Sunday, May 11, 2008

23 - من بكين الى القاهرة

نقلا عن الاهرام ... الاثنين 5-5-2008 الصفحة التانية ........ 90% من النساء الحاصلات على الدكتوراه فى الصين يواجهن صعوبات بالغة فى ايجاد زوج مناسب لهن . هذا ما كشفه استطلاع للرأى اجرى بمدينة جوازنج و هو شمل مائة امرأة ؟. الطريف انه خلاف ماهو موجود فى مجتماعاتنا الشرقية, فان السبب ليس هروب الرجل من النساء الاكثر تميزا علميا خوفا من غرورهن او تسلطهن , و لكنه فى الصين يرجع لاصرار المرأة على ان يكون الزوج مكافئا لها فى مستوى التعليم هذا بالاضافة الى حرصها على ان يكون دخله الشهرى مساويا لما تحصل عليه ام لم يزد عنه



انتهى الخبر .... الخبر ده عينى ضربت فيه النهاردة ( اصل احنا من هواة قراية الجرايد فى الحمام و بنسيبهم حبة كده على ترابيزة صغيرة و بعدين نجددهم كل اسبوع ) و قعدت افكر حبة فى الكتير اللى بين السطور فى الخبر ده.

اللى لفت نظرى هو انه باختلاف البلاد و الثقافات بل و الاديان .. بيظل رفض الراجل فى انه يكون جنب اى ست اكثر تميزا منه - فى المقال هنا علميا - و ده يشمل ايضا اى نوع آخر من التميز!

التوافق امر محبب لاستمرار الحياة بشكل اقرب الى الطبيعى قدر الامكان ... لكن عمر مالتوافق كان معناه التطابق .. يعنى ممكن يبقى مسموح بقدر مناسب - متروك لكل اتنين تحديده - من الاختلاف عشان نقدر نوصل ل "التشابه و ليس التناسخ"

كده الكلام حلو ... فين المشكلة؟ المشكلة ان الراجل عنده كامل الاستعداد لقبول هذا القدر من الاختلاف طالما ان الكفة لصالحه.

مش لازم تكون من نفس االمستوى العلمى او المادى او الاجتماعى مادام هو شهاداته اعلى و مرتبه اكبر و طالما انه انشط اجتماعيا و اصدقاءه اكتر و خبرته فى الحياة اوسع ... ده حتى فى الشكل!! آه الشكل ... صحيح هو بحبها حلوة و ممكن احلى منه بس مش اوى و الا بتتحول الحياة الى مرار الشك و انعدام الثقة خصوصا كمان لو اصغر منه بقدر ملحوظ!!

عشان كده الخبر ده - بغض النظر عن مدى صحته لان اللى يمشى ورا احصائيات الاهرام اخرته مش حلوة - مش غريب عليا .. اول ما خلصت قراية قلت " طب ماهو آه .. ايه الجديد يعنى؟" الجديد هو موقف المرأة من هذا الافترى و اللا منطق

فى الوقت اللى الست هنا فى مصر فى أغلب الاحيان بتكون واحد من 3 ا
حتمالات.. الست الصينية كانت اكتر شجاعة و مصالحة مع نفسها فى رأيى
الست فى مصر :


* يا عمرها ما بتدخل نفسها فى اى محاولات حياتية ممكن تحصرها فى دائرة "المتميزات" و ده فى كل شىء و اى شىء لدرجة ان فى اوساط مش مسموح للست الآنسة فيها امتلاك عربية حتى لو فى امكنياتهم يجيبوها لان ده ممكن يخوف العرسان

* يا اما بتاخد من كل جانب القليل اللى تضحك بيه على نفسها و يحفظلها قدر " معقول " محسوب بدقة يميزها عن "بقية العرايس" لكن ليس بالقدر اللى "يوقف حالها" و اكبر مثال على ده بنات كلية طب و اغلب الكليات العملية المرموقة فى مصر اللى بتدخلها البنت للحصول على اللقب بدون اى طموح علمى حقيقى و دول بتنتهى قصتهم مع الطب بالحصول على اللقب بأى شهادة بقى ... بكالريوس ماجستير .. كله اسامى واخداهم من البيت

* يا الفئة التالتة بقى اللى مش بيقدروا يوقفوا نجاحهم بس بيتنازلوا عنه و يرموه فى الزبالة عشان خاطر عيون" العريس " .. كله يهون ( و هى تهون ) كمان ... بيسيبوا الشغل و الدراسة و بيقبلوا بماديات اقل و مستوى معيشة اقل بكتير ... مش رغبة فى الحياة مع هذا الرجل لكن رغبة فى عدم الحياة بدون رجل

اللى عاجبنى فى الست الصينية اوى فى الخبر ده هو مدى حبها لنفسها و اعتزازها بتميزها و صدقها مع نفسها و مع مجتمعها فى رغباتها المشروعة فى الحصول على مستوى حياة افضل عكس بنات كتير هنا بيتربوا على محى اى حاجة ممكن تطفش العرسان و يا ريت احسن و احسن محى هويتها بالكامل

هى هنا - الصينية- مش بس احتفظت لنفسها بحقها العلمى لأ و كمان طالبت بعدم التنازل فى ان يكون شريك حياتها على نفس هذا المستوى علميا و ماديا حتى لو كان التمن فى ده هو عدم الزواج لان الست الصينية - عقبالنا كده يا رب- عرفت ان عدم الجواز مش اخرة الدنيا و ان الراجل مش الغاية من الحياة و ان مفيش حاجة ولا حد فى الدنيا دى يساوى ان البنى آدم يمحى نفسه او يبخسها حقها و ان اللى بيهزأ نفسه لا يمكن يعيش بأى شكل غير شكل " المهزا"

و اللى مش عاجبها كلامى ترميه و تفتكر طبعا ان كل ده عشان انا عانس حقود

9 comments:

مصطفى عثمان said...

ايمان
لا طبعا كلامك جميل و مهم جدا
انا ليا راي في الموضوع ده
ان اكيد لازم يبقى في تفاهم و توافق بين اللي هيتجوزوا
اول انواع التوافق ده هو الحب
مهو لو في حب حاجات كتير هتتنسي
لكن بقى لو هو جواز تقليدي
الطرفين هيقعدوا يعددوا مميزات الطرف التاني
و ده معاه شهاده ايه
و هي درست لغايه فين
و ايه اللي خلاها تبقى دكتورة
هي عايزة تشتغل ولا ايه؟
و في الاخر بيبقى في شكوك من الطرفين في بعض
فالستات بتريح نفسها انها متزودش اوي في طموحها
و مشكله ستات نصر
انهم لغايه دلوقتي حلمهم بينحصر
في جواز و شقه و عربيه و الولاد
و بس كده
كده هي افتكرت انها ادت رسالتها في الحياه
اه الجواز و الخلفه جزء من الرساله بتاعه المرأة في الحياه لكن مش كل الحياه لازم يبقى عندها طموح انها تثبت نفسها
و لازم الرجاله اللي دماغهم تعبانه و يقولوا انا متجوزش واحدة دكتورة و انا مثلا معايا بكالوريوس بس
يبطلوا عقد
و ده شئ مستحيل في مصر
فلازم يتحطوا قدام الامر الواقع انهم يلاقوا كل الستات عندها طموح تحقيق ذاتهم
بس كده

Crystal Lobna said...

بس نسيتى فئة أخيرة فئة بتقول أنا كده و اللى عاجبه أهلاً وسهلاً واللى مش عاجيه فى ستين ........ سلامة . يعنى أنا مثلاً مش حتغير عشان حد و بعدين أنا أصلاً مرضاش بواحد عايز نص بنى أدمه يعنى واحده تكون أقل منه

بصراحة أنا أعرف ناس كتير معندهمش أستعداد يتنزلوا أو يتغيروا بس ده ميمنعش أن فى ناس فعلاً أسمى هدف ليها فى الدنيا هى الجواز و بس

P=S=Y=C=H=O said...

Begad i 've no words 2 say
el kalam mazbot gedan

bas 3ayza a2ol li ostaz mostafa 7aga so3'era
en 7ata lw feh 7ob dah maymn3esh eno ya3od yetshrat 3aleh w a3mely kaza w kaza.. w enty kaza w kaza..w heya el mafrod daymn eli tetnzaly w howa maynf3esh yatnzal w ana eli kalmtey tamshy leeh 3ashan ana '' ragel''

sorry fi lafz
bas el regalah 3ayzeen el setat 3agena homa eli shaklhom 3ala mazghom w di 7aga est7ala ta7sl
w 7ata lw el set radet enha tekon 3agenaa..
yerg3 howa w yebos bara bardo
mafesh fayda begad
7ata lw feh 7ob w zeft

مصطفى عثمان said...

psycho
معاكي حق في معظم كلامك
بس برده في اي حاجه في الكون فيه اشكال مختلفه
يعني ممكن فعلا الراجل يغير من تفوق الست
و ممكن و اعترف انه قليل انه يحصل
انه يشجعها في شغلها
بس برده في الستات
في منهم بيتحكموا بالرجاله و بيعمله خاتم في ايديهم
و ممكن تخضع ليه و تبقى عجينه هي في ايديه و عشان احنا مجتمع شرقي
او المفروض لسه بيتقال عليه شرقي
الست دايما بتتغلب بعرف التقاليد و العادات
بس كده

Bella said...

بعدين معاكي ياايمان يابنتي

يعني ضروري تنكشيني يعني

اولا عندنا مشكلة كبيرة جدا هي مشكلة التعميم
يليها مشكلة ربما تكون اكبر على مشكلة الاحكام المسبقة

يعني حاجات كده فلكلور في حياتنا الناس بتعملها بشكل ىلي وتعممها على الجميع

يعني خدي عندك مثلا لو ست عندها دكتوراة غالبا الناس بتعتبرها مش بتفكر في الجواز اصلا بدليل انها وصلت لهذه المرحلة من العلم وانها في الاغلب الاعم زي الناس مابتقول مكرسة نفسها للعلم فقط واحتمال كبير كمان تكون ست مسترجلة ومتسلطة وح تقعد تدي اللى تتجوزه اوامر كأنه طالب عندها

دي مثلا من الفلكوريات المصرية الشهيرة جدا

فلكلور تاني

برضه للست ام دكتوراة دي

ان غالبا طلباتها المادية ستكون مرتفعة جدا ولن تساهم في تكوين البيت وباقي ملحقات هذا الكلام

وانت عارفة الرجالة عندنا مش بيقدروا قيمة العمل الا وقت الست ماتساهم في تاثيث المنزل معهم وبعدها تبدأ زنانة القعدة في البيت تشتغل على طريقة ان الست مكانها البيت وخلقت لتربي الاولاد ونجاحها في تربيتهم افضل من مليون دكتوراة والكلام ده كله

والذي غالبا مايخفي خلفه رغبة من الرجل في كبت قدراتها العلمية وكتنفيس عن الغيرة من مركزها الاجتماعي

فكتير جدا من الرجال يعتبر ان المرأة الحاصلة على شهادات جامعية اعلى من البكالوريوس او الليسانس امرأة صعبة الترويض فلا يقترب منها ايثاراً للسلامة وحتى لايتعب نفسه من الاصل

وهناك الكثيرين ممن يعتبرون ان المرأة صاحبة الشهادات العليا تمثل مصدر خطر على مظهرهم الاجتماعي اصلا وان ذكاءها يهدد ذكاءهم مع اننا مش في مسابقة ولا ح ندخل لبعض في مارثون لقياس درجات الذكاء

والكل بينسى انها ست طبيعية زي اي ست بتحب بيتها وزوجها واولادها ولن تدخل مع زوجها في نقاش عنيف حول المادة والكتلة وباقي الامور العلمية البحتة دي

انما نقول ايه بقى

فيبدأ المجتمع بما فيه الرجل في التعامل مع هذه المرأة بعنف ويعاقبها على نبوغها العلمي بالعنوسة فلا يفكر اصلا في الاقتراب منها حتى تكون عبرة لغيرها من بنات جنسها وحتى تتذكرها الاخريات عندما يفكرن في رفع سقف طموحهن ويعرفن ماينتظرهن من مصير إن فكرن في الحصول على شهادة جامعية اعلى او التفوق في العمل مثلا

وهكذا

فتجدي بين النساء انفسهن خرافات من عينة لو انت ذكية حاولي تستغبي وتخبي ذكاءك اصل الرجالة مش بتحب الست الذكية وهكذا

يعني في اعتقاد ان كثير من المصريات لسن بأقل من الصينيات في التفكير والتصالح مع أنفسهن ولكن المشكلة في المحيطين بهن من اسرة ومجتمع دائما مايُرجع مشكلة تأخرهن في الزواج لحصولهن على شهادات عليا ويكرر لهن ان السبب هو عدم تواضعهن في الاحلام

وهذه من خرافات مجتمعنا ايضا

معذرة على الاطالة

الحقيقة الحديث في هذا الموضوع ذو شجون

ربما أعود مرة اخرى

هههههههه

تحياتي

Night Poet said...

السلام عليكم

الحقيقة دي أول مرة أعلق على حاجة في مدونتك الرائعة رغم اني اتابعها بانتظام من فترة وربما أضيف تعليقات عن الموضعوعات الأخرى قريبا .. المهم

1- أتفق مع الأخ مصطفى في أن الحب ينسينا أصلا وجود فوارق
2- لو كان الزواج تقليديا : وأنا لا أحقر من شأن هذا الأسلوب لأنه قد ينجح أو يفشل مثله مثل زواج الحب..
-هل الفتاة (الدكتورة) لديها شعور متضخم بالذات والعظمة أم أنها سوية
العريس : هل هو ناقص الثقة أم أنه يؤمن بقدراته وتميزه فيما يفعل (حتى لو كان ميكانيكي وهيه أستاذة جامعة)
3- شخصيا لا يمكن أن أتنازل عن زوجة ذكية بل شديدة الذكاء والواقع أن من سمات هذ الذكية أنها ستحافظ على بيتنا وعلاقتنا وستنشئ أبناءنا بشكل جيد ولا يعني ذكاءها أن تتحداني وتصطدم بي فهذا هو اسلوب الأغبياء!!!
4- أنا أختلف مع الصينيات في الإصرار على زوج بنفس المستوى المادي والعلمي...ولا أقصد أن ترضى الفتاة بأي رجل (من باب ضل رجل ولا حيطة) ولكن التكافؤ مسألة نسبية وهو في الأساس شعور متبادل من الطرفين بالرضا عن شريك الحياة كشخص يحترمك ويحبك دون تغاضي عن الإمكانات المادية في حد مناسب تقبل العيش فيه ولكم من رجال على قدر رفيع من المال والعلم ولا تشعر زوجاتهن بالرضا عنهم

أخيرا .. أعتذر للإطالة وسأعود لأعلق على مواضيع قديمة قريبا

Eman Hashim said...

مصطفى:
الحب شرط آه بس الحب مش حاجة سحرية بتطلع فجأة مرة واحدة بتحب حد يبقى كل حاجة تمام
الحب بيتربى و بيكبر لو موجود فى ظروف تسمحله بده
عشان كده انا يمكن مش متحمسة اوى لفكرة ان الحب بيخلق التوافق .. انا ممكن اقول ان الحب محتاج توافق عشان يكمل و يكبر

اما انعدام طموح الست فانا معاك تماما فيه
و اقدر اقولك كمان ان البطيخة عمرها ما هاتطلع حاجة غير بطيخ

كريستال:
الفئة دى بقى هى القلة المندسة اللى بدأت تزيد الحمد لله
اللى بيتقال عليها معقدة و اللى عايشة فيها اجنبية و اللى مريضة و اللى عانس و غيرانة ...
ربنا يعافينا يا بنتى

سايكو:
بكل أسف عندك حق
و المصيبة - زى مانا بقول علاطول- مش فى ان فى رجالة بتتطالب بده
المصيبة فى ان الستات بتوافق

بيلا:
حبيبتشى هههههههه

انا وراكى ايه غير اننى انكشك ؟؟؟
جامده اوى الفلكلورات دى ... ضحكتنى موت
للأسف هى فعلا زى أغنية الدنيا ربيع يوم شم النسيم و فيلم واه اسلاماه ليلة رأس السنة الهجرية

مفيش اطالة ولا حاجة
كلامك 100% مضبوط .. الاهل لو يرحمونا

نايت:

اهلا اهلا بيك اولا
و انا فعلا مبسوطة انك قلت تعلق

1- مش متفقة اوى و يمكن انا اكثر واقعية مما يتبغى فيما يتعلق بالجواز
2- حسب .. فى خرييجين طب بتبقى ذاتهم متورمة
اما الرجالة بقى فللأسف نسبة اللى عندهم مشاكل خاصة بالمقارنة بالست كتير اوى
و فى عادى ... زى اى حاجة يعنى
3- طبعا .. كلام منطقى
4- ماهو ماعتقدش انها كانت بتطلب امور مستحيلة بس الفكرة دائما بتكون ان انها على معقولية المحاولة لكنها صعبة

Miss. Sosa said...

والله انا مع الست الصينية ديه جدا .. وعلشان كدا قاعدة اهو :D
هي ديه اخرة المباديء .. هي ديه اخرة الثقافة وكبر الدماغ .. كان عيبه ايه الدبلووون .. اهو هتبقي مكافأة لاي واحد وزي الفل .. صحيح اختك دكتورة جامعة للاسف .. بس اوعدك لو مسكت وزارة التعليم العالى همنعه للبنات .. كفاية عليهم ثانوية عامة بلا وجع قلب .. وبكدا اكون قضيت علي مشكلة التكافيء من جذورها .. وساهمت في حل مشكلة العنوسة

Eman Hashim said...

سوسة
شكلك معبية اوى يا عينى
ضحكتينى و الله يا بنتى

نا كتير ببص لموضوع الدبلون ده بمنظرو مختلف تماما عن طول حياتى

خدت ايه من بكالريوس الطب غير قلة القيمة .. الحمد لله