Tuesday, February 19, 2008

13 - الجواااااااااز بطيخة

سمعتوها كم مرة الحكاية دى؟ فى المسلسلات .. من الجيران .. من المجتمع و الناس على رأى سمير الاسكندرنى

انا شخصيا ليسة سمعاها من مفيش كم يوم من جارتى اما كانت قاعدة جنبنا و احنا بنتفرج عليا ( امال.. مانا بقيت من المشاهير بقى!!)و قال ايه الست حبت تجيب التايهة و تفحمنا كلنا قامت رافعة دراعها زى ميل جيبسون فى فيلم القلب الشجاع و قالت::

" الجوااااز بطيخة ..........ملهوش حل!"
عملنا ايه البطيخ عشان نحمل عليه مسؤلية التهمة دى مش عارفة

الجملة دى بقى - المتنكرة فى شكل بطيخة - هى اس البلا... لان على اساس كده فاحنا بقى يا عينى مغلوبين على امرنا و مفش حاجة قدامنا نعملها.



" ما احنا مش اجانب يعنى نعيش سوا الاول و نجرب و نشوف و بعدين نبقى نقرر نتجوز ولا لأة و عيالنا يزغردولنا فى الفرح!!"

اه .. احنا مش اجانب و مش هنعيش سوا , و اه فى درجة معينة من القرب مش بتتعرف غير مع المعاشرة بدليل ان فى اصدقاء ممكن تلاقيهم قريبين جدا لبعض لكن لو سافروا يصيفوا مثلا و قعدوا سوا ممكن تحصل مشاكل و حساسيات
دى حاجة فى النفس البشرية عادى ... مش كل شخص تندمج معاه يبقى بالضرورة شخص تنفع تشاركه السكن فما بالك بدرجة عالية جدا من المشاركة زى زوج و زوجة مفترض انهم هيشاركوا اللى اكتر من السكن؟

بس ده مش معناه ان الحكاية مبهمة اوى كده

فى حاجات كتير بتبان من الاول لكن المشكلة الحقيقية بتبقى فى السرعة الكدابة ... الخطوبة فى مصر هى الفترة اللى على مالشقة تخلص لدرجة انكم ممكن تلاقوا كتير اوى بيحجزوا الفرح و هما مايعرفوش هايسكنوا فين او ليسة الشقة طوب و زلط!!!!!!

لاحول ولا قوة الا بالله!! الرعب بيبقى لدرجة انهم عايزين يتأكدوا انهم اتدبسوا فى بعض

يالله نقرا الفاتحة
يالله نلبس دبل
مش هنكتب الكتاب بقى
الفرح نحجزه و ربنا يكرم فى الباقى


الخطوبة مفروض انها فترة اختبار و تجربة للطرفين عشان معظم الاشياء تبان عشان يوم ماتجوز ابقى عملت كل اللى اقدر عليه انى اتأكد انها ان شاء الله جوازة ناجحة

* حقى على نفسى انى اتعبلها شوية عشان ارحمها من النكد
* حق الانسان التانى انى لو عارفة اننا نش هنريح بعض نبعد
* و اهم حاجة حق ولادى انى اكون عملت كل اللى اقدر عليه عشان اضمن لهم قدر مناسب من الجو الاسرى اللى من حق كل طفل

" مانتى كده عمرك ما هتتجوزى"

مانشالله ماتجوزت .. على رأى البنت ( قاعدة الخزانة ولا الجوازة الندامة) - دى كانت من البنات اللى فى حلقة التليفزيون


-عايزين تفهمونى ان البخيل مش بيبان من الاول؟
-عايزين تقنعونى ان اللى بيضرب مراته ماكانش باين عليه من الاول انه عصبى و غلاط و من النوع اللى مش بيتحكم فى اعصابه؟ ماهو مش هيمد ايه و هو خاطب اه بس الطبع ده بيبان فى حاجات كتير
- المتسلط مش هيتدايق كل ما تعارضيه؟
-الانانى مش هيطالب بأشياء توضح انانيته؟

كل دى و اكتر حاجات ممكن جدا ربنا يحطها قدام البنت علامات و هى مخطوبة ان خطيبها بيعانى منها و هى بتختار انها تتعمى عنها مش عشان مراية الحب عامية و لأعشان هى عن كامل اختيار و اقتناع شايفة ان برضه هو انسان كويس و هى مختارة ده و متحملة نتيجته .... لأة .... بيبقى عشان لحسن تتفسخ الخطوبة .. ده انا ما صدقت ... دى خوخة و جت بعد دوخة

هيفضل بعد كده النسبة القليلة بتاعت الابتلائات بقى ( هى الهمزة كده صح؟) المريض نفسيا اللى بيتحول بليل ... اللى بيتخبط على دماغه و يصحى يلاقى نفسه برعى ... اعتقد ان اللى بيمثل لو تروينا و استنينا و فكرنا مرة و تلاتة و عشرة ماعتقدش انه هيعرف يمثل علاطول

ممكن اختلافات حتة فى نقاشات ملهاش علاقة بالجواز بشكل مباشر بتبقى مؤشر على التفكير بطريقة معينة

و على هذا و بناء على جميع ما سبق انا بقى هصرخ زى راسل كرو فى فيلم جلادياتور و اقووووووول :


اسفة ... ارفض هذى البطيخة!!*

و يستمر الحقد









* مع الحفاظ على حقوق الملكية الفكرية لميرفت امين .. اللا هى كانت لازقة كده ليه للراجل؟ ايه؟ مفيش دم؟ مفيش كرامة؟؟ ده احنا بنلعن فى الراجل اللى يعيش مراته معاه غصب عنه , تقوم الست عاملة كده؟ده ايه التناحة دى؟؟؟

12 comments:

Lobna Ahmed Nour said...

متفقة معاكي في نقاط كتير ويبقى الجواز بطيخة مهما حاولنا نقنع نفسنا بغير كده

شر لابد منه ..

تحيااااااتي

Unknown said...

ايه لابد منه دى بس؟؟؟
ازاى متفقة معايا؟؟
بصراحة مش قادرة اقول اننى فاهمة اوى تقصدى ايه
انا بقول انه مش بطيخة و انتى بتقولى انك معايا و هو بطيخة؟؟؟؟؟؟

و كلمة "لابد منه" دى بالذات ضد كل اللى المدونة قايمة عليه

لابد منه ليه بقى؟؟

P=S=Y=C=H=O said...

Kol el sana ta2olek el kelma di
''shar labod meno''
w howa la labod meno wala neela
kol wa7ed 7or

ana lama omy bet2oly en el gawaz sona el 7ayah w kalam dah
a2om radaha 3aleha bi kamet el berod
'' el gawaz sona mish fard'':D

Unknown said...

bas keda
howa da elkalam ya psycho!!

P=S=Y=C=H=O said...

Ana ma3ky gedan
w heya fa3ln bate7'a w daymn bettl3 ar3a lil asaf w ta7'dy el shock el tamam w mish el banat bas 3ashan mab2tesh zalma w welad kaman betsadmo fena
fa leeh ba2a wg3 el alab..ab2a 3anes ar7am men eny a3esh met3kena tol 7ayaty
Nice post ya bet

Samar Ali said...

msh labod mno wla 7aga
adena 2a3den ahoo,,malna?? zay el fol...wla batee7' wlla bytengan..bla ham ba2a ya o7'tchy!

walahy ya eman..ana motafeqa m3aky f kol klma f el post...asl el moseba en el aflam el 3araby ras7't l kam karsa keda...zay el segara w 3amood el noor..!!!

I really recommend u to read the latest article by Sahar El Mougy

here is the link

http://www.almasry-alyoum.com/article.aspx?ArticleID=93626

Unknown said...

Facebook comments:

Somaya Dsouky (Egypt) wrote
at 3:55pm on February 19th, 2008
i agree ,da kalam sa7 gedaaaaaaaaan


Hany Hosny Saleh (no network) wrote
at 1:42am on February 20th, 2008
ana 3ayz 22olik mesal ana shayfo be 3ainy 3nd nas 2rayby , el ragel kways motadien mo2adab we dammo `7afif geddan, bs taktashefy enno keda bs just outside the house i mean this funny charectar , once he enters the house kemmet el mo3amla el gaffa m3 afrad el 3aila kollha msh ha2olik m3 mrato 7ata , we kaman ya3ny sorry fi habits el nas bt3melha zy manty bet2oly home kind of habits which u ofcourse u cant see unless u live together which is ofcourse cant happen here in egypt isa ya3ny .... rest in the next post


Hany Hosny Saleh (no network) wrote
at 1:42am on February 20th, 2008
ana hadiky mesal m3lesh hwwa mo2ref shwaya bs hyya dy 7agat f3lan so`3ayara bs bteb2a sabab l7agat tanya kteer , lamma el ragel yd`7ol el 7amam we yetabawa2 standing , out of his control he will wet the toilet seat ,ofcourse any body will came will be angry , another habit is there is kind of ppl who when enters the bathroom dont close the door behind which makes who stay outside soundtracks coming from their also this makes other feels unconfortable , but this kind of things can be treated easily b2a when u manage to taste one of the orignal batti`7as , which is tafahom we respect of ur feelings ,so when ur man or woman know that this thing bother u supposibly he work hard to stop this habite immediatly
Message - Delete

Ahmed Ibrahim Soliman (Egypt) wrote
at 8:54pm on February 20th, 2008
mesh yemkin asdaha .. momkin tetla3 7elwa wa mesakara wa 7amra .. or momkin tetla3 maskha wa 2ar3aa .. mesh bybaan el 2alb 3amel ezay mn el eshra el ma3'tyah ..

El mohim ne3raf neksar el eshra el sameka de .. 3alshan ne3raf neshof gowaha eh ??!!

wa 3alshan kida 3amlo el khtoba .. 3alshan neksar el batekha de .. wa yabean el gowaaaa ..

bas sa3at mabtetkasersh khalis .. i think in this case .. wade7 en el couple dool mesh naf3een le ba3d .. wala eh

mostafa rayan said...

كل واحد يا ايما له عيوبه وماحدش حالي من العيوب
ومافيش راجل او ست كاملنين
لأن الكمال لله وحده
انا حاسس انك بتدوري علي انسان مثالي قوي مالوش مكانغير في المدينة الفاضلة ودة مش هتلاقيه علي الأرض
وبعدين الصفات الوحشة مشتركة فيالراجلوالست زي مافي رجالة عصبية او لسانها طويل او بخلاء في ستات كدة بردة لكن الأساس ان اللي بيحب حد وعايز يعيش معاه هايخده كدة زي ماهو
ياريت يا ايما تخفي شوية علي الرجالة انا حاسس انك عندك عقدة نفسية منهم معقولة مافيش اي شيء حلو لاقياه في الراجل ايه كل الرجالة اللي شوفتيهم كانوا وحشين دة انت عقدتيني يا شيخة
فكيها علشان تتفك وابسطيها علشان تنبسط ياحسن دة انت لو فضلت علي كدة هتفضلي بجد طول عمرك وحيدة
ربنا يوفقك بجد للأنسان المناسب

Unknown said...

مصطفى:

مالكش دعوة لو سمحت انا هفضل ازاى
خليها دى على جنب
لو كنت بتقرى كلامى باى موضوعية كنت عرفت ان الكلام للاتنين .. بس انت واضح انها خلاص كبرت فى دماغك ... ايه علاقة اى كلام من ده باننى بقول الرجالة كلهم وحشين؟
هو انا اما اقول كل طرف يشغل دماغه عشان ما يندمش يبقى بقول محدش كويس؟؟
ده غير البوست ده بالذات انا بحمل فيه المسئولية الاكبر على البنت مش العكس اللى انت خلاص حطيته فى دماغك حكم مسبق

يعنى انت مش واخد بالك ان انا اغلب رفضى لو ينفع يتسمى رفض موجه للبنات مش الولاد؟؟
لو مش واخد بالك من دى يبقى فعلا مش فاهم

اما انى معقدة ..انا ريحتك و قلتلك حقود , اكتر من كده ايه؟

AyA said...

والله هو كله عند المصريين بطيخ...
انا طول الليل والنهار والسكاشن والمحاضرات اسمع العيال بيقولوا دي ,كلية فقر, دي كلية مقلب , احنا اضحك علينا يا اخونا, مكناش عاملين حسابنا على كده....
يعني كتير من المصريين بلاش نقول كلهم, مابيحبوش يعملوا دراسة عن اي قرار مقبلين عليه, دماغهم دي بيعتبروها قيمة أكبر من انها تستهلك يوميا, بيحوشوه لقرارات أكبر, ايوة زي جراج رمسيس كده :D


ملحوظة للأخوة العرب من قرّاء المدونة:
الجراج المذكور تكلّف بناءه ملايين وبعد ما خلصوه اتكشفوا انه في مكان غلط اذ فجأة كده, راحوا هادينه.... ولا عزاء في الملايين اللي ادفعت...

Unknown said...

هههههههههه
جامدة اوى نحطة رمسيس دى و تسبيه هايل للى بيحصل فعلا .. انتى يا بنتى لازم تكتبى بجد
ماينفعش كده

King Mina said...

حبيت اعلق على كلامك وأقول ان الخطوبة (فى نظرى) تعتبر فخ لكثيرين

كثير من المفاجآت الغير سارة تكتشف بعد الخطوبة لكن بسبب كلام الناس و التزامات المجتمع- بتتبلع - لنجد انفسنا امام الزواج وبعدها المعاناه مع مارفضنا مواجهتة فى الخطوبة لاننا ببساطة اتدبسنا ادام الناس
وهذا ما يعزز نظرية البطيخة
لذلك انا ارى ان الخطوبة هى فخ صعب الخروج منة