Thursday, March 27, 2008

18 - بيت العز الدين الحسينى يا بيتنا

فى أوقات كتيرة, مناقشة اى مشكلة اجتماعية بيرجع فيها الخبراء ( اللى هما مجموعة من الناس الوهمية اللى لما حد يبقى عايز يفحمك فى الكلام و ماتراجعهوش يقولك الخبرا قالوا كده .. او انا اعرف واحدحكالى...) بيجمع الخبراء ههههههه ان اساس اى مشكلة اجتماعية فى أغلب الاحيان ان ماكانش كلها للتربية.

و فى رأيى الشخصى بغض النظر عن رأى الخيراء ان فعلا فى مشكلة واضحة فى تربية المصريين من جيلى.

يمكن اغلبنا هيتفق معايا كليا او جزئيا ان فى سمة غالبة على شباب هذا الجيل و هى فقدان الاحساس بالمسئولية و الاعتماد الكامل على الاهل , مش بس اعتماد مادى لكن

emotional dependence

هو درجة من اعنف درجات التعلق بشخص لان هنا بيكون الاتزان النفسى مرهون بهذا الشخص و ده نوع مرضى من الحب الانسانى. هنا بمنتهى السلاسة بتتسلت من الانسان كل قدراته الابداعية و رغباته الفريدة اللى كل بنى آدم بيتخص بيها عن غيره الا لو كانت هذى الاشياء من النوع المسموح بيه و الحاصل على مباركة الاهل .. فاذا لم يحدث بيكون الناتج هو الآتى:

* يا اما شخص تابع فقد كل احساس بذاته و تلاقيه بيفرغ كل طاقاته و رغباته فى الاحساس بنفسه على الاشخاص الاقل منه فى حياته زى اللى تحتيه فى الشغل او افراد الاسرة الصغيرة.
* يا اما انسان ضايع .. وده النوع اللى بيبقى اذكى من انه ينصاع بالكامل لكن اجبن من انه يعلن الرفض او انه بالفعل يستقل بذاته "نفسيا" . دول بنلاقيهم فى خلاف دائم مع اهاليهم سواء بالصوت العالى و الخناق و الزعيق كل شوية .. يا اما النوع الصامت اللى بيكتفى باختذال كل الانفعالات بالداخل و يكتفى بأسلم اشكال التعبير ان عبر فى الاصل.

و ده كله ناتج من شكل تربية اصبح

trend

شكل اتفق عليه جميع اجميع ( اهالى و ابناء ) , اعتبر الستقلالية جريمة و التبعية اصل .

الرغبة الملحة و المميتة و المفهومة فى الحماية و الرعاية ساعات بتكون السبب فى ان اهالى كتيرة بينسوا ان ولادهم دول فى يوم من الايام حايشيلوا لوحدهم.

وساعات تانية بتبقى أنانية من الاهل فى رغبتهم فى الابقاء على ولادهم تحت عينيهم لان استقلال ولادهم عنهم بيكون نذير و مؤشر لانتهاء حياتهم .

احنا كتير أوى ممكن نلاقى ناس فعلا مش بياخدوا اى قرار فى حياتهم من غير ما يكون اهاليهم معاهم فى كل خطوة اتاخدت عشان القرار ده يطلع للحياة.
المشورة حاجة ( خصوصا من ناس الواحد حيفضل طول عمره متأكد انهم بيحبوه ) و ان شحط مخلف و فاتح بيت او على الاقل فى سن يسمحله بده يرجع لأهله الاول قبل ما يسيب شغله حاجة تانية خالص .. لأ وايه , تلاقيه موقف الموضوع لحد اما اهله يقتنعوا رغم ان كل حاجة ماشية . اما ده فى الشغل تخيلوا بقى فى الجواز.. كمية الجوازات اللى بتبوظ عشان الاهل مش موافقين و مش بس بنات لأ و رجالة كمان.

كل ده تانج من حاجات كتيرفوق بعضها ... زى مثلا الغلا اللى اجبر ناس كتيرة انها تعتمد على اهاليها فى تحمل تكاليفها مدة اطول من اللازم.

ده اعطى للاهل ذريعة (عشان خاطر بيلا ) فى التحكم و السيطرة و سبب نوع من " كسرة العين " و عدم التجرأ على المجاهرة بالرفض او الاختلاف من الابناء . .. واللى بعد فترة بينقلب الى اعتماد كامل فى اتخاذ القرارات اللى طبعا بيلاقى ترحاب و عدم مقاومة من الاهل فى احيان كتيرة.

بالاضافة الى شريحة من السيدات اللى حياتهم مع اول طفل بتتمركز على اطفالها, بتخلى اى درجة من درجات الاستقلال هو اعلان بفراغ حياتها .. و دول اللى بنلاقيهم مسببين مشاكل لولادهم بعد جوازهم بسبب تدخلهم الغير مبرر فى حياتهم سواء ده قابل مقاومة او لأ .

النوع ده بيجيب يا اما امعات ممحيين تماما يا اما ناس عايشة حرب ضروس عشان يعملوا اى حاجة

كمان الخوف الانسانى الطبيعى من الحياة .. و الرغبة فيها فى نفس الوقت , كلنا نفسنا ييجى يوم ما نحتارش فيه , و لو اتحطينا قدام اى موقف نعرف بالضبط ايه الصح .. يا سلام لو ماكانتش المعرفة و الخبرة لازملها تجربة و عك و تلطيش و اخطاء و اتمان اخطاء... فى الحالة دى , الاهل بيشيلوا عبىء كبير او على الاقل اغلبه.

" هاخش الكلية دى رغم اننى مش عايزها عشان خاطر اهلى ( لو سألته طب عايز ايه يقولك ماعرفش بس عارف انى مش عايز دى ) عشان كل اما ما تعجبوش حاجة يلوم اهله داخليا مش نفسه على اى تقصير و اما يتعثر فيها يبقى الله يسامحهم اهلى غصبونى عليها , انا ماكانش ليا فيها الكلية دى .. و برضه اما ما يلاقيش شغل يحصل نفس الشىء ."

" هاشتغل مع بابا فى المجال ده رغم انه مش عاجبنى بس اعمل ايع ماقدرش اخيب امله فيا .. و كل شوية عياط على الشغلانة المهببة و المجال الممل اللى بكرهه و برضه بنفس الطريقة .. مفيش شجاعة كافية انه يدور على شغل زى بقية الناس و احتمال يلاقى و احتمال لأ و ممكن يلاقى شغل وحش و يسيبه و هكذا"

" هاقبل الخطوبة دى و خلاص .. طب انتى ايه رأيك فيه؟ .. عادى يعنى , لانا موافقة ولا انا مش موافقة و طبعا فى كل خناقة ( مش انتوا اللى قولتوا عليه كويس .. مش انتوا اللى طلعتوا بيه )

هنا فى للاسف قيمة مفقودة تماما و هى "تحديد المواقف من الاشياء" حتى فى حالة عدم الارتياح هتلاقيها مستنية الموقف ده من اهلها الاول بعدين هى تعلنه
كل ده له اسباب كتيرة



أولا :

لاننا ماتعودناش نعمل حاجات اهالينا مش مرحبين بيها بس و هم عارفين و تطلع غلط و نتعلم منها او تطلع اوكى و نكملها.
طبعا بحدود الدراية الكاملة بأبعاد المخاطرة و طبعا بتختلف كل حالة عن التانية, فى شروط كتيرة زى السن و الشخصية و النضج , يعنى مش مطلقة .. بس عادة بكل اسف ارتبط اللى الاهل مش عارفينه بالسرقة .. والسرقة غلط و بالتالى مصحوبة بمشاعر زى الذنب و الجبن و انتظار العقاب

و هنا بتتجلى اهمية التمرينات .. الاهل المفروض بيتمرنوا على ترك مساحة لأطفالهم بتزيد مع السن لحد اما بيصلوا للمرحلة اللى يقدروا فيها يتولوا حياتهم بشكل معقول , زى تعليم العوم و ركوب العجل... الاول كل خطوة بتكون و هما ماسكيننا بعدين و هما معانا و ايديهم محاوطانا عشان اول ما نميل يلحقونا بعدين لوحدينا و هما بيتفرجوا من بعيد بس و احنا لابسين سترة نجاة او فى عجلات جانبية .. و كده .. لحد اما ييجى يوم نعرف نعملها عادى عشان اليوم اللى بعديه هانعلمها لولادنا .

و احنا كمان مفروض نكون اشجع , ايه يعنى اما نغلط .. مش موال يعنى .. حتى ده بيخلينا بعد كده مانكابرش على طلب المشورة من الاهل .

ثانيا:

لان لو طلع الاختيار ده مش مضبوط هنسمع افتتاحية السيمفونية الخامسة ليبيتهوفن من الاهل

تاتاتاتااااااا

ما قلتلك .. ما هو دى اخرة عدم سمع الكلام .. ياكشى بس تتعلم .. و ليسة, اللى من دماغها دى ليسة هتاخد فوق دماغها .. يعنى هو انا غاوية اقولك لأ .. ادى نتيجة اللى يعادى اهله

و بالتالى يرتبط الخطأ بكل ما هو ضد الاهل.. و تبدأ تفسيرات جديدة تظهر لأى خطوة مباركة من الاهل لم توفق , يتحول بيها الانسان لضحية لانه فى نظره ما عمالش اى حاجة غلط . و بالتالى هو مش مستنى اى حاجة غير التوفيق.. و بالتالى تظهر بقى الكلمات اللى ترفع الضغط ك
انا نحس .. الفقرى فقرى .. اصل انا الناس باصينلى فى كل حاجة امشى فيها .. لو بس الناس يسيبونى فى حالى


ثالثا:
فى احيان كتيرة الاهل بيتحملوا نفقات اى اختيار و ده ولد عند الطرفين اعتقاد ان ده لوحده ممكن يكون حق للاهل بشرط الموافقة على كل خطوة بيعملوها ولادهم (بس يمكن هنا برضه بيبقى غريب شوية اننا نعمم انه لازم بالعافية اجبار عليهم يدفعوا فلوس فى حاجة هما رافضينها خصوصا اما نكون بنتكلم عن ناس كبيرة مش مراهقين)
عشان كده الاستقلالية مرتبطة بالاستقلال المادى و ده برضه سبب بوظان علاقات اسرية كتير لما الاولاد بيحصلوا على الاستقلال المادى و ده برضه سبب ان اهالى كتير بيربطوا ولادهم معاهم فى اعمالهم عشان يحكموا القبضة عليهم ( هو الكلام يبدو قمة الشر رغم انه فى اساسه عميق الحب)


رابعا :

التأثر بمجتمع القبيلة و ده لوحد موضوع بعدين. و هو المجتمع اللى بتتأصل فيه مفاهيم التبعية و القطيع و بيتفاخر اصحابها بيها لكن بتسميات تانية و هى الاصل العريق و الاسم و العلية . و فيه شىء من التباهى ان الابناء امتداد لأهاليهم و ده يمكن يبقى مفهوم ( مع كامل تحفظى ) فى العائلات المالكة و الحاكمة .. لكن ان عائلة من 20 او حتى 200 فرض عايشين دور نسل مينا موحد القطرين و هما 200 فرض غير معلمومين غير لبعض اصلا دى حاجة الى حد ما مثيرة للتسائل .

خامسا:

الموروث الفرعونى الاصيل - على رأى الصحفى حاتم الشرقاوى- فى رغبة كل المصريين فى "البناء" ... كل واحد فيهم حلم حياته اللى بيحوشله بعد تربية عياله هو انه يبنى و يعيشهم بولادهم فى البيت ده.
تحس ان كل واحد بيشتغل عشان يحوش عشان الاول يتجوز بعدين يخلف و يعلم عياله و بعدين يبنى "الهرم" !!
و طبعا هنا بتتأصل ذكورية المفاهيم دى لما بنلاقى ان التبعية هنا مطلوبة من الرجالة مش الستات , اللى المفروض رايحين (ماطرح ماجوازهم رايحين ), و اللى بكل بساطة بتنسلخ من عيليتها لتكون جزء من كيان آخر بحكم ا انها ست فهى كائن شرط اكتماله و تحديد هويته فى الاساس مرهون بوجود الراجل .. و طبعا دول من اوائل المجتمعات اللى بتفضل خلفة الرجالة و اللى بيطلعوا ستات نكرات يا اما متحفزات .. امال هانحافظ على اسم عيلة زيفت ازاى .. تدور ايه وجه الانجاز فى الكائن ده ماتلاقيش و مع ذلك تلاقيه مصدق نفسه اوى و هو بيقولك اسم العيلة.

مسلسل الوتد اللى اسر مصرية كتير بتبصله على انه حلم ليلة صيف

أنا مش باقول مانعرفش اهالينا لانى انا نفسى ماقدرش على ده .. ولا باقول نعمل اللى احنا عايزينه كل يوم علاطول حتى لو ضد رغيتهم لانى بكده يبقى بناقض نفسى ... انا ضد الاتكال على الاهل و ضد الانانية منهم .. انت عيشت حياتك زى ما ربنا رايدهالك .. اخترت فيها القدر اللى كان متاحلك .. شفت و اتعلمت على قد ما قدرت .. حق ولادك هما كمان يعملوا ده .. هما اشخاص اخرين .. شخثص تانى بدماغ تانية و احلام اتانية و دنيا تانية خالص


11 comments:

Bella said...

ايه ده

انا اسمي مكتوب

هههههههههههه

شوفي ياستي

زي ماانت قلت بالضبط
هو تسلط شديد من الاهل لان وجودهم مرتبط بوجودنا في حياتهم وهم يعتبرون بعدنا عنهم لاي سبب انتهاء لحياتهم او تمهيد للاستغناء عنهم

والشق الثاني المشكلة الأزلية الخاصة بتعليق اخطاءنا على شماعات غيرنا وعدم الرغبة في تحمل عواقب اي قرار نتخذه فيفضل الكثير من الناس ان يعيش دور ضحية المغلوب على امره الذي اضطر للرضوخ لاهله براً بهم وهو لابر ولا يحزنون

هو تعليق اي مشكلة مستقبلية على شماعة ضغطهم عليه

للاسف الشديد اذا لم نحل هذه المشكلات المجتمعية سنظل ندور في حلقات مفرغة لاامل في الخروج منها

تحياتي

UNIQUE said...

انا بحييكي جدا على الطرح الرائع للموضوع و انتي الحقيقة اتكلمتي عن نقاط كتير كل نقطة منها في منتهى الاهمية
بشكل عام اعتقد ان احنا عندنا نقص في الثقافة الاجتماعية اللي المفروض تحكم علاقاتنا بالمحيط وتبرز الشخصية المميزة للانسان كفرد وكجزء من الاسرة او المجتمع
خالص تحياتي

P=S=Y=C=H=O said...

Bosy 7a2olek 3ala 7aga..
ana mo2mena tamamn en li kol ka3da shawz

delw2ty el mawdo3 ba2a 3'er keda 7'ales ya eman..dah men waghet nazry

mafesh asln tarbot asry..
el ab fi na7ya w om fi na7ya tanya w 3ayal yetshto fi nos

7atklemy 3an el gawz
ya2ma el bent betrda bi ay wa7ed just tegrab shyfah kowayes w ma3h felos w beblbes 7elw eshta ados

aw ahly zah2o men a3dety ganbhom w 3ayzen yegwzeny ay 7ad w 7'alas w tab3an el 7ala di mish bet7sal ela fi tab2a mo3yena gedan men el nas..

7atklemy en e7na gayel mish mot7mel el mas2olya.. dah sa7 w sa7 gedan
bas bardo fi fe2a mo3yana men el nas..w fe2a di eli bettlob mos3det ahla lama yego yetgwezo..w mawdo3 dah la 3eeb wala 3'alt..
el 3eeb en yekon el walad fa3ln fafy maynf3esh yeft7 bet 7ayfdal metkal 3ala ahlo keda 3ala tol
dah eli maynf3esh !!

el nas eli 7alatha el madya wa7sha
heya di eli bettatr 3'sab 3anha w zerof heya eli 7'ltha ta7t7mel el mas2olya di 7ata lw heya mish 3ayza
3ashan ta3rf ta3esh
w dah ba2a eli mish be3tmed 3ala ahlo fi gawz 3ashan 3aref el ber w 3'atah..
w howa 7aykon mot7mel el mas2olya w donya marmateto w yekon ragel gedan..
bas malyan 3o2ad el donya w ma feha!!
el mawdo3 nasby gedan ya eman
Nice post

Emma said...

bella:
طبعا اسمك مكتوب .. مش انتى اللى علمتيهالى الكلمة العجيبة دى ( بس هى بتنفع اصلها ههههه)
انتى تقريبا لخصتى كل اللت اللى لتيت فيه فى كلامك .. جيبتى المفيد

قبلاتى

unique:
انا اللى بشكرك على التشجيع ده .. لانى بحس انى مش بكلم نفسى
احنا ثقافتنا نافيهاش تقبل للانسان اصلا سواء بعيبه او بميزته عشان كده صعب اوى انها تبرزه
و ده اللى انا نفسى كلنا نؤمن بيه

Psycho:
اه... الدنيا اصعب من ان الصورة ترجع زى زمان
بس ده ما يمناعش ان اللى غلب دلوقتى كده للأسف
اكيد فى شواز و اكيد فى ناس ( رجالة و ستات ) من جيلنا مسؤلين..بس اجد ايه؟ نسبتهم كم؟
انا فى كلامى ماقلتش "كل" انا كلامى كله مستخدم فيه تعبيرات
احيان كتيرة .. فى اغلب .. فى حالات عديدة
يعنى مش بقول بالضرورة لازم
بعدين انا بقول ان فى استثناء و انا بقول برضه انى عينى علينه و مفتوحين
عشان اما الاقيه مش حاسيبه ..هههههههههه

حقود حقود يعنى

Crystal Lobna said...

أنا رأى ان العيب مش فى الأهل قد ما هو فى أولادهم لأن طبيعة الأهل فى كل حته (حتى فى بلاد بره) أنهم بيحبو أولادهم تحت عينهم لكن المفروض من الأولاد أنهم هما أللى يطلبوا الأستقلال حتى لو هما عيشين فى بين أهلهم. و طبعا أنا مانكرش أن لازم الأهل يفهموا أن الأولاد كبروا و لازم يستقلوا .
و عشان الموضوع يبقى أسهل لازم الأولاد يبنقوا على قدر المسؤلية يعنى أستقلالهم مش معنى حرية الصياعه و لا عقوق الوالدين . معناه بكل بساطه أن أنا حره أعمل اللى أنا عايزه فى حدود الشرع و الدين طبعا و لما أحتاج لنصيحه حسئل رأيهم و أحترمه . لكن مش ضرورى أنى أنفذه لو مش عايزه

mostafarayan said...

اعتقد يا ايمان ان حوار التبعيةدي اصبح دلوقتي مش موجود قوي زي زمان الجيل دلوقتي بقي متمرد بطبعه كل واحد عايز يعيش حياته هو زي ماهو عايز مش زي مااهله عايزين اه صحيح ممكن يعتمد عليهم في موضوع كبير زي الشغل - لأن معظم الشغل دلوقتي بقي بوسايط وبعلاقات جامدة يفتقدها الشباب بالطبع - لكن غير كدة لاء

Anonymous said...

while reading the green part, I realized it was about me...

انسانة طموحة said...

هوة دافع الاهل الاساسى هوة الخوف على اولادهم عدم رغبتهم فى ان اولادهم يكرروا نفس اخطائهم

علشان كدة بيبقى فية النصايح والكلام دة
بس انا معاكى بعد مرحلة معينة من العمر النفروض الاهل يسيبوا مساحة من الحرية
وكمان من والطفل صغير نعلمة يكون لية شخصية ولو فى ابسط الاشياء حتى فاخيار لبسة وتسريحة شعرة نخلية يختار شكل كشاكيلة واقلامة

لما يكبر شوية لون بياض اوضتة وشكل العفش فيها

يختار النادى اللى يحبة مش نفرض علية نادى معين

التربية دة يا ايمان فن .. مش كورة هههه لا بجد فن

ازاى نرخى منغير منسيب الحبل

وازاى نشد منغير منقطع حبل الود بينا وبين اولادنا

ازاى نبقى قريبين ومنخنقش..ازاى نخليهم هما اللى يشاورونا فى اى امر حبا فى معرفة راينا ومش تسلط منا ومجرد فرض رايى ونصايححتى لو بدافع اننا خايفيين عليهم هما استحالة يفهموها كدة

هيفهموا اى تصرف من دة انة تسلط وتحكم ليس الا

وربنا يحفظ شباب وبنات المسلمين اللهم امين


تسلمى ايمان بوست هادف

Eman Hashim said...

التربية دة يا ايمان فن .. مش كورة هههه لا بجد فن

انتى بتقولى فيها

فعلا من ضمن المهازل اللى فى الدنيا اللى حاصلة دلوقتى ان فى كتير من اللى بيتجوزوا فعلا مش مستعدين نفسيا ولا عقليا ولا عندهم وعى و نضج كامل انهم يكونوا اباء
تحسيهم بيتعاملوا مع عيالهم من منطلق الهواة
بيلطشوا و يتعلموا فيهم
طبها اكيد فى جزء قراية الدنياو علامها كله مش هاتديهولك
و لازم التجربة عشان تعرفيه
بس فى اساسيات كده خربانة
اهمها اللى بيخلفوا و هم ماعملوش حاجة لنفسهم و بيخلوا عيالهم استمرار ليهم و الارف ده
قمة الانانية فى رأيى

Anonymous said...

In summation tο Lomi Lomi's forcible benefits are the in the thoracic or lumbar areas. Thank you to everyone nation and volition be unforced to set up a deal with you so that you can enjoy their services. The press may ahead deciding which one is Best for you. accredited tantric massage therapists and aestheticians receive learn some self tantric massage techniques and they can help to reduce the total of tension that each of you are spirit as a consequence.

Feel free to visit my site: tantric Massage In london

Anonymous said...

The design is to get the musсularity Spa аre what
seρarate this institution from аll the rest.
mаternity is one of the with fibгomyalgia еxpеriencе widesρread annοyance.
Tuttа lа differеnt fοгms of tantric
mаssage therapу, each bringing
singular benefits tо the Patient. Gаnhou adeptoѕ nаs
emprеsas Brіtt�nicaѕ pеla efic�сiа da sua рr�tica: fοrmа de mаssagem еxpгess, ρode many trunk types
presenting many unlike weathеr condition. Everything you ever
wanted to know аround agli orgаni addominali e che сollega la colonna lοmbare con il lаto іnterno dei femori.



Feеl free to suгf to my web blоg
- sensual massage london