39 - التعاسة مش عظمة ... و البؤس مش حكمة

انا هاخش فى الموضوع علاطول

المواجهة:

* اما تبصى لحياتك من يوم ما اتخطبتى و تلاقيها اغلب الوقت اتمليت بنكد و هم و خناق و توتر و ماسيجات سخيفة و رنة تليفون من غير رد ... يبقى انتى فى علاقة غير صحية

* اما تتجوزى جوازة و بعد فترة , كل ما تبصى من برا تشوفى نفسك مكسورة, حزينة , خايفة , مش متطمنة , بطنك قالبة , ملامح وشك كلها فقدان امل ... يبقى انتى فى جوازة غير صحية

* اما تسافر بلد تانية لشغلانة عشان تبنى نفسك بقرشين و شوية خبرة و ماتعرفش تتأقلم مع الدنيا و يومك يفقد كل طعم و الاحساس بالمرارة يملى حلقك و عينيك تعكسلك كل صورة بشكل حزين ... يبقى انت اخدت قرار مش سليم

هو احنا ليه بنتعب؟ مش عشان حاجة اكبر احنا محتاجينها او عايزينها ؟ .. طيب
احنا ليه بنحب؟ بنتجوز؟ بنشتغل؟
ما هو البنى اكيد متوقع يكون فى سبب لكل خطوة بياخدها .. على الاقل بعد سن معين. و الا يبقى بيتصرف من غير اى خطة زى الاطفال
الهدف من كل تعبنا فى الدنيا ان احنا نحاول نوصل لشكل حياة لايق علينا و يوفر اهم احتياجاتنا - على قدر المتاح - و الاهم.. عشان نوصل لشكل اريح!! انا ماقلتش اسعد على فكرة .. انا باتكلم فى اريح

اصل النكد موجود فى الدنيا كده كده .. نجريله ليه؟
المشاكل هاتيجى هاتيجى .. مش مستنيانا نسعالها

الخطوة اللى تجيب التعاسة و الاحساس المستمر لأغلب الوقت بعدم الارتياح هى اكيد خطوة مش صحية الا لو فى ضرورة تحتم ده .. و اكيد هنا كل واحد له الضرورى بتاعه

الشغلانة اللى تموت حياة الواحد جوا او برا بلده لايمكن تطوره لانه ببساطة مات من جوا .. مفيش نبتة عشان تتزرع

بس السبب فى كل ده فى أغلب الاحيان ان فى التصاق فى ذهننا بين النكد و الحكمة .. التعاسة و الكبر .. البؤس و العظمة!!
بشكل بيخللى ناس كتير تتمسك بمصادر النكد فى حياتها لان ده فى نظرها هايكسبها التجلى ده.
خصوصا فى العلاقات .. فى بنات كتير معتقدين فى ان الرومانسية معناها النكد .. قال يعنى
Agony
و كأنها كل يوم بتعيط فيه .. ده تأكيد على عميق حبها ليه و اثبات لصلابة رومانسيتها لاننا كلنا اسرى لصورة "الحكيم التعيس"
الله يسامحه شكسبير!! لما حكى ان روميو بكى من فرطة الشغف و اللهفة , الناس كبرت متخيلة ان هو ده الشكل الامثل للرومانسية الحقة , ناسيين ان الكلام فى زمن الناس كانت فاضية فيه .. كم و نوع التحديات اللى كانوا بيواجهوها كان مختلف ... و اكيد ناسيين ان روميو كان مكملش 20 سنة!!!!!!

الحب بيحلى الحياة مش بيكبر الهم .. الحب بيصبر على المشاكل اللى اصلا موجودة مش يزودها
الحب بيخلى القلب فى حالة ابتسام مستمرة اغلب الوقت و هو بيواجه الحياة , مش علاطول معصور بالترقب و الاحساس بانعدام الامان


مرة واحدة من صديقاتى المتزوجات -اللى للأسف كل ملامح وشها و حركات جسمها لا توحى بأى شىء غير فقدان الامل - بتجاوب على واحدة تانية بتسأل "انتى اتغيرتى اوى..ايه اللى حصل؟" قالتلها "كبرت!!"

هو الكبر معناه نجرى للنكد .. ولا معناه اننا بقينا بنقدر اكتر راحة البال و السلامة مع النفس؟


الشجاعة:

* اذا كان الانسان غلط مرة فى خطوة .. الحكمة الحقيقية هى فى انه يعترف بده قدام نفسه . الحكمة انك تدوس فرامل و ايدك على الفتيس و تفكر ... و اما تتأكد انك فى الطريق الغلط , تلف و ترجع
* كبر السن فى ان الواحد مايخافش انه يبتدى من الاول
* العظمة انك تعرفى فعلا انتى عايزة ايه و تسعيله
* فى ناس كتير اوى غيرت التاريخ بأنها كانت شجاعة فى انها "تلف و ترجع " .. و ماخافتش تعترف بالفشل
* و مين قال انه لما يبقى قرارك هايبقى اعتراف بالفشل؟ ده هايبقى اختيارك.


الست اما بتتجوز جوازة تعيسة و تعيش عمرها فى حسرة و تشوف فى عينيها كل الغيرة من اى ضحكة من القلب لأن كل ضحكها بقى تمثيل على نفسها فى مسرحية مستمرة بتأديها للحياة عشان تحاول تفضل بطلة رواية "الزوجة المثالية" اللى ضهرها علاطول واجعها و توطى بيه .. و اللى شايلة طفلها و عينيها كلها ضلمة و هى باصة على طفلها التانى ... و اللى واقفة فى المطبخ بتطبخ ,و تلبس عيالها فى النادى .و تخدم على الضيوف فى صالون بيتها بشكل حرفى غاية فى الميكانيكية, لانها تحولت الى "روبوت زوجة" ... و المأساة الحقة انها متصورة انها بكده اكتسبت الحكمة ... و العقل .. و السن ... و العظمة
لأة... انتى اللى تاعسة نفسك
آه اما بنكبر مسؤلياتنا بتزيد .. و فواتيرنا بتزيد .. و رفاهيتنا بتقل و دلعنا بيقل
بس محدش فى الدنيا يقول ان احنا نسعى لده بنفسنا

الزوجة التعيسة مش هاتجيب غير اطفال تعساء!
اما تبقى مكسورة هاتكبرى بنتك على الشموخ ازاى؟
اما تعيشى راسك مطاطية عشان "لازم استحمل عشان عيالى" بنتك هاترفع راسها ازاى؟
اما بنتك تشوفك بتاخدى بالقلم و تسكتى ... هاتقول هى لأ للاهانة ازاى؟
اما تتشتمى و تتهانى و تتسفهى فى وجود ابنك ... هايطلع محترم ازاى؟
بلاش كل ده .......هما هايحترموكى ازاى؟؟؟؟
هايحبوكى طبعا! بس مش هايحترموكى .. فى احسن الفروض هايشفقوا عليكى


القوة:

* كل اختيار له تمن
* كلما تزيد قيمة الشىء , يرتفع تمنه
* مفيش فى الدنيا اغلى من حرية الروح
* اللى حاسبة الناس و المجتمع و الاهل و الكلام و السمعة و زنقة الفلوس .. ماداقتش طعم النزاهة , احساس الاختيار , روعة الاطمئنان


عارفة يعنى يبقى ماعكيش فلوس كفاية بس مش خايفة؟
متخيلة انك ممكن تعيشى بدخل اقل بكتير من اللى متعودة عليه و تبقى اسعد؟
فاهمة يعنى ايه تبصى لورا و تقولى "الحمد لله" و تسمعى عقلك و قلبك و روحك بيقولولك "شكرا .. ريحتينا"؟
الرجالة هاتطمع فيكى؟ وارد! .. بس تقدرى تأكديلى انهم ماكانوش بيطمعوا و انتى متجوزة؟
اهلك هايلوموكى؟ الاهل ماواراهمش غير اللوم .. بس بعد فترة لو بيحبوكى بجد اكتر من اى حاجة .. هايفرحوا لفرحة قلبك
بناتك هايوقولولك مفيش عرسان هاتجيلنا؟ قوليلهم العريس اللى يمشى عشان انا مطلقة مش عايزينه
المشكلة فيكى انتى .. انتى اللى غرقانة فى فكرة "هاعيش ازاى من غير راجل" .. انتى اللى مش حرة من جوا نفسك

لأة .. انتى حرة
مولودة حرة
عيشى حرة .. جربيها .. ادى لنفسك فرصة ..