17 - مفهوم الفشل

يا ساتر يا رب ... هى طالباها غم انتى كمان؟ الصبر

فاكرين اما قلتلكوا انى شايفة اللى مبوظ حاجات كتيرة فى حياتنا هو تخريب المفاهيم؟ اهه الفشل من المفاهيم دى .

الانسان فى رحلته القصيرة مهما طالت بيقضيها فى تجميع و لملمة .. تجميع حسنات .. خطوات .. علاقات .. نجاحات و اخفاقات ... خبرات و آمال و اختيارات

كلنا فى مرحلة عمرية معينة (لازم) الدنيا بتكون عرفتنا يعنى ايه نعوز حاجة و مانلاقيهاش ... بس الغريب هو ان ده لامر غير مفهوم بالنسبة لى ارتبط بالفشل.

توماس اديسون ليه حكاية مشهورة بتاعت عدد محاولاته الغير ناجحة لحد اما وصل للى هو عايزه ... هانرجعلها تانى الحكاية دى

ايه هو الفشل؟
الفشل انك اما تكرر التجربة بنفس الظروف و نفس المعطيات تغلط نفس الغلطات فى نفس الخطوات كل مرة تجرب التجربة

لكن ... اما تبقى كل مرة بتتفادى الغلطة اللى فاتت و تتكعبل فى غلطات تانية يبقى انت كائن مجرب و متعلم مش فاشل ابدا!

الفاشل الحقيقى هو اللى خوفه من عدم النجاح من اول مرة بيقضى على روح القتال و المخاطرة عنده و تحصره فى تجارب مستهلكة فاقدة القيمة لمجرد انه ضامن انه لو مشى فى التجربة دى على نفس خط سير اللى قبليه فهو هيوصل للنتيجة المقبولة اللى هم وصلولها .
و عشان كده احنا مش بنقبل تكرار عدم التوفيق و بنسميه فشل .
اغلبنا بيفكر انه الطبيعى و المنطقى ان اول علاقة جادة تجمع الانسان مع انسان اخر لازم ( طالما هما الاتنين محترمين و مؤدبين ) تنتهى بالجواز.
بنبص لعدم نجاح اى علاقة كعار مهما كانت المرحلة اللى بتخلص فيها
الفركشة سبة
الفسخ مصيبة
الطلاق كارثة

و بالتالى كل و اى علاقة بعد العلاقة الاولى بيبتدى العداد يتكتك ... تلاقى البنت اللى فسخت خطوبة او اكتر مذعورة هى و اهلها و فى دى يمكن الرجال فيها بيعانوا زى البنات. اى واحدة فينا هايجيلها عريس كان خاطب قبل كده مرتين مثلا هتفكر الف مرة قبل الموافقة انها تشوفه .. فما بالك بقى لو شخص سبقله الجواز؟؟؟!!!

انا مش بعمل دعوة لتعدد العلاقات و لا بمجد الاشخاص اللى بيبدلوا شركائهم باتسخفاف.. ولا انا بحمس اى حد بيواجه مشكلة مع شريكه او مديره او جاره انه مايحاولش مرة و اتنين و عشرين قبل ما ينفصل او يستقيل او يعزل.
الحلول التلاتة دول , فى مواقف هيتوصفوا فيها بانها انهزام ,و مواقف تانية هيبقوا قمة الشجاعة اللى ممكن حتى اللى حواليك مايفهموهاش.

انا بس كل همى اننا نقف ضد ان الخوف من عدم النجاح يحجم امكانياتنا و يحصر افاقنا فى الطرق اللى عليها علامات خطوات .. عشان يبقى هى دى اكيد اللى فى ناس مشيوا فيها قبلى و لو كان فى خطر كان زمانهم علقوا يافطة بتقول خطر.

مش يمكن انت ربنا خالقك اقوى؟ احكم؟ عندك من مقومات النجاح فى الحاجة دى بالذات اكتر من غيرك؟؟ ليه عايزين الاسهل حتى لو كان اقل بكتير مما نستحق؟
ماهى معروفة ... الحاجة كل ما بتحلى بتغلى و بيزيد تعبها

و الدليل ان الفشل المزرى ده مش بس فى العلاقات .. ده اكتر و اقبح بقى فى الحياة العملية و العلمية
اما بنيجى نختار مثلا دراسة ... عمل ... بيزنس,كل تفكيرنا بيبقى فى انهى اسهل و اضمن مش انهى اقيم و اقرب للى انا عايزه حتى لو اصعب

اللى بتكلمكوا نفسها عملتها العملة السودة دى اما اجلت امتحانى 3 مرات عشان خايفة مانجحش عشان هو امتحان اجنبى جديد و عدد الناجحين من اول ماتعمل الامتحان من سنتين لحد دلوقتى لا يتعدى ال60 ممتحن من مئات من كل بلاد العالم بمتوسط 15 ناجح كل سنة علما انهم بينجحوا اعلى نسبة من المتقدمين مش فى درجة نجاح زى العادى كده.

يعنى انا عارفة ان كلمة راسب كلمة صعبة .. بس ممكن افضل خايفة انى مانجحش مرة او اتنين او عشرة حتى و اديسون ماخافش ولا اتهز اما مانجحش فوق التسعميت مرة
ماهو عشان كده هو اديسون
مش عشان هو اذكى ...لأ ... عشان هو اكثر اصرارا و عزيمة و عشان هو ماخافش من عدم النجاح و ماخافش يتقال عليه فاشل ..كمان عشان كان بيتعلم من غلطاته و عمره ما كررها ..يعنى هو اما جرب 99 تجربة .. و غلط 99 مرة .. عرف 99 معلومة!!

يبقى لايمكن عدم نجاح تجربة يخلى البنى ادم يتسرع و يتلهوج فى اى حاجة عشان مايتقالش عليه فاشل
و هنا انا افتكرت مدرس اللغة الانجليزية فى الجامعة الامريكية دينا بشير الديك اللى اتخطتبت اكتر من مرة بس كانت اشجع من انها تمشى فى جوازة بس عشان تبقى متجوزة و عشان مايتقالش عليها بتتخطب كتير .. و هى كانت من ضيوف الحلقة التليفزيونية اللى كنت انا فيها لو فاكرين اللى انا شخصيا بحيى شجاعتها و صدقها مع نفسها

بس يعنى .. رجاء خاص .. احنا هنقتدى بتوماس اديسون اه فى الحياة بس بلاش فى الحياة العاطفية نقول و ايه يعنى 99 مرة ..ههههه

عشان ماحقدش عليكوا اكتر مانا اصلا باحقد