Thursday, February 14, 2008

12 - هابى فالانتاين

صرح مصدر أمنى مسئول بأنه قد صدرت التعليمات و الاوامر لكافة الجهات المعنية بأمور الحب و السهوكة و المختصة بكل ما له علاقة بالمياصة و السماجة بأنه و فى تمام الثامنة من صباح اليوم الخميس 14\2\2008 قد اكتمل احمرار المحروسة احتفالا بالفالانتاين


احمرت القاهرة!!!

ازاى تعرف ان النهاردة الفالاتاين؟

- كل المولات بتتملى بلالين حمراء و دبدوب كبير او قلب احمر ضخم
- كل محلات الهدايا بيطلع منها اطفال من سن 11 الى 18 سنة شايلين علب هدايا حمراء اكبر منهم
- الشعب كله بيبقى بيلمع ( من الجليتر اللى بيبقى منتشر على الهدايا)
- كل القنوات الفضائية بتجيب فواصل فيها وردهة حمراء تقلب قلب او ولد و بنت ماسكين ايدين بعض و الموسيقى يا أما اغنية سيلين ديون بتاعت فيلم تايتانيك يا اما موسيقى هادية فيها صوت عصافير
- اعلانات الكول تونز و الفيديو كولز كلها عن الهيام و الغرام
-محلات الورد بيتضاعف حجمها بفاعل احتلال الرصيف كله و اعلان الورود الحمراء فى كل الاشكال و الكميات المهولة من الورد الاحمر على شكل قلب صغير و قلب كبير و بطيخة كمان
- محلات الحلويات كلها تورتات فيها قلوب حمراء ان ماكانتش اصلا على شكل قلب
- الجرايد كلها اعلانات موبايلات جوا علب مرسوم عليها قلب
- البنات مسيبين شعرهم
و المحجبات لابسين طرح حمراء او سبانيش بوردة حمراء
- الولاد لابسين البنطلون و التى شيرت بالوان لايقة على بعضها!!!!!!!
- التى شيرت فى احيان كتير بيكون نضيف!!!!!!!!
- الولد بيكون مستحمى و ريحته كويسة ( يا رب يطول فالانتاينك يا شيخ)
- تامر حسنى يفقعنا اغنية نحنوحة جديدة كلها عبارة عن حرف ال (ه) و ال (ح) و تنهيدات كتيييييييييرة
-انتشار الشائعات عن الالبومات الجديدة (اللا بالمناسبة انا سمعت ان ده الميعاد الجديد للمرة التسعين لالبوم منير الجديد ... ربنا يهديه و ينزله بقى احسن الواحد خلاص بيهرش فى دراعه فعلا)
- نزول ييجى 857849276 سينجل جديد لكل المطربين عن الحب و الحبيبة
- اسامة منير يعلن انه انسان بيحب الحب و بيحب كل انسان بيحب و بيحب اى معنى جميل لانه تعبير عن شكل من اشكال الحب و بيدعو كل الناس انها تتسهوك و تتحسوك فى سلسفيل جدور ابو الحب




اليوم ده ( على جمال معناه المفروض) بيتعبر من اكبر الدلائل على فقدانا الكامل بتمام اختيارنا لكل طعم للحياة و اننا فعلا ماشيين زى القطيع بنقلد بعض
و ان اى طعم او بصمة شخصية للحياة هو امر مفقود تماما

معلهش ... ماتزعلوش نفسكوا .. انتوا طبعا فاهمين ان الكلام ده كله بدافع الغيرة المرة من اننى يا عينى يا حرام ماعنديش حد اتموحن عليه فى هذا اليوم العظيم بس اعتقد ان محدش منكم مستغرب لان ده اقل شىء متوقع من العانس الحقود








معلومة:
اختلف العديدن فى تحديد اصل و تاريخ هذا اليوم لكن اكثر الروايات انتشارا هو انه
على شرف القديس فلنتاين
(Saint Valentine)
الذي كان يعيش تحت حكم الإمبراطور الروماني كلاديوس الثاني في أواخر القرن الثالث الميلادي، فقد لاحظ الإمبراطور أنَّ العزاب أشد صبرًا في الحرب من المتزوجين الذين يرفضون الذهاب إلى المعركة، فأصدر أمرًا بمنع عقد أي قران، غير أنَّ القس فالنتين عارض ذلك، واستمر في عقد الزواج بالكنيسة سرًّا حتى اكتشف أمره،وقد حاول الإمبراطور بعد ذلك إقناعه بالخروج من إيمانه المسيحي وعبادة آلهة الرومان، ليعفو عنه، ولكن القديس فالنتين رفض ذلك بشدة وآثر التمسك بدينه، فنُفِّذ فيه حُكم الإعدام يوم 14 فبراير، وكانت هذه بداية الاحتفال بعيد الحب إحياءً لذكرى القس الذي دافع عن حق الشباب في الزواج و الحب .







18 comments:

salma said...

Happy falantain tay ya gamil :), but I just have one quistion, can't we salibrat love to anyone but our LOVER, I mean like our
" 3awanes" friends:) ,or our family? why does it has to be about " Na7na7a"?
Sal:)

rahaf said...

انا معاكي ان الناس بتبقي اوفر في اليوم دا بس فعلا الحب احلي حاجه في الدنيا وبكره ان شاء الله تجربي وتعرفي وبلاش تبقي متشائمه مش كل الرجاله وحشين وبيجوزوا خدامات مع مرتبه الشرف انا علي فكره زميلتك طبيبه ولسه متخرجه السنه دي وقبل سنتين كانت افكاري عن الرجاله زيك بالضبط لحد مقابلت الانسان اللي غيرلي تفكيري بحبه واحترامه ليا واحنا مجوزين من سنه ومبسوطين جدا الحمد لله عقبالك وان شاء الله تلاقي اللي يقدرك ويحترمك ويحبك بجد بس اوعي ساعتها تزعلي لو مجبلكيش حاجه حمرا في الفلانتين

Emma said...

يا سلمى يا حبيبتى انا اللى هوريكى النحنحة فعلا!! ههههههه

@ رهف
متخرجة السنة ( من طب) و متجوزة من سنة؟؟؟
ميهيألى احنا فعلا مختلفين

Marwa Rakha said...

You made me laugh ... again .... I loved the part about the clean shirts and the guys looking clean:)

Bossy ba2a .... you have to write a book .... I am not joking .... turn this blog into a book .... it will sell like hot cakes ...

x muah - happy valentine's day ya ro7i:)

Emma said...

Marwa dear, Coming from you, you have no idea how much it means to me.
Thanks begad ;)

sherif Eladawyٍ said...

اتهدي بقة يا شيخة واتجوزي وريحينا !! ده انت قاعدة بتخسي من كتر الحقد لمل بقيتي شبه مسمار 10 !!

Emma said...

انت ايه اللى جابك هنا افهم؟؟؟
شريف العدوى يا جماعة من ضحايا طب عين شمس بس الدفعة اللى اكبر منى ب3 سنين
و ما شاء الله عنده بنوتة قمر كده ( رينا رحمها انها تطلع شبهه)
اتجوز قال!!!

و اتهد كمان ؟؟ دى حاجة لطيفة جدا

لولا said...

انا اول مرة ازور مدونتك
وعاوزة اقولك حاجه
انتى كاتبه في البروفيل بتاعك انك عندك 26 سنة
هو الي عنده 26 سنه يبقى عانس
امال الي عدت 30 يقولوا عليها ايه
دا في الاول والاخر نصيب وقدر
بس مجتمعنا اللي متخلف لو بنت خلصت جامعه ومتخطبتش يقولو عليها عانس
فكك يا بنتى انتى معنستيش ولا حاجه مجتمعنا الي عنس من افكاره المتخلفه

هابي فالانتين داي
ويارب يكرمك بن الحلال
يارب
وتعزمينى في الفرح

Emma said...

يا لولا التسمية جاية من القالب
متهيألى لو قريتى ول واحدة ( التعريف) حتفهمى قصدى

salma said...

أنا مش فاهمة تقصدي أيه يا أيمان أنك هاتوريني النحنحة؟؟؟؟؟ طيب وتوريهالي ليه ما انا شيفاها خلقة، رحت أجيب لصحبتي بوكيه ورد لقيت كل الناس الي واقفة عند محل الورد شباب لابس بلوفرات حمرة وبنات عليهم جليتر، أتصلت بيها وقلتلها هابي زفت على دماغك :) :) :)
Sal:)

Emma said...

LooooooooL @ salma
7aga gameela wallahy
hahahaha

drsamoor said...

Walahy ya eman...
te3rafy en el youm da belzaat 3moro ma far2 m3aya?
feh ayam tanya f3ln el wa7ed by7es feha bel we7da...
bs sho3'al el hattal da..malosh 2ema asasn..

mostafarayan said...

علي فكرة انا سمعت ان برة في عيد الحب اللي بيكون لابس احمر معناه انه عايز يصاحب اويكون له حبيب وكدة
سواءبنت او ولد فبيلبس احمر علشان يعلن عن نفسه تشجيعا للطرف الأخر يعني بمعني اخر
(تعالي يا عم الحاج قرب ماتخافشي)
علي اي حال انا مش عارف ايه اللي مزعلك او مزعل حد تاني من الأخوة الكرام القراء ماتخلوا الناس تحب وتتحب وتلبس حلو وتجيب هداياوورد
خلوا الناس تعيش والمحلات تسترزق
تحياتي ليكي ولأصدقائك ويارب تحبوا وتتحبوا
اه كان عندي سؤال هو يعني ايه باباراتزي ياريت تقوليلي بليز علشان مش عارف معناها

Emma said...

باباراتزى دول اللى هما برا بيطاردوا الفنانين كل مايروحوا حتى
يصوروهم
تسمع عن حوادث المطرب الفلانى داس على رجل مصور من الباباراتزى بعربيته عشان كان بيطارده و مدخل راسه من الشباك؟
مش عارفة دخلت تقيس هدوم فى محل لقت مصور باباراتزى قامت شتماه هو و عيلته

هما دول الباباراتزى

Gina Inani said...

:D
Great topic at a great time! It is real funny. You see more of red this time of the year more than you see throughout the whole year. Momken adeef eno el minimum charge fi kol el amaken beykoon el de3f? Tayeb ely 3ayez yefasa7 el valentino bta3o yedfa3 .. el 3awanes el masakeen yedfa3o leah? :)

Eman Hashim said...

Lol That's a thought.
fake
everything is fake

nOk said...

De7k awi ya Emmy:D..luvd the part about "atfaal mn 11-18 sana:D"..hehe
Happy valentine's to you:DD

Eman Hashim said...

NokNok
so glad to read your words here :)
and to you too dearest