Sunday, May 25, 2008

25 -الكابل المثالى فى الافراح

من كم يوم اتعزمت على فرح و عرفت سبب جديد انا ليه ( الحمد لله ) عانس



الراجل ( زوج - خطيب - صاحب ) لازمنه فى الافراح معروفة و محفوظة تتلخص فى الآتى


سواق

1 اول لما تبدأ الرقصة التانية .. ارقص معاه عشان الناس تشوف الفستان

شبكة اعد اتمنزر بيها على الناس او هدية اقولهم هو اللى جايبهالى - و ممكن اوكن انا اللى دافعة تمنها

رفيق للسهرة عشان اتأخر براحتى من غير مابقى بنت وحشة بتتأخر لوحدها برا

مهمة الراجل فى الدايرة الراقصة حوالين العرسان محتاجة شوية حنكة و حبة مفهومية
ا - الرقص معايا عشان مابقاش واقفة قرعة من غير راجل و يقولوا عليا برقص عشان الناس تتفرج عليا
ب - يزغر كده كل شوية عشان اقول لصحباتى اصله بيغير عليا اوى
ج - يسيبنى ارقص برضه ما يخنقش عليا يعنى


جيوب الراجل مفيدة جدا لان هى حاجتها اصلا لايمكن تتحط فى الشنطة الميكروسكوبية بتاعت السوارية اللى لازم
امسكها لزوم الانوثة و اللى يادوب تكفى صباع روج و منديل

اخده معايا فى كل الصور عشان اطلع فى كل الصور بكل الكاميرات بتاعت كل الناس

و برضه فى الفيديو بيبقى مفيد اوى عشان اتصور كل شوية بارقص معاه كده كل مالكاميرا تيجى علينا قال يعنى قصة
الحب الملتهبة ان شالله حتى لو احنا متخانقين

شاهد على كامل انوثتى و جمالى لان وجود الراجل فى حياتى هو التوثيق الرسمى الغير قابل للجدال اننى انثى متفجرة الانوثة و جميلة و كده



و كل ده الراجل بيقى ماعندوش مانع يعمله .. و فى مقابل بسيط جدا يتلخص فى انها اول مالبوفيه بيدأ تقوم تعمله طبقين
واحد حاذق و واحد حلو - اللى طبعا هى حافظة الاصناف اللى هو عايزها فيهم- و تتذوق على سنجة عشرة عشان هو يتمنزر بيها قدام صحابه انه الناصح اللى وقع واقف

14 comments:

P=S=Y=C=H=O said...

LoooooooooooooooL::D
w ma 7'ofya kan anyaaaaall:D

Hope said...

ما شاء الله يعني انتين مصلحنجية واتلموا علي بعض. ما جمع الا ما وفق. ربنا يكرمهم بقي ويورنا هايعيشوا ازاي

Bella said...

ههههههههههه

تصدقي اغلب الحالات بتكون كده

هو فيه حالات تانية غير كده

ههههههههههههههههههههههههه

Omar El-Tahan said...

على فكرة ... أي كباية في الدنيا فيها نص مليان ونص فاضي .... وكل واحد ليه حرية الإختيار إنه يبص على النص اللي هو شايفه ... الدنيا مش شفتشي ... بس برضه مش سودة كده ... هو يعني الراجل ما بيشوفش في الدنيا غير الأكل وبس ؟؟؟ ولقمتين هما اللي الست هاتبسطه بيهم مهما حصل أو اتعمل !!!! أعتقد إن ده لي لأعناق الحقائق

وبعدين حضرتك شايفة ان هي دي فايدة الرجالة ؟؟ على الأقل في الأفراح؟؟ أنا مش عارف احنا ليه بندور على أسوأ ما في الدنيا ونحطه قدام عنينا ومانحاولش حتى نشوف غيره.

فاكره حضرتك فيلم عمارة يعقوبيان؟

نماذج كلها سيئة بلا استثناء .. حتى الطالب المجتهد .. لما اتظلم استسهل الإرهاب عن إنه يعمل زي ناس كتير ويحاول يثبت نجاحه في مجال تاني

يا ترى بقى مصر فيها 78 مليون واحد من اللي في الفيلم دول ؟؟ مافيش بني آدم في البلد طبيعي ؟؟

Eman Hashim said...

عمر
ماتزعلش لو سمحت..انا حافهمك قصدى بالبوست ده

مجتمع الافراح ده من المجتمعات اللى بيتجى فيها النفاق الاجتماعى و خداع الذات و الزيف اللى بيستفز واحدة زيى

الصورة المرسومة هنا مش بالضوروة حياة كل زوجين علاطول.. بس هى للأسف شكل اصبح متكرر فى التجمعات اللى زى دى

انا شفت بعينى يا عمر..والله العظيم.. تبقى بتتريأ على الفستان و الميك آب و مال شعرها بايظ كده ليه و ايه القاعة البيئة دى و فجأة تتدورلها تضحك فى وشها

غير ان مهما حاولنا نذوق الحقايق ..الجواز فى ايامنا دى قدر كبير منه مسلسل من بتوع اوبرا الصابون الامريكى
احداث ممله و محفوظة و مفاجآت درامية غير مفهومة مع نهايات عبيطة
لو انت كنت اوفر حظا منى انك ماشوفتش خالص ده قول الحمد لله
لانى انا و ربنا شاهد مش بألف ده ولا بادعيه..انا شايفاه و عايشاه كل يوم

Eman Hashim said...

لووووووووووووووووووووول @ بيلا
يا بنتى انا والله مرواح الافراح بقى عقاب بالنسبة لى

Omar El-Tahan said...

أنا متفق معاكي إن النفاق الإجتماعي بقى ظاهرة وفي كل مناحي الحياة مش في الأفراح بس ... دي حقيقة مؤسفة .. وحتى بين الأزواج والأصدقاء المقربين

احنا للأسف بناخد من العالم المحترمة المظاهر بس .. إنما جوهر الأعمال اللي بيعملوها عشان بعد كده يتمتعوا بالمظاهر دي فبالتأكيد مالناش دعوة بيه لأننا بتوع فشخرة كدابة بس .. إنما مش بتوع شغل

أشكرك على التوضيح لأنك صلحتي صورة كنت أخدتها قبل كده بإنك مش بتحبي الآراء المخالفة

Crystal Lobna said...

الأفراح دى عالم و ليه قواعد و أصول و هى أصلا ملخصها ان كل واحد عايز يبين أن هو/هى أحسن ناس.
و كله بيضحك على كله

P=S=Y=C=H=O said...

el pic gamda ya bet

Blank Mind said...

من أبوخ و أرخم طقوس الزواج
الفرح
2 قاعدين معروضين زى البضاعه فى فاترينه عشان المعازيم يتفرجو عليهم و يفلوهم من فوقهم لتحتيهم
و اللى يغيظ ان الاتنين المتجوزين دول دافعين دم قلبهم او دم قلب اهلهم عشان المعازيم يتريقو عليهم فى السر و ياخدوهم بالحضن فى العلن و عشان يحشروا و بس

هيتقالى ، يا محترم الفرح ده الغرض منه الاشهار و الفرحه
فرحة ام العروسه ببنتها و هى بتتزفت لبيت جوزها
طب ما اى 2 بينكتب كتابهم بيتجرسوا .. قصدى خبر جوازهم بيبقى على كل لسان
ليه بقى الفرح و وجع الدماغ و المظاهر الاجتماعية الملزأه اللى توجع البطن دى

ايمان
بغض النظر عن اسلوب عرضك اللظيظ اللى طلعتى فيه الراجل مجرد شوفير و مرقصاتى مفجوع

بس التدوينة عجبتنى

سلام مربع لـ حقد العوانس

Eman Hashim said...

شكرا يا اميرة

blank:

انا ماجيبتش سيرة العرايس فى حاجة
دول مرة تانية
:D
اهلا بيك هنا فى معقل الحقد الازلى
سلام مأنتخ

Blank Mind said...

انتى مجبتيش سيرة العرايس
بس جيبتى سيرة

مجتمع الافراح ده من المجتمعات اللى بيتجى فيها النفاق الاجتماعى و خداع الذات و الزيف اللى بيستفز واحدة زيى


فأنا رغيت فى النقطه دى بوجه عام من وجهة نظرى فى الافراح

و بلاش سيرة الانتخه لانى مستكفى منها و قربت اصدر

:-D

Eman Hashim said...

LOOOOOOOOOOOOOOOOOOOOOOOOOOOL:D:D:D

Anonymous said...

personally i hate going to weddings i think they are completly fake (شكليات و مضاهر) i hated every wedding i'v been to up untill i went to an american wedding last year (i'm not saying we should be like america and i dont care what people say i'm not racists and friends are friends مش قصدي انو احنا لازم نقلد الغرب) i knew the bride and they got married for love and belive me for some one like me i was actually touched, loving some one is not 7aram love is not forbeden after all God is love, the wrong thing is getting married just for the sake of having a husband some jerk who you dont even know some one that was recommended by an other some one you dont know, you know what! i would rather be the spinster that i'm planing to be than to get marred to (سواق, شبكة اعد اتمنزر بيها على الناس او هدية اقولهم هو اللى جايبهالى - و ممكن اوكن انا اللى دافعة تمنها
,رفيق للسهرة عشان اتأخر براحتى من غير مابقى بنت وحشة بتتأخر لوحدها برا , اخده معايا فى كل الصور عشان اطلع فى كل الصور بكل الكاميرات بتاعت كل الناس
مهمة الراجل فى الدايرة الراقصة حوالين العرسان محتاجة شوية حنكة و حبة مفهوميةا - الرقص معايا عشان مابقاش واقفة قرعة من غير راجل و يقولوا عليا برقص عشان الناس تتفرج علياب - يزغر كده كل شوية عشان اقول لصحباتى اصله بيغير عليا اوى ج - يسيبنى ارقص برضه ما يخنقش عليا يعنى ,
شاهد على كامل انوثتى و جمالى لان وجود الراجل فى حياتى هو التوثيق الرسمى الغير قابل للجدال اننى انثى متفجرة الانوثة و جميلة و كده
)
lubna from baghdad