من فترة كنت عند واحدة صاحبتى اكبر منى شوية و بنتها ليسة متحجبة جديد . الست قال ايه بتاخد رأيى فى شكل بنتها بالحجاب فقامت قايلالى – قدام البنت – و كل وشها تعابير عدم الرضا بل و القرف:
ايه رأيك يا ايمان؟ شكلها معقول بالحجاب..ولا ايه؟ يمشى يعنى؟
انا ما بقيتش عارفة ارد .. مش عشان البنت شكلها مش معقول
عشان الست دى فى لحظة 1- وصلت لبنتها انها شايفة شكلها وحش . 2- عبرت عن ده قدامى و 3- اديتنى فرصة انى انا كمان يبقالى رأى فى بنتها فى وجودها و بسماحها بل و بناء على طلبها!!
بعدها بحبة كنت عند صحبتى تانية ليسة عندها بيبى شهور. و مش فاهمة العيلة قررت ان البنت دى شكلها مش قد كده..كل شوية صاحبتى تبص لبنتها و تقوللى " هى مش امورة بس والله دمها خفيف! ". و طبعا الشعور ده هايوصل للبنت دى من و هى صغيرة!
انا مش هاتكلم عن تضخيم اهمية شكل البنت و استخدامه فى التأثير على ثقتها بنفسها! و مش هاتكلم عن كمية المواقف اللى فيها حوار السمار و البياض و العينين الملونة بيكون هو موضوع الساعة!
انا بس عايزة افهم .. ازاى ممكن ام تكون مصدر انهيار ثقة البنت بنفسها و هى مفروض تكون العكس؟ انا مش باقول تضحك على بنتها و تفهمها انها ملكة جمال .. بس برضه ماتكسرش مقاديفها - و قدام الناس – و تتخيل ان ده مش هايأثر. مهما انا قلت و شعرت فى البنت فى الموقف الاولانى عمره ما هايصلح اللى الست دى وصلته لبنتها . لان البنت هاتفضل مصدقة ماماتها مش اى حد تانى .. و اللى بيحصل بعد كده هو سلسلة من المشاكل بيكون احسن مصير فيها هو ان البنت تتمرد تماما على ماماتها و تجرد كل كلامها من قيمة و ده برضه فى الاخر هايفقدها مساندة و نصيحة حد مهم جدا فى حياتها.
يا ريت كل بنت تربى بناتها على الشموخ و الثقة . و يا ريت مايكونش شكل البنت هو كل رصيدها فى الدنيا اللى على اساسه يتحدد البنت دى بنى آدم له قيمة او لأة !!
16 comments:
انتي مش فاهمة دول بيخزو العين هي هي هي
ياريت يكون الموضوع خزي للعين مش أكثر
لأن فعلا حكاية " مش حلوة بس دمها خفيف دي" بسمعها كثير لدرجة تصيب بالغثيان .. وعلى الأولاد كمان
وألله بقى لو في مقارنة بين البنت وأخيها !!
يعني تقول أخوها أحلى بس هي دمها أخفّ .. وتضطر في سبيل تعويضهم عن ذلك إنها تبقى مرحة ومطيعة ونشيطة وذكية وووو
وأخوها العكس تمامًا
!!
حاجة تقرف
يابنتي اكتبي حاجة ما تجيبش السكر والضغط
وياريت تكملي في زهرة ومريخ :D
تحياتي لكِ :)
الاولانية اعتقد انها هاتهد ثقة بنتها فى الحجاب مش فى نفسها
التانية هى اللى غلطانة بجد و ده سببه ان طبعا امها عملت معاها نفس الحركة
هههههههههه يا سمير
فكرة برضه
77math:
طب اعمل ايه بس؟
اروح فين .. نفسى الاقى زرار
pause
لمخى
اما تلاقيه ابقى هاتيلى منه
egyptian:
وجهة نظر ماجاتش فى دماغى بس عندك حق جدا فيها و واردة اوى
تخيلي بقه ان في امهات بتغير من بناتها وتبقى جريمة لوحد شبه البنت بامها الموضوع ده منتشر بس للاسف محدش بيعترف بيه!!!!
يالهوى!!
للدرجة دى؟
ايوه حصل والله معايا شخصياومع قريبتي وغالبا بسبب عقد نقص قديمة او خلل في التنشئة
لو انا شبه ماما وحد قالها كده يبقى الرد هو الصمت والعكس صحيح مع اخويا شكر عميق وفرحة طاغية
يا ريت الناس تبطل تقدس الامهات بشكل مبالغ فيه عشان في عينة محتاجة تتعلم ازاي تكون ام وازاي بنتها هي ضناها مش ضرتها اللي لازم تكسرها وتذلها
اظن كلامي صدمة ولكن من خلال ملاحظاتك لتصرفات بعض الامهات الم تجدي هذا السلوك?
شكرا على التواصل
اخ منكم ياحريم انتم أخخخخخخخخخ
حريم؟؟؟؟؟؟؟؟؟؟؟
ايوة حريم اصل انا من جذور صعيدية في حاجة؟ مش عاجبك الصعايدة ولا ايه؟
موضوع الغيرة بين الحريم ده منتشر على نطاق واسع
لازم تتعاونوا سوا فى مواجهة الغزو الرجالي و تبطلوا غيرة و انقسام بقى
لأ هو اصلا مفيش زى الصعايدة و ده رأى معروف من زمان
الست الصعيدية بتستنى اما تكبر و تطلع القديم و الجديد و اتخنها راجل فى البلد مايعرفش يبق معاها
ههههههههه
بس هو انت اكيد ننفق معايا ان استخدام الكلمة هنا فى القاهرة مش بنفس معناه و بيدى ايحاء مش لطيف
و المدونة هنا زى مدونات كتير بنحاول فيها ان احنا نحط ايدينا على "النفسنة" اللى انت بتقول عليها دى
اللى انتى بتقوليه ده رانيا هو اخطر تأثير فعلا
ان الامهات بيفقدوا قيميتهم العالية فى حياة الانسان
و اللى للأسف مفيش حد فى الدنيا ممكن يعوضها
بس اما تيجى تحسبيها هاتلاقى ان من الاصل هما ماكانوش مستعدين انهم يكونوا امهات اصلا
Eman ...This is more than True !!!
begad ..and it extends to: when they always try to compare between siblings / sisters looks specially , in who is momre beautiful we keda..and this is shabah abouha and other 7elwa le ommaha !! which is like a common discussion ppl always do infront of the girls ! and what are they expecting from those girls later ? to be in luv with their mom n dad?let alone being jealous !!
ازيك يا بطاطس
عندك حق والله يا بنتى
حاجة توجع القلب و تحرق الدم
مش عارفة ازاى دول امهات مفروض انهم بيحبوا عيالهم
ان جيتى للحق فكلمة الام بجد زى السهم الحاد بيصيب فورا وعلاج جروحة صعب..ان مكنش ممستحيل
خصوا فعلا لو طفلة..كل اللى بتشوفة بتعرفة عن طريق عيون امها ووجهات نظرها فى الحياة والناس
كل كلامها اكيد بيتصدق..حتى لو البيت خارجيا اعترضت علية وانكرتة بيكون جواها شىء اقوى مصدقة
والكلام دة سواء صغيرة او كبيرة .. اللى بيفرق بس ان الكبيرة بتعرف ترد وتتكلم انما الصغيرة بتتكون جواها عقد نفسية فى صمت
وف الاخر الاتنين كارثة
وسبحان الله من امتى كان فية فضل لبنى ادم على التانى بالشكل؟؟؟؟؟؟
اذا كان عينك ملونة وشكلك حلو فدة نعمة ربنا عليك مش شطارة منك
واذا كان ربنا مش اداك جمال ساحر فكفاية انة اداك شكل مقبول وخلقة انسانية سوية..مفيهاش اشياء تشمئز منها النفوس
فية ناس بتتمنى خلقة سوية ..روح المستشفيات واتفرج او اتفرجى..ولا شوفوا المعاقيين ذهنيا..ترضى تبقى اجمل انسانة فالكون بس معاقة ذهنيا ؟؟؟
يا جماعة فكروا بعقلكم ربنا هوة اللى بيقسم الارزاتق بينا مش احنا..احنا اقل بكتير اوى من حتى اننا نعترض..احنا نقول الحمد لله يا ارحم الراحمين على كل شىء بنفس راضية
وفى الاخر لو هتشغل عقلك وتحسبها برضة فالاخر كلنا واااااااحد متساويين فى النعم والابتلاءات
سورى انى طولت بس موضوع جيد
تسلمى ايمان
لا طبعا ماطولتيش ولا حاجة
للأسف فى ناس فرحانين بنفسهم زيادة عن اللزوم
مرضى بنفسهم يا عينى
ربنا يعافينا يا رب و يتمها علينا بالخير
Post a Comment