Saturday, November 8, 2008

32 - الحياة ... خللى العفريتة تتفرج

كنت قاعدة باتفرج على التليفزيون و لقيت اعلان لقناة تليفزيونية نصه الآتى:

يبدأ بالبطل بيعرفنا بنفسه ب "حسن رمز الرجولة" .. طول عمره فى الجامعة "راجل" ... و تليفون البيت ده محدش يجرأ يرد عليه غيره .. يرن التليفون ... ليسة هايمد ايده للتليفون ييجى كائن عجيب الشكل ... و تنزل بالساطور على التليفون تقسم الترابيزة نصين و هى بتزعق "حسن !!" و هو بقمة الاستكانة و الصوت الواطى " حاضر .. حاضر" ...

المشهد التانى .. الزوجة بتتفرج على المسلسل و بتمص قصب بطريقة مقرفة و بصوت يصحى الميتين و هى لابسة جلبية الخدامين و شكلها بجد منفر... الزوج بس حب يمسك الريموت هى قامت مجعرة فيه "حسن!!" و هو "حاضر .. حاضر" ز بعدين تقوم تجيب حاجة فهو يستغل الفرصة و يطلع ريموت من جيبه زيادة زى الحرامى فهى تجعر من مكانها "حسن!!" و هو يرمى الريموت و يكرر "حاضر ..حاضر"

و ينزل الكلام : الحياة ... سيب المدام تتفرج

الدروس المستفادة من الاعلان ده:

1 – الرجولة هى ان الراجل يكون الوحيد اللى ماسك الريموت و الوحيد اللى بيرد على التليفون

2 – الست اللى عايزة الحق "الرجالى" ده ست معفنة و مقرفة و غالبا ريحيتها وحشة

3 – الراجل اللى يسيب المدام تتفرج هو ابو صوت مش مسموع المستكين

4 – الراجل اللى مش راجل ده هو اللى بيقول لمراته "حاضر .. حاضر"

لأ و النعم!! هى دى المفاهيم اللى فعلا نحب برنى عليها مشاريع الستات و الرجالة

11 comments:

An Egyptian said...

الصراحة ياقطة انتى اللى غلطانة تشوفي محطة تشر و تهر تخلف زى الحياة دى

بجد انا ماشفتش برنامج عدل فى المحطة دى

goodman said...

المعنى واضح طبعا
الست المحترمة لازم تكون بسكويتة رقيقة تتفتت من اقل كلمة
لكن المهم هل الاعلان ينادى يذلك
ام فقط يؤكده؟

Eman Hashim said...

An Egyptian:
عندك حق والله .. بس بلاش قطة دى احسن بعدين اخربش
هههههههه

goodman:
بالضبط كده .. احنا اعلامنا ليسة اسير فلكلور ان الست القوية كائن متوحش
انا معاك ان المعنى مش جديد فى مضمونه .. بس اما تلاقى مادى اعلانية تستخدمه و كمان تنكت بيه اكيد المسئولية كبيرة عليهم

An Egyptian said...

سوري كنت فاكر اني على بلوج قطة الصحرا

Hani Michel said...

انا شوفت البرومو ده و استفزنى فعلا
هو و اعلان المصريه للاتصالات اللى راجل كان قاعد فيه مع مراته على السرير و وجه يتكلم فى الموبايل، مراته شخطت فيه و خلته يتكلم ارضى يا ابن بلدى
سلوك الزوجه المفتريه فى الدعايه فى رأيى موجه للزوجه و ليس للزوج، بعض النسوه يؤثر فيهن هذه الاعلانات، لأن المرأه فيه تفعل ما تريد فى زوجها، و المشاهده تتمنى أن تكون مثلها، بنفس منطق اعجاب كثير من النساء بأفلام ناديه الجندى و نبيله عبيد فى التسعينات، لأنهما يحققان رغبتهن فى تحقيق النجاح و الاستقلاليه و السيطره و القياده المسلوبين منهما فى الحياه.. و ربما ايضا الرغبه بالانتقام من الظالم و لو للحظات على الشاشه

77Math. said...

والإعلان عن القصب بقى ؟

Eman Hashim said...

لا انا اصلا مازعلتش يا
egyptian

Hany:
زى كده الناس اما بتشجع الحرامى فى الفيلم عشان هو البطل الامور؟؟
لأ..انا مش معاك فى التشبيه

ماعرفش الاعلان ده يا 77

انسانة طموحة said...

ههههههههه الحقيقة بجد تعبيراتك دمها خفيف اوى ..بس للاسف فعلا دلوقتى كل اللى بيعمل اعلان مش بيهمة الفكرة اللى توصل من وراة

بيهمة بس انة يسيب علامة مع الناس زي محصل بالظبط كدة

ومش مهم بقى العلامة دة عاهة مستديمة ولا شىء ايجابى ههههه
المهم انه لفت نظرنا الاعلان واتكلمنا عنة واللى مشفوش دلوقتى عايز يشوفة
دة فكرتهم اللى غالبا بينجحوا فيها
وطبعا لو على فكرة الاعلان ذاتة طبعا دة تهريج ههههه من امتى حتى البنت ولا الست ليها التحكم فالريموت كنترول بامارة الماتشات اللى 24 ساعة ولا قنوات الاخبار اللى مش بتتقفل هههه
وهوة عموما موضوع مش مشكلة يعتبر يعنى جت ع الريموت ههههه انما فعلا عندك حق بترسخ مبادىء خاطئة

تسلم ايدك ايمان

Eman Hashim said...

ماهو دى مفروض من وظايف الاعلام و القائمين عليه يا طموحة
ولا ايه؟

انسانة طموحة said...

ماهو دى مفروض من وظايف الاعلام و القائمين عليه يا طموحة
ولا ايه؟


قائمين ؟؟؟ مين دول؟؟؟؟؟

موجود منهم فمصر دول هههههه

اول مرة اسمع منك والل ان بقى فبلدنا قائمين

اللى اعرفة وبشوفه النايمين ودول مراميين فكل حتة ههههههه انما قائمين ولا عمرى شفت اكيد فبلد تانية ودة دسيسة (هوة يعنى اية دسيسة ؟) احم يلا مش مهم ههههه

المهم يا مونى احنا دلوقتى بقينا فى عصر القنوااااات المفتوحة والسموااااات المفتوحة والبديهاااااات احم مشيها المقفولة ههههه احنا بقينا فعصر الانفتاااااااح يا بنتى مالك

العالم بقى قرية صغيرة خلاص وشوية كدة زى مقال البشمهندس محمد هنيدى فى مشروع التطوير اللى طرحة فى مؤتمر حزمنى ياااا (انا مالى هوة اللى اسمة كدة )

قال خلاص هيهدوا كل البيوت وكلنا هنعيش فبيت واااااااحد مصر كلها تدخل الحمام فوقت واحد وواحد بس اللى يشد اسمة اية دة احم مش مهم هههههه

احنا بقينا منفتحين خلاص وعدم وجود رقابة بقى قمة التحضر والرقى

كل شىء دلوقتى بينفتح .. حتى الناس الجهلة الشعبيين برضة بقوا متفتحين
والرؤؤس عندهم بقت بتنفتح دلوقتى (بس فى الخناقات )

المهم يا مونى مش عارفة ارد عليكى بشكل جدى لان الموضوع دة محدش واخدة بشكل جدى من صغيرها لكبيرها

وربنا يرحمنا برحمتة

وكل عام وانتم بخير هههه

وتسلمى لردك

Eman Hashim said...

فعلا عندك حق
محدش واخد موضوع الاعلام ده بجد خالص
مع انه بيأثر تأثير منيل
انتى عارفة حجم المغالطات الاجتماعية و التاريخية و القانونية و الانسانية اللى موجودة عندنا فى اعلامنا قد ايه؟