Thursday, November 20, 2008

35 - الرجال .. و الاحجام ....... و اشياء اخرى

هاقولكوا على شوية مشاهدات كده فى عالم الرجال :

1 اما تلاقى العربية كبيرة .. و الموبايل كبير .. و الولاعة كبيرة .. و المفاتيح موضوع .. و اللاب توب مش عارف ماله , هنا فى سؤال كبير جدا بيطرح نفسه صراحة!!! يعنى هو كل الحاجات الكبيرة دى اكيد تعويض عن حاجة صغيرة
ممكن الثقة الشخصية
ممكن الشغلانة
ممكن قيمة الانسان قدام نفسه
ممكن حاجات كتير

2 - اما تلاقى الراجل عبارة عن انتفاخات من كل ناحية مفترض انها عضلات و تلاقيه لابس التي شيرت صغيرة هاتفرقع من عليه .. و كل حركاته تعتمد على ابراز البلالين اللى فى جسمه دى .. ييجى يربع تحس ان دراعه هايفرقع فى وشك
برضه الواحد لازم يسأل .... يا ترى كل البقاليل دى بتعوض ايه؟؟؟
طول عمرى باحس الراجل اللى بارز عضلاته و نافخهم كده زى اللى لابسة بادى ضيق و" مصدرلنا " الدنيا فى وشنا كده

3 - الراجل اللى مش طويل او طويل بس رفيع اوى تلاقيه عنده مأساة فى الثقة بالنفس الا لو فعلا بنى آدم محترم و واثق فى نفسه
- بتلاقيهم ماشيين نافشين صدرهم كده .. و كأنهم بيقولوا للحياة "انا مش قليل و هفية .. ده انا راجل اوى"
بس ياعينى بتيجى معاهم بالعكس .. بيبقى شكلهم كاريكتيرى اوى
- بيمشى كده دراعاته واخدة شكل القوس حوالين جسمه عشان تدى ايحاء كاذب بالحجم.. و الصدر لقدام .. و الرجلين علاطول مخاصمين بعض.. و تلاقيه موته و سمه البنت الطويلة
يعنى ممكن يفتعل مشكلة عشان تبطل تقف جنبه و تتكلم معاه
- و لازم لازمة كده فى احيان كتيرة .. حركة بالكتف .. نحنحة كل شوية .. رفعة دقن كده على الماشى
- و على فكرة .. دول- فى حالات كتير - بيبقوا ازواج متعبين جدا لان خازوق انه يكون "راجل مركوب" عامل نزناز فى دماغه لانه حاسس جوا نفسه ان قلة حجمه هاتكون سبب لده ( اكيد مستهيفاه )

4 - الصور!!!
الرجالة بقى بتتفضح فى الصور
لو واثق فى نفسه و متسامح مع الحياة بيبان
و لو عنده مشاكل فى الموضوع ده بيبان .. مش بتتدارى .. الضحكة بتبقى صفرة كده و باين فيها الغلب اللى جوا الوحش الوهمى ده
ممكن كمان تلاقى الجسم مفرود بزيادة و الدقن مرفوعة عشان توحى بالطول ... عشان برضه تعوض مشكلة الحجم
* حتى الغرور بيبان ... و بيبان قد ايه البنى آدم جبروته فقاعة ممكن اى حد يخفيها بصباعه

5 - القعدة:
_ فى رجالة تلاقيها قاعدة رجليها واخدة زاوية 170 درجة زى ما يكونوا بياخدوا الحياة بالحضن .. بس برجليهم
مش ممكن!!! اصل يعنى مش للدرجة دى يعنى!! دول ممكن يعدوا فى المواصلات واخدين كرسيين بسبب القعدة دى!!
حاجة صعبة يعنى ... عرفنا يا عم ... نسقف يعنى؟؟؟

- فى ساعات رجالة يقعدوا ضهرهم مقوس و ايديهم مضمومة على جسمهم زى ما يكونوا مداريين نفسهم
فى قاعدة بتقول انك اما تدارى حاجة .. الناس هاتبقى هاتتجنن و تشوفها و غالبا يتشوفها
يعنى لو متدايق انه اصلع , تلاقيه كل شوية يغطى راسه باديه مثلا



13 comments:

TAFATEFO said...

طب والتخان؟
:D:D

Anonymous said...

لا دا تنظير ف موضوع مينفعش فيه تنظير خالص

Eman Hashim said...

مالهم التخان؟؟
مش فاهمة التعليق التانى صراحة

AyA said...

ههههههههههههههههههههه

فكرتيني بموقف فظيييييييييع,
في احدى جلسات البنات بس -من اللي قلبك يحبها برضه- كانت بنت بتتكلم عن واحد معجبة بيه, فواحدة سألتها ايه اللي عاجبك فيه؟ فقالتلها راقي اوي في كلامه, مابيقلش أي الفاظ شتيمة مهما كان الموقف, بيغضب بعقل ومابيستخدمش ايده وهو بيهزرمع اصحابه الاولاد, وصوته مش تخين حتى وهو بينادي حد من بعيد بصوت عالي, ولما يكون غلط في حاجة او ضايق حد من غير ما يقصد بيعتذر وبيبقى وشه أحمر شوية صغنططين بس بيبقى شكله جميل اوي, وجسمه مش ضخم ومابيمشيش زي التريلات فارد دراعه ومعتني بشكله وبوشه (تقصد ذقنه طبعا عشان ميروحش دماغك لبعيد) و..... قامت اللي سألتها قالتلها انتي متأكده انك معجبة بولد؟

طبعا ساعتها انا قعدت أضحك بتاع ربع ساعة مثلا :)......
يعني تناقض كبير بين وجهة نظر البنت ووجهة نظر باقية اللي قاعدين عن الرجل... ناس كتير فاهمين الرجولة غلط انها بالصوت التخين المزعج والهزار بالايد والفوضى في كل حاجة ....

Eman Hashim said...

ماهو عشان الرجالة كمان متعرضين لضغط " اثبات كامل رجولتهم للمجتمع" مش ممكن!! مش منطقى ان كل ما البنى آدم يكون كائن بغسض , يكون راجل

و اللى بقى بيتخلصوا من دى بيبقوا حاجة مالهاش حل
راجل كده من جواه مش مستنى شهادات الجودة
و هو ده المطلوب
هههههههه
اول مالاقى منه هابقى اشوف بقى اعمل ايه
هههههههههه

AyA said...

هتعملي ايه ها ايه ايه؟
ههههههههههههههههههه



وغلاوتك عندي لو اتوجد ما هتلحقي تلمحيه حتى :)

هيتخطف خطف
>_>

Eman Hashim said...

خلاص خليكى جنبى فى كورنر الحقودات
ههههههههههه
انتى يا بنتى فين تليفونك
مش بعتلك ميل انى عايزاه ضرورى؟

AyA said...

عاااااااااااااا
وانا كل ده مستنية :D :D
اتاري الرسالة موصلتش اساسا :) :)
انا هبعتلك رقمي تاني دلوقتي على الايميل عشان أضمن من اتصالات الغبية
:@ :@

Eman Hashim said...

ماشى يا ستى
انا كده معايا
هاكلمك يا لوزة
;)

matrix said...

بصراحة انتى عندك مرض اسمة عدوة الرجالة طيب ما فى ستات عملين مناظر تخلى الواحد يكرة نفسة من الامنظرة وقلة الادب عيب احترمى نفسك وكلامك كدة مش حلو على شانك

Eman Hashim said...

ماهو انت لو بتقرا فعلا و عايز تعرف انا باتكلم فى ايه ... كنت شوفت ان اغلب كلامى اصلا عن البنات و للبنات

انما انت مش جاى هنا لكده

انت جاى - كتر خيرك تعالجنى - و عشان كده بقى عملتلى اضافة على الماسينجر

على سبيل العلاج طبعا

Anonymous said...

إنتي بتحكمي على الرجالة من منظرهم ؟؟! ... طيب نفرض إن لاسمح الله كان فيه راجل طويل و قوي البنيان بس راجل طيب و مفيش في دماغه أي أفكار معقدة عن إنه يداري حاجة ولا يبرز حاجة, مش بياخد باله هو قاعد عامل إزاي و لا بيقيس زاوية إنفراج رجليه إللي هي 170 درجة علشان الدنيا حر مثلاً و مش في دماغة إن الدكتورة إيمان قاعدة و مطلعة المازورة و المنقلة و نازلة قياس في عيوب أهله .... يبقى ده إيه ؟؟؟. ... أكيد مخلوق خرافي -طبقا لنظريتك-, طيب بلاش.... نفرض إن ربنا خلق واحد ضخم الجثة عريض المنكبين شلولخ بس الشلولخ ده نفسة حاسس من جواه إن ضخامة جسمة ممكن تأزي شعور حد تاني قصير و نحيف -من الناس دول إللي بيفكرو إن الشكل و الحجم مهم- فيقوم هذا الشلولخ يحاول يداري ضخامة جسمه بأي شكل... ده طبعا طبقا لنظريتك شئ لا يصدقه عقل... أعتقد إن الأحسن إنك تتعبي نفسك شوية و تخاطبي العقول أحسن من الإستسهال و الحكم على الناس من المظهر الخارجي ... لاحظي إن كل كلامك إستنتاجات غير منهجية بالمرة و كأنها غلطة الراجل إللي عنده مظهر رجالي كلاسيكي قوي... حتى لو مش مخطئ في حاجة يبقى برضه غلطان... وجهة نظرك غير مقبولة عقلياً.

Eman Hashim said...

سلام عليكم الاول

اولا كده انا مش بحكم على حد جالة او ستات, مش عشان اى حاجة غير انه مش من حقى

ثانيا مفيش نظريات ولا حاجة
الموضوع ابسط من كده

ثالثا فعلا مش عارفة ليه اخدت الكلام بكل الجدية دى, مع انه واضح جدا من الكلام و الاسلوب و حتى التعليقات هنا انه هزار فى هزار

الحكاية حقيقى ابسط من كده اوى, ماتاخدهاش على قلبك كده

و عموما يا سيدى حقك عليا ما تزعلش

خامسا بقى و اهم حاجة, مش كنت تقولى اسمك طيب؟ ولا حلو يعنى انك تكلمنى و انت مجهول الهوية كده؟ انت حر طبعا بس بتدى انطباع مش لطيف شوية

سلام