Thursday, February 26, 2009

46 - الجراحة .مش للبنات (مقال مجلة احنا شهر يوليو2008)ه

كان يوم من الايام الحلوة .. يوم نتيجة الثانوية العامة.. و اللى عرفت فيها انى حققت حلمى و حلم العيلة و دخلت كلية الطب.

و بعد 6 سنين عذاب مع المذاكرة و ذل فى امتحانات الشفوى و قهر ايام النتيجة..و بعد سنة امتياز و بالضبط فى مارس 2006 اتخرجت من كلية الطب و مسكت كارنيه النقابة و ترخيص مزاولة المهنة.

عشان تبقوا فى الصورة..طب بالنسبة لى عمرها ما كانت كلية القمة بتاعت الصفوة و الكلام ده اللى بينفخوا بيه طلبة سنة اولى..ولا كانت مصدر بريستيج و خصوصا للبنات عشان ابقى فى سوق العرايس دكتورة و لا لزوم الفشخرة الكدابة زى ما اهالى كتير بيبصولها.

طب دى من الاخر...حلمى...فعلا..يادوب اخرج برا اطار الحفظ و التسميع بتاع مناهج الجامعة و يتحول الطب الى امتع العلوم فى للاطلاع.

ماستنيتش كتير بعد التخرج و كنت عملت عقد عشان اتعلم فى حتى لو على حسابى.. و ايه يعنى مش مهم الفلوس دلوقتى..هما الدكاترة كده .. لازم يشحتوا اول 20 سنة فى حياتهم .. طالما بتتعلمى يبقى بتستفيدى.

اول يوم رحت لابسة البالطو و دخلت العيادة , لقيت دكتورة بتكتب على مكتب و سألتنى: خير؟ قلتلها : انا جديدة هنا ..طب اهلا يا دكتورة اتفضلى

قعدت على سرير كد جوا العيادة و محدش عبرنى غير دكتور اخد باله منى اول ما دخلت و بصلى و قاللى: انتى مين؟ - ايه الداخلة دى..ما علينا- رديت عليه : انا ايمان ..ديسمبر 2004 .. طب عين شمس .. اصل الاسم الثلاثى فى طب كده! بصلى و قاللى : انا د\ ... و احنا هنا 6 نواب انتى اجددهم يبقى انتى ال

Junior

و احنا هنا كلنا

Senior

عليكى .. وده معناه انك تسمعى الكلام من غير نقاش..احنا النهاردة ينحضر حالات العمليات بتاعت بكرة و ده معناه ان النهاردة طوارىء و الدكتورة ... هى المسئولة عنها..بصيتلها و سألتها:

هو حضرتك هاتباتى النهاردة – انا قلت اشوف يمكن ابات معاها-

قالتلى : ابات مين؟؟ انا عندى عيال اربيهم!!!

المهم عرفت منهم حبة بحبة نظام الشغل. و كان اول شىء مطلوب منى هو

Paper work

Junior الاول كنت فاكرة انى عشان

لكن فهمت بعد كده ان دى الوظيفة اللى المفروض البنات تأديها هى و شوية حالات فى العيادة و كتر خير الدنيا.

تيجى فى الحالات الصعبة ولا المتطورة ولا الجراحة و يتقال: لأ .. البنات مش بتوع كده و الرائع و المستفز انى كنت باسمع الكلام ده من البنات قبل الولاد!!

يعنى لما الستات تقول الكلام ده يبقى الرجالة مش ملامة.. كان كلامهم من عينة:

,,, اللى تقوللى اصل الجراحة دى عايزة جمودية..دى شغلانة رجالى مش بتاعت بنات

,,, واللى تقوللى اديكى رايحة جاية على وظيفة كويسة و محافظة على اللقب و هاتخدى الماجستير بتاعك ..انما الجراحة دى كبرى دماغك منها

,,, و اللى تقوللى اصل جراحة ازاى؟ انتى فى الاول و فى الآخر ليكى هايبقالك بيت مسئولة عنه و عيال تروحيلهم و راجل مش هايستحمل ترجعيله متأخرة عشان قال ايه كان عندك عمليات النهاردة

كان نفسى اسألهم طب دخلتوا طب ليه .. او طب جايين هنا ليه؟ ماقعدتوش فى البيت ليه؟ بس اكيد الاجابات كانت هاتنقكنى اكتر و انا مش ناقصة

عشان كده عذرت الرجالة شوية فى كلامهم اللى كان مليان غيظ و شحن و قرف و يأس من اى ست فى المجال

لدرجة ان مرة استاذ من اساتذتى – اللى كان فعلا بيحاول يساعدنى و يعلمنى – قاللى : انا هاعد اعلم فيكى و اول ما هاتتخطبى مش هلاقيكى .. هاتتلهى فى الجهاز و الشقة و بخ!

و مرة زميلى قاللى:

مانتى تعدى تزاحمينى فى التعليم .. و الفرص تتقسم علينا بالتساوى و بعد ماتتجوزى بكم شهر تاخدى عمل مخفف عشان الحمل و اجازة رعاية طفل عشان العيال .. يعنى لا سيبتيلى التعليم و لا انتى عملتى بيه حاجة .. للى هو فيها لاخفيها و خلاص

و واحد بقى من النواب الكبار جابهالى على بلاطة و قاللى:

الدكاترة الستات .. استثمار فاشل!!!

طب حد يفهمنى .. بكلام الستات قبل الرجالة,انا ارد اقول ايه؟؟ و منين اقنع اى حد انى مش كده ؟ و ازاى؟؟ دول فاكرينى جاية املى الفراغ العاطفى اللى فى حياتى و ادور على عريس

محدش كان واخدنى بجد و اللى كان مزود ده انى بحكم انى ليسة متخرجة كانت معلوماتى قليلة و خبرتى معدومة .. فطبعا كنت بسأل فى امور بسيطة و اصبحت بديهية عندهم و كانوا بيستخدموا ده ذريعة لتأكيد عدم استحقاقى للتواجد فى المكان ده اصلا و كأن كل واحد فيهم كان مولود ب سيديهات طب فى دماغه

و طبعا كانوا بيضحكوا ..

اما حبى الاول بقى ..الجراحة فمهما وصفتلكوا اول مرة يتسمحلى رسمى تبقالى عملية جراحية اعملها لوحدى كانت عاملة ازاى مش هاعرف ! كان استاذى الطيب ده هو السبب .. ماعتقدش لولاه كان حد هايدينى الفرصة دى . و طبعا لازم الاول فى مرحلة طويلة باشتغل تحت اشراف كامل من احد الدكاترة الاكبر منى و ده امر مفهوم طبعا .. و ده طبعا جه بعد مرحلة من التمرين على حاجات من كذا مادة و سفينج و بعدين خطوات بسيطة – كانوا بيذلونى عليها-

المهم .. ان ليا حالة النهاردة .. اما الممرضة نادتنى و قالتلى :" يالله يا دكتورة اتعقمى عشان هانبدأ حالتك " كنت سعيدة سعادة .. بس السعادة ما كملتش .. لان ببساطة شديدة الدكتور المشرف اشتغل الحالة كلها!! بلغة الدكاترة "هبشها " .. آه .. هو كده .. بمنتهى البساطة !!

وقتها مسكت نفسى بالعافية من العياط .. و باصيلى هو و قاللى:

"ايه مالك فى ايه؟ انتى مصدقة نفسك اوى كده ليه؟ انتى فاكرة انك هاتبقى جراحة بجد؟ .. امتبى علاج العيان فى الملف بتاعه عشان التمريض يطلعه اودته !!"

Saturday, February 14, 2009

منى ليكم فى عيد الحب

http://www.gusanito.com/esp/tarjetas/postales/dias_festivos/mis_mejores_momentos/2161



هو انا عارفة انه اهبل زيى بس انا فرحانة بيه اوى
شكرا Rain Captivator



2
ليه ياقلبي ليه بتحلفني ليه
اخبي الحكايه واداري عليه
ما اوصفلوش عذابي وحيره شبابي
وحبه اللي خدني من اهلي وصحابي
وازاي بس اداري وازاي يبقي جاري واتشوق اليه
ليه ياقلبي ليه بتحلفني ليه
ليه يا قلبي ليه
لا مش قادره اخبي بحبه ياقلبي واحلف انه اول واخر حبايبي
واديني هقوله كلامك ده كله شوف هتعمل ايه
ليه ياقلبي ليه بتحلفني ليه
ليه يا قلبي ليه
راح اقوله كل اللي داريته راح اقوله قد ايه حبيبته
راح اقوله واقوله وياريته يسمعني ياريته
ياقلبي بحبه ومغلبني حبه لكن اعمل ايه
ليه ياقلبي ليه بتحلفني ليه
ليه يا قلبي ليه


http://www.4shared.com/file/28338756/b5ebac0b/lih_%20ya_dodo_lih.html

Wednesday, February 11, 2009

45 - عانس و حقود و مش رومانسية كمان

صراحة انا طول عمرى اعرف انى مش رومانسية – حسب التعريفات المتعارف عليها - بس كل مالوقت بيعدى بتأكد ليه؟ .. النهاردة انا هاضربلكم اكتر الايفيهات الرومانسية عرض الحائط .

1 – يو كومبيليت مى !

الكامة دى و اللى معناها العربى ( انت تكملنى ) اتقالت فى مشهد النهاية فى فيلم جيرى ماجواير اللى البطل فيه مفروض اما قال الكلمة دى البطلة خلاص سامحته على وطينته معاها طول الفيلم فى مشهد مفترض بقى ان انا كمشاهد اسح بقى دموع ومناديل و كده ...

انا ليه التعبير ده بيستفزنى؟

لان المصيبة ان التعبير ده بيرمز لمأساة حقيقية و هى ان الاحساس بال "تمام" او "الاكتمال" عند ناس كتير – و طبعا الستات اكتر – مشروط بوجود حد فى حياتهم.. تلاقى الست طول ماهى "سينجيل" مش مضبوطة .. تحسها فيها حاجة غلط .

مأساة بجد !!! يالله غنوا معايا على الربابة:

"يا بنتى .. يا حبيبتى .. انتى كاملة

براجل .. من غير راجل .. انتى كاملة

يا ستى .. انتى مش ناقصك حاجة لو مفيش راجل فى حياتك

يا روح قلبى .. انتى مش مستنية راجل يبصلك عشان تتأكدى انك ست

يا نور عينى .. لو انتى مش حاسة انك ست من جواكى , عمرك ماهاتوصلى راجل انه يشوف ده"

حلوة الاغنية؟ انا حاسة هاموت و انا باقول كده و البنات تفضل تسيب الرجالة تلعب بيها الكورة عشان واحد "يرضى " يتجوزها!



2 – انا بحبه اكتر من نفسى:

والنبى ايه؟؟ لا يا شيخة؟؟ طيب .. الاغنية التانية ..

" فيما عدا الام .. مفيش بنى ادم بيحب بنى آدم تانى اكتر من نفسه .. ماينفعش !! مش صحى اصلا

يا ست الكتكوتة .. انتى لازم تحبى نفسك اكتر من اى حد .. عشان الناس تشوف فيكى حد يتحب

.. يااااا حبيبتى , لو انتى مش بتحبى نفسك هايحبك هو ازاى؟

يا جميلة .. لو انتى مش معززة نفسك .. اى حد هايعززها ازااااى؟؟ "

** لأ .. و تقوم عكاها بقى اما تقوللى ( انا باتمناله حتى انه يجيب درجات اعلى منى ) .. ( انا عايزاه يبقى احسن منى ) .. ( انا بادعيله انه ينجح حتى لو انا لأة )

- اقول ايه و اعمل ايه ؟؟ طب ليه طيب؟؟ ايه وجه الحب فى كده ؟؟ ليه يعنى شرط من شروط الحب ان الانسان يدمر نفسه بايده عشان يثبت انه بيحب؟؟

- تيجى الاجابة بقى – قال يعنى هاتفحم – التضحية!! اصل دى اسمى معانى الحب .

- ماااااااااااشى .. فى تضحية آه بس 24 \7 يعنى!! التضحية بتتحسب كويس و تتضبط عشان الواحد مايبقاش ملطشة .. بعدين ايه وجه التضحية فى ان واحدة طالبة جامعة مثلا تسقط عشان هو سعادته عايد سنة فما يبقاش اقل منها ؟؟؟ ياخى *)%^&**$ .. بجد يعنى!!



3 – انا ماقدرش اعيش من غيره, لو سابنى هاموت ,انا روحى فيه !

يا سلاااااااااااام؟؟ بتاع ايه يعنى؟؟ مفيش حاجة اسمها كده .. المشكلة ان فى ناس بتقول كده كتير لحد اما يصدقوها و يفتكروا ان حياتهم فعلا مرهونة بالانسان ده .. لأة .. الدنيا مش بتقف عند حد .. بجد!!

- و على فكرة .. فى حالات كتير اما الست بتتعامل مع الراجل على انه كل حياتها , ده بيضغط عليه اوى و بيخنقه كمان ..

- بس برضه .. نفس الراجل ده .. لو ارتبط بانسانة حياتها مليانة مش بيبقى مرتاح .. الراجل عايز ست هو كل حياتها بس من غير ما تخنقه .. واحدة متواجدة اما هو يحب انها تبقى متواجدة .. بالشكل و القدر اللى هو عايزه !!

- بالعكس .. اما حياتك تبقى مليانة ناس و اهتمامات هاتبقى مليانة من جواكى مش فاضية .

- و حتى لو انشغلتى عنه ساعات .. هاتوحشيه , بدل مانتى فى حياته امر مسلم بيه .

- عمر مالراجل .. اى راجل .. كان اخر الدنيا .. و مش ده مقياس الحب .. ده انعدام امان .. اما العلاقة توصلك للاحساس انك من غيره ماعندكيش حياة ده معناه انك محتاجاه عشان تستمرى فى البقاء .. و دى علاقة كلها احساس بانعدام الاستقرار و الامان و الثقة فى النفس و الانسان التانى .. اه .. اصل الراجل اللى ينجح فى انه يوصلك الاحساس التهديد ده ازاى تضمنى انه هايبقى ليكى بعد ما تتجوزيه ؟

و ليسة .. ده الجزء الاول