Sunday, March 30, 2008

19 - الوكالة ... مش بتاعت البلح

هى ليه الست فى مصر بتوكل راجل تانى فى جوازها؟
ليه انا ماجوزش نفسى؟
ليه ابويا يسلمنى لجوزى؟
ليه راجل يسلمنى لراجل تانى؟
انا اجوز نفسى .. انا انطق بالعهود .. انا اسمع الوعود
اتعهد له و يتعهد لى ..وجها لوجه
انا ليه احتاج انوب حد؟؟



انا بدعى كل البنات تفكر فى السؤال
انا بدعى كل الرجالة انهم يفكروا و بس

Thursday, March 27, 2008

18 - بيت العز الدين الحسينى يا بيتنا

فى أوقات كتيرة, مناقشة اى مشكلة اجتماعية بيرجع فيها الخبراء ( اللى هما مجموعة من الناس الوهمية اللى لما حد يبقى عايز يفحمك فى الكلام و ماتراجعهوش يقولك الخبرا قالوا كده .. او انا اعرف واحدحكالى...) بيجمع الخبراء ههههههه ان اساس اى مشكلة اجتماعية فى أغلب الاحيان ان ماكانش كلها للتربية.

و فى رأيى الشخصى بغض النظر عن رأى الخيراء ان فعلا فى مشكلة واضحة فى تربية المصريين من جيلى.

يمكن اغلبنا هيتفق معايا كليا او جزئيا ان فى سمة غالبة على شباب هذا الجيل و هى فقدان الاحساس بالمسئولية و الاعتماد الكامل على الاهل , مش بس اعتماد مادى لكن

emotional dependence

هو درجة من اعنف درجات التعلق بشخص لان هنا بيكون الاتزان النفسى مرهون بهذا الشخص و ده نوع مرضى من الحب الانسانى. هنا بمنتهى السلاسة بتتسلت من الانسان كل قدراته الابداعية و رغباته الفريدة اللى كل بنى آدم بيتخص بيها عن غيره الا لو كانت هذى الاشياء من النوع المسموح بيه و الحاصل على مباركة الاهل .. فاذا لم يحدث بيكون الناتج هو الآتى:

* يا اما شخص تابع فقد كل احساس بذاته و تلاقيه بيفرغ كل طاقاته و رغباته فى الاحساس بنفسه على الاشخاص الاقل منه فى حياته زى اللى تحتيه فى الشغل او افراد الاسرة الصغيرة.
* يا اما انسان ضايع .. وده النوع اللى بيبقى اذكى من انه ينصاع بالكامل لكن اجبن من انه يعلن الرفض او انه بالفعل يستقل بذاته "نفسيا" . دول بنلاقيهم فى خلاف دائم مع اهاليهم سواء بالصوت العالى و الخناق و الزعيق كل شوية .. يا اما النوع الصامت اللى بيكتفى باختذال كل الانفعالات بالداخل و يكتفى بأسلم اشكال التعبير ان عبر فى الاصل.

و ده كله ناتج من شكل تربية اصبح

trend

شكل اتفق عليه جميع اجميع ( اهالى و ابناء ) , اعتبر الستقلالية جريمة و التبعية اصل .

الرغبة الملحة و المميتة و المفهومة فى الحماية و الرعاية ساعات بتكون السبب فى ان اهالى كتيرة بينسوا ان ولادهم دول فى يوم من الايام حايشيلوا لوحدهم.

وساعات تانية بتبقى أنانية من الاهل فى رغبتهم فى الابقاء على ولادهم تحت عينيهم لان استقلال ولادهم عنهم بيكون نذير و مؤشر لانتهاء حياتهم .

احنا كتير أوى ممكن نلاقى ناس فعلا مش بياخدوا اى قرار فى حياتهم من غير ما يكون اهاليهم معاهم فى كل خطوة اتاخدت عشان القرار ده يطلع للحياة.
المشورة حاجة ( خصوصا من ناس الواحد حيفضل طول عمره متأكد انهم بيحبوه ) و ان شحط مخلف و فاتح بيت او على الاقل فى سن يسمحله بده يرجع لأهله الاول قبل ما يسيب شغله حاجة تانية خالص .. لأ وايه , تلاقيه موقف الموضوع لحد اما اهله يقتنعوا رغم ان كل حاجة ماشية . اما ده فى الشغل تخيلوا بقى فى الجواز.. كمية الجوازات اللى بتبوظ عشان الاهل مش موافقين و مش بس بنات لأ و رجالة كمان.

كل ده تانج من حاجات كتيرفوق بعضها ... زى مثلا الغلا اللى اجبر ناس كتيرة انها تعتمد على اهاليها فى تحمل تكاليفها مدة اطول من اللازم.

ده اعطى للاهل ذريعة (عشان خاطر بيلا ) فى التحكم و السيطرة و سبب نوع من " كسرة العين " و عدم التجرأ على المجاهرة بالرفض او الاختلاف من الابناء . .. واللى بعد فترة بينقلب الى اعتماد كامل فى اتخاذ القرارات اللى طبعا بيلاقى ترحاب و عدم مقاومة من الاهل فى احيان كتيرة.

بالاضافة الى شريحة من السيدات اللى حياتهم مع اول طفل بتتمركز على اطفالها, بتخلى اى درجة من درجات الاستقلال هو اعلان بفراغ حياتها .. و دول اللى بنلاقيهم مسببين مشاكل لولادهم بعد جوازهم بسبب تدخلهم الغير مبرر فى حياتهم سواء ده قابل مقاومة او لأ .

النوع ده بيجيب يا اما امعات ممحيين تماما يا اما ناس عايشة حرب ضروس عشان يعملوا اى حاجة

كمان الخوف الانسانى الطبيعى من الحياة .. و الرغبة فيها فى نفس الوقت , كلنا نفسنا ييجى يوم ما نحتارش فيه , و لو اتحطينا قدام اى موقف نعرف بالضبط ايه الصح .. يا سلام لو ماكانتش المعرفة و الخبرة لازملها تجربة و عك و تلطيش و اخطاء و اتمان اخطاء... فى الحالة دى , الاهل بيشيلوا عبىء كبير او على الاقل اغلبه.

" هاخش الكلية دى رغم اننى مش عايزها عشان خاطر اهلى ( لو سألته طب عايز ايه يقولك ماعرفش بس عارف انى مش عايز دى ) عشان كل اما ما تعجبوش حاجة يلوم اهله داخليا مش نفسه على اى تقصير و اما يتعثر فيها يبقى الله يسامحهم اهلى غصبونى عليها , انا ماكانش ليا فيها الكلية دى .. و برضه اما ما يلاقيش شغل يحصل نفس الشىء ."

" هاشتغل مع بابا فى المجال ده رغم انه مش عاجبنى بس اعمل ايع ماقدرش اخيب امله فيا .. و كل شوية عياط على الشغلانة المهببة و المجال الممل اللى بكرهه و برضه بنفس الطريقة .. مفيش شجاعة كافية انه يدور على شغل زى بقية الناس و احتمال يلاقى و احتمال لأ و ممكن يلاقى شغل وحش و يسيبه و هكذا"

" هاقبل الخطوبة دى و خلاص .. طب انتى ايه رأيك فيه؟ .. عادى يعنى , لانا موافقة ولا انا مش موافقة و طبعا فى كل خناقة ( مش انتوا اللى قولتوا عليه كويس .. مش انتوا اللى طلعتوا بيه )

هنا فى للاسف قيمة مفقودة تماما و هى "تحديد المواقف من الاشياء" حتى فى حالة عدم الارتياح هتلاقيها مستنية الموقف ده من اهلها الاول بعدين هى تعلنه
كل ده له اسباب كتيرة



أولا :

لاننا ماتعودناش نعمل حاجات اهالينا مش مرحبين بيها بس و هم عارفين و تطلع غلط و نتعلم منها او تطلع اوكى و نكملها.
طبعا بحدود الدراية الكاملة بأبعاد المخاطرة و طبعا بتختلف كل حالة عن التانية, فى شروط كتيرة زى السن و الشخصية و النضج , يعنى مش مطلقة .. بس عادة بكل اسف ارتبط اللى الاهل مش عارفينه بالسرقة .. والسرقة غلط و بالتالى مصحوبة بمشاعر زى الذنب و الجبن و انتظار العقاب

و هنا بتتجلى اهمية التمرينات .. الاهل المفروض بيتمرنوا على ترك مساحة لأطفالهم بتزيد مع السن لحد اما بيصلوا للمرحلة اللى يقدروا فيها يتولوا حياتهم بشكل معقول , زى تعليم العوم و ركوب العجل... الاول كل خطوة بتكون و هما ماسكيننا بعدين و هما معانا و ايديهم محاوطانا عشان اول ما نميل يلحقونا بعدين لوحدينا و هما بيتفرجوا من بعيد بس و احنا لابسين سترة نجاة او فى عجلات جانبية .. و كده .. لحد اما ييجى يوم نعرف نعملها عادى عشان اليوم اللى بعديه هانعلمها لولادنا .

و احنا كمان مفروض نكون اشجع , ايه يعنى اما نغلط .. مش موال يعنى .. حتى ده بيخلينا بعد كده مانكابرش على طلب المشورة من الاهل .

ثانيا:

لان لو طلع الاختيار ده مش مضبوط هنسمع افتتاحية السيمفونية الخامسة ليبيتهوفن من الاهل

تاتاتاتااااااا

ما قلتلك .. ما هو دى اخرة عدم سمع الكلام .. ياكشى بس تتعلم .. و ليسة, اللى من دماغها دى ليسة هتاخد فوق دماغها .. يعنى هو انا غاوية اقولك لأ .. ادى نتيجة اللى يعادى اهله

و بالتالى يرتبط الخطأ بكل ما هو ضد الاهل.. و تبدأ تفسيرات جديدة تظهر لأى خطوة مباركة من الاهل لم توفق , يتحول بيها الانسان لضحية لانه فى نظره ما عمالش اى حاجة غلط . و بالتالى هو مش مستنى اى حاجة غير التوفيق.. و بالتالى تظهر بقى الكلمات اللى ترفع الضغط ك
انا نحس .. الفقرى فقرى .. اصل انا الناس باصينلى فى كل حاجة امشى فيها .. لو بس الناس يسيبونى فى حالى


ثالثا:
فى احيان كتيرة الاهل بيتحملوا نفقات اى اختيار و ده ولد عند الطرفين اعتقاد ان ده لوحده ممكن يكون حق للاهل بشرط الموافقة على كل خطوة بيعملوها ولادهم (بس يمكن هنا برضه بيبقى غريب شوية اننا نعمم انه لازم بالعافية اجبار عليهم يدفعوا فلوس فى حاجة هما رافضينها خصوصا اما نكون بنتكلم عن ناس كبيرة مش مراهقين)
عشان كده الاستقلالية مرتبطة بالاستقلال المادى و ده برضه سبب بوظان علاقات اسرية كتير لما الاولاد بيحصلوا على الاستقلال المادى و ده برضه سبب ان اهالى كتير بيربطوا ولادهم معاهم فى اعمالهم عشان يحكموا القبضة عليهم ( هو الكلام يبدو قمة الشر رغم انه فى اساسه عميق الحب)


رابعا :

التأثر بمجتمع القبيلة و ده لوحد موضوع بعدين. و هو المجتمع اللى بتتأصل فيه مفاهيم التبعية و القطيع و بيتفاخر اصحابها بيها لكن بتسميات تانية و هى الاصل العريق و الاسم و العلية . و فيه شىء من التباهى ان الابناء امتداد لأهاليهم و ده يمكن يبقى مفهوم ( مع كامل تحفظى ) فى العائلات المالكة و الحاكمة .. لكن ان عائلة من 20 او حتى 200 فرض عايشين دور نسل مينا موحد القطرين و هما 200 فرض غير معلمومين غير لبعض اصلا دى حاجة الى حد ما مثيرة للتسائل .

خامسا:

الموروث الفرعونى الاصيل - على رأى الصحفى حاتم الشرقاوى- فى رغبة كل المصريين فى "البناء" ... كل واحد فيهم حلم حياته اللى بيحوشله بعد تربية عياله هو انه يبنى و يعيشهم بولادهم فى البيت ده.
تحس ان كل واحد بيشتغل عشان يحوش عشان الاول يتجوز بعدين يخلف و يعلم عياله و بعدين يبنى "الهرم" !!
و طبعا هنا بتتأصل ذكورية المفاهيم دى لما بنلاقى ان التبعية هنا مطلوبة من الرجالة مش الستات , اللى المفروض رايحين (ماطرح ماجوازهم رايحين ), و اللى بكل بساطة بتنسلخ من عيليتها لتكون جزء من كيان آخر بحكم ا انها ست فهى كائن شرط اكتماله و تحديد هويته فى الاساس مرهون بوجود الراجل .. و طبعا دول من اوائل المجتمعات اللى بتفضل خلفة الرجالة و اللى بيطلعوا ستات نكرات يا اما متحفزات .. امال هانحافظ على اسم عيلة زيفت ازاى .. تدور ايه وجه الانجاز فى الكائن ده ماتلاقيش و مع ذلك تلاقيه مصدق نفسه اوى و هو بيقولك اسم العيلة.

مسلسل الوتد اللى اسر مصرية كتير بتبصله على انه حلم ليلة صيف

أنا مش باقول مانعرفش اهالينا لانى انا نفسى ماقدرش على ده .. ولا باقول نعمل اللى احنا عايزينه كل يوم علاطول حتى لو ضد رغيتهم لانى بكده يبقى بناقض نفسى ... انا ضد الاتكال على الاهل و ضد الانانية منهم .. انت عيشت حياتك زى ما ربنا رايدهالك .. اخترت فيها القدر اللى كان متاحلك .. شفت و اتعلمت على قد ما قدرت .. حق ولادك هما كمان يعملوا ده .. هما اشخاص اخرين .. شخثص تانى بدماغ تانية و احلام اتانية و دنيا تانية خالص


Saturday, March 15, 2008

17 - مفهوم الفشل

يا ساتر يا رب ... هى طالباها غم انتى كمان؟ الصبر

فاكرين اما قلتلكوا انى شايفة اللى مبوظ حاجات كتيرة فى حياتنا هو تخريب المفاهيم؟ اهه الفشل من المفاهيم دى .

الانسان فى رحلته القصيرة مهما طالت بيقضيها فى تجميع و لملمة .. تجميع حسنات .. خطوات .. علاقات .. نجاحات و اخفاقات ... خبرات و آمال و اختيارات

كلنا فى مرحلة عمرية معينة (لازم) الدنيا بتكون عرفتنا يعنى ايه نعوز حاجة و مانلاقيهاش ... بس الغريب هو ان ده لامر غير مفهوم بالنسبة لى ارتبط بالفشل.

توماس اديسون ليه حكاية مشهورة بتاعت عدد محاولاته الغير ناجحة لحد اما وصل للى هو عايزه ... هانرجعلها تانى الحكاية دى

ايه هو الفشل؟
الفشل انك اما تكرر التجربة بنفس الظروف و نفس المعطيات تغلط نفس الغلطات فى نفس الخطوات كل مرة تجرب التجربة

لكن ... اما تبقى كل مرة بتتفادى الغلطة اللى فاتت و تتكعبل فى غلطات تانية يبقى انت كائن مجرب و متعلم مش فاشل ابدا!

الفاشل الحقيقى هو اللى خوفه من عدم النجاح من اول مرة بيقضى على روح القتال و المخاطرة عنده و تحصره فى تجارب مستهلكة فاقدة القيمة لمجرد انه ضامن انه لو مشى فى التجربة دى على نفس خط سير اللى قبليه فهو هيوصل للنتيجة المقبولة اللى هم وصلولها .
و عشان كده احنا مش بنقبل تكرار عدم التوفيق و بنسميه فشل .
اغلبنا بيفكر انه الطبيعى و المنطقى ان اول علاقة جادة تجمع الانسان مع انسان اخر لازم ( طالما هما الاتنين محترمين و مؤدبين ) تنتهى بالجواز.
بنبص لعدم نجاح اى علاقة كعار مهما كانت المرحلة اللى بتخلص فيها
الفركشة سبة
الفسخ مصيبة
الطلاق كارثة

و بالتالى كل و اى علاقة بعد العلاقة الاولى بيبتدى العداد يتكتك ... تلاقى البنت اللى فسخت خطوبة او اكتر مذعورة هى و اهلها و فى دى يمكن الرجال فيها بيعانوا زى البنات. اى واحدة فينا هايجيلها عريس كان خاطب قبل كده مرتين مثلا هتفكر الف مرة قبل الموافقة انها تشوفه .. فما بالك بقى لو شخص سبقله الجواز؟؟؟!!!

انا مش بعمل دعوة لتعدد العلاقات و لا بمجد الاشخاص اللى بيبدلوا شركائهم باتسخفاف.. ولا انا بحمس اى حد بيواجه مشكلة مع شريكه او مديره او جاره انه مايحاولش مرة و اتنين و عشرين قبل ما ينفصل او يستقيل او يعزل.
الحلول التلاتة دول , فى مواقف هيتوصفوا فيها بانها انهزام ,و مواقف تانية هيبقوا قمة الشجاعة اللى ممكن حتى اللى حواليك مايفهموهاش.

انا بس كل همى اننا نقف ضد ان الخوف من عدم النجاح يحجم امكانياتنا و يحصر افاقنا فى الطرق اللى عليها علامات خطوات .. عشان يبقى هى دى اكيد اللى فى ناس مشيوا فيها قبلى و لو كان فى خطر كان زمانهم علقوا يافطة بتقول خطر.

مش يمكن انت ربنا خالقك اقوى؟ احكم؟ عندك من مقومات النجاح فى الحاجة دى بالذات اكتر من غيرك؟؟ ليه عايزين الاسهل حتى لو كان اقل بكتير مما نستحق؟
ماهى معروفة ... الحاجة كل ما بتحلى بتغلى و بيزيد تعبها

و الدليل ان الفشل المزرى ده مش بس فى العلاقات .. ده اكتر و اقبح بقى فى الحياة العملية و العلمية
اما بنيجى نختار مثلا دراسة ... عمل ... بيزنس,كل تفكيرنا بيبقى فى انهى اسهل و اضمن مش انهى اقيم و اقرب للى انا عايزه حتى لو اصعب

اللى بتكلمكوا نفسها عملتها العملة السودة دى اما اجلت امتحانى 3 مرات عشان خايفة مانجحش عشان هو امتحان اجنبى جديد و عدد الناجحين من اول ماتعمل الامتحان من سنتين لحد دلوقتى لا يتعدى ال60 ممتحن من مئات من كل بلاد العالم بمتوسط 15 ناجح كل سنة علما انهم بينجحوا اعلى نسبة من المتقدمين مش فى درجة نجاح زى العادى كده.

يعنى انا عارفة ان كلمة راسب كلمة صعبة .. بس ممكن افضل خايفة انى مانجحش مرة او اتنين او عشرة حتى و اديسون ماخافش ولا اتهز اما مانجحش فوق التسعميت مرة
ماهو عشان كده هو اديسون
مش عشان هو اذكى ...لأ ... عشان هو اكثر اصرارا و عزيمة و عشان هو ماخافش من عدم النجاح و ماخافش يتقال عليه فاشل ..كمان عشان كان بيتعلم من غلطاته و عمره ما كررها ..يعنى هو اما جرب 99 تجربة .. و غلط 99 مرة .. عرف 99 معلومة!!

يبقى لايمكن عدم نجاح تجربة يخلى البنى ادم يتسرع و يتلهوج فى اى حاجة عشان مايتقالش عليه فاشل
و هنا انا افتكرت مدرس اللغة الانجليزية فى الجامعة الامريكية دينا بشير الديك اللى اتخطتبت اكتر من مرة بس كانت اشجع من انها تمشى فى جوازة بس عشان تبقى متجوزة و عشان مايتقالش عليها بتتخطب كتير .. و هى كانت من ضيوف الحلقة التليفزيونية اللى كنت انا فيها لو فاكرين اللى انا شخصيا بحيى شجاعتها و صدقها مع نفسها

بس يعنى .. رجاء خاص .. احنا هنقتدى بتوماس اديسون اه فى الحياة بس بلاش فى الحياة العاطفية نقول و ايه يعنى 99 مرة ..ههههه

عشان ماحقدش عليكوا اكتر مانا اصلا باحقد

Wednesday, March 12, 2008

16 - تسائلات

لو تخيلنا حياتنا بلغة الكمبيتر هنلاقى ان و احنا بنستتب بندوس على اوكى فى حاجات كتيرة اوى و احنا مش واخدين بالنا
انا النهاردة هتسائل فى شوية من الحاجات الغامضة بالنسبة لى


1 - ليه الست فى شهر العسل دايما بتأكل جوزها؟ هو البعيد اتسخط و لا هى مالهاش نفس؟

2 - ليه بقى بعد شهر العسل بتودعه على باب الشقة و هو رايح الشغل بعيون ماليانة حب و يقوم هو حادفها بوسة و هى ليسة بالبيجاما؟ هى مش رايحة شغلها هى كمان؟

3 - طب هى لو مش بتشتغل .. ايه اللى مصحيها بدرى بقى؟؟ اياك حد يقوللى عشان تفطره .. هقل ادبى !!!

4 - "سؤالى المفضل" ليه الستات لازم ترجع قبل اجوازها؟؟ تانى و تالت و رابع ... ليه؟؟ ليييييييييييه؟؟ لييييييييييييييييه؟؟؟؟؟ طب تخيلوا معايا كده... الراجل خلص شغل... رجع البيت..حط المفتاح فى الباب (ماحنا من فترة طالبنا المجتمع انه يعمل نسخ من مفاتيح الشقة للرجالة) و دخل الشقة مالقاش مراته.. هه بقى؟ و بعدين؟؟ ايه بقى الكارثة اللى هتحصل؟؟

5 - ده سؤال و ممكن يكون رد على 4
ليه الست اول ما جوزها يرجع من الشغل ( وهى زوجة مثالية و موجودة فى البيت) تجرى وراه الأودة و تقف وراه و هو بيقلع الجاكيتة؟ طب هو قبل الجواز كان بيلبس ايه فى الشغل؟ ثم ان فى اغلب الاحيان الست اقصر من جوزها .. يعنى فى الواقع هى مش بتساعده نهائى .. هى بتقف وراه فاردة دراعتها و هو يحدف الجاكيتة لورا و هى تلقفها

6 - ليه اما الست بتحب تدلع الراجل بتلبسه الكرافتة؟ طب هو قبل الجواز كان بيعمل ايه؟ ماتقولوش مش كل الناس بتعرف تظبطها .. حتى لو بيعرف...الغريب فى الموضوع ان فى اغلب الاحيان هى بتلبسها.. اصل فعلا ظبطة الكرافتة دى اسهل و الواحد لابسها .. هى تلبسها و تربطها و بعديت تفكفكها سنة و تديهاله

7 - لودى حاجة لزوم الدلع؟؟ ليه بقى مفيش راجل بيظبط لمراته الطرحة و هى نازلة؟ سواء سبانيش او عادى ( على فكرة هى مجرد تخيلها مستفز ...ههههههه) و لو مش محجبة , ليه مايسرحلهاش شعرها قبل ما تنزل .. يفك الرولون و يطلع السيشوار و يظبط القصة او يلمه بتوكة ...كده يعنى

8 - ليه الفطار فى السرير دلع؟
طب و اما نفتفت و النمل يهجم على السرير و يقرص فينا؟
طب و العماص؟ مش نغسل وشنا و سناننا الاول بعدين ناكل؟
طب و اما نبقع المفرش ولا اللحاف و الست ترقع بالصوت يرجع يقول عليها مش رومانسية؟

9 - ليه الرجالة لازم تتنحنح و هى خارجة من الحمام؟ ايه علاقة اللى عملوه فى الحمام بان فى حاجة فى زورهم و غالبا مفيش حاجة .. هو كده , الخارج من باب الحمام يتنحنح ..اوكى

10 - ليه الستات اما يبقوا فى مشكلة بيغمن عليهم؟
خطيبها يزعقلها .. تقع فى الحمام
باباها يرفض الجوازة ... تترمى فى الكنبة
جوزها يقولها مش بحبك ..تندلق فى السرير
لأ و ايه؟ هى غالبا بتبقى زابطة حسابات المكان و الابعاد فى مخها قبلها .. يعنى لو فى ترابيزة وراها استحالة تتخبط فيها والا رقبتها هتنكسر و نرتاح كلنا .. و لو جنب السرير تلاقيها اتسنترت فيه كده و مالياه و طبعا فى الحمام عند البايون .. لا يمكن حتى تتخبط فيه!!!




و فى الاخر يتبقى الألغاز اللى لا جيلنا و لا جيل احفادنا هايحلوهم
- الست بتعمل ايه اما بتحضر الحمام
- و الميا السخنة لازمتها ايه فى الولادة الطبيعبة *
- و ميل جيبسون اما باس صوفى مارسو فى الوداع فى فيلم القلب الشجاع و بعدين تف الدوا... عملها ازاى الحركة الصايعة دى؟؟




* زمان كنت فاكراهم بيسلقوا العيل .. اقصد يعنى الحموم لزوم النضافة بس اصل المية بتبقى بتبقلل .. دى اكيد مية سليق.
و اما دخلت طب قلت بس .. اكيد بيغلوا الادوات فيها.. بس طب الداية بتمسكهم ازاى؟ ماهم مولعين.. بتمسكهم بفوطة او حتة من المطبخ .. حاجة كده لزوم التعقيم


و النبى بطلوا تدوسوا اوكى و خلاص و اقروا بتدوسوا على ايه و اعرفوا لازمته ايه

و مش هابطل احقد


أهم شيء أن لا تتوقف عن التساؤل .....
ألبرت أينشتاين

Monday, March 3, 2008

15- الست = حرام

انا ايه اكبر مشكلة بتواجهنى فى المجتمع اللى احنا عايشين فيه ده؟
فيما يتعلق بالرجالة و الستات و صراع الجبابرة ده؟

كلمتين و بس ............. (الدين) و (الحرام)
الراجل اسهل حاجة عنده انه يقول لأة عشان حرام .. او انه يفرض الهيمنة باسم ان الدين اداله الحق ده.

و انا بكبر بقى منظر طبيعى اوى ان الاقى اى مناقشة فى الدين تتحور و تتحوصل و تتمحور حول الحجاب و عمل المرأة و اذن السفر و الحق الشرعى فى الطلاق... بقيت مناقشة الدين فى مناقشة مدى الكبس على نفس الست و بقى مقياس الحرية هو فى قد ايه لحم متعرى .

و بقى عادى أوى اننى اتفرج على النشرة على الحكومة الاسلامية الجديدة اللى مسكت البلد دى و اللى اول حاجة عملتها فرض الحجاب على الستات و تحجيم دور الست و يا ترى هتسوق ولا لأ و هتشتغل ولا لأ و هتبان فى التليفزيون ولا لأ و هتنتخب و ترشح نفسها ولا لأ .

و بقى مألوف اوى ان الاقى ان المرجعية فى اى صراع للست عشان تقتحم مهنة جديدة هو انها دينيا ماتنفعش
و يجتهد عالم الرجال فى تطليع قطط فاطسة فى احاديث مشكوك فى امرها و تفسيرات فردية ملتوية لآيات قرآنية عشان يبقى الرد انه الست حرام تشتغل فى القضاء و العسكرية و الشرطة و الجيش و الوزارات المؤثرة و الجراحات الحساسة و رئاسة الجمهورية.

و مابقاش غريب لودنى انى اسمع من الرجالة اللى بقابلهم ..باسمعهم .. باقرالهم .. انه تحجيم دور الست ده لانهم فى الاساس وجودهم متحجم بحكم ديننا و بالتالى فهو المنطقى ان يكون تفاعلهم مع الحياة اقل .. و اكيد خبرتهم و حكمتهم و حكمهم ... اقل تأثيرا فى الحياة



و الفكرة ان المقاومة من ناحية الست كانت فى اتجاهين .. طول عمرى حربى فى جبهتين, جبهة الاقوى بحكم قوانين الحياة اللى رافض التخلى عن اى فتفوتة من هيمنته و رجال لقم فى الدين ما يصلح زريعة ( هى زريعة كده صح؟) لأن يكون الآمر الناهى . و جبهة ضعيف مستأنث خايف من مواجهة اى حروب اذا طلب مكان فى الجيوش و ستات استسهلوا ومر حمل الدنيا على الرجالة تحت بند ان الستات اضعف و انهم قوامون. اتسحلوا التنبلة و خافوا من الشقى .. من الاحساس بالفشل اللى قبل اى نجاح .. من امتحان الطوح لما تشد التحديات و من اختبار عمق الايمان لما بتتشكك القيم ( يعنى كلام كبير بشكل!!) خافوا ما يبقوش قدها .. لقيوا اللى يقلهم كنوا ... وقروا ... قالوا يا سلام!!

طيب هل انا عمرى ما قابلت راجل نظرته للست خالية من التسفيه ده؟ طبعا شفت و سمعت ... بس المطب فين بقى ؟؟ انهم بيكونوا حاجة من اتنين فى اغلب الاحيان


- يا اما عايشين فيها فى دور الاجانب
- يا اما الدين لا يمثل اى حيز فى حياتهم على الاطلاق

لكن انى الاقى راجل مصرى عربى شرقى مسلم مؤمن باصوله و بدينه و شايف ان اللى بيحصل لا يمت لاى دين بصلة هو ده بقى التحدى ...

و ان شاء الله هلاقيه!!!

بس لو لقيته مش هسيبه ...ههههههههههه

شفتوا الحقد وصل لحد فين