Saturday, March 15, 2008

17 - مفهوم الفشل

يا ساتر يا رب ... هى طالباها غم انتى كمان؟ الصبر

فاكرين اما قلتلكوا انى شايفة اللى مبوظ حاجات كتيرة فى حياتنا هو تخريب المفاهيم؟ اهه الفشل من المفاهيم دى .

الانسان فى رحلته القصيرة مهما طالت بيقضيها فى تجميع و لملمة .. تجميع حسنات .. خطوات .. علاقات .. نجاحات و اخفاقات ... خبرات و آمال و اختيارات

كلنا فى مرحلة عمرية معينة (لازم) الدنيا بتكون عرفتنا يعنى ايه نعوز حاجة و مانلاقيهاش ... بس الغريب هو ان ده لامر غير مفهوم بالنسبة لى ارتبط بالفشل.

توماس اديسون ليه حكاية مشهورة بتاعت عدد محاولاته الغير ناجحة لحد اما وصل للى هو عايزه ... هانرجعلها تانى الحكاية دى

ايه هو الفشل؟
الفشل انك اما تكرر التجربة بنفس الظروف و نفس المعطيات تغلط نفس الغلطات فى نفس الخطوات كل مرة تجرب التجربة

لكن ... اما تبقى كل مرة بتتفادى الغلطة اللى فاتت و تتكعبل فى غلطات تانية يبقى انت كائن مجرب و متعلم مش فاشل ابدا!

الفاشل الحقيقى هو اللى خوفه من عدم النجاح من اول مرة بيقضى على روح القتال و المخاطرة عنده و تحصره فى تجارب مستهلكة فاقدة القيمة لمجرد انه ضامن انه لو مشى فى التجربة دى على نفس خط سير اللى قبليه فهو هيوصل للنتيجة المقبولة اللى هم وصلولها .
و عشان كده احنا مش بنقبل تكرار عدم التوفيق و بنسميه فشل .
اغلبنا بيفكر انه الطبيعى و المنطقى ان اول علاقة جادة تجمع الانسان مع انسان اخر لازم ( طالما هما الاتنين محترمين و مؤدبين ) تنتهى بالجواز.
بنبص لعدم نجاح اى علاقة كعار مهما كانت المرحلة اللى بتخلص فيها
الفركشة سبة
الفسخ مصيبة
الطلاق كارثة

و بالتالى كل و اى علاقة بعد العلاقة الاولى بيبتدى العداد يتكتك ... تلاقى البنت اللى فسخت خطوبة او اكتر مذعورة هى و اهلها و فى دى يمكن الرجال فيها بيعانوا زى البنات. اى واحدة فينا هايجيلها عريس كان خاطب قبل كده مرتين مثلا هتفكر الف مرة قبل الموافقة انها تشوفه .. فما بالك بقى لو شخص سبقله الجواز؟؟؟!!!

انا مش بعمل دعوة لتعدد العلاقات و لا بمجد الاشخاص اللى بيبدلوا شركائهم باتسخفاف.. ولا انا بحمس اى حد بيواجه مشكلة مع شريكه او مديره او جاره انه مايحاولش مرة و اتنين و عشرين قبل ما ينفصل او يستقيل او يعزل.
الحلول التلاتة دول , فى مواقف هيتوصفوا فيها بانها انهزام ,و مواقف تانية هيبقوا قمة الشجاعة اللى ممكن حتى اللى حواليك مايفهموهاش.

انا بس كل همى اننا نقف ضد ان الخوف من عدم النجاح يحجم امكانياتنا و يحصر افاقنا فى الطرق اللى عليها علامات خطوات .. عشان يبقى هى دى اكيد اللى فى ناس مشيوا فيها قبلى و لو كان فى خطر كان زمانهم علقوا يافطة بتقول خطر.

مش يمكن انت ربنا خالقك اقوى؟ احكم؟ عندك من مقومات النجاح فى الحاجة دى بالذات اكتر من غيرك؟؟ ليه عايزين الاسهل حتى لو كان اقل بكتير مما نستحق؟
ماهى معروفة ... الحاجة كل ما بتحلى بتغلى و بيزيد تعبها

و الدليل ان الفشل المزرى ده مش بس فى العلاقات .. ده اكتر و اقبح بقى فى الحياة العملية و العلمية
اما بنيجى نختار مثلا دراسة ... عمل ... بيزنس,كل تفكيرنا بيبقى فى انهى اسهل و اضمن مش انهى اقيم و اقرب للى انا عايزه حتى لو اصعب

اللى بتكلمكوا نفسها عملتها العملة السودة دى اما اجلت امتحانى 3 مرات عشان خايفة مانجحش عشان هو امتحان اجنبى جديد و عدد الناجحين من اول ماتعمل الامتحان من سنتين لحد دلوقتى لا يتعدى ال60 ممتحن من مئات من كل بلاد العالم بمتوسط 15 ناجح كل سنة علما انهم بينجحوا اعلى نسبة من المتقدمين مش فى درجة نجاح زى العادى كده.

يعنى انا عارفة ان كلمة راسب كلمة صعبة .. بس ممكن افضل خايفة انى مانجحش مرة او اتنين او عشرة حتى و اديسون ماخافش ولا اتهز اما مانجحش فوق التسعميت مرة
ماهو عشان كده هو اديسون
مش عشان هو اذكى ...لأ ... عشان هو اكثر اصرارا و عزيمة و عشان هو ماخافش من عدم النجاح و ماخافش يتقال عليه فاشل ..كمان عشان كان بيتعلم من غلطاته و عمره ما كررها ..يعنى هو اما جرب 99 تجربة .. و غلط 99 مرة .. عرف 99 معلومة!!

يبقى لايمكن عدم نجاح تجربة يخلى البنى ادم يتسرع و يتلهوج فى اى حاجة عشان مايتقالش عليه فاشل
و هنا انا افتكرت مدرس اللغة الانجليزية فى الجامعة الامريكية دينا بشير الديك اللى اتخطتبت اكتر من مرة بس كانت اشجع من انها تمشى فى جوازة بس عشان تبقى متجوزة و عشان مايتقالش عليها بتتخطب كتير .. و هى كانت من ضيوف الحلقة التليفزيونية اللى كنت انا فيها لو فاكرين اللى انا شخصيا بحيى شجاعتها و صدقها مع نفسها

بس يعنى .. رجاء خاص .. احنا هنقتدى بتوماس اديسون اه فى الحياة بس بلاش فى الحياة العاطفية نقول و ايه يعنى 99 مرة ..ههههه

عشان ماحقدش عليكوا اكتر مانا اصلا باحقد

11 comments:

mostafa rayan said...

علي فكرة دي اول مرة تقولي علي حاجةواكون موافقك في رأيك تماما احنا لازم نحاول ومانخفش من الغلط ولا نسيب من اول مرة بحجة اننامنجحناش
الغلط مش بعبع ولا امناالغولة بالعكس الغلط هو اللي بيعلمنا الصح نيوتن لما غلط اكيد اتعلم من غلطه وكان بيفادي الغلط في كل مرة
بس انا شايف المشكلة في تربيتنا من واحنا صغيرين اهالينا بيخوفونا من الغلط فبنتربي خايفين من التجربة نفسها وبنحتاج لوقت طويل لمانكبر علشان نصلح المفاهيم الغلط دي جوانا وللأسف دة الفكر المسيطر علي المجتمع كله حتي لما تروحي تقدمي في شغل وتكوني لسة جديدة صاحب الشغل بيخاف ياحسن ماتنجحيش معاه طيب ياعم اديني فرصتي يقولك لاء روحي جربي عند حد تاني وبعدين تعالي والتاني يقولك نفس الكلام بردة وهكذا
سب انا معاكي المفروض مانفقدش الثقة في نفسينا ونحاوة مرتين وتلاتة ومليون واكيد هننجح
وهنوصل للي عايزينه

nohamy said...

اكيد لازم نعيد محاولة طالما احنا عايشين
فيه اغنية لمنير بتقول

أفتح فلبك
متخفيشي
مهما تخاف انك تمشي من الاحزان مهتسلميشي

Crystal Lobna said...

I Just stumbled across your blog. and read all the posts. I totally love it. and agree with you on almost everything that you say. Especially the fact that we as people are too afraid of failure.
Personally I believe that you should look at every experience (especially failed ones) as a chance to learn something new.
I think you are a very brave person. You know what you want and not afraid to say it.
كمان ان عارفة أنك هنا مش عايزة شفقة من حد. أنتى بس بتقولى رأيك و أقتنعاتك و كمان مش معناه أنك أو أنا أو أى حد
. Single
يبقى نقصين و معندناش أى حاجة للمجتمع نقدمها أو عايزين نتجوز و خلاص. أنا علاطول بأقول يا صح يا بلاش مينفعش حاتجوز و السلام

Unknown said...

mostafarayan
ده يوم يشهد له التاريخ والله ...هههههه
يا ريت احنا نفتكر ده و احنا بنتصرف بس .. و اخش انا كمان الامتحان


tohamy
مضبوط جدا كده .. و الكينج ده الكل فى الكل ..حبيبى اللى ذلنا على الابوم


Crystal Lobna
متشكرة اوى يا لبنى .. اعدى معايا و قولى معايا كل اللى نفسك فيه
اهم حاجة ان الانسان على كل بلاويه اللى ممكن ماتعجبكيش فيه ميزة ربانية و هى انه جهاز بشرى لكشف الكدب و الزيف مهما حاول يدعى غير ذلك
فانت قولى اللى نفسك فيه و ولا يهمك

ملحوظة:
كان فى غلطات مطبعية باعتذر عنها و صلحتها

الهدهد الطائر said...

أول زيارة
أنا أتفق مع بعض كلامك و أختلف مع بعض
فعلا..الحكم بالفشل من كثير من الناس ممكن يكون تسرع و قلة عزيمة
أما النجاح في كل الأمور له أصول
أولا: تحديد الاهداف بوضوح.. مش ممكن أدخل تجربة بدون ما أعرف ما الذي أريده
ثانيا: المصارحة.. لو كان معايا شركاء آخرين لازم يعرفوا أهدافي
و أنا كمان.. لازم أعرف منهم أهدافهم
ثالثا: يوجد منطقة خضراء و منطقة صفراء و حمراء
المنطقة الخضراء: الأمور ماشية عال.. العال
الصفراء: أخطاء حصلت ..ولكن يمكن التجاوز عنها.. مع توضيحها
الحمراء: أخطاء لا يمكن تصورها
المنطقة الحمراء بالخصوص لازم تكون واضحة من الاول
و بالتالي .. وضع اطار عام للتجربة كفيل بنجاحها
أما الأخ اديسون فهو اتبع اسلوب "المحاولة و الخطأ" في التجربة
و بدون شك هو اسلوب غير سليم الا في حالة ضرورة خوض التجربة فقط من أجل التجربة
لانه اسلوب يعتمد على عنصر واحد فقط هو عنصر الحظ
البطيخة اما تطلع حمرا أو قرعة
على فكرة.. انتي أمرتي الناس بالمعروف و لكن نسيتي نفسك
يوميات"عانس حقود!".. ايه الظلم ده
هو ده الحكم بالفشل الغير مبرر
ياريت يكون"يوميات وردة متفائلة" مثلا
...تحياتي...ـ

Anonymous said...

معلش دي اول مرة ادخل عندك
بس كان في حاجة عايز افهمها من اسم مدونتك عانس حقود علي مين ؟ وليه؟
معلشي ياريت تفهميني

Unknown said...

التعريف رقم 1 ممكن يرد على السؤال ده

اما الهدهد فاعتقد انا سبب اختيارى للمثال بتاع اديسون كان واضح و هو تعدد مرات عدم التوفيق مش مهم بقى الاسلوب بتاع شغله
اما الالوان .. فحتى لو .. ساعات بيبقى لازم تفكر بقى الصندوق و تبطل انصياع للالوان اللى غيرك حطها
الحياة اقيم من انها تمر كده بتلات الوان

Unknown said...

اللي نعرفه أحسن من اللي مانعرفوش؟

وهو احنا لسه هنجرب ونبدأ من أول تاني

خلاص بقي نكمل ومش مشكله

بجد دي أفة المجتمع المصري

معرفش الناس حتي معندهاش أمل انها تحاول أو تغير ليه؟

علي فكرة أديسون نجح في التجربة ال1000 يبقي ال 99 مش كتير يعني

(:

P=S=Y=C=H=O said...

3ala ra2y mounir
betd7ak seka leya w betrg3 tany leya
atry el 3'orba sa3ba w 7'twa heya heya
wa7'deny leeh ba3ed ya 7elmy ya 3ANEEEEEEEEEEED

انسانة واقعيه said...

فية تساؤل مهم اوى على فكرة انتى طرحتية ..لية بنختار الاسهل والاضمن حتى لو اقل مما نستحق؟؟؟

والحقيقة ملاقتش اجابة عندى على سؤالكبس يمكن الانسان بطبيعتة بيحب العيشة السهلة ..يمكن..بس دة مش اجابة انا الحقيقة متحيرة فى سؤالك

اما عن الفشل فانا الحقيقة زمان كنت بتهم نفسى بية..لانى كنت بقصر احيانا وبالتالى النتيجة بتكون غير المتوقع

فكنت بتهم نفسى بلاهمال والفشل

بس اتعدلت الحمد لله ههههه

ومهما يكون دلوقتى او مهما يحصل بعرف احط نقطة...
وابتدى من اول السطر حاجة جديدة
لان ببساطة الحياة اقصر من اننا نقصرها ومن اننا نقف نبكى على الاطلال
نتعلم من اخطائنا ونحاول نلم اد منقدر من اللى وقع ونكمل

هنقف نعيط ونقول فاشلين يبقى هنقضى عمرنا كلة فالعياط

بوست جميل دمتى موفقة

Unknown said...

لان ببساطة الحياة اقصر من اننا نقصرها ومن اننا نقف نبكى على الاطلال
نتعلم من اخطائنا ونحاول نلم اد منقدر من اللى وقع ونكمل

بالضبط كده
مش اخرة الدنيا ان احنا غلطنا
طالما عاقدين العزم اننا نعمل اللى نقدر عليه عشان مانكررش الغلطة دى