Wednesday, March 12, 2008

16 - تسائلات

لو تخيلنا حياتنا بلغة الكمبيتر هنلاقى ان و احنا بنستتب بندوس على اوكى فى حاجات كتيرة اوى و احنا مش واخدين بالنا
انا النهاردة هتسائل فى شوية من الحاجات الغامضة بالنسبة لى


1 - ليه الست فى شهر العسل دايما بتأكل جوزها؟ هو البعيد اتسخط و لا هى مالهاش نفس؟

2 - ليه بقى بعد شهر العسل بتودعه على باب الشقة و هو رايح الشغل بعيون ماليانة حب و يقوم هو حادفها بوسة و هى ليسة بالبيجاما؟ هى مش رايحة شغلها هى كمان؟

3 - طب هى لو مش بتشتغل .. ايه اللى مصحيها بدرى بقى؟؟ اياك حد يقوللى عشان تفطره .. هقل ادبى !!!

4 - "سؤالى المفضل" ليه الستات لازم ترجع قبل اجوازها؟؟ تانى و تالت و رابع ... ليه؟؟ ليييييييييييه؟؟ لييييييييييييييييه؟؟؟؟؟ طب تخيلوا معايا كده... الراجل خلص شغل... رجع البيت..حط المفتاح فى الباب (ماحنا من فترة طالبنا المجتمع انه يعمل نسخ من مفاتيح الشقة للرجالة) و دخل الشقة مالقاش مراته.. هه بقى؟ و بعدين؟؟ ايه بقى الكارثة اللى هتحصل؟؟

5 - ده سؤال و ممكن يكون رد على 4
ليه الست اول ما جوزها يرجع من الشغل ( وهى زوجة مثالية و موجودة فى البيت) تجرى وراه الأودة و تقف وراه و هو بيقلع الجاكيتة؟ طب هو قبل الجواز كان بيلبس ايه فى الشغل؟ ثم ان فى اغلب الاحيان الست اقصر من جوزها .. يعنى فى الواقع هى مش بتساعده نهائى .. هى بتقف وراه فاردة دراعتها و هو يحدف الجاكيتة لورا و هى تلقفها

6 - ليه اما الست بتحب تدلع الراجل بتلبسه الكرافتة؟ طب هو قبل الجواز كان بيعمل ايه؟ ماتقولوش مش كل الناس بتعرف تظبطها .. حتى لو بيعرف...الغريب فى الموضوع ان فى اغلب الاحيان هى بتلبسها.. اصل فعلا ظبطة الكرافتة دى اسهل و الواحد لابسها .. هى تلبسها و تربطها و بعديت تفكفكها سنة و تديهاله

7 - لودى حاجة لزوم الدلع؟؟ ليه بقى مفيش راجل بيظبط لمراته الطرحة و هى نازلة؟ سواء سبانيش او عادى ( على فكرة هى مجرد تخيلها مستفز ...ههههههه) و لو مش محجبة , ليه مايسرحلهاش شعرها قبل ما تنزل .. يفك الرولون و يطلع السيشوار و يظبط القصة او يلمه بتوكة ...كده يعنى

8 - ليه الفطار فى السرير دلع؟
طب و اما نفتفت و النمل يهجم على السرير و يقرص فينا؟
طب و العماص؟ مش نغسل وشنا و سناننا الاول بعدين ناكل؟
طب و اما نبقع المفرش ولا اللحاف و الست ترقع بالصوت يرجع يقول عليها مش رومانسية؟

9 - ليه الرجالة لازم تتنحنح و هى خارجة من الحمام؟ ايه علاقة اللى عملوه فى الحمام بان فى حاجة فى زورهم و غالبا مفيش حاجة .. هو كده , الخارج من باب الحمام يتنحنح ..اوكى

10 - ليه الستات اما يبقوا فى مشكلة بيغمن عليهم؟
خطيبها يزعقلها .. تقع فى الحمام
باباها يرفض الجوازة ... تترمى فى الكنبة
جوزها يقولها مش بحبك ..تندلق فى السرير
لأ و ايه؟ هى غالبا بتبقى زابطة حسابات المكان و الابعاد فى مخها قبلها .. يعنى لو فى ترابيزة وراها استحالة تتخبط فيها والا رقبتها هتنكسر و نرتاح كلنا .. و لو جنب السرير تلاقيها اتسنترت فيه كده و مالياه و طبعا فى الحمام عند البايون .. لا يمكن حتى تتخبط فيه!!!




و فى الاخر يتبقى الألغاز اللى لا جيلنا و لا جيل احفادنا هايحلوهم
- الست بتعمل ايه اما بتحضر الحمام
- و الميا السخنة لازمتها ايه فى الولادة الطبيعبة *
- و ميل جيبسون اما باس صوفى مارسو فى الوداع فى فيلم القلب الشجاع و بعدين تف الدوا... عملها ازاى الحركة الصايعة دى؟؟




* زمان كنت فاكراهم بيسلقوا العيل .. اقصد يعنى الحموم لزوم النضافة بس اصل المية بتبقى بتبقلل .. دى اكيد مية سليق.
و اما دخلت طب قلت بس .. اكيد بيغلوا الادوات فيها.. بس طب الداية بتمسكهم ازاى؟ ماهم مولعين.. بتمسكهم بفوطة او حتة من المطبخ .. حاجة كده لزوم التعقيم


و النبى بطلوا تدوسوا اوكى و خلاص و اقروا بتدوسوا على ايه و اعرفوا لازمته ايه

و مش هابطل احقد


أهم شيء أن لا تتوقف عن التساؤل .....
ألبرت أينشتاين

17 comments:

المُهاجر said...

مريت على مدونتك بالصدفة
استفزني كلامك فلازم اتكلم
ولك كل الحرية انك تحذفيه
1
الست بتأكل جوزها في شهر العسل علشان تخليه ما يفوقش من الصدمة وما ياخدش باله من المصيبة اللي عملها في حق نفسه

2
بتودعه على باب الشقة علشان تدعي ربنا انا يرجع سليم ، وإلا هتلاقي مغفل تاني فين والدنيا مليانة حريم

3
هي صحيت بدري قبله علشان تفتش في جيوبه .. وتقلبه .. وتخليه على الحديدة علشان ما يفكرش يتجوز عليها

4
هي لازم ترجع قبله علشان تلحق تعمل له السم اللي هايكله ، ولا يطبخ هو بقى أو يقضيها مطاعم زي ايام العذوبية
مع ان المفرض انها ما تشتغلش اصلاً علشان تسيب فرصة لشاب غلبان مش لاقي وظيفة وكل ما يدخل مصلحة حكومية يقول جاتكو القرف مليتوا البلد

5
دا بقى ردك على تلاتة مش اربعة
وطبعاً علشان تاخد البدلة وتقلبها بدري بدري
او تدور على شعرة دهبي مثلا
قال اصل فيه ستات شعرها دهبي أصلاً
ما تعرفش انها باروكة وتلاكيك حريم

6
بتلبسه الكرفاته بقة علشان تأمن عليها وتعرف هي مربوطة ازاي
ولما يرجع صاحبنا تشوف اذا كان فكها وهو بره ولا لا

7
وماله .. فيها ايه لما يظبط لها الطرحة أو يعمل لها شعرها
ولا اقولك
هو يسيب شغله ويشتغل لها كوافير احسن

8
مين قال لك ان اللي بيفطر في السرير انسان طبيعي
دي تقليعه جاية من الغرب
وهو بيجي من الغرب شيء يسر القلب

9
الراجل بيتنحنح وهو خارج من الحمام زي غفير الدرك اللي بيقول ها مين هناك
شوية حركات يعني علشان يقول ان في اسد في البيت

10
دي مش تبعي .. علشان دي سهوكت حريم


مين بقى اللي بيدوس اوكي وخلاص ؟؟

وعلى فكرة اوعي تبطلي حقد
دا حتى علامة صحية

في زميلة مدونة اسمها المفقوع مرارتها
بعد ما قريت موضوعك
شكلي ها احصلها

Anonymous said...

3andk 7a2 ya emAN enena bendos ok fe 7agat kter fe 7yatna men 3`er manfakar .bs eltsa2olat ely enty sa2laha de m2drsh afty feha delw2ty l2any aked 7a3`ayar ra2y b3d elgawaz

Omar El-Tahan said...

انا متفق معاكي في موضوع الأوك اللي بندوسها من غير ما نفكر ... وفعلاً حته مهمة قوي

بس بعد كده كل الكلام حسسني انك بتشوفي افلام عربي كتير ... كتير قوي ... أكتر من اللازم

هو نسبة كام من البنات دلوقتي بتعمل كده؟

وبعدين فرضاً إنها بتعمل كده ... انتي زعلانة ليه يا ستي ... هو عيب ان الست تدلع جوزها وتظبطه ؟؟؟ حتى هتاكل دماغه وتحسسه انه سبع البرمبه واي راجل بيحب كده.

وبعدين هو لما تدلع جوزها يعني ايه اللي هايحصل؟؟ هاتخسر ايه؟؟
هاتروح النار ؟؟؟ ولا طنط ظاظا هاتشمت فيها ؟؟؟ ولايمكن منظرها قدام صاحباتها وقريباتها يبقى بيئة

عامة أنا برضه شايف ان الراجل مفروض يعمل حركات من دي برضه ويظبط مراته ويدلعها عشان الدنيا تبقى رايحة وراجعة .. مش رايحة بس ... والراجل يكسب كل حاجة لو قدر يحسس مراته انها مهمة عنده وانه بيفكر ازاي يسعدها ولو بحاجات بسيطة ....

الدنيا خد وهات ... وعم عشم لسه ما مات

تحياتي لك.

Ahmed Shokeir said...

Post of the day
:)

ahmEd_H said...

هاهاهاها

يخرب بيت الحقد يا شيخة

دمك خفيف مووز

mostafarayan said...

يا يا ايمان يعني انت مستخسرة في الراجل بعد مابيدفع دم قلبه في الجواز شقة وعفش وشبكة ومهر وفرح بعدكل دة مستخسرة فيه بوسة من مراته وبتتردلها بزيادة وفي وقتها وبعدين يعني ايه المشكلة لما مراتي تسرحلي شعري اوتقلعني البدلةاوتلبسهالي ماهي لازم مراتي تدلعني وتخلي بالها مني وتحسسني ان في فرق بين قبل الجواز وبعده امال يعني انا كنت متجوز ليه وبعدين الست لمابتعمل كدة الراجل مش بيطلب دة منهاهي بتعمل كدة بحب بدافع الغريزة وبدافع الفطرة اللي مانقدرش نشوفلها اسباب هو كدةعلشان كدة خصوصا لو كان الأتنين بيحبوابعض
لكن مايمنعش بردة ان الراجل يظبطلهاالطرحة وهي لبساها طبعا
اما الراجل مش بيعمل كدة ليه لأن الست بتفضل واقفة قدام المراية عشر ساعات قبل ماتنزل فطبيعي عند الراجل انها جاهزةومش ناقصها حاجة زائد ان عادة الراجل لمابيكون خارج مع مراته بيكونوا متأخرين لأن الست الهانم بقالها نص يوم قدام المراية فالراجل بيكون علي اخره لمابيصدق تقوله يلا خلصت علشان ينزلوا
غير كمان ان الحاجات اللي بتقولي عليهادي بتحصل في اسبوع او شهر العسل بس لماالست بتكون لسة مهتمية بنفسها وفاكرة انها ست وعلي ذمة راجل لازم تهتم بنفسها علشان تفضل حلوة في عنيه لكن بعد كدة وزي مانت اكيد سمعتي من اغلبية الرجالةان الست بتتحول لمخلوق تاني لا يمت للأنوثة بصلة
بتبقي حاجة كدة تسد النفس ولا بتشجع لا علي بوس ولا احضان ولا اي رومانسية من اي نوع
ولنا الله نحن معشر الرجال

la3lahakhier said...

يا ستى دوسى كنسل و بلاش اوكى اللى جابتلنا الكلام دا
بوست تحفة ورد المهاجر تحفةهو كمان
فى انتظار المزيد
لعلها خير

P=S=Y=C=H=O said...

LoooooooooooooooooooL:D
mish adra abtal da7k:D
lama abtel da7k 7ab2a adelek comment:D

P=S=Y=C=H=O said...

yabenty howa
esmo '' shar 3asl''
ya3ny'' dal3''
w ba3ed el shr da '' bel gezam''

Emma said...

Anonymous ( Mohamed Hashim )
اما نشوووووووووف

Omar El-Tahan
لو العملية بالتوازن اللى بتقوله يبقى يا ريت


Ahmed Shokeir
Thanks .. Hope to see you here again :)

ahmEd_H
Thanks .. again, I wish I can see here all the time ;)


mostafarayan
انا حاسة اننا مش مختلفين فى المبدأ و ده شىء جميل

la3lahakhier
متشكرة يا فندم .. و الحقد حايزيد على فكرة مش العكس


P=S=Y=C=H=O
ايوة ... خايهم يعيشوا الصدمة

drsamoor said...

Enti mogrema kberaaaa...

Mostafaryan...

la2 el regala homla ely byb2o wsh romansyea!

JASMINE MINO said...

HAHAHAHA
el tasa2olat beta3tek f ma7alaha ya eman ..besara7a

lih el set betwakel gozha .. w betwada3o ..w betfataro fel sereer .. w bet7adarlo el 7amam lamo2akhza .. ( w heya bet7adar el 7amam ya3ny eh .. ana gayalik fel kalam )

bete3mel ya sety el kalam da .. plus mawdoo3 el karavata kaman .. men lozoom el maskana .. w ana otta w daloo3a w e3mely eli ana 3ayzah .. system ya3ny :))

bet7adarlo el 7amam.. ya3ny betefta7lo .. el maya el sokhna .. w te7adarlo el bashkeer w keda ..w te7adar daraget 7araret el 7amam .. 3ashan yeb2a dafy 3ashan mayestahwash nanoos 3ein .. tante 7amatha ..

ama el daya ya dr .. w ma3alish en lazim akteb da in medical terms ..
el maya el sokhna 3ashan tebel fowat w tekhaliha dafya 3ashan el baby law tele3 breech ( nazel bel derrier ya3ny ) telef el fowat el dafya .. around his legs back so not to breathe while the head is still inside :))

nice blog .. ektashafto today ..
way to go girl ..made my day today
by the way ..i am ophthalmologist too ..:))
jasmine

Eman Hashim said...

zameelaaaaaaaaa

ezayak ya zomol
thx 3ala el comment
we tafseeratek feeha mantek wallahy

merci gedan lemo7awlet el7efaz 3ala 3a2ly :D

انسانة طموحة said...

ههههههههه معاكى لازم نسال بس مش بالشكل دة يا ايمان هنتجنن كدة ههههههه

فية حجات مش مهم نسال فيها يعنى مثلا يتنحنح يستى يولع فنفسة هو حر هههه

او مثلا كرافتة او بتاع اهى بتدلع جوزها برضة هية حرة ومظنش خلوها فرض دة كمان ؟؟؟

وحكاية ان اول ميرجع يلاقيها دة لان بيبقى وراها اشغال شاقة فالبيت لازم تعملها قبل ميجى الباشا

زى الغدا وتوضيب البيت

اما تساؤلك عن المشكلة اذا رجع ومش لاقاها واااااااااضحة

مش هيتغدى طبعا كارثة قومية والدنيا تقوم ومتقعدش..غداة هيتاخر يناس وهوة الراجل الشقيان التعبان واللى واللى ........الخ

على اساس انها كانت فساونا مكنش طالع
عينها زية

اما حكاية الاغماء دة فدة من كتر الهدة اللى البنات فيها تقريبا

او خلاص اعصابنا باظت من الضغوط ومش منحسين زى ناس البعدااااااا مفيش دم هههههههه

وكفاية تساؤلات يا مونى بشفق على دماغك يا حببتى هتتعبى هههههههه

وربنا معاكى يا قمر

تسلم ايدك

Eman Hashim said...

انا ضحكت ضحك من ردك يا طموحة
مش ممكن
بجد
دمك خفيف اوى
و عندك حق .. انه مايلاقيش الغدا دى كارثة قومية فعلا
ههههههههههههههههههههه
لو عندك فيس بوك ضيفينى
بس حطى فى طلب الاضافة انك انسانة طموحة عشان اعرفك

انسانة طموحة said...

يارب دايما مرورى يكون سبب فى اسعادك ويكون مرورى خفيف عليكى هههههه

وانا فعلا ضفتك وبعتلك رسالة لان الاكونت بتاعى باسم
SALMA

ومنتظرة قبولك للاضافة

وتسلمى لردك

Eman Hashim said...

كده تمام
:)