Sunday, November 30, 2008

39 - التعاسة مش عظمة ... و البؤس مش حكمة



هخش فى الموضوع على طول

المواجهة:

* اما تبصى لحياتك من يوم ما اتخطبتى و تلاقيها اغلب الوقت اتمليت بنكد و هم و خناق و توتر ... يبقى انتى فى علاقة غير صحية

*
اما تتجوزى جوازة و بعد فترة , كل ما تبصى من برا تشوفى نفسك مكسورة, حزينة , خايفة , مش متطمنة , بطنك قالبة , ملامح وشك كلها فقدان امل ... يبقى انتى فى جوازة غير صحية

*
اما تسافر بلد تانية لشغلانة عشان تبنى نفسك بقرشين و شوية خبرة و متعرفش تتأقلم مع الدنيا و يومك يفقد كل طعم و الإحساس بالمرارة يملى حلقك، وعينيك تعكس لك كل صورة بشكل حزين ... يبقى انت اخدت قرار مش سليم

هو احنا ليه بنتعب؟ مش عشان حاجة أاكبر احنا محتاجينها او عايزينها ؟ .. طيب
احنا ليه بنحب؟ بنتجوز؟ بنشتغل؟
ما هو البنى اكيد متوقع يكون فى سبب لكل خطوة بياخدها .. على الاقل بعد سن معين. و الا يبقى بيتصرف من غير اى خطة زى الاطفال
الهدف من كل تعبنا فى الدنيا ان احنا نحاول نوصل لشكل حياة لايق علينا و يوفر اهم احتياجاتنا - قدر المتاح- و الأهم،عشان نوصل لشكل اريح!! انا ماقلتش اسعد على فكرة .. انا باتكلم فى اريح

اصل النكد موجود فى الدنيا كده كده .. نجرى له  ليه؟
المشاكل جاية جاية .. مش مستنيانا نسعى لها

الخطوة اللى تجيب التعاسة و الاحساس المستمر أغلب الوقت بعدم الارتياح هى اكيد خطوة مش صحية الا لو فى ضرورة تحتم ده .. و اكيد هنا كل واحد له الضرورى بتاعه

الشغلانة اللى تموت حياة الواحد جوا او برا بلده لايمكن تطوره لانه ببساطة مات من جوا .. مفيش نبتة عشان تتزرع

بس السبب فى كل ده فى أغلب الاحيان ان فى التصاق فى ذهننا بين النكد و الحكمة ،التعاسة و وكبر السن، البؤس و العظمة
بشكل بيخلى ناس كتير تتمسك بمصادر النكد فى حياتها لان ده فى نظرها هيكسبها التجلى . وده
خصوصا فى العلاقات،فى بنات كتير معتقدين فى ان الرومانسية معناها النكد .. قال يعنى
Agony
و كأنها كل يوم بتعيط فيه، ده تأكيد على عميق حبها و اثبات لصلابة رومانسيتها لاننا كلنا اسرى لصورة "الحكيم التعيس"
الله يسامحه شكسبير!! لما حكى ان روميو بكى من فرطة الشغف و اللهفة , الناس كبرت متخيلة ان هو ده الشكل الامثل للرومانسية الحقة , ناسيين ان الكلام فى زمن الناس كانت فاضية فيه .. كم و نوع التحديات اللى كانوا بيواجهوها كان مختلف ... و اكيد ناسيين ان روميو كان مكملش 20 سنة

الحب بيحلى الحياة مش بيكبر الهم.
الحب بيصبر على المشاكل اللى اصلا موجودة مش يزودها
الحب بيخلى القلب فى حالة ابتسام مستمرة اغلب الوقت و هو بيواجه الحياة، مش على طول معصور بالترقب و الاحساس بانعدام الامان


الشجاعة

*
اذا كان الانسان غلط مرة فى خطوة .. الحكمة الحقيقية هى فى انه يعترف بده قدام نفسه . الحكمة انك تدوس فرامل و ايدك على الفتيس و تفكر ... و اما تتأكد انك فى الطريق الغلط , تلف و ترجع
*
كبر السن فى ان الواحد مايخافش انه يبتدى من الاول
*
العظمة انك تعرفى فعلا انتى عايزة ايه و تسعى له
*
فى ناس كتير اوى غيرت التاريخ بأنها كانت شجاعة فى انها "تلف وترجع " و مخافتش تعترف بالفشل
*
و مين قال انه لما يبقى قرارك هيبقى اعتراف بالفشل؟ ده هيبقى اختيارك


الست اما بتتجوز جوازة تعيسة و تعيش عمرها فى حسرة و تشوف فى عينيها كل الغيرة من اى ضحكة من القلب لأن كل ضحكها بقى تمثيل على نفسها فى مسرحية مستمرة بتأديها للحياة عشان تحاول تفضل بطلة رواية "الزوجة المثالية" اللى ضهرها على طول واجعها و توطى بيه،واللى شايلة طفلها و عينيها كلها ضلمة  وهى باصة على طفلها التانى،واللى واقفة فى المطبخ بتطبخ ،و تلبس عيالها فى النادى ،و تخدم على الضيوف فى صالون بيتها بشكل حرفى غاية فى الميكانيكية لانها تحولت الى "روبوت زوجة" ... و المأساة الحقة انها متصورة انها بكده اكتسبت الحكمة ،وخلاص عملت كل اللى عليها ومتشبعة بفكرة انها ضحيت بنفسها.
لأة... انتى اللى تاعسة نفسك
اه اما بنكبر الحكاية بتبقى اصعب والمسئوليات والمشاكل بتزيد،بس محدش فى الدنيا يقول ان احنا نسعى لده بنفسنا

الزوجة التعيسة مش هتجيب غير اطفال تعساء
اما تبقى مكسورة هتكبَّرى بنتك على الشموخ ازاى؟
اما تعيشى راسك مطاطية عشان "لازم استحمل عشان عيالى" بنتك هترفع راسها ازاى؟
اما بنتك تشوفك بتاخدى بالقلم و تسكتى،هتقول هى لأ للإهانة ازاى؟
اما تتشتمى و تتهانى و تتسفهى فى وجود ابنك،هيطلع محترم ازاى؟
بلاش كل ده .......هما هيحترموكى ازاى؟؟؟؟
هيحبوكى طبعا! بس مش هيحترموكى،فى احسن الفروض هيشفقوا عليكى


القوة

*
كل اختيار له تمن
*
كلما تزيد قيمة الشىء , يرتفع تمنه
*
مفيش فى الدنيا أغلى من حرية الروح
*
اللى حاسبة الناس و المجتمع و الاهل و الكلام و السمعة و زنقة الفلوس،ماداقتش طعم النزاهة , إحساس الاختيار،وروعة الاطمئنان


عارفة يعنى ايه يبقى معكيش فلوس كفاية بس مش خايفة؟
متخيلة انك ممكن تعيشى بدخل اقل بكتير من اللى متعودة عليه و تبقى اسعد؟
فاهمة يعنى ايه تبصى لورا و تقولى "الحمد لله" ؟
الرجالة هاتطمع فيكى؟ وارد...  بس تقدرى تأكدى لى إنهم ماكانوش بيطمعوا و انتى متجوزة؟
اهلك هيلوموكى؟ الاهل ماواراهمش غير اللوم، بس بعد فترة لو بيحبوكى بجد أكتر من اى حاجة، هيفرحوا لفرحة قلبك
بناتك هيوقولولك مفيش عرسان هتجيلنا؟ قوليلهم العريس اللى يمشى عشان انا مطلقة مش عايزينه
المشكلة فيكى انتى،انتى اللى غرقانة فى فكرة "هعيش ازاى من غير راجل"... انتى اللى مش حرة من جوا نفسك

لأة .. انتى حرة
مولودة حرة
عيشى حرة ... جربيها ... ادى لنفسك فرصة

36 comments:

77Math. said...

لافضَ فوك يا فتاة

:)

Anonymous said...

بتنجان كل دا بتنجان

Anonymous said...

eh ya 2eman da hya talba m3aky nakad we ka2aba keda leh ..2etl3y mbn elfoka3a a7san

Anonymous said...

المهم ان اكتر حاجه الواحد بيكرهها ف الدنيا نوعية الكلام اللي انتي بدأتي تكتبيه دا
مش لاقيه حاجه تقوليها اسكتي
متلبخيش ...اهو الابتذال بدأ ييجي اهو
يا ستي كلامك دا علي شاكلة الستات اللي ماشيه مع سوزان مبارك والله
وبعدين دا مش موضوع مستاهل تتكلمي فيه وانا حره وانا فلانه
يختي لما تتجوزي وتتعسي اطلقي
كل واحد له اعتباراته ف قرارته
المهم كل واحد يرتاح
وانتي كمان تريحينا من الابتذال دا
يباااااااااااي

Anonymous said...

وبمنالسبه تاني سوري يعني ع النبره دي
بس كلامك والطريقه حفزتني جدا
اصل انا كان عاجبني المدونه ومش عاجبني النبره دي علي رأي الانونيمس الزميل اللي فوق
اطلعي من القوقعه بقي احسن
وسوري تاني

77Math. said...

اللي بيكتب الكلام دا اللي إيمان كتبته مش كتبه تسلية ولا عشان يكيد في الناس اللي مش بتحب تقرأ الكلام دا لاسمح الله!

اللي كتبه شاف قصص ناس كثير مكبوتة وخايفة ومقهورة وساكتة ومظلومة وراضية !

مجرد التعبير عن الأمر بالكتابة لايعني أنها تقيم الدنيا ولا تقعدها ..

لا يعني أنها ليست إنسانة طبيعية تمارس كل الطقوس البشرية شديدة العادية !

لا يعني وجود أيّ قواقع في أية بحار !


دائما ما يتخيل الناس أننا بدفاعنا عن بعض القضايا أو بقناعتنا ببعض الأفكار أننا لا نعيش، وأننا ندفن أنفسنا في الرمال والتهديد بعدم الخروج إلا بعد حدوث كل ما ندافع عنه !

بالعكس

نحن - أتحدث عن نفسي أولا- نكتب ما لا يعجبنا .. ونتمنى أن يتغير

لأننا رأينا ما عقدنا منه كفاية

وبالتأكيد إن حدث لنا هذا الأمر فلن نسكت .. لأننا خلقنا أحرارًا

معلش يا إيمان .. لكنني بحكم الـتشابه .. شعرتُ أنّ عليّ أن أقول شيئا !

تحياتي

77Math. said...

وبالمناسبة زي ما في ستات ينطبق عليها المقال ..

في رجال ينطبق عليها أيضًا

!!

Eman Hashim said...

هو فى كم انونيماس؟
عشان اعرف بكلم كم واحد بس
عموما الفقاعة دى معناها انه حد من عندى على الفيس بوك
بس مش عايز يقول اسمه
و ده لوحده كفاية .. اللى خايف يقول هو مين كلامه صعب اوى يتعمل بيه
يعنى من صيغة الكلام انك راجل .. الراجل يقول هو مين .. لو راجل !
لو مش لاقية اقول حاجة مش هاقول مانيش باقبض بالكلمة يعنى
انا فعلا عايزة اقول الكلمتين دول

ماعرفش مين اللى ماشية مع سوزان مبارك دى , ولا بتعمل ايه

عموما على رأى مروة رخا .. انونيماس يعنى "نكرة"

Eman Hashim said...

نبرة ايه اللى اتغيرت فى كلامى
لأ معلهش ادعوك الى قراية كلامى القديم .. اصل النبرة هى هى
يمكن كنت بتقرا مدونة تانية

Eman Hashim said...

77math:
ردى يا حبيبتى
اتفضلى اهلا وسهلا


دائما ما يتخيل الناس أننا بدفاعنا عن بعض القضايا أو بقناعتنا ببعض الأفكار أننا لا نعيش، وأننا ندفن أنفسنا في الرمال والتهديد بعدم الخروج إلا بعد حدوث كل ما ندافع عنه !

بالعكس

نحن - أتحدث عن نفسي أولا- نكتب ما لا يعجبنا .. ونتمنى أن يتغير

لأننا رأينا ما عقدنا منه كفاية

بالضبط كده
و انا بقى اللى هاقولك "لا فض فوك يا قتاة"

بنكلم نفسنا

77Math. said...

لأ مش بنكلم نفسنا ..

بنحاول نقنع الناس دي بإنها تاخد خطوة في الواقع

لأنهم بيبقى نفسهم يتخلصوا من علاقاتهم بس مش قادرين والأسباب أسخف من كوننا أحياء !!

المهم

لو هم مش عايزين .. بنتضايق لهم آه ودا اللي بيخلينا نكتب

مش معنى كدا أبدًا إننا متقوقعين ولا حاجة

احنا قرفانين بس !

تحياتي لكِ

Anonymous said...

2na sade2 msh anonymous wllahy:D...nice ya eman...3agebny f klamk 2no waqe3y 2wy... dah 3'er 2n 2sloobek bgd 7lw 2wy...ana lmma babda2 msh ba3rf 2a2of 2ella lmma 25allas 2l mqala kolaha:)...nice work and hoping 4 more

Eman Hashim said...

مش فاهمة
انت انهى انونيماس فى ال4 اللى فوق؟

=p=s=y=c=h=o said...

w hena el so2al
ya3ny eh 7ora!

Eman Hashim said...

تقصدى ايه؟

insomniac said...

يسلم فمك

يا ريت ناس كفاية بتفكر بنفس المنطق... المشكلة اللي بشوفها ان اللي بيعيشوا دور التضحية بيستكتروا على غيرهم السعادة اللي موجودة في حرية الإختيار و بينسوا ان اللي عايز يضحي بجد عشان اي اعتبارات، مش المفروض بقى يستنى مقابل و لا يلوم الناس على تعاسته!!

بحس كتير ان ثقافة النكد و التعاسة في مجتمعنا مرتبطة بالعظمة و ان الناس سفهت من معنى التضحية لمجرد ان معندهمش الشجاعة يعترفوا بالغلط حتى لو مش هيقدروا يصلحوه... بالعكس، الأم ممكن تلوم ولادها لإستمرارها في زيجة تعيسة و تعايرهم "بتضحيتها" لأنها متوقعة منهم عرفان بالجميل همة مش قادرين يشوفوه و لا يحسوا بيه لأنها من غير ما تحس تعستهم معاها

طولت عليكي، بس بجد انتي قلتي اللي بيبقى نفسي اقوله لكل اللي بيصمموا على استمرار زواج فاشل "عشان خاطر العيال".. حاجة تعصب

An Egyptian said...

بلوج جميل يامزة

Eman Hashim said...

شكرا بس هو مرة قطة و مرة مزة؟؟ \

Insomniac:

متشكرة على التشجيع
و فعلا من اسخف الاشياء هو ان زى مانت قلت كده بيبقى كمان فى مطالبة ضمنية بالمقابل
و دى نقطة مهمة جدا

Marwa Rakha said...

فعلا يا أيمان التعاسة مش عظمة و البؤس مش حكمة .. فى ناس كتير بتخلط ما بين التضحية و البؤس

لكن تقولى لمين .. الحرية اللى انت اتكلمت عنها مسؤولية .. فى ناس كتير بتخاف من المسؤولية ... مسؤولية الفشل و الغربة و الشقاء و الحرية

و فى ناس تانية بتستعذب الالم و مع الوقت بتتحول المعاناه لهويتهم و حكايتهم عن البؤس و التعاسة بتتحول الى المصدر الوحيد للاهتمام بيهم ... و كل واحد بيغنى على الربابة بتاعته

a divorcette said...

Eman,

can i link this post from my blog?? with all your copyrights of course...

Eman Hashim said...

divorcette طبعا يا
دى شىء يزيدنى شرف يا فتاة

عندك حق يا مروة .. جزء كبير من الموضوع
بيبقى خوف من تحمل المسئولية
و مروة هنا قالت نقطة مهمة جدا .. ان فعلا فى ناس كمان بتتحول الى ابطال مآسى اغريقية وهمية و بيطالبوا الناس بانهم ينبهروا و يتأثروا بيها

Anonymous said...

بصي انا موافقه معاكي جدا ف الفكره دي
وان فيه ستات كتير الرومانسيه والنبل عندهم مرتبط بالتعاسه والاستنزاف لمشاعرهم ورغباتهم وكل حاجه حلوه ف حياتهم
وانا شخصيا عملت كدا لما لقيت نفسي بتعس ...عرفت ان مفيش حاجه اسمها كدا لازم نكون لايقين علي بعض ومتفاهمين ومش لازم مهدش الدنيا عشان افضل النبيله المتحمله ..وفعلا قلبت الدنيا وبقيت نفسي
بس اللي مش حباه طريقة انا لازم ابقي حره ولازم نبلور اي حاجه ف اي شكل ونعمل تجمعات وننادي الموضوع بسيط لدرجة ان الهتاف بيه أرف ( دا رأيي)
وحاجه كمان ان فيه ستات كتير عاجبها حالها بس ولو الدنيا رجعت بيهم تاني مش هيختاروا غير اللي هما فيه بس لازم يصعبنوا ولما يقعد يتكلموا يقولوا الكلام اللي يخليكي تقولي كدا ...اللي مش مرتاح بجد وحياته مستحيله وهيموت بيفكه ومفيش داعي للهوسه دي بردوا

Eman Hashim said...

هاقولك على حاجة
و ممكن تشوفيها كلام مالوش منطق

فى ناس بتتعرض لمشكلة و بتحلها, ده بيديهم احساس انها "عادى" او "بسيطة" و ان كتر الكلام فيها على حد تعبيرك (ارف)

لكن اللى انتى يمكن مش واخدة بالك منه ان الامور مش بالوضوح ده عند ناس كتير اوى
انا فى مرحلة عمرية بقيت شبكة علاقاتى تشمل المتزوجات و الغير متزوجات
و اما اقولك ان فى مش مدركين ده , للأسف باتكلم عن حاجة شوفتها

واضح انك عاملة زيى .. بتشوفى الحاجة فى حجمها الحقيقى بوضوح و مش بتحبى الدراما
و ده بيخللى الكلام فيها بيانلك هوسة
بس فى ناس ( انا منهم ) مش بيعرفوا يسكتوا عن اللى من وجهة نظرهم ظلم
و عايشين بيحاولوا اى محاولة للتغيير . خصوصا ان الناس دى الحلول الفردية الشخصية بالنسبة لها مش كفاية

شكرا على الرد و ان كنت اتمنى اعرف انا بكلم مين

Anonymous said...

ماشي يا ستي
اولا انا نورا
ثانيا يعني انا مش مسألة شايفه الامور بحجمها الحقيقي اللي ناس كتير مش شايفاه
انا بس عندي قناعه بان كل واحد بيختار لنفسه احسن وضع ممكن ودايما فيه قشايه كل بني ادم بيتعلق بيها ولما مبيبقاش فيه اي حاجه الشجاعه بتيجي والواحد بيقلب الترابيزه فكل واحده ليها اسبابها اللي بينها وبين نفسها اللي مخلياها مستحمله اي حاجه والبني ادم اللي يقولك انا مستحمل عشان مش عارف ايه ومش عارف ايه ولكلام دا لكن لو بخاطري كنت عملت كذا دي واحده كدابه وبتكدب حتي علي نفسها لان الكدب والادعاء دي ماسكين ف الستات جدا . وبعدين لما واحده مش راضيه تتطلق عشان المجتمع ميبصلهاش بصه وحشه طب ما الوضع الاجتماعي فارق معاها ودي نقطه وحاجه كمان مش هتقولنا عليها عشان هي بطبيعتها كائن بيكتسب احساسه بالنبل والجمال من خلال توضيع وضعه المعذب امام الاخرين وكل ما الناس قالت يعيني وهو متحمل كل ما احساسها بالنبل يكبر وكل واحد متعلق من عرقوبه وكل واحد بيشوف حاجه تملاه وبردوا متوصليش للي جو اي ست وهتفضل العلاقه كدا بين الراجل والست وهتفضل الست تقول كدا ففعلا بحس ان الكلام دا مسخ اوي للسبب دا لانه ف نظري لما نقول كدا احنا بنساهم ف جزء من الديكور اللي بيحسسها بالتعذيب وبالتالي بالعظمه
ـــــــــــــ
ملحوظه دا ميمنعش ان ف رأيي ف ستات فعلا معذبه ودول غالبا ظروفهم صعبه وبعيدي كل البعد عن اغلب الستات وكمان غالبا بتكون ظروف حياتيه
وشكرا ع الرد

ابن المليونير said...

أستاذة إيمان
أنا معاكى فى التراجع عن الخطوبة لانها صنعت لذلك..وأيضا التراجع عن العمل مادام لن يتأثر بهذة الخطوة احد..أما عن الزواج فأعذرينى فانا ضد مبدأ الطلاق تماما الا فى الحالات التى لا علاج لها
فليس معنى إحساسانا بالتعاسة أو عدم الإرتياح زى ما حضرتك قلتى ان نتسرع بطلب الطلاق
اظن أن على الإنسان ان يحتمل..ليس عن خوف او ضعف بل يحتمل بقوة المواجهة ..مواجهة المشاكل وليس الهروب منها.. يحتمل بمحبة..محبة لاولادة
و للطرف الاخر كإنسان قبل ان يكون شريك للحياة
نحن نتعامل مع بشر و ليسوا حيوانات قاسية ( وإن كانت حتى الحيوانات تحن و تألف للإنسان) ..لذا فلنصبر على بعض..فلنعضض بعض.. فلنساند بعض..على المرأة (كما الرجل) أن تتفهم من امامها..مادمت ترى بقايا إنسان فى رجلها فلتحاول ان تُكملة و تصلح مسارة.. وهل يمل الطبيب من علاج مريضه حتى و إن رفض المريض العلاج ..والله قادر على تغيير القلوب الحجرية ليحولها
إلى قلوب لحمية تشعر و تتفاعل

و حتى فى الحالات التى لا جدوى من علاجها أو المحاولة معها فقرار الطلاق صعب..انهم يخشوا من الغد و ما سيفعلة بهم ..يخافوا على اولادهم و كيف سيحيوا دون أب( وجود أب حتى لو ظالم أفضل من عدمة)

الزواج ليس طريق نغيرة بسهولة بل هو إطارات السيارة ذاتها فهل نستغنى عن احد الإطارات و نقول هذة شجاعة أم تهور و مجازفة شديدة لحياة الأسرة بداخل السيارة
إن حدثت أى مشكلة بالسيارة فلننزل جميعا و نساعد بعض و نتكاتف حتى نحل الأزمة اما ان يهرب احد الافراد و يذهب ليجد وسيلة اخرى ليكمل حياته فاكيد دة شخص غير مسئول او محب لعائلتة و لكنة انانى و يحب ذاته و يرغب فى خلاص نفسه فقط
تحياتى و اسف إن اطلت

جعلوني مريض نفسيا said...

كل عام وأنت والأسرة والأمة الأسلامية بخير

batates_777 said...

Bravo !
sa7 awiii !!

Eman Hashim said...

و انت طيب يا جعلونى

شكرا يا بطاطس

Anonymous said...

ربنا يوعدك ونشوف هتتصرفى ازاى
على فكره انا مش متضايق من كلامك ولا بنتقدك
انا كنت بفكر زيك كده
بس لما اتحطيت فى الموقف ده
اكتشفت ان فى حسابات تانيه كتير

Eman Hashim said...

زى ايه؟؟
ما صح فعلا .. لو فى حاجة انا مش فاهماها عشان ماتحطيتش فى الموقف ده يا ريت تفهميهالى
لو ممكن هاكون بجد سعيدة

Anonymous said...

very severe against the romanticism of Shakespeare.
Romeo loved Juliette, a romantic love, an emotional attachment, but Shakespeare does not speak marriage, nor couple.
A couple is romantic love or reason?

Eman Hashim said...

I don't think I totally got you, can you please elaborate more?

Amr el hamalawy said...

Can anybody before looking at the empty part of the glass give a good glance at the full part and say al7amdo lellah . I am happy with all the blessings allah gave to me ?
With such ( mazlom -da7eya - ta3esa - bo2s ) . All the women will ask for the divorce . And all the men will run away from responsibility .... Happyness is an enternal status . And satisfaction is the fruit of wisdome.
Be happy .. Be satisfied .... Do your best and whatever the result ... Be sure that it is good for you .
Al 7amdo lellah rab el 3almeen

Eman Hashim said...

الحمد لله رب العالمين

اللى باتكلم عنه يا عمرو هو فى حالة ان الانسان اخد اختيار من وجهة نظره هو الشخصية خاطىء
و كل اللى بطالب بيه هو اننا نكون على قدر من المسئولية اننا نتحمل نتيجة اخطائنا بشجاعة و نصلحها

بس مش اكتر

maissan said...

I will go home and read your blog ( 3ala rawa2an) ....I need a boost in my revloutional feeling against what I can't change...

Eman Hashim said...

waiting for your feedback, maissan