Sunday, February 3, 2008

8- و ليسة الوحدة هتزيد

الاختلاف لا يفسد للود قضية

كلمة لذيذة اوى بنسمعها كل يوم ... لكن الحقيقة ان للأسف الاختلاف فعلا بيفسد كل الود. بدون اى سابق انذار او دراية فى احيان كتيرة .. الانسان المختلف بيتعزل
هل ده لعدم تقبل الآخر؟ .. جايز
هل ده رفض للى هو بيمثله؟ .. احتمال

بس اللى انا متأكدة منه ان المشكلة بتبقى فى ( الاختلاف) نفسه ..... " مش مهم انتى ايه المهم انك مش زينا" . النا س بتخاف من المختلف و بتقلق منه ايا كان هو ايه.

فى منكم قرا تقديمى للمدونة و كان فيه قلت ان انا بقدم صورة انسانة حاسة بالوحدة رغم ان عندها اصحاب من كافة اشكال البشر.
للأسف ده تمن غالى اوى انا بدفعه كل يوم و كل لحظة نتيجة اختلافى عن كتير من اللى حواليا

الحكاية دى بتفكرنى بذكرى أليمة جدا و هى احد المرتين اللى قررت فيهم انى اعمل فيها متعلمة و مثقفة و اروح للدكتور النفسى.
واحد منهم ماسمعش ولا كلمة و قاللى " انتى عندك اكتئاب عشان مش متجوزة"

نهار اسود و مدوحس!!! يعنى انا جاية بقولك انى بعانى من بعض المتاعب نتيجة اختلافى بشكل عام تقوللى خالليكى زى بقيت الناس؟ مانا لو قادرة او عايزة كنت اتنيلت!!

بس الغلط مش غلطه.. انا اللى ماكنتش صادقة مع نفسى كما ينبغى.. كان لازم اكون اوضح و كان لابد ابقى اشجع

عشان الانسان يستمرمحتاج يكون واضح و صريح مع نفسه و قدام نفسه ( بينك و بين نفسك محدش له عندك حاجة ) صريح مع نفسه و اختياراته و اتمانها عشان يقدر فعلا يحدد هو هيقدر على ايه و مش هيقدر على ايه و يكون شجاع فى دفع التمن.
عشان كده انا عارفة ان ليسة الوحدة هتزيد

بس انا ليسة عندى مزيكتى .. و ليسة عندى كتبى ... و مدونتى ... و اهم حاجة انى ليسة عندى نعمة الصلاة و الكلام مع ربنا

و ليسة عندى الحقد حبيبى ....ههههههههه

8 comments:

mostafarayan said...

بصي انا النهاردةاول مرة ادخل علي مدونتك دي
مش عارف انا حاسس انك مزودها حبتين
الدنيا صحيح مش وردي قوي لكن مش سودة اوي كدة والناس معظمهم بقي ابن ستين كلب لكن بجد لسة في ناس كتير كويسين والأنسان ممكن يعتمد عليهم ويكونو اصحاب بجد انا حاسس انك انت اللي متعمدة تفرضي سياج الوحدة دي علي نفسك مش عارف حاسس انك خايفة شويتين من الحياة ومواجهة مشاكلها بس الأنسان لازم يواجه لازم يفرض رأيه
كمان عايز اقولك ان كل حاجة جاية في معادها سواء موضوع الزواج او غيره
ومش معني ان الدكتور النفسي ده مافهمكيش كويس يبقي خلاص نعقد نفسينا لاء هو مش بيقول قرآن يعني
انت بنفسك تقدري تواجهي وتنتصري علي كل المشاكل اللي بتواجهك
عايز اقولك كمان ان احيانا الوحدة بتدي للأنسان الفرصةانه يبدع ويقرأ ويعمل كل حاجة مش بيقدر يعملها في وسط الناس لكنها بردة زي اي حاجة الكتير منها غلط
يارب تكوني قدرتي تفهمي قصدي
وربنا يوفقك

Emma said...

مش قادرة اقول انى فهمته اوى بس ان شاء حفهم اكتر اما نتكلم اكتر

و شكرا على الدعوة
ربنا معاك انت كمان

L.G. said...

سلامو عليكم
على فكرة عرفتك من برنامج البيوت أسرار وعجبني حوارك بس لما دخلت المدونة -لي تحفظ كبير عليها خاصة لغة الكلام فيها - بس مش ده المهم
نصيحة من أخت لك انتي بتتكلمي وحسب البروفيل بتاعك عندك 26 سنة استني لما تبقى 30 الوحدة حتزيد عندك حق وكل اللي حواليكي حتى لو بيحبوكي حينصرفوا عنك واستني لما شبح عدم الانجاب يراودك متستهونيش بحالتك دلوقتي والعيلة لسه جنبك
الشغل والكتب والموسيقى مش حياة دي مكملات حتبقى زي واحدة عندها مجوهرات وعايشة في الصحراء من غير نقطة ميه
أيوة متتجوزيش غلط بس الجواز أهم حاجة للراجل والست
الاختلاف مش حاجة جميلة على العكس زي ما قلتي الناس بتبعدلأنها بتخاف الناس الشجاعة فقط بتحمل نفسها عناء الاكتشاف وان اختلافك لا يعني بالضرورة انك سيئة
الحياء جميل صدقيني لا تتركي للناس فرصة ليصفوك بعكس ذلك
كتاباتك تحتاج التدقيق فيها بعض الشئ
أتمنالك زوج طيب
لو نجحت كطبيبة وخت جايزة عالمية ولكن ليس لك رفيق وكل من بالحفل اتنين اتنين
شعورك حيكون ايه ؟
على فكرة لم يعجبني نهائيا ردود الدكاترة خاصة المصريين خالص والولد بيتكلم في الالالا مين بيطلب شبكة ب60 ألف الا الحرامية
طولت عليكي كنت أود مناقشتك أكثر في مضمون الحلقة بس عذرا للتطويل
ابتعدي قليلا عن الحماسة الزائدة في الحوار لأنها تفقدك المصداقية مع ان كلامك بيكون صح
العبرة بسعادتك انت مش بتفوقك في الكلام مع الناس
ادع لنفسك بالزواج لأنه عفة وحياة صدقيني

Emma said...

لا ما طولتيش ولا حاجة
و اهلا بيكى يا ست ال جى

حتة حتة... اللغة اعتقد انها حاجة بكامل اختيارى و النصيحة بالتدقيق فيها تقمس لدور المحرر مش فى مكانه خالص.
النصيحة بالتدقيق - على رغم من انى مش فاهماها اوى- لكن ا عتقد انها مش اللى المدونة دى عنه .. انا بكتب يومياتى .. انطباعاتى فى لحظة معينة .. انا على فكرة مش بعمل اى تنقيح للكلام .. الكلام ده عفويا كده من دماغى على المدونة

اما انى اه ماتجوزش جوازة غلط بس الوحدة وحشة فأنا اعتقد انها بالظبط اللى انا بقوله
انا ماقلتش انى مستمتعة بده بس قلت انى طالما مختاراه بيقى اكون قده

حماسى و انا بتكلم بيفقدنى مصداقيتى دى شكلا و موضوعا مرفوضة لان ماعتقدش انك تعرفينى عشان يبقالى مصداقية عندك تفقد او تستمر .. مصداقية فى ايه بالظبط ؟ و حماسى فى ايه؟

انتى بتقولى استنى لما تبقى عانس بجد .. انا بقولك بصى اسم البوست " ليه الوحدة هتزيد" يعنى فى كامل ادراك ان اللى انا فيه ده ليسة مش النهاية

كلمة عانس انا شرحت اكتر من مرة و فى البرنامج زى مانتى شوفتيه ايه سبب تسمية المدونة بيها و بالتالى صعب يكون الرد من حد بيدقق فى الكلام انه يقوللى انتى ليسة مش عانس

فى حاجة .. البوست كلع تعليمات .. لسبب واحد .. فر السن .. انتى شايفة ان ده اداكى الحق فى التعليق على اللغة و الكلام و الحوار و الافكار بل و الانطباعات .. انا عايزة اقولك امى بطلتها الحكاية دى

انتى ممكن تلخصيها فى انى بيبى و تكبرى دماغك و تريحى الكل .. و ممكن تناقشى اللى بيتقال فعلا لو من وجهة نظرك يستحق ده..
لكن فى كل الاحوال ماعتقدش انه منطقى " الدخلة" اللى انتى دخلتيها دى

و شكرا على اهتمامك

L.G. said...

إذا كان كلامي أزعجك فهذا أبدا لم يكن مقصدي ويعلم الله
فقط أردت أن أسوق لك تجربة شخصية وفي جميع الأحوال
وفقك الله
وأعتذر ان كان مقصدي محاولة ألا يمر غيري بنفس المشاكل
لو كنت شايفاكي بيبي لم أكن لأكاتبك أصلا أسأت فهمي تماما
نهاية غفر الله لي ولك
وآسفة يا ستي على الزيارة مش حكررها تاني

Emma said...

يييييييى
هو اى خلاف يبقى ده اخره؟؟
يا ستى ماتجيش ليه بس؟
اهلا و سهلا بيكى طبعا
بلاش الافش ده

Anonymous said...

i just wanna 2 tell u that am in luv with urblog and i'd be honored if u accepted me s a friend
Hebat Allah T.G

Eman Hashim said...

ازيك يا هبة؟
ربنا يخليكى ليا على التشجيع ده
يا ريت اعرف رأيك فى باقى الكلام