Sunday, February 3, 2008

10 - هى دى الحدوتة



تعرفوا جين اوستن؟ دى كاتبتى المفضلة.
طب تسمعوا عن فخر و اجحاف ؟ دى روايتى المفضلة.

الاجحاف!!!

من اقسى و اقبح و اسوأ و اكتر سلوكيات الانسان قبحا ..

انا على ادى بفهمه شكل من اشكال الظلم. انك تحكم على انسان باى شىء غير انسانيته .. وده سواء بالسلب او باليجاب على فكرة.
مانت برضه لو حكمت على حد باليجاب لشىء مش فيه ده برضه ظلم ( مع كامل تحفظى على اننا لازم نحكم اصلا)


الفلسطينيين حراميا
الخلايجة مغارير
الاغنياء جبابرة
سواقين التاكسى رغايين
السبكين نصابين
السوريين بيحبوا مصر
المنصوريات حلوين
العمال طيبين


انا بس بطالب اللى يقول حاجة من دول انه يكون شاف و سمع و اتعامل مع كل الناس اللى بتخضع للفئة دى لانه لو مش كده يبقى هو اكيد بيظلم.



لايهمنى اسمك
لا يهمنى عنوانك
لا يهمنى لونك
ولا بلادك .. مكانك
يهمنى الانسان و لو ملوش عنوان
يا ناس يا ناس يا مكبوتة
هى دى الحدوتة




الحدوتة






5 comments:

جميز said...

متفق معاكى فى اللى انتى بتقوليه بالنسبة للحكم على الأشخاص بالتعميم , و دا غلط بالتأكيد , لكن الإجحاف مالوش دعوة بالكلام دا , على فرض اتفاقنا على معنى الإجحاف , و معناه عدم إعطاء الشىء أو الشخص حقه الكافى

تحياتى

Emma said...

ممكن جدا يكون عندك حق
المعجم مافيهوش حاجة تقول مين فينا صح
و الويكيبيديا اصلا مترجمنها حاجة عجيبة كده
هدور اكتر و اقولك وصليت لايه

شكرا على التوضيح

جميز said...

متدوريش و تتعبى نفسك .. حصل خير
أنا أصلا متفق معاكى فى كل كلمة
و شكرا على حدوتة منير

تحياتى

islam said...

دي يا إيمي مش صفه مصريه لأ دي إنسانيه .... إزاي ؟؟؟
علماء النفس بيقولوا إن البني آدم دايما بيحاول يلاقي قوالب يحط فيها الحاجات عشان تكون أسهل عليه في فهمها.
هو طبعا ده عادي بالنسبه للحاجات ... بس للبني آدمين ... صعب جدا
لكن عايز اسجل ملاحظه ... باعتبار اني شوفت ناس كتير من محافظات و مدن كتير ..
ان الناس فعلا في مجتمعات معينه ممكن يكون ليهم نفس الطباع الأساسيه .... بمعنى ..
أنه مثلا اللي بيتربى في منطقة أهلها بيقدسوا الأرض الزراعية بيكون زيهم
اللي اتولد في مكان الناس فيه بيقدروا بعض بالفلوس اللي معاهم أكيد بيتأثر و يبقى فيه شيء من الحرص و أحيانا بخل
و هكذا
و الموضوع هتلاقيه أي ناس بتعيش في مجتمعات أساسها التواصل المباشر و الدائم

انما الأحكام العامه بتكون طبعا غلط إذا افترضنا انها لكل الناس
و صح إذا إعتبرناها تقرير للصفات الغالبه على معظم ناس المكان

بس كده

إسلام

Emma said...

كل ده و بس كده؟؟!!!!
ههههههه
انا فاهمة انت تقصد ايه و جايز ممكن يفسر من درجات الحظر لكن انا بس مشكلتى انه للأسف الأسيف( ههههه) بيظلم