27 - حصة احياء

اللى بيتكسف يمشى
و اللى بيخاف يروح
و الى يعرف ماما يبقى يطمن عليها من بعدى


انا بقالى فترة عاملة مش واخدة بالى و الناس ياما علقت على  خبر من الدستور و انا برضه ولا كأنى هنا.

لكن لأة ... انتهى ... حان وقت درس الاحياء

احنا كبار و مش هانتكسف من بعضينا

1- Pineal Gland

هى واحدة من الغدد الصماء و موجودة فى منتصف المخ جوا و صغيرة جدا فى الحجم. تفرز مادة الميلاتونين اللى ليها وظيفتين:
-وظيفة لها علاقة بالنوم و الصحيان
-وظيفة انها تمنع الجسم من النمو الجنسى

و دى يا حلوين موجودة فى الذكر و الانثى

عند سن البلوغ, تنكمش هذه الغدة و يقل معدل الميلاتونين فى الدم عشان بيدأ الجسم فى مرحلة البلوغ

2 - Puberty البلوغ

هو مصطلح يصف مجموعة الخطوات اللى بياخدها الجسم عشان يتحول الانسان من طفل الى بالغ قادر على التناسل.
الحكاية بتمشى ازاى؟

1 - ادراة كده فى المخ تبعت مرسال الى الاعضاء التناسلية ( الخصية و المبيض .. ملناش دعوة بحاجة تحت) تقولهم يالله شوفوا شغلكوا عشان البنى آدم ده عايزينه يبلغ
2- الاعضاء التناسلية بتعمل مرسال زى ايميل كده و تبعته لكذا جهة فى الجسم:

المخ ( ادارة الهوية الجنسية) و العظام و العضلات و الثدى و جهات تانية كتير
3- يقوم الجسم واخد بقى الخطوات:
المخ يبدأ يعرف الانسان - يا ذكر انت ذكر و يا انثى انتى انثى- و تبدأ سلسلة التغيرات بناء على كده زى مثلا فى الشكل و الطول و توزيع العضلات و الدهن و الصوت و الدنيا دى

المراسيل دى عبارة عن اشرات كميائية اسمها هرمونات

كل ده برضه يا حلوين بيحصل للذكر و الانثى

قبل البلوغ.. الفرق الوحيد بين الانثى و الذكر هو وجود الاعضاء التناسلية الغير عاملة


البلوغ علميا كمصطلح يصف حالة الجسم مع بداية عمل الاعضاء التناسلية ( تانى الخصية و المبيض مش اى حاجة تحت) و
بداية تحديد الفروق الجسمانية بين الجنسين اللى بتتسمى السمات الجنسية الثانوية
Secondary sex characteristics

احد هذى المراسيل زى ما اتفقنا بيروح لادارة الهوية الجنسية فى المخ بيفهمه بقى... و الله الانسان ده بلغ جنسيا كذكر ( او كانثى)
و بيطالبه بانه يعمل اللازم عشان يبتدى يحس بالانجذاب
libido

برضه يا عيونى احنا بنتكلم عن الذكر و الانثى و برضه ماجبناش سيرة اى حاجة تحت . كله لجان فى المخ عاملة اجتماعات سوا عشان بياخدوا قرارات مصيرية حتمية

احد اهم مهام الادارة بتاعت الهوية الجنسية دى هى مشورع مهم و حيوى اسمه المراهقة

3 - Adolescence المراهقة

هى المرحلة الانتقالية اللى بتطور الانسان من طفل الى انسان كبير
الانتقال ده يشمل تغيرات بيولوجية و سيكولوجية و اجتماعية

تختلف النظريات فى العلاقة العمرية بين البلوغ و المراهقة و ان كانت فى الاطار العام تتفق على انهم قريبين من بعض

بيقى هنا اللى بيتأثر بالمجتمع هو المراهقة و ليس البلوغ

و ده معناه ان تحديد الهوية الجنسية امر حتمى هيحصل هيحصل و ان الانجذاب برضه هيحصل هيحصل لكن اللى بيتأثر بعوامل المجتمع و التربية و التقاليد و التابوز هو التعامل مع الواقع ده و التعبير عنه

يعنى اما نربى بنت انها تتكسف تقول الولد ده امور مش معناه انها مش هاتشوفه امور ولا معناه انها مش هاتقولها لتفسها - انا قلت امور مش عاجبها لا سمح الله - كل اللى بيحصل انها لو حاسيتها مش هاتقولها لنفسها و لو قالتها لنفسها فى نفسها كده فى سرها هاتبدأ تتكسف من نفسها و تعيش و تموت مكسوفة من نفسها و من اللى بتحسه

و هنا بنيجى لمرحلة مهمة جدا و هى التوجه الجنسى

4 - Sexual Orientation التوجه الجنسى

هو مصطلح يصف الانجذاب الجنسى و العاطفى و الرومانسى تجاه جنس معين سواء الجنس الاخر او نفس الجنس
Bisexuals الشذوذ -- او اللى هما اى حاجة ماشى دول

دى بقى .. من الاكتر الاشياء الخاضعة للتأثر بالمجتمع و القابلة لكل الخراب و العك
لان اللى بيحصل هو تحديد الجنس بشكل عام بقى .. لاحظوا هنا اننا بنقول عاطفى و رومانسى يعنى مش بس حاجة جنسية .. يعنى جزء مهم من هوية الانسان و اتزانه بينه و بين نفسه و تشكيل علاقاته بالناس بشكل عام بتتكون فى المرحلة دى

هاديكوا مثل يعنى ( و ماتمسكوش فيه و النبى, انا بس هاجيب صورة صارخة لتوضيح الفكرة) فى حالات لما بتتربى البنت فى عالم بدون رجالة و تكبر هى و غيرها على ان الرجالة دى وحوش بشرية و ان اى نوع من انواع المشاعر تجاه اى مذكر هو عيب و قلة ادب و حرام و عار و نيلة و هباب على دماغها و دماغ العيلة كلها, و فى نفس الوقت بتتربى فى وسط كله بنات بمباركة من الدنيا كلها, بيبدأ يتولد عندها ذعر و رعب ثم نفور من الرجالة و ارتياح اكبر مع البنات ... ده مثلا مثلا مثلا يعنى

5 - Clitoris البظر - يا نهار ازرق على الكلام -

البظر ده هو عضو من اعضاء انثى الثدييات ( اللى هما الستات منهم ) موجود اعلى المهبل و مجرى البول و مقابله عند الذكر هو العضو الذكرى اللى وظيفته للذكر توصيل الاحساس بالمتعة الجنسية بالاضافة الى انه فيه مجرى البول. فى حين ان البظر عند الانثى يحمل الوظيفة الاولى فقط, و اللى بيساعد على ده انهم الاتنين (البظر و العضو الذكرى) مليانيين قدر مهول من الاعصاب

هو ده بقى اللى العالم المعاتيه بيشيلوه - كله او حتة منه - اثناء جريمة الختان

يعنى سايبين الشقة كلها و قاعدين فى اودة واحدة ... اقصد سايبين عملية التطور الجنسى كلها و جايين فى الفينيشينج و يتكلموا

يبقى نستفيد ايه بقى يا قطاقيط من درس النهاردة

1 - الهوية الجنسية يبدأ تحديدها فى المخ
2- البلوغ هو المخ بيقول للاعضاء التناسلية تقول للجسم انه ذكر او انثى
3 - الانجذاب الجنسى كمبدأ عملية تبدأ من المخ
4- هاينجذب لأيه بقى و هايعمل ايه وقتها ده اللى المجتمع بيخربه
5- الاحساس بالمتعة الجنسية بيتطلب مجموعة من العوامل السابق ذكرها و بيوصل بكذا طريق احدهم و اهمهم عند المرأة اللى بيتشال فى جريمة الختان ده
6- اغلب الرجالة دى هما اللى بيتهموا زوجاتهم بكل اتهامات البرود و النفور و حاجات من هذا القبيل
7- فى دى بالذات العالم المجانين دول ملهمش دعوة بالسعودية اللى فلقونا بيها و عايزننا تقلدها فى كل حاجة, بييجوا عند دى و لأة . لان الجزيرة العربية كلها مافيهاش موضوع الختان ده


اطن كده اتأكدتوا اننى عانس و حقود و وحشة خالص خالص

References:

Pineal gland
Puberty
Secondary sex characteristic
Libido
Adolescence
Sexual Orientation
Clitoris

26 - الحقد بقى عالمى ..هههههههههههه

http://www.globalvoicesonline.org/2008/05/29/from-the-diaries-of-an-egyptian-sinister-spinster/

الحقد بقى عالمى
مترجم للانجليزية و الفرنسية و الايطالية

25 -الكابل المثالى فى الافراح

من كم يوم اتعزمت على فرح و عرفت سبب جديد انا ليه ( الحمد لله ) عانس

الراجل ( زوج - خطيب - صاحب ) لازمنه فى الافراح معروفة و محفوظة تتلخص فى الآتى

سواق

1 اول لما تبدأ الرقصة التانية .. ارقص معاه عشان الناس تشوف الفستان

شبكة اعد اتمنزر بيها على الناس او هدية اقولهم هو اللى جايبهالى - و ممكن اوكن انا اللى دافعة تمنها

رفيق للسهرة عشان اتأخر براحتى من غير مابقى بنت وحشة بتتأخر لوحدها برا

مهمة الراجل فى الدايرة الراقصة حوالين العرسان محتاجة شوية حنكة و حبة مفهومية

ا - الرقص معايا عشان مابقاش واقفة قرعة من غير راجل و يقولوا عليا برقص عشان الناس تتفرج عليا

ب - يزغر كده كل شوية عشان اقول لصحباتى اصله بيغير عليا اوى

ج - يسيبنى ارقص برضه ما يخنقش عليا يعنى

جيوب الراجل مفيدة جدا لان هى حاجتها اصلا لايمكن تتحط فى الشنطة الميكروسكوبية بتاعت السوارية اللى لازم

امسكها لزوم الانوثة و اللى يادوب تكفى صباع روج و منديل

اخده معايا فى كل الصور عشان اطلع فى كل الصور بكل الكاميرات بتاعت كل الناس

و برضه فى الفيديو بيبقى مفيد اوى عشان اتصور كل شوية بارقص معاه كده كل مالكاميرا تيجى علينا قال يعنى قصة

الحب الملتهبة ان شالله حتى لو احنا متخانقين

شاهد على كامل انوثتى و جمالى لان وجود الراجل فى حياتى هو التوثيق الرسمى الغير قابل للجدال اننى انثى متفجرة الانوثة و جميلة و كده

و كل ده الراجل بيقى ماعندوش مانع يعمله .. و فى مقابل بسيط جدا يتلخص فى انها اول مالبوفيه بيدأ تقوم تعمله طبقين

واحد حاذق و واحد حلو - اللى طبعا هى حافظة الاصناف اللى هو عايزها فيهم- و تتذوق على سنجة عشرة عشان هو يتمنزر بيها قدام صحابه انه الناصح اللى وقع واقف

24 - حق الاختيار

فاكرين الوكالة ؟ و الاستقلال فى السكن ؟ تسمعوا عن العصمة ؟ الخلع ؟ حق الزوجة فى السفر دون اذن الزوج؟ حق الزوجة فى الطلاق بكامل حقوقها فى حالة زواج زوجها من اخرى؟ مطالبة المرأة بمقاعد وزارية مؤثرة ؟ و بتولى مهام محافظات مهمة فى مصر؟

كل دى امثلة من لائحة طويلة من خطوات نفسى اعيش و اشوفها بتتاخد . و كل دى - و غيرها- من المطالب اللى بتثير حفيظة رجالة و ستات كتير. منهم اللى شايفها منافية لطبيعة المرأة او طبيعة الرجل بالمرأة او منافى للشكل السليم للعلاقة دى او منافى للدين .. و كمان منهم اللى بيقول مش دى مشاكل المرأة الحقيقية و اللى لو جيت سألتهم طب ايه هى المشاكل الحقيقية يقول لك مشكلة انها تربى جيل يحمل راية الاسلام و مايغشش و لا يسرق .. و كأن ده هييجى كده من فراغ مش نتاج فكر كامل ناضج و روح حرة منطلقة

بس الحقيقى بقى .. ان اللى (بيغيظ) كل الرافضين هو انطباع القوة اللى بيديه الكلام ده. اللى يبنرفز الناس دى من الكلام هو الرغبة و المحاولة و المجاهرة بل و الدعوة لإمتلاك المرأة حق " الاختيار" ... تختار ايه دى مش قضيتنا دلوقتى.. لكن اللى بيجنن العالم دى هو وجود ستات عارفة ان فى اختيار و انها ممكن تختار اللى هى عايزاه . و ان فعلا ممكن يكون فى شكل حياة تانى غير اللى هم عايزينه

اللى يفرق معايا انا شخصيا و اللى بدافع عنه هو "الايمان بحق الاختيار" والنظرة المتمعنة فى كل اختيار منهم. و ان كل ست فى كل خطوة من حياتها بس تفكر و تعمل بعد كده اللى مناسب ليها و اللى هى عايزاه حتى لو كان اللى كل الناس بتعمله .. تكون بتعمله عشان ده قرارها هى مش عشان الناس بتعمل كده
انا لا يعنينى فى شىء اذا كنتى تجوزى نفسك او توكلى راجل فى كتب الكتاب.. لكن انا بس يهمنى انى افكرك انك ممكن تختارى.. فكرى و شوفى و اعملى اللى مناسب ليكى .. مش من حق حد يسألك بتعمليه ليه .. بس فكرى و اختارى

لان من حقك تختارى

مش معنى كلامى ان اى بنت عايشة مع اهلها ضعيفة و هينة و مش مؤمنة بقضية المرأة و حقوقها .. طالما انه اختيارها مش عايشة كده عشان هى الحياة كده و مفيش شكل تانى..
لان الحقيقة ان فى شكل تانى .. و فى اشكال كتير و كل ست من حقها شكل حياتها يبقى على مزاجها

ما تفتحيش عينين البنات

عارفين الكلمة دى ؟ اللى هو البنت لازم تفضل عينيها مقفولة اهلها بيسحبوها لجوزها اللى ساحبها وراه لحد اما تموت. اوعى البنات تعرف ان فى بديل للسحبة دى احسن بعدين ماتعجبهمش

بطلى نغمة " اعنس احسن دى " اصل طب و بعدين؟ الحكاية دى مخلية البنات قوية و قاعدين من غير جواز
يعنى ايه يعنى ست وتعيش من غير راجل؟ ... ازاى يعنى؟ لأ طبعا ماينفعش .. هى الدنيا اتخلقت كده

ماهم الرجالة اطفال ....على فكرة الحكاية دى بتفرسنى اوى .....انتى مش هاتغيريهم و كتر الكلام ده مش حلو

بصى.. ماتحطيش الطلاق ده اختيار اصلا فى دماغك

الخلع ده بتاع ستات الله اعلم بيهم .. يا بنتى مفيش زى الستر

كل دى اشكال للقمع اللى هدفه الاول و الاخير هو الغاء الاختيار من قاموس اى بنت .. و هو ده سبب الهجوم على الكلام لانه بالفعل بيوضح ان فى اختيارات كتيرة قدام اى ست حرة و ان الست الحرة عمرها ما هاتبجل ضل الراجل ولا ستر المجتمع على فضيحة شجاعتها ولا هتخاف ألقاب مطلقة و الخطافة و العازبة و العانس ... حتى كمان العانس الحقود

23 - من بكين الى القاهرة

نقلا عن الاهرام ... الاثنين 5-5-2008 الصفحة التانية ........ 90% من النساء الحاصلات على الدكتوراه فى الصين يواجهن صعوبات بالغة فى ايجاد زوج مناسب لهن . هذا ما كشفه استطلاع للرأى اجرى بمدينة جوازنج و هو شمل مائة امرأة ؟. الطريف انه خلاف ماهو موجود فى مجتماعاتنا الشرقية, فان السبب ليس هروب الرجل من النساء الاكثر تميزا علميا خوفا من غرورهن او تسلطهن , و لكنه فى الصين يرجع لاصرار المرأة على ان يكون الزوج مكافئا لها فى مستوى التعليم هذا بالاضافة الى حرصها على ان يكون دخله الشهرى مساويا لما تحصل عليه ام لم يزد عنه

انتهى الخبر .... الخبر ده عينى ضربت فيه النهاردة ( اصل احنا من هواة قراية الجرايد فى الحمام و بنسيبهم حبة كده على ترابيزة صغيرة و بعدين نجددهم كل اسبوع ) و قعدت افكر حبة فى الكتير اللى بين السطور فى الخبر ده.

اللى لفت نظرى هو انه باختلاف البلاد و الثقافات بل و الاديان .. بيظل رفض الراجل فى انه يكون جنب اى ست اكثر تميزا منه - فى المقال هنا علميا - و ده يشمل ايضا اى نوع آخر من التميز!

التوافق امر محبب لاستمرار الحياة بشكل اقرب الى الطبيعى قدر الامكان ... لكن عمر مالتوافق كان معناه التطابق .. يعنى ممكن يبقى مسموح بقدر مناسب - متروك لكل اتنين تحديده - من الاختلاف عشان نقدر نوصل ل "التشابه و ليس التناسخ"

كده الكلام حلو ... فين المشكلة؟ المشكلة ان الراجل عنده كامل الاستعداد لقبول هذا القدر من الاختلاف طالما ان الكفة لصالحه.

مش لازم تكون من نفس االمستوى العلمى او المادى او الاجتماعى مادام هو شهاداته اعلى و مرتبه اكبر و طالما انه انشط اجتماعيا و اصدقاءه اكتر و خبرته فى الحياة اوسع ... ده حتى فى الشكل!! آه الشكل ... صحيح هو بحبها حلوة و ممكن احلى منه بس مش اوى و الا بتتحول الحياة الى مرار الشك و انعدام الثقة خصوصا كمان لو اصغر منه بقدر ملحوظ!!

عشان كده الخبر ده - بغض النظر عن مدى صحته لان اللى يمشى ورا احصائيات الاهرام اخرته مش حلوة - مش غريب عليا .. اول ما خلصت قراية قلت " طب ماهو آه .. ايه الجديد يعنى؟" الجديد هو موقف المرأة من هذا الافترى و اللا منطق

فى الوقت اللى الست هنا فى مصر فى أغلب الاحيان بتكون واحد من 3 احتمالات.. الست الصينية كانت اكتر شجاعة و مصالحة مع نفسها فى رأيى
الست فى مصر :

* يا عمرها ما بتدخل نفسها فى اى محاولات حياتية ممكن تحصرها فى دائرة "المتميزات" و ده فى كل شىء و اى شىء لدرجة ان فى اوساط مش مسموح للست الآنسة فيها امتلاك عربية حتى لو فى امكنياتهم يجيبوها لان ده ممكن يخوف العرسان

* يا اما بتاخد من كل جانب القليل اللى تضحك بيه على نفسها و يحفظلها قدر " معقول " محسوب بدقة يميزها عن "بقية العرايس" لكن ليس بالقدر اللى "يوقف حالها" و اكبر مثال على ده بنات كلية طب و اغلب الكليات العملية المرموقة فى مصر اللى بتدخلها البنت للحصول على اللقب بدون اى طموح علمى حقيقى و دول بتنتهى قصتهم مع الطب بالحصول على اللقب بأى شهادة بقى ... بكالريوس ماجستير .. كله اسامى واخداهم من البيت

* يا الفئة التالتة بقى اللى مش بيقدروا يوقفوا نجاحهم بس بيتنازلوا عنه و يرموه فى الزبالة عشان خاطر عيون" العريس " .. كله يهون ( و هى تهون ) كمان ... بيسيبوا الشغل و الدراسة و بيقبلوا بماديات اقل و مستوى معيشة اقل بكتير ... مش رغبة فى الحياة مع هذا الرجل لكن رغبة فى عدم الحياة بدون رجل

اللى عاجبنى فى الست الصينية اوى فى الخبر ده هو مدى حبها لنفسها و اعتزازها بتميزها و صدقها مع نفسها و مع مجتمعها فى رغباتها المشروعة فى الحصول على مستوى حياة افضل عكس بنات كتير هنا بيتربوا على محى اى حاجة ممكن تطفش العرسان و يا ريت احسن و احسن محى هويتها بالكامل

هى هنا - الصينية- مش بس احتفظت لنفسها بحقها العلمى لأ و كمان طالبت بعدم التنازل فى ان يكون شريك حياتها على نفس هذا المستوى علميا و ماديا حتى لو كان التمن فى ده هو عدم الزواج لان الست الصينية - عقبالنا كده يا رب- عرفت ان عدم الجواز مش اخرة الدنيا و ان الراجل مش الغاية من الحياة و ان مفيش حاجة ولا حد فى الدنيا دى يساوى ان البنى آدم يمحى نفسه او يبخسها حقها و ان اللى بيهزأ نفسه لا يمكن يعيش بأى شكل غير شكل " المهزا"

و اللى مش عاجبها كلامى ترميه و تفتكر طبعا ان كل ده عشان انا عانس حقود

22-الاستقلال - فوبيا

فى فكرة عمالة تخمر فى دماغى بقالها فترة .. و كل ما بقولها لحد بلاقى ردود افعال متضاربة و ان كان اغلبها رافض و غير مرحب.
الفكرة ببساطة هى انى عايزة - ان شاء الله - اول ما اقدر اعيش لوحدى ... ايوة ... اسيب بيت اهلى


يعنى ايه؟ و تسيبى مامتك ليه؟
ازاى بنت و تعيش لوحدها ؟ من غير راجل؟
بكرة تندمى على انك عايزة تسيبى اهلك .. و تتمنى اليوم و انتى معاهم
اهه ده اللى خادناه من الغرب
طب ما تستقلى فى الاودة بتاعتك
طب و العرسان؟

الحكاية بمنتهى البساطة ان الانسان بيوصل لسن معين و لمرحلة معينة من النضج بيبقى خلاص كبير على انه يعيش مع اهله. و الاهل فى نفس الوقت مش عارفين يفهموا ان الكائنات اللى كانت لا حول لها ولا فوة من كم سنة خلاص كبروا
كبروا على انهم يتقال لهم ذاكروا عشان الدراسات العليا بنفس الطريقة بتاعت ايام الثانوية العامة
كبروا على انهم يصحوهم بروحوا الشغل زى ماتكون المدرسة
كبروا على انهم يسألوهم بتصرفوا مرتباتكم فى ايه
كبروا على انهم يتسألوا كل يوم رايح فين و هاتشوفى مين و انتى فين دلوقتى و سهرت برا كده ليه
و هم برضه معذورين .. اولا عشان فى أغلب الاحيان تربيتهم اصلا مش مطلعة ناس بتذاكر و تشتغل و تحوش من نفسها و ثانيا لانهم غصب عنهم مش بيعرفوا يشوفوا عيالهم بيعملوا حاجة بطريقة غير طريقتهم - مضمونة النتيجة فى نظرهم - و يسكتوا ... ده فى احسن الفروض المستبعد فيها حب السيطرة
اصلا الطبيعة دى معمولة فينا عشان الدنيا تعمر و عشان العيال تطلع برا البيت و تعمل بيوت تانية - غالبا بعيالهم هما - بدليل ان فى أغلب الاحيان العلاقات الاسرية بتتحسن جدا مع جواز الابناء .

طب و اللى مش عايز يتجوز؟
طب و اللى مش باينلها جواز؟

دول بقى ( و طبعا البنات اكتر ) التعساء ... لان دول محكوم عليهم بكبسة المحشى العمر كله .... " يا أهلك يتحكموا فيكى يا تجيبيلك راجل يقوم بالمهمة دى"

فين الكارثة فى انى اعيش لوحدى؟ مستقلة بالمعنى الكامل مش بمعنى انى اول الشهر هاروح لأهلى آخد منهم الايجار و المصروف و لا زى ما رجالة كتيرة بتعمل يروح يتغدى عند مامته ولا اخته المتجوزة عشان ياكل طبيخ لانه آه عايش لوحده بس مش هايعمل اكل لنفسه - و اكيد اللى مش بيأكل نفسه اكيييييد بيته زريبة- ... ولا هو برضه معناه ان البنت فى اول جوازها مامتها هى اللى بتمشى البيت و المصاريف و بتجيبلها الشغالة و بتقولها تعمل ايه فى كل كبيرة و صغيرة ... الاستقلال المادى و المعنوى اللى يخلى العلاقة مع الاهل فى الاطار الصحى ليها فى المرحلة دى و هو النصح و الارشاد من غير تحكم الاهل و لا مكابرة الابناء!

البيت ده بيت أهلى .. هم اللى عملوه و تعبوا فيه .. العفش ده ذوقهم و التكاليف من جيبهم .. من كم يوم ماما بتجيب ستاير مش عاجبانى قلت لنفسى حقها .. الحياة دى حياتهم , هم اللى كونوها على قد ما سمحت ظروفهم حسب شخصياتهم و اولوياتهم
مش من حقى انا كمان يبقالى بيتى و العالم بتاعى؟؟

الاستقلال مش معناه عقوق الاهل لان اللى بيتجوزوا و يعزلوا اكيد بيبروا اهاليهم . الاستقلال يعنى تحمل الانسان مسئولية نفسه كاملا عشان يتعرف على نفسه صح . اما لو التربية الاتكالية مخلية الانسان غير قادر على تحمل مسئولية نفسه تبقى مصيبة و جواز انسان زى ده جريمة .. جريمة فى حق اللى هايتجوزه و جريمة فى حق العيال اللى هايجيبوهم ... ازاى انسان مايعرفش يتولى مسئولية نفسه يقدر يتحمل حمل اسرة؟؟ الا لو الاهل بقى ممشينها


اما العرسان ... فاللى شايف انى هاسكن لوحدى عشان اعمل قلة ادب يبقى يروح احسن لواحدة من اللى اهلها بالموبايل فوق دماغها كل ساعة - قال يعنى هو ده الضامن الحقيقى للأدب -واحدة تكون بنت عادية ...........
ماتكونش عانس حقود


تحياتى

21 - جواز الانتريهات

أصل ماعندنش صالون فى البيت!!

بغض النظر عن الطريقة ( صالونات .. جامع .. كنيسة .. نت .. مكاتب..) متهيألى ممكن نتفق ان الهدف من النوع ده من العلاقات هو الجواز ... صح كده؟
لو مش صح حد يقوللى يا ريت

هو صحيح مسئولية , بس الجواز برضه حاجة جميلة و حلال و تعطى احساس بالصحبة و ان البنى آدم مش لوحده فى الدنيا دى

بس هل ده كافى انه يكون هدف؟؟
انا اللى اعرفه ان الهدف هو الانسان! انى اقابل فلان و اللى احنا اقتنعنا ببعض و اصبح ( هدف مشترك ) اننا نكون اسرة سوا لكن ان هدفى يكون شبكة منورة و شقة مفروشة بالكامل و فرح صحباتى يغيروا منه - و يا ريت حتى ده مضمون- ده صراحة مش هدف
و لا الخلفة هدف
ولا البيت هدف

فى الجوازات دى عادة اللى بيحصل هو الاتى:

العريس -- يطلع المازورة و برفع المقاسات و يتأكد من انها على مزاجه لضمان عامل الانشكاح
الام -- تتفحص البيت و الاسرة لاستبيان التوافق الاجتماعى لضمان عامل الفشخرة

و اقطع دراعى ان ماكان اصلا من الاول شاف صورة لانه طبعا هايتجوز الشكل و يا ريت الصورة تبقى من فوق لتحت
يعنى انا اتلخصت من الاخر فى لازمة واحدة!!!

آه بيفتح مواضيع .....بس عشان اوافقه فيها
آه بيتكلم عن الستات و مشاكلهم ...... بس عشان يسمع ان آه هو عنده حق
امال يعنى هانفشكل الجوازة!!

هنا طبعا البنت اللى شكلها مش قد كده مالهاش اى سوق لان أول مالراجل بيشوف صورتها بيصرف نظر
و هنا طبعا الراجل مالهوش صورة لانه فى النهاية الراجل مايعيبوش الا جيبه .. لو قرد بس هايجيب شبكة يشيل

يعنى الست سريرو تجيب عيال اولهم بعد 9 شهور من ليلة الدخلة لاثبات حالتها الصحية و رجولته
و الراجل بنك كل اللى عليه يصرف على الجرمأ ده

طب انا عايزة اسأل سؤال..

صعب اوى كده انى الاقى حد عايزنى انا عشان انا؟؟
كتيرة مثلا؟؟؟
مش عشان شكلى مناسب و مش تخينة و سنى يجيب عيال و عيلتى ناس كويسين و سمعتى مافيهاش حاجة و ماتخطبتش قبل كدة؟؟؟ - يا ريت بس كنت بيضة ملفولة القوام تقدس الحياة الزوجية .. كنت يقيت فعلا العروسة اللقطة- و يا سلام لو اصل و فصل و حسب و نسب


حق جوزى اللى ماجاش انه يكون عارف و متأكد انى عايزة اتجوزه هو مش اى حد تانى زى ماده حقى انا كمان
ولادى يبقوا ولاده هو
بيتنا يبقى بيتى انا و هو
هو مش راجل و السلام

و وحياة ربنا لو ماجاش مش البديل انى ( آخد ) اى حاجة و السلام .. اهه يبقى اسمى متجوزة
الجواز مش سلعة فى سوبرماركت بتنقى الماركة اللى عاجباك و مستوفية الشروط بالسعر المناسب اللى على قد اللى فى جيبك

اى حد فينا بيحترم نفسه شوية متهيالى ممكن يشوف انه يستحق من هذى الحياة ذات ال 6 مليار نسمة واحد بس شايفه

THE ONE

انتى اقيم من انك تكونى ( عروسة)
انت فيك حاجات كتير اهم من انك بس تبقى ( عريش)

و الهدف هو مشاركة فلان مش تغيير البطاقة