Sunday, February 3, 2008

9 - يا ناس ارحموا الناس

شوفى محجبة و لابسة ايه
شوفى الولد ماسك ايديها ازاى
ايه ده؟ هى ازاى لابسة الالوان دى
شوفى مطول شعره ازاى ... بالذمة ده راجل ده
يعنى متدينين و الست تعد فى البيت لكن بنتهم تشتغل


من اظرف الاشياء فى الانسان مقدرته على الرؤيا الواضحة تماما للصح و الغلط عند الناس التانيين. كل واحد فينا عايش زى ما يكون عضو لجنة تحكيم بيدى درجات للناس اللى حواليه.

لكن هل الانسان بيكون بنفس العبقرية دى مع نفسه؟ طبعا لأ. احنا فالحين اوى فى اكتشاف غلطات غيرنا و كأننا مش بنغلط ولا كأننا جاتلنا لحظات تصرفاتنا اتناقدت مع مبادئنا و كأن الانسان كائن فى الاصل غير مخطىء او كأن الخطأ ده هو استثناء القاعدة.

يعنى هو تعامل الانسان مع الخطأ هو اللى بيعلمنا .. هيتعلم منه ولا لأ ... هيكرره ولا لأ .. لو اتحط فى نفس الموقف هيكرر نفس الموقف ولا التجربة تفرق ؟ و لو اه هتفرق ازاى؟؟
طب لما كلنا بنغلط و كلنا بنناقد نفسنا .. لما كلنا كده .. ليه مش سايبين حد فى حاله؟ ليه بننبسط اوى كده لما بنلاقى حد غلطان؟

هل لما بنشوف لحظة ضعف عند انسان ده بيقلل احساسنا بشدة او مدى ضعفنا و تناقدنا؟ هل ده السبب اننا بنفرح اما يكون الانسان ضعيف ادامنا؟
هل للدرجة دى الانسان ممكن يضحك على نفسه .. لدرجة ان اللى بيحدد مدى ضعفه هو ضعف الاخرين؟ و بالتالى بيبقى فى رغبة ملحة و مستمرة فى ايجاد ناس اضعف ؟؟
طب ما هو زى ما فى اسوأ فى برضه الافضل... اشمعنا بقى؟؟


" لأ اصلها عاملة فيها خضرة الشريفة و العيبة مش بتطلع منها" .. انا معنديش مشكلة ان حد يناقض نفسه بس مشكلتى فى الحكم على بعضنا بتناقضاتنا .. يعنى انا بقول حاجة و اتصرفت مرة عكسها دى مش مشكلة حد .. المشكلة لو قررت امشى احكم على الناس .

ما هو لو كل واحد فينا وفر طاقاته النقدية لنفسه اكيد هيكون انسان احسن و افيد و انفع لنفسه و لغيره و اكيد هيتطور و ينمو مع الدنيا.

لو انا ربنا مدينى حبة مخ اضيعهم ليه على البشرية .. مانا اولى

و محدش يقوللى الامر بالمعروف و النهى عن المنكر
اولا : انت كده لا بتأمر ولا بتنهى
ثانيا: انت كلامك فى الغالب مش هينفع ان ماضرش
ثالثا: الدنيا اتغيرت .. فى اغلب الاحيان اللى بيغلط عارف ان ده غلط
رابعا: مين قال اصلا انه غلط؟؟ مش يمكن اصلا مش غلط؟؟ ولا هو مفيش غير الصح اللى انت شايفه صح و الغلط اللى انت شايفه غلط؟
خامسا: مين قال ان حضرة جناب ساعتك ليك فى سوق البنى ادمين انك تقول ان فلان صح و علان غلط؟؟ فيك ايه زيادة عن البشر؟


محجبة و لابسة قصير؟
محجبة و بتكدب؟
محجبة و بتغش؟
محجبة و مصاحبة؟
محجبة و بتنط من سور المدرسة؟ - تعليقا على صورة من بيقى انت اكيد فى مصر -

على فكرة ... الانبياء خلصوا .. و على فكرة برضه الانبياء بس هما اللى ربنا خلقهم مش بيغلطوا .. و على فكرة كمان المحجبة مش قديسة يعنى مش معنى انها اخدت القرار ده يبقى هى اخدت قرار انها فوق الغلط و مضت اتفاقية دولية تتعهد فيها انها بالذات دونا عن كل البشرية جمعاء مش هتغلط .. يعنى عادى المحجبة دى بنى ادمة عادية جدا ممكن تعمل حاجات صح و حاجات مش كده .. عادى زى كل مخاليق ربنا.. و بالتالى برضه مش معنى ان فى بنت مسلمة مش محجبة انها شيطانة.
يعنى هو حكم من احكام الاسلام مش ركن من اركان الاسلام




و برضه ليسة هاحقد اكتر

3 comments:

mostafarayan said...

بصي انا عايز اقولك حاجة انا معاكي اننا بنقدر نشوف اخطاء غيرنا كويس قوي رغم انها ممكن تكون مش واضحة قوي بينما لانري اخطائنا رغم انها ممكن تكون واضحة قوي
معاكي كمان ان ماحدش واصي علي حد ولا حدمن سلطته يفرض رقابة علي حد لكن اللي عايز اقولهولك ان احيانا الأنسان بيخارلنفسه مظهر خارجي معين والناس بتعامله علي اساس المظهر دة زي الحجاب للنسا واللحية للرجال لكن ساعات الأنسان مش بيحترم مظهره دة فالناس بالتالي مش بتحترمه زي المحجبة اللي مصاحبة الناس بتتكلم عليها لأن الحجاب اللي هي لابساه بيأمرها بغير كدة لكنها ماحترمتش نفسها ولا احترمته فبالتالي الناس فقدوا احتراههم ليها وزي الملتحي اللي بيكذب في تعاملاته هو اتصرف عكس اللحية فالناس اتكلمت عنه
مش معني كدة بقي اننا نفكر قبل مانتصرف رأي الناس هيكون ايه ولكن مانعملش حاجة ممكن تحرجنا وتخلي اي حد يسوي اومايسواش يتكلم علينا
نعمل اللي عايزينه طالما انه صح ومش بيغضب ربنا وننفض اخر حاجة لكلام الناس .....
كل سنةوانت طيبة

Emma said...

و انت طيب
بس هو مين فينا مش بيناقض نفسه ساعات؟؟

islam said...

إحنا أصلا " كبني آدمين " مجموعة من المتناقضات متجمعة في علبه واحده

لكن موضوع النقد للناس ده أنا شايف إنه بيكون مهم لو بتنقديهم في وشهم و بينك و بينهم
و عارف طبعا ان ده مش قصدك هنا في البلوج ده
لكن ...
لو في حد في الشارع بيعمل حاجه غلط " حكم غلط هنا من منطلق ديني" يبقى غلط مرتين ... مره لأنه أصلا حاجه غلط و التانيه عشان في الشارع

أكيد مافيش ملايكه على الأرض ... لكن اللي بيغلط و هو عارف ان ده غلط بيحاول يكون متداري ... و اللي بيغلط و هو مش متداري فكده بيكون وصل لحاجه من اتنين
انه مش شايف انها غلط أصلا
أو إنه شايف انها غلط بس خلاص مابقاش يتكسف.... و ده هيخليه يوصل لأول حاله بعد شويه

هو ده رأيي
الله أعلم