Sunday, February 24, 2008

14 - أغبى الأذكياء

الذكاء ...... من النعم اللى ربنا بينعم بيها على ناس و ناس
و الذكاء انواع كتيرة حسب ما بيقولوا و اشهر و ادق مقياس ليه هو ال ( آى كيو) *
و من الاذكياء دول ,فى نوع غبى و هو اللى مش عارف يستغل النعمة دى صح او مش مستغلها اصلا!

و من أغبى الاذكياء ان ماكانش أغباهم فعلا - فى رأيى- هما النوع اللى ذكائه بيضحك عليه ( اخبار الهمزة ايه؟) فبيفتكر نفسه اذكى من الدنيا .. و انه ممكن يضحك عليها.

"محدش هياخد كل حاجة"
اكيد مش غريبة عليكو الكلمة دى .. بس هل فعلا كل اللى سمعوها هضموها كويس؟ بشكل يخليهم دايما حاطينها فى دماغهم و هما بيقرروا قراراتهم و اختياراتهم؟ ماعتقدش!!

لان فى غالبية الاحيان اكتر مشاكل الانسان صعوبة بتبقى بسبب رغبته الداخلية فى انه يتذاكى على الحياة و ياخد منها كل حاجة ... لأة... و مش بس كده .. و من غير اى اتمان

لو حاولنا نقسم الجوانب اللى بتستحوذ على معظم اهتمامه هتكون تلاتة:
* نفسه
* الناس (عائلة و اصدقاء و جيران و قرايب و مجتمع كامل)
* و عمله

و فى رأيى اهم مشاكلنا اننا فى لحظة تخيلنا اننا لازم يبقى عندنا كل ده كل يوم بالكامل .. لو احساس الانسان بنفسه و باتزانه اتهز مش هيعرف يستمتع او يطور اى حاجة تانية
و اكيد اى انسان بيحتاج الناس بكافة اشكال العلاقات البشرية
و لأسباب كتير عمل الانسان هو المتنفس المنطقى و المشروع لطاقاته و رغبته فى الاحساس بالتميز و الانجاز

بس فى مشكلة واضحة عندنا لما بنتخيل ان التلاتة حقوق مكتسبة على الحياة توفيرها للانسان و بالتالى فى تناسى واضح عندنا لمفهوم الاتمان
و كأن اى خطوة فى اى اتجاه من التلاتة هى حق من الانسان لا يتطلب منه اى مجهود مقابل الحصول عليه

و ده بيبان فى التعميم .. القوالب .. مش مهم انتى مين ولا عايزة تبقى ايه ولا بتشتغلى فى انهى مجال .. اى بنت لازم تجيب اول عيل و هى 26 و الا يبقى فى شىء غلط
و طبعا الكارثة الحقيقية فى الرجالة

فى كل مجتمع , فى مهن الناس اللى بيشتغلوا فيها بيقوا لمجرد انهم بيشتغلوا المهنة دى المجتمع بيديهم قيمة ارفع عن غيرهم. السياسيين .. الدبلوماسيين .. و ساعات المشاهير زى الفنانين و الرياضيين و اوقات افراد الجيش و الشرطة و احيانا العلماء (اللى احنا ماعندناش اى حاجة تشبههم حتى!) و الاطباء !

و ده مش لفراغ المفروض
المهن دى مفروض قيمتها دى نظرا لان الانسان ده تخلى - بارادته و مش تحت تهديد السلاح - عن جانب من جوانب حاياته عشان متطلبات المهنة دى
- السياسى تقريبا ماعندوش حاجة اسمها حياة اجتماعية و ممكن غلطة عملها و هو شاب تضيع كل مشواره
- الفنان عليه 600 ميكروسكوب بيفصص كل حركة بيعملها
- الصحفى كلمته بتسمع كل الاعمار و ممكن تأثر على اعمار صغيرة جدا
- الدكتور ده بنى آدم مطلوب منه حياة اكاديمية بشكل معين .. مطلوب منه شكل حياة مهنية مختلف عن كتير من المهن فيما يتعلق بالمواعيد و سقف المواعيد و التحصيل .. انتوا عارفين ان الطبيب فى اول تعيينه بيبقى اسمه "طبيب مقيم" من انه مقيم فى محل عمله؟؟
- اللى حاطط حياته دايما على المحك عشان شغله زى الجيش و المراسل الصحفى


و بالتالى احنا كلنا عندنا مشكلة فى تقبل تبعات اختياراتنا لشكل حياتنا... كلنا عايزين كل حاجة
و التمن؟؟ ... بنرسى على ولا حاجة!!

لاحياة عملية ناجحة
ولا بيت و اسرة ناجحة
ولا بنوصل لأى درجة من الارتياح و الاتزان النفسى المطلوب لاستمرار الحياة و اللى هو اصلا الهدف من كل محاولاتنا فى كل الحياة

ماهو ماينفعش ناخد من كل شجرة ثمرة و نعيش على اننا عايشين فى جنينة!!

على فكرة انا الحكاية دى هى البداية لسلسلة فى الموضوع ده .. دى بس الافتتاحية لتعريف مفاهيم خربانة كتيرة عندنا زى " الاختيار" .. "التضحية" و "التوازن" و محتاجة التفاعل الكامل منكو

حتى يستمر الحقد..






* الاى كيو هو ال

intelligence quotient or IQ


نسبة الذكاء هي النقاط المستنتجة من مجموعة اختبارات قياسالذكاء والتي من خلالها تعرف درجة الذكاء بشكل تقريبي, قام بأبتكاره العالمين الفرنسيين ألفريد بينيه وتيودور سيمون عام 1905, يعتبر الرقم 100 هو متوسط الذكاء عند الإنسان وكلما زادت النتيجة أعتبر الشخص عبقريا وكلما قلت أعتبر غبيا. والجدير الذكر أن آينشتين أجرى هذا الأختبار وخصل على نتيجة تتجاوز ال 200 نقطة


Thursday, February 21, 2008

نيو لوك

المدونة عملت نيو لوك
واديتها سبا من كم يوم كده
عملت كم ماسك و سنفرة و ايه!!
حاجة كده تليق بالظهور العلنى
المدونة دلوقتى بتتصور فى كل حتة و الباباراتزى حواليها فى كل مكان!!!
زى كل الفنانين اول ما يشتهروا شكلهم بيتحول
و اللى مش مصدق يشوف الجزىء الاول من زيزينيا ... الكائن الغامض اللى كانت بنت فردوس عبد الحميد دى منى زكى

ايه رأيكوا فيها كده؟
المدونة مش منى زكى!!!


تحياتشى

Tuesday, February 19, 2008

13 - الجواااااااااز بطيخة

سمعتوها كم مرة الحكاية دى؟ فى المسلسلات .. من الجيران .. من المجتمع و الناس على رأى سمير الاسكندرنى

انا شخصيا ليسة سمعاها من مفيش كم يوم من جارتى اما كانت قاعدة جنبنا و احنا بنتفرج عليا ( امال.. مانا بقيت من المشاهير بقى!!)و قال ايه الست حبت تجيب التايهة و تفحمنا كلنا قامت رافعة دراعها زى ميل جيبسون فى فيلم القلب الشجاع و قالت::

" الجوااااز بطيخة ..........ملهوش حل!"
عملنا ايه البطيخ عشان نحمل عليه مسؤلية التهمة دى مش عارفة

الجملة دى بقى - المتنكرة فى شكل بطيخة - هى اس البلا... لان على اساس كده فاحنا بقى يا عينى مغلوبين على امرنا و مفش حاجة قدامنا نعملها.



" ما احنا مش اجانب يعنى نعيش سوا الاول و نجرب و نشوف و بعدين نبقى نقرر نتجوز ولا لأة و عيالنا يزغردولنا فى الفرح!!"

اه .. احنا مش اجانب و مش هنعيش سوا , و اه فى درجة معينة من القرب مش بتتعرف غير مع المعاشرة بدليل ان فى اصدقاء ممكن تلاقيهم قريبين جدا لبعض لكن لو سافروا يصيفوا مثلا و قعدوا سوا ممكن تحصل مشاكل و حساسيات
دى حاجة فى النفس البشرية عادى ... مش كل شخص تندمج معاه يبقى بالضرورة شخص تنفع تشاركه السكن فما بالك بدرجة عالية جدا من المشاركة زى زوج و زوجة مفترض انهم هيشاركوا اللى اكتر من السكن؟

بس ده مش معناه ان الحكاية مبهمة اوى كده

فى حاجات كتير بتبان من الاول لكن المشكلة الحقيقية بتبقى فى السرعة الكدابة ... الخطوبة فى مصر هى الفترة اللى على مالشقة تخلص لدرجة انكم ممكن تلاقوا كتير اوى بيحجزوا الفرح و هما مايعرفوش هايسكنوا فين او ليسة الشقة طوب و زلط!!!!!!

لاحول ولا قوة الا بالله!! الرعب بيبقى لدرجة انهم عايزين يتأكدوا انهم اتدبسوا فى بعض

يالله نقرا الفاتحة
يالله نلبس دبل
مش هنكتب الكتاب بقى
الفرح نحجزه و ربنا يكرم فى الباقى


الخطوبة مفروض انها فترة اختبار و تجربة للطرفين عشان معظم الاشياء تبان عشان يوم ماتجوز ابقى عملت كل اللى اقدر عليه انى اتأكد انها ان شاء الله جوازة ناجحة

* حقى على نفسى انى اتعبلها شوية عشان ارحمها من النكد
* حق الانسان التانى انى لو عارفة اننا نش هنريح بعض نبعد
* و اهم حاجة حق ولادى انى اكون عملت كل اللى اقدر عليه عشان اضمن لهم قدر مناسب من الجو الاسرى اللى من حق كل طفل

" مانتى كده عمرك ما هتتجوزى"

مانشالله ماتجوزت .. على رأى البنت ( قاعدة الخزانة ولا الجوازة الندامة) - دى كانت من البنات اللى فى حلقة التليفزيون


-عايزين تفهمونى ان البخيل مش بيبان من الاول؟
-عايزين تقنعونى ان اللى بيضرب مراته ماكانش باين عليه من الاول انه عصبى و غلاط و من النوع اللى مش بيتحكم فى اعصابه؟ ماهو مش هيمد ايه و هو خاطب اه بس الطبع ده بيبان فى حاجات كتير
- المتسلط مش هيتدايق كل ما تعارضيه؟
-الانانى مش هيطالب بأشياء توضح انانيته؟

كل دى و اكتر حاجات ممكن جدا ربنا يحطها قدام البنت علامات و هى مخطوبة ان خطيبها بيعانى منها و هى بتختار انها تتعمى عنها مش عشان مراية الحب عامية و لأعشان هى عن كامل اختيار و اقتناع شايفة ان برضه هو انسان كويس و هى مختارة ده و متحملة نتيجته .... لأة .... بيبقى عشان لحسن تتفسخ الخطوبة .. ده انا ما صدقت ... دى خوخة و جت بعد دوخة

هيفضل بعد كده النسبة القليلة بتاعت الابتلائات بقى ( هى الهمزة كده صح؟) المريض نفسيا اللى بيتحول بليل ... اللى بيتخبط على دماغه و يصحى يلاقى نفسه برعى ... اعتقد ان اللى بيمثل لو تروينا و استنينا و فكرنا مرة و تلاتة و عشرة ماعتقدش انه هيعرف يمثل علاطول

ممكن اختلافات حتة فى نقاشات ملهاش علاقة بالجواز بشكل مباشر بتبقى مؤشر على التفكير بطريقة معينة

و على هذا و بناء على جميع ما سبق انا بقى هصرخ زى راسل كرو فى فيلم جلادياتور و اقووووووول :


اسفة ... ارفض هذى البطيخة!!*

و يستمر الحقد









* مع الحفاظ على حقوق الملكية الفكرية لميرفت امين .. اللا هى كانت لازقة كده ليه للراجل؟ ايه؟ مفيش دم؟ مفيش كرامة؟؟ ده احنا بنلعن فى الراجل اللى يعيش مراته معاه غصب عنه , تقوم الست عاملة كده؟ده ايه التناحة دى؟؟؟

Saturday, February 16, 2008


و طلعت فى اليتليفزيووووووووووووون
و طلعت فى اليتليفزيووووووووووووون
و طلعت فى اليتليفزيووووووووووووون
و طلعت فى اليتليفزيووووووووووووون

واللى يا ويل .. واللى يا ويل





و النعمة حاجة تفرح .. اه .. هبلة بقى تقولوا ايه .. و الحلقة على فكرة عجبتنى
صحيح .. اللى فعلا مهتم المغروض الموضوع ده ليه جزئين كمان مع ضيوف تانيين بظروف تانية

فيعنى .. اللى فيكوا انتريستيد ( سيكى على اللغات ) يبقى يتابع البرنامج


على فكرة اللى شوفتوه هو بالظبط اللى اللى اتقال .. انا صراحة كنت خايفة ينقوا فى الكلام و يحذفوا بقى و كده ( رغم انى عارفة ان مفيش حاجة اتقالت تتحذف بس يعنى .. انا ماعرفش سلو التليفزيون ايه

لكن فعلا مفيش كلام من ده خالص

الا فى جزء صغير كده من كلام الشاب الضيف عشان كان تريأة على اسامة منير ( و كان مالوش اى علاقة بالموضوع اصلا)

بس كله كوم و الدكتور بتاع علم الاجتماع ده كوم تانى!!

بس على مين ... عيب عليكوا


الحمد لله بجد ...

و زى ماحنا متعودين

و دائما و ابدا و علاطول








و يستمر الحقد







..... ملحوظة: اللى ما شافش الحلقة الاعادة يوم السبت الساعة 2 و نص الظهر و يوم الاربعاء الساعة 12 منتصف الليل


.... ملحوظة تانية: اللى عنده مشكلة فى التغييرات الخاصة بترددات قنوات ال ايه ار تى .. يتصل برقم 19300 و هما هايقولوك ازاى تعرف تجيبها

مفيش حجة بقى

Friday, February 15, 2008

البيوت اسرار






البرنامج النهاردة ان شاء الله


الجمعة 15\2\2008
ART EIN

الساعة 9 بليل

و الحاضر يعلم الغايب

Thursday, February 14, 2008

12 - هابى فالانتاين

صرح مصدر أمنى مسئول بأنه قد صدرت التعليمات و الاوامر لكافة الجهات المعنية بأمور الحب و السهوكة و المختصة بكل ما له علاقة بالمياصة و السماجة بأنه و فى تمام الثامنة من صباح اليوم الخميس 14\2\2008 قد اكتمل احمرار المحروسة احتفالا بالفالانتاين


احمرت القاهرة!!!

ازاى تعرف ان النهاردة الفالاتاين؟

- كل المولات بتتملى بلالين حمراء و دبدوب كبير او قلب احمر ضخم
- كل محلات الهدايا بيطلع منها اطفال من سن 11 الى 18 سنة شايلين علب هدايا حمراء اكبر منهم
- الشعب كله بيبقى بيلمع ( من الجليتر اللى بيبقى منتشر على الهدايا)
- كل القنوات الفضائية بتجيب فواصل فيها وردهة حمراء تقلب قلب او ولد و بنت ماسكين ايدين بعض و الموسيقى يا أما اغنية سيلين ديون بتاعت فيلم تايتانيك يا اما موسيقى هادية فيها صوت عصافير
- اعلانات الكول تونز و الفيديو كولز كلها عن الهيام و الغرام
-محلات الورد بيتضاعف حجمها بفاعل احتلال الرصيف كله و اعلان الورود الحمراء فى كل الاشكال و الكميات المهولة من الورد الاحمر على شكل قلب صغير و قلب كبير و بطيخة كمان
- محلات الحلويات كلها تورتات فيها قلوب حمراء ان ماكانتش اصلا على شكل قلب
- الجرايد كلها اعلانات موبايلات جوا علب مرسوم عليها قلب
- البنات مسيبين شعرهم
و المحجبات لابسين طرح حمراء او سبانيش بوردة حمراء
- الولاد لابسين البنطلون و التى شيرت بالوان لايقة على بعضها!!!!!!!
- التى شيرت فى احيان كتير بيكون نضيف!!!!!!!!
- الولد بيكون مستحمى و ريحته كويسة ( يا رب يطول فالانتاينك يا شيخ)
- تامر حسنى يفقعنا اغنية نحنوحة جديدة كلها عبارة عن حرف ال (ه) و ال (ح) و تنهيدات كتيييييييييرة
-انتشار الشائعات عن الالبومات الجديدة (اللا بالمناسبة انا سمعت ان ده الميعاد الجديد للمرة التسعين لالبوم منير الجديد ... ربنا يهديه و ينزله بقى احسن الواحد خلاص بيهرش فى دراعه فعلا)
- نزول ييجى 857849276 سينجل جديد لكل المطربين عن الحب و الحبيبة
- اسامة منير يعلن انه انسان بيحب الحب و بيحب كل انسان بيحب و بيحب اى معنى جميل لانه تعبير عن شكل من اشكال الحب و بيدعو كل الناس انها تتسهوك و تتحسوك فى سلسفيل جدور ابو الحب




اليوم ده ( على جمال معناه المفروض) بيتعبر من اكبر الدلائل على فقدانا الكامل بتمام اختيارنا لكل طعم للحياة و اننا فعلا ماشيين زى القطيع بنقلد بعض
و ان اى طعم او بصمة شخصية للحياة هو امر مفقود تماما

معلهش ... ماتزعلوش نفسكوا .. انتوا طبعا فاهمين ان الكلام ده كله بدافع الغيرة المرة من اننى يا عينى يا حرام ماعنديش حد اتموحن عليه فى هذا اليوم العظيم بس اعتقد ان محدش منكم مستغرب لان ده اقل شىء متوقع من العانس الحقود








معلومة:
اختلف العديدن فى تحديد اصل و تاريخ هذا اليوم لكن اكثر الروايات انتشارا هو انه
على شرف القديس فلنتاين
(Saint Valentine)
الذي كان يعيش تحت حكم الإمبراطور الروماني كلاديوس الثاني في أواخر القرن الثالث الميلادي، فقد لاحظ الإمبراطور أنَّ العزاب أشد صبرًا في الحرب من المتزوجين الذين يرفضون الذهاب إلى المعركة، فأصدر أمرًا بمنع عقد أي قران، غير أنَّ القس فالنتين عارض ذلك، واستمر في عقد الزواج بالكنيسة سرًّا حتى اكتشف أمره،وقد حاول الإمبراطور بعد ذلك إقناعه بالخروج من إيمانه المسيحي وعبادة آلهة الرومان، ليعفو عنه، ولكن القديس فالنتين رفض ذلك بشدة وآثر التمسك بدينه، فنُفِّذ فيه حُكم الإعدام يوم 14 فبراير، وكانت هذه بداية الاحتفال بعيد الحب إحياءً لذكرى القس الذي دافع عن حق الشباب في الزواج و الحب .







Monday, February 11, 2008

11- انتى حلم اى شاب

ايمان ... انتى حلم اى شاب ( ما عدا انا )

الكلمة دى - من غير الاضافة اللى بين قوسين - لا تتخيلوا انا بسمعها اد ايه

آه و النعمة.
بلاش نفسنة و اصبروا .. انا مش بعيش عليكوا ولا نيلة .. دى داهية سودة

انا فعلا سمعت الكلمة دى ييجى دزرليون مرة ..

طب ليه بقى؟؟

ممكن اضحك على نفسى و اصدق تفسير (ع) صحبتى اللى قالت:

يا بت هما بيقولوا كده عشان عمره ما يقدر يحلم انك تبقى ليه
واسعة دى يا (ع) ده احمد السقا قالها لحنان ترك فى تيتو
ايوة بس يا ضنايا تيتو كان طالع راجل واللى بيوردوا علينا دلوقتى انتى فاهمة مشكلتهم


يعنى ... مش مقتنعة انا اوى بتفسير (ع) بس شاركتكوا معايا فيه

انا بقى لي تفسير تانى ... و هستعين فيها بواحد ا .. اما لخصهالى فى جملة واحدة - من غير ما يقوللى انى حلم اى شاب و اى فيتاه-
قاللى:

بصى يا ايمان .. انا لو عندى مشكلة فى الشغل احب اخد رأيك او حتى افكر معاكى بصوت عالى ... بس اما اتجوز ما حبش مراتى يبقالها رأى فى شغلى!!

ايوة
المشكلة ان فى كتير من الحالات - بلاش كل عشان بتزعل- الراجل بيبقى محتاج انه يقتنع ام مراته "قلة" و لو جيت سألته مثلا
طب هى مراتك عارفة انك بعت ولا اشتريت؟؟
و دى ايش افهمها دى؟ .. الستات يابنى مالهومش فى الكلام ده .. و هتعد تزن علافاضى و توقف المراكب السايرة

هو فى الحالة دى مش حب واحدة و اتجوزها و يا عينى على بخته طلعت حمارة ... هو دور لحد ما لقى "حمارة على مقاسه" ما هى اصل الحمورية مقاسات
اللى شايف نفسه ذكى بيدور على اللى تبان ذكية بس بالنسبة له حمارة
و الخروف بيدور على معزة

و هنا هرجع للكارثة الحقيقية ... البنات البنات البنات .. الطف الكائنات
البنت بكل اسف فى احيان كتير بيبقى شرط عندها عشان تسترجل الراجل انه يحسسها انها حمارة
هل انا شايفانى فلتة؟ هل انا مصدقة الاختبارات اللى بتقول انى عبقرية زمانى؟ الحمد لله لأة
بس اللى اكيد مش هسمح بيه ان واحد .. اى واحد .. يحسسنى و المصيبة ( يقنعنى) انى حمارة
حتى لو كان يعرف اكتر او شاف اكتر بحكم انه اكبر ده مش معناه انه بالضرورة احكم و اكيد لا ميكن يؤدى انى اكون حمارة!!
واخدين بالكوا من اكبر دى .. اصل صراحة ان واحد عنده 25 سنة ييجى يقوللى الولد اكيد يعرف اكتر من البنت و تبقى كل خبراته فى الحياة انه هو و اصحابه بيتلموا طول الليل واقفين جبن عربية راكنينها جنب كشك و عمالين يشربوا سجاير و كل ما بنت تعدى جنبهم يعاكسوها و يضحكوا .. دى مستحيل تكون خبرة .. اسفة جدا!!

و للحقد بقية

مبرووووووووووووووووووووووووووووووك



يخليكوا لينا يا رب

Wednesday, February 6, 2008

طب ايه؟ هو الكلام وحش اوى كده؟ طب ماهو لو وحش قولوا وحش يعنى انا مش الحزب الوطنى.

ولا ممل اوى لدرجة انه مايتقريش؟؟

Sunday, February 3, 2008

10 - هى دى الحدوتة



تعرفوا جين اوستن؟ دى كاتبتى المفضلة.
طب تسمعوا عن فخر و اجحاف ؟ دى روايتى المفضلة.

الاجحاف!!!

من اقسى و اقبح و اسوأ و اكتر سلوكيات الانسان قبحا ..

انا على ادى بفهمه شكل من اشكال الظلم. انك تحكم على انسان باى شىء غير انسانيته .. وده سواء بالسلب او باليجاب على فكرة.
مانت برضه لو حكمت على حد باليجاب لشىء مش فيه ده برضه ظلم ( مع كامل تحفظى على اننا لازم نحكم اصلا)


الفلسطينيين حراميا
الخلايجة مغارير
الاغنياء جبابرة
سواقين التاكسى رغايين
السبكين نصابين
السوريين بيحبوا مصر
المنصوريات حلوين
العمال طيبين


انا بس بطالب اللى يقول حاجة من دول انه يكون شاف و سمع و اتعامل مع كل الناس اللى بتخضع للفئة دى لانه لو مش كده يبقى هو اكيد بيظلم.



لايهمنى اسمك
لا يهمنى عنوانك
لا يهمنى لونك
ولا بلادك .. مكانك
يهمنى الانسان و لو ملوش عنوان
يا ناس يا ناس يا مكبوتة
هى دى الحدوتة




الحدوتة






9 - يا ناس ارحموا الناس

شوفى محجبة و لابسة ايه
شوفى الولد ماسك ايديها ازاى
ايه ده؟ هى ازاى لابسة الالوان دى
شوفى مطول شعره ازاى ... بالذمة ده راجل ده
يعنى متدينين و الست تعد فى البيت لكن بنتهم تشتغل


من اظرف الاشياء فى الانسان مقدرته على الرؤيا الواضحة تماما للصح و الغلط عند الناس التانيين. كل واحد فينا عايش زى ما يكون عضو لجنة تحكيم بيدى درجات للناس اللى حواليه.

لكن هل الانسان بيكون بنفس العبقرية دى مع نفسه؟ طبعا لأ. احنا فالحين اوى فى اكتشاف غلطات غيرنا و كأننا مش بنغلط ولا كأننا جاتلنا لحظات تصرفاتنا اتناقدت مع مبادئنا و كأن الانسان كائن فى الاصل غير مخطىء او كأن الخطأ ده هو استثناء القاعدة.

يعنى هو تعامل الانسان مع الخطأ هو اللى بيعلمنا .. هيتعلم منه ولا لأ ... هيكرره ولا لأ .. لو اتحط فى نفس الموقف هيكرر نفس الموقف ولا التجربة تفرق ؟ و لو اه هتفرق ازاى؟؟
طب لما كلنا بنغلط و كلنا بنناقد نفسنا .. لما كلنا كده .. ليه مش سايبين حد فى حاله؟ ليه بننبسط اوى كده لما بنلاقى حد غلطان؟

هل لما بنشوف لحظة ضعف عند انسان ده بيقلل احساسنا بشدة او مدى ضعفنا و تناقدنا؟ هل ده السبب اننا بنفرح اما يكون الانسان ضعيف ادامنا؟
هل للدرجة دى الانسان ممكن يضحك على نفسه .. لدرجة ان اللى بيحدد مدى ضعفه هو ضعف الاخرين؟ و بالتالى بيبقى فى رغبة ملحة و مستمرة فى ايجاد ناس اضعف ؟؟
طب ما هو زى ما فى اسوأ فى برضه الافضل... اشمعنا بقى؟؟


" لأ اصلها عاملة فيها خضرة الشريفة و العيبة مش بتطلع منها" .. انا معنديش مشكلة ان حد يناقض نفسه بس مشكلتى فى الحكم على بعضنا بتناقضاتنا .. يعنى انا بقول حاجة و اتصرفت مرة عكسها دى مش مشكلة حد .. المشكلة لو قررت امشى احكم على الناس .

ما هو لو كل واحد فينا وفر طاقاته النقدية لنفسه اكيد هيكون انسان احسن و افيد و انفع لنفسه و لغيره و اكيد هيتطور و ينمو مع الدنيا.

لو انا ربنا مدينى حبة مخ اضيعهم ليه على البشرية .. مانا اولى

و محدش يقوللى الامر بالمعروف و النهى عن المنكر
اولا : انت كده لا بتأمر ولا بتنهى
ثانيا: انت كلامك فى الغالب مش هينفع ان ماضرش
ثالثا: الدنيا اتغيرت .. فى اغلب الاحيان اللى بيغلط عارف ان ده غلط
رابعا: مين قال اصلا انه غلط؟؟ مش يمكن اصلا مش غلط؟؟ ولا هو مفيش غير الصح اللى انت شايفه صح و الغلط اللى انت شايفه غلط؟
خامسا: مين قال ان حضرة جناب ساعتك ليك فى سوق البنى ادمين انك تقول ان فلان صح و علان غلط؟؟ فيك ايه زيادة عن البشر؟


محجبة و لابسة قصير؟
محجبة و بتكدب؟
محجبة و بتغش؟
محجبة و مصاحبة؟
محجبة و بتنط من سور المدرسة؟ - تعليقا على صورة من بيقى انت اكيد فى مصر -

على فكرة ... الانبياء خلصوا .. و على فكرة برضه الانبياء بس هما اللى ربنا خلقهم مش بيغلطوا .. و على فكرة كمان المحجبة مش قديسة يعنى مش معنى انها اخدت القرار ده يبقى هى اخدت قرار انها فوق الغلط و مضت اتفاقية دولية تتعهد فيها انها بالذات دونا عن كل البشرية جمعاء مش هتغلط .. يعنى عادى المحجبة دى بنى ادمة عادية جدا ممكن تعمل حاجات صح و حاجات مش كده .. عادى زى كل مخاليق ربنا.. و بالتالى برضه مش معنى ان فى بنت مسلمة مش محجبة انها شيطانة.
يعنى هو حكم من احكام الاسلام مش ركن من اركان الاسلام




و برضه ليسة هاحقد اكتر

8- و ليسة الوحدة هتزيد

الاختلاف لا يفسد للود قضية

كلمة لذيذة اوى بنسمعها كل يوم ... لكن الحقيقة ان للأسف الاختلاف فعلا بيفسد كل الود. بدون اى سابق انذار او دراية فى احيان كتيرة .. الانسان المختلف بيتعزل
هل ده لعدم تقبل الآخر؟ .. جايز
هل ده رفض للى هو بيمثله؟ .. احتمال

بس اللى انا متأكدة منه ان المشكلة بتبقى فى ( الاختلاف) نفسه ..... " مش مهم انتى ايه المهم انك مش زينا" . النا س بتخاف من المختلف و بتقلق منه ايا كان هو ايه.

فى منكم قرا تقديمى للمدونة و كان فيه قلت ان انا بقدم صورة انسانة حاسة بالوحدة رغم ان عندها اصحاب من كافة اشكال البشر.
للأسف ده تمن غالى اوى انا بدفعه كل يوم و كل لحظة نتيجة اختلافى عن كتير من اللى حواليا

الحكاية دى بتفكرنى بذكرى أليمة جدا و هى احد المرتين اللى قررت فيهم انى اعمل فيها متعلمة و مثقفة و اروح للدكتور النفسى.
واحد منهم ماسمعش ولا كلمة و قاللى " انتى عندك اكتئاب عشان مش متجوزة"

نهار اسود و مدوحس!!! يعنى انا جاية بقولك انى بعانى من بعض المتاعب نتيجة اختلافى بشكل عام تقوللى خالليكى زى بقيت الناس؟ مانا لو قادرة او عايزة كنت اتنيلت!!

بس الغلط مش غلطه.. انا اللى ماكنتش صادقة مع نفسى كما ينبغى.. كان لازم اكون اوضح و كان لابد ابقى اشجع

عشان الانسان يستمرمحتاج يكون واضح و صريح مع نفسه و قدام نفسه ( بينك و بين نفسك محدش له عندك حاجة ) صريح مع نفسه و اختياراته و اتمانها عشان يقدر فعلا يحدد هو هيقدر على ايه و مش هيقدر على ايه و يكون شجاع فى دفع التمن.
عشان كده انا عارفة ان ليسة الوحدة هتزيد

بس انا ليسة عندى مزيكتى .. و ليسة عندى كتبى ... و مدونتى ... و اهم حاجة انى ليسة عندى نعمة الصلاة و الكلام مع ربنا

و ليسة عندى الحقد حبيبى ....ههههههههه