Saturday, November 15, 2008

34 - الاستقلال المادى هو الحل!!

فاكرين فيلم امبراطورية ميم لما فاتن حمامة كانت شايفة ان تحملها لتكاليف مشروع مكتبة البيت سبب منطقى و ذريعة لحقها فى انها تشرف على اختيار الكتب؟

اهه ده بقى اساس شكل العلاقة بين الست و الراجل فى احيان كتيرة اوى. مهما كانت الامور سلسة و الناس نفسها صافية. الممول ( اب .. زوج .. اخ كبير حتى) دايما بيبقاله حق التدخل و التحقق و الاشراف و طبعا الموافقة من عدمها. و بيفضل موجود بينهم نزناز " المقابل" ده اللى بيبوظ الدنيا.
و الموضوع فى جزء كبير منه نفسى على فكرة..يعنى اما انسان يحس ان فى حد متحكم فى مصاريفه بالكامل اكيد هايحس قدامه بالضعف او بالدونية
ده على الرغم من اننا فى مجتمع بيعتبر ده هو الشكل الاساسى للعلاقة اصلا... بس اللى بيعتبروه برضه اساسى هو تدخل الراجل بصفة الوصاية فى كل خطوة الست بتعملها.. و ده بيربى الستات على انهم توابع غير انه بيفقدهم اى ملكات خاصة باتخاذ القرارات او تحمل اى مسئولية
انا مش هاقول الدنيا وحشة و مش هاردد احتملات الترمل و الطلاق و اليتم – رغم انها مش مستحيلات – بس انا بس عايزة افهم ازاى تكون بتاخد فلوس عشان تصرفها ماتتسألش "هاتعملى بيهم ايه؟" و كم حالة بيكون الرد " اللى انا عايزاه"؟؟
اللى بيحصل هو "تحجيم الاختيار" و وضع "سقف للتفكير" و كمان بيبتر اى ظواهر اختلاف او تميز ممكن تكون موجودة. كم واحدة تقدر فعلا تشتغل اللى هى عايزاه و تحلم بحرية حقيقة او حتى تمارس هواية بتحتبها.. دى عشان تروح كورس انجليزى ولا كمبيوتر هو اللى بيدفعلها تمنه ووارد جدا يقولها " هاتعملى بيه ايه يعنى؟" او " اجليه شوية" او " انا مش شايف انك محتاجاه"
هانفضل طول عمرنا عشان نعمل حاجة يبقى فى حد بيصرف علينا و بالتالى من حقه يوافق او يرفض؟؟
انا مش مادية .. و لا عايزة الستات يتوحشوا . الست اللى عايزة تختار لنفسها مش قليلة الادب و لا عايزة "تدور على حل شعرها" . و مش كبس النفس هو الحل لمنع الخطأ الانسانى اللى من الاساس طبيعة بشرية.
انا بس شايفة ان لو كل ست تخلصت من احساس انها محتاجة جوزها عشان تاكل و تشرب و يبقى جواها اطمئنان داخلى انها لو عايزة تعمل حاجة بجد ممكن تعملها .. العلاقة هاتبقى اجمل و اصفى .. و الراجل هايبقى متأكد انها معاه باختيارها مش احتيجا ليه.. و حتى الصرف وقتها هايكوعن حب مش تمن شراء التحكم

9 comments:

Anonymous said...

كلها قيم بدوية نجسة استوردتوها من السعودية ده اذا ماكنتوش انتم اصلا سعوديين غزاة جيتوا على مصر زى الوبا

لما هي قيم مش لاعاجباكوا اوى كده استوردتوها ليه؟

Unknown said...

انت باتخاطب مين
انا مافهمتش؟

Anonymous said...

بخاطب الشعب

Unknown said...

الحمد لله
لو انا فهمت قصدك صح .. تأثر المجتمع المصرى بالشكل القبلى بقى فعلا غريب
مفاهيم العيلة اللى مافيهاش اى علاقة باى مودة او رحمة بقيت فعلا منتشرة

كل واحد دلوقتى فاكر نفسه من سلالة العيلة المالكة

77Math. said...

الأفكار دي ليست سعودية الجنسية، لسة النهاردة كنت في جلسة أصدقاء رائعة وكنا نتحدث عن هذا الأمر ..

للأسف الشباب الناضج قلّة جدًا جدًا من الجنسين ..

وهذه القيم .. قيم راسخة منذ الأزل، لن تجدي عكسها إلا في الأشخاص المنفتحين فعلا ..

كم من امرأة لا تطيق زوجها ولا تريد الطلاق لأنها لا يصح لها أن تكون " مطلقة" ؟ أو لأنها "حصرف منين؟"

باختصار لافضّ فوك يا فتاة

Unknown said...

يعنى خلاص مفيش فايدة؟؟

77Math. said...

تؤ

انسانة واقعيه said...

فعلا الاستقلال المادى هو الحل

فعلا بيديهم سيطرة وتحكم كبير علينا

لان من الاخر مش بيبقى بايدينا شىء نعملة..وحتى لو اعتراضنا اعتراضتنا بيضرب بيها عرض الحائط وطولة كمان

بس يارب حتى لو سعينا للاستقلال المادى نلاقية...خلاص مبقاش فية شغل

تسلم ايدك ايمان

Unknown said...

من اختيارك لاسمك انا واثقة ان ان شاء الله هاتعرفى تعملى اللى نفسك فيه كله لنفسك
الطموح بيجيب احلام و الاحلام بتخلينا نجرب مرة و اتنين و عشرين و ربنا بيسهل و بنوصل للى فيه خير لينا

اهلا بيكى يا طموحة