39 - التعاسة مش عظمة ... و البؤس مش حكمة

هخش فى الموضوع على طول

المواجهة:

* اما تبصى لحياتك من يوم ما اتخطبتى و تلاقيها اغلب الوقت اتمليت بنكد و هم و خناق و توتر ... يبقى انتى فى علاقة غير صحية

* اما تتجوزى جوازة و بعد فترة , كل ما تبصى من برا تشوفى نفسك مكسورة, حزينة , خايفة , مش متطمنة , بطنك قالبة , ملامح وشك كلها فقدان امل ... يبقى انتى فى جوازة غير صحية

* اما تسافر بلد تانية لشغلانة عشان تبنى نفسك بقرشين و شوية خبرة و متعرفش تتأقلم مع الدنيا و يومك يفقد كل طعم و الإحساس بالمرارة يملى حلقك، وعينيك تعكس لك كل صورة بشكل حزين ... يبقى انت اخدت قرار مش سليم

هو احنا ليه بنتعب؟ مش عشان حاجة أاكبر احنا محتاجينها او عايزينها ؟ .. طيب
احنا ليه بنحب؟ بنتجوز؟ بنشتغل؟
ما هو البنى اكيد متوقع يكون فى سبب لكل خطوة بياخدها .. على الاقل بعد سن معين. و الا يبقى بيتصرف من غير اى خطة زى الاطفال
الهدف من كل تعبنا فى الدنيا ان احنا نحاول نوصل لشكل حياة لايق علينا و يوفر اهم احتياجاتنا - قدر المتاح- و الأهم،عشان نوصل لشكل اريح!! انا ماقلتش اسعد على فكرة .. انا باتكلم فى اريح

اصل النكد موجود فى الدنيا كده كده .. نجرى له  ليه؟
المشاكل جاية جاية .. مش مستنيانا نسعى لها

الخطوة اللى تجيب التعاسة و الاحساس المستمر أغلب الوقت بعدم الارتياح هى اكيد خطوة مش صحية الا لو فى ضرورة تحتم ده .. و اكيد هنا كل واحد له الضرورى بتاعه

الشغلانة اللى تموت حياة الواحد جوا او برا بلده لايمكن تطوره لانه ببساطة مات من جوا .. مفيش نبتة عشان تتزرع

بس السبب فى كل ده فى أغلب الاحيان ان فى التصاق فى ذهننا بين النكد و الحكمة ،التعاسة و وكبر السن، البؤس و العظمة

بشكل بيخلى ناس كتير تتمسك بمصادر النكد فى حياتها لان ده فى نظرها هيكسبها التجلى . وده
خصوصا فى العلاقات،فى بنات كتير معتقدين فى ان الرومانسية معناها النكد .. قال يعنى
Agony
و كأنها كل يوم بتعيط فيه، ده تأكيد على عميق حبها و اثبات لصلابة رومانسيتها لاننا كلنا اسرى لصورة "الحكيم التعيس"
الله يسامحه شكسبير!! لما حكى ان روميو بكى من فرطة الشغف و اللهفة , الناس كبرت متخيلة ان هو ده الشكل الامثل للرومانسية الحقة , ناسيين ان الكلام فى زمن الناس كانت فاضية فيه .. كم و نوع التحديات اللى كانوا بيواجهوها كان مختلف ... و اكيد ناسيين ان روميو كان مكملش 20 سنة

الحب بيحلى الحياة مش بيكبر الهم.

الحب بيصبر على المشاكل اللى اصلا موجودة مش يزودها

الحب بيخلى القلب فى حالة ابتسام مستمرة اغلب الوقت و هو بيواجه الحياة، مش على طول معصور بالترقب و الاحساس بانعدام الامان


الشجاعة

* اذا كان الانسان غلط مرة فى خطوة .. الحكمة الحقيقية هى فى انه يعترف بده قدام نفسه . الحكمة انك تدوس فرامل و ايدك على الفتيس و تفكر ... و اما تتأكد انك فى الطريق الغلط , تلف و ترجع
* كبر السن فى ان الواحد مايخافش انه يبتدى من الاول
* العظمة انك تعرفى فعلا انتى عايزة ايه و تسعى له
* فى ناس كتير اوى غيرت التاريخ بأنها كانت شجاعة فى انها "تلف وترجع " و مخافتش تعترف بالفشل
* و مين قال انه لما يبقى قرارك هيبقى اعتراف بالفشل؟ ده هيبقى اختيارك


الست اما بتتجوز جوازة تعيسة و تعيش عمرها فى حسرة و تشوف فى عينيها كل الغيرة من اى ضحكة من القلب لأن كل ضحكها بقى تمثيل على نفسها فى مسرحية مستمرة بتأديها للحياة عشان تحاول تفضل بطلة رواية "الزوجة المثالية" اللى ضهرها على طول واجعها و توطى بيه،واللى شايلة طفلها و عينيها كلها ضلمة  وهى باصة على طفلها التانى،واللى واقفة فى المطبخ بتطبخ ،و تلبس عيالها فى النادى ،و تخدم على الضيوف فى صالون بيتها بشكل حرفى غاية فى الميكانيكية لانها تحولت الى "روبوت زوجة" ... و المأساة الحقة انها متصورة انها بكده اكتسبت الحكمة ،وخلاص عملت كل اللى عليها ومتشبعة بفكرة انها ضحيت بنفسها.

لأة... انتى اللى تاعسة نفسك
اه اما بنكبر الحكاية بتبقى اصعب والمسئوليات والمشاكل بتزيد،بس محدش فى الدنيا يقول ان احنا نسعى لده بنفسنا

الزوجة التعيسة مش هتجيب غير اطفال تعساء
اما تبقى مكسورة هتكبَّرى بنتك على الشموخ ازاى؟
اما تعيشى راسك مطاطية عشان "لازم استحمل عشان عيالى" بنتك هترفع راسها ازاى؟
اما بنتك تشوفك بتاخدى بالقلم و تسكتى،هتقول هى لأ للإهانة ازاى؟
اما تتشتمى و تتهانى و تتسفهى فى وجود ابنك،هيطلع محترم ازاى؟
بلاش كل ده .......هما هيحترموكى ازاى؟؟؟؟
هيحبوكى طبعا! بس مش هيحترموكى،فى احسن الفروض هيشفقوا عليكى


القوة

* كل اختيار له تمن
* كلما تزيد قيمة الشىء , يرتفع تمنه
* مفيش فى الدنيا أغلى من حرية الروح
* اللى حاسبة الناس و المجتمع و الاهل و الكلام و السمعة و زنقة الفلوس،ماداقتش طعم النزاهة , إحساس الاختيار،وروعة الاطمئنان


عارفة يعنى ايه يبقى معكيش فلوس كفاية بس مش خايفة؟
متخيلة انك ممكن تعيشى بدخل اقل بكتير من اللى متعودة عليه و تبقى اسعد؟
فاهمة يعنى ايه تبصى لورا و تقولى "الحمد لله" ؟
الرجالة هاتطمع فيكى؟ وارد...  بس تقدرى تأكدى لى إنهم ماكانوش بيطمعوا و انتى متجوزة؟
اهلك هيلوموكى؟ الاهل ماواراهمش غير اللوم، بس بعد فترة لو بيحبوكى بجد أكتر من اى حاجة، هيفرحوا لفرحة قلبك
بناتك هيوقولولك مفيش عرسان هتجيلنا؟ قوليلهم العريس اللى يمشى عشان انا مطلقة مش عايزينه
المشكلة فيكى انتى،انتى اللى غرقانة فى فكرة "هعيش ازاى من غير راجل"... انتى اللى مش حرة من جوا نفسك

لأة .. انتى حرة
مولودة حرة
عيشى حرة ... جربيها ... ادى لنفسك فرصة