Monday, February 11, 2008

11- انتى حلم اى شاب

ايمان ... انتى حلم اى شاب ( ما عدا انا )

الكلمة دى - من غير الاضافة اللى بين قوسين - لا تتخيلوا انا بسمعها اد ايه

آه و النعمة.
بلاش نفسنة و اصبروا .. انا مش بعيش عليكوا ولا نيلة .. دى داهية سودة

انا فعلا سمعت الكلمة دى ييجى دزرليون مرة ..

طب ليه بقى؟؟

ممكن اضحك على نفسى و اصدق تفسير (ع) صحبتى اللى قالت:

يا بت هما بيقولوا كده عشان عمره ما يقدر يحلم انك تبقى ليه
واسعة دى يا (ع) ده احمد السقا قالها لحنان ترك فى تيتو
ايوة بس يا ضنايا تيتو كان طالع راجل واللى بيوردوا علينا دلوقتى انتى فاهمة مشكلتهم


يعنى ... مش مقتنعة انا اوى بتفسير (ع) بس شاركتكوا معايا فيه

انا بقى لي تفسير تانى ... و هستعين فيها بواحد ا .. اما لخصهالى فى جملة واحدة - من غير ما يقوللى انى حلم اى شاب و اى فيتاه-
قاللى:

بصى يا ايمان .. انا لو عندى مشكلة فى الشغل احب اخد رأيك او حتى افكر معاكى بصوت عالى ... بس اما اتجوز ما حبش مراتى يبقالها رأى فى شغلى!!

ايوة
المشكلة ان فى كتير من الحالات - بلاش كل عشان بتزعل- الراجل بيبقى محتاج انه يقتنع ام مراته "قلة" و لو جيت سألته مثلا
طب هى مراتك عارفة انك بعت ولا اشتريت؟؟
و دى ايش افهمها دى؟ .. الستات يابنى مالهومش فى الكلام ده .. و هتعد تزن علافاضى و توقف المراكب السايرة

هو فى الحالة دى مش حب واحدة و اتجوزها و يا عينى على بخته طلعت حمارة ... هو دور لحد ما لقى "حمارة على مقاسه" ما هى اصل الحمورية مقاسات
اللى شايف نفسه ذكى بيدور على اللى تبان ذكية بس بالنسبة له حمارة
و الخروف بيدور على معزة

و هنا هرجع للكارثة الحقيقية ... البنات البنات البنات .. الطف الكائنات
البنت بكل اسف فى احيان كتير بيبقى شرط عندها عشان تسترجل الراجل انه يحسسها انها حمارة
هل انا شايفانى فلتة؟ هل انا مصدقة الاختبارات اللى بتقول انى عبقرية زمانى؟ الحمد لله لأة
بس اللى اكيد مش هسمح بيه ان واحد .. اى واحد .. يحسسنى و المصيبة ( يقنعنى) انى حمارة
حتى لو كان يعرف اكتر او شاف اكتر بحكم انه اكبر ده مش معناه انه بالضرورة احكم و اكيد لا ميكن يؤدى انى اكون حمارة!!
واخدين بالكوا من اكبر دى .. اصل صراحة ان واحد عنده 25 سنة ييجى يقوللى الولد اكيد يعرف اكتر من البنت و تبقى كل خبراته فى الحياة انه هو و اصحابه بيتلموا طول الليل واقفين جبن عربية راكنينها جنب كشك و عمالين يشربوا سجاير و كل ما بنت تعدى جنبهم يعاكسوها و يضحكوا .. دى مستحيل تكون خبرة .. اسفة جدا!!

و للحقد بقية

20 comments:

Aladdin said...

زي ما بيقولوا إن القرآن بيقول "الطيبون للطيبات والخبيثون للخبيثات" فبرده "الآتان للحمار والحمار للأتان"!

الفكرة النمطية ان الراجل الشرقي يفضلها "غبية" لا تروق لي على الإطلاق!! أكيد لو راجل غبي أو تافه هاينجذب للبنت الغبية أو التافهة ونفس الكلام ينسحب على الرجل الذكي أو الناجح سوف ينجذب للمرأة الناجحة أو الذكية. دا بس على مستوى العلاقات بين الجنسين، دا كمان على مستوى علاقات الصداقة حتى بين أفراد الجنس الواحد!

Aladdin said...

فكرة إن حد يبقى "حلم" حد غالبا بتتقال على سبيل "المجاملة" (الممزوجة بالشفقة أحيانا) - دا على أساس إننا عايشين في مجتمع يُنْظر فيه إلى "العزّاب" على أنهم "أشياء" فاقدة للأهلية في أحسن السيناريوهات!! وأظن عشان كدا بلوج زي اللي أنا باعلق عنده دا ليه أهمية كشف الغطاء عن "نفسنة" الحاجات العازبة دي!!!!

Unknown said...

نهار مدوحس و مأندل؟؟؟؟
طب انا هعمل زى الناس الهاديين و استنا اما تيجى تفهمنى ايه الكلام ده

Anonymous said...

well i guess eno aladdin's comment about eno elragel eltafeh howa ely beynagazeb lel mar2a eltfaha is right .. who said we have a lot of smart ppl out there anyway .. and sometimes those ppl rn't lucky enough to meet someone who's compatible.
weza kan elmogtama3 zay ma bet2ol beynzor lel singles 3la enohom ashya2 fakda lel ahleya , i guess this what makes such a blog important to defense smart ppl who hasn't been lucky enough to find compitable ppl .
actually ana a7eb arfa3lek elkoba3a ya eman on ur courage to reveal what single ppl can pass through ina society that loves generalization most of the time we a2olek eny ma3 ur friend "3" in her opinion

Anonymous said...

دية مصيبة سودة لو كل بنت شايفة ان اي ولد شايفها حمارة
و معلش لو دة مبدأ عند البنت سوري فعلا حمارة!!!
و مش عيب لو حد يعرف عنك و أكتر منك مش لزم يقولك انتي حمارة لفظا
غير انة طبيعي انتي حتحسي بكدة لوحدك لو حد سالك سؤال بالروماني و هو هو نفس الأحساس الي حيحسة لو قولتيلة البني أدم بيقف نموة امتي لية !!
نيجي بقة لموضوع ان تيتو راجل !!!
طيب ما سهل نقول بنات الأيام دي زي مانتي فاهمة برضة و لا اية ؟
و معلش صورة الشاب الي علي القهوة و واقف جنب عربية و بياعكس بنات انتو قدام قوي
البنات دلوقتي هي الي بتقعد و بتشيش و بتعاكس
ربنا يوفقكوا

Unknown said...

انتي عندك حق والله

المشكله ان في شباب كتير بيفكرو كده

بس انتي عارفه اللي يفكر كده مايستهلش ان واحده ترضي تتجوزه اصلا

خليهم كده لحد مايعنسوا عشان يتعلموا الأدب

انا ان شاء الله هبقي أجي عندك كتييييييييييير

(:

Anonymous said...

القضيه يا إيمي إن فيه "للأسف
الأسيف " ناس كتير مقتنعة انه
أحسن أعيش حماره " أو حمار
طبعا" ولا إن الناس تنفسن عليا
و أنا بني آدم ويشوفوني معقد
أو مابعرفش أو يطلعوا أسباب
عدم جوازي زي ماهما عايزين.

المشكله ان إحنا في مجتمع
بيستسهل" و بيستهبل برضه"
لأنه ممكن تسألي حد انت اتجوزت
ليه يقولك لأن الناس كلها
بتتجوز

يعني بيعمل زي الناس و خلاص

و ممكن نقيس على كده حاجات كتير قوي

Unknown said...

جامد اوى الاسف الاسيف ده!!

اللى يقبل ينهق عشان بقيت الناس بتعمل كده فعلا يستاهل

انا اللى نفسى يتغير البنات .. نفسى يقاوموا شوية
نفسى يطمعوا حبة

Anonymous said...

و فى برضزا رجاله مش عايزين يتجوزوا لعبة او مجرد دميه
عايزين واحده بتفكر و تحاور و تدى حيا للعيشة
برضوا
الطيور على اشكالها تقع

Unknown said...

هما فيييييييييييييييييييييين

Anonymous said...

every where .. you just have to spot them :)

Anonymous said...

هناك فقط 3 % من الناس هما اللي ممكن الواحد يتوائم معاهم المشكله انك لازم تدوري عليهم عشان تلاقيهم .... شوفتي صعب ازاي!!!
المشكله ان حظك ممكن يكون نحس و تتعاملي بس مع ال97% التانيين
صدق الدرويش أبو فراج ... الدنيا مابتديش محتاج "و في أقوال أخري" مابتفتحش ادراج

Marwa Rakha said...

ماما دايما تقولى "الست الذكيه هى اللى تقنع الرجل انها غبيه علشان تجيب رجله مش الست اللى دايما فاقساه و فاقسه حركاته الغبيه" طبعا انا قلت لماما كلا البتا ... فقالت لى انى حمارة

Unknown said...

لوووووووووووووووول على تعليق مروة
المشكلة كمان يا مروة ان مش فى كل الحالات بيبقى سبب الحكاية هو رفض المبدأ .. المشكلة فى ان فى ناس حتى مش هايعرفوا يعملوا كده
و لو عملتها مرة مش هاعملها التانية

mostafa rayan said...

بصي هو الراجل بطبيعته مابيحبش ان مراته تكون ازكي منه لأنه دة بيخيله يظن انها ممكن تركبه او تمشي كلامها عليه وهو طبعا مايحبش مراته تمشيه مش موضوع قلة ثقة في النفس او كدة لكن طبيعة بشرية هو فعلا يحب يعرف ست زكية يتكلم معاها في الشغل او يشيت معاها او ياخد رأيها من بعيد كدة وممكن فعلا يقلبه في دماغه ويعمل به لكن يتجوزها لاء هيفكر مليون مرة قبل ماياخد الخطوة دي وغالبا مش هياخدها رغم انه ممكن يكون معجب بها جدا لكن عند الرجالة الاعجاب حاجة والجواز حاجة تانية خالص
ممكن تحسيها تناقض ممكن يكون صح كدة لكن هو فعلا الأمر كدةزي ماقولتلك طبيعة بشرية بقي

Omar El-Tahan said...

والدي حكالي مرة قصة حصلتله وهو في الصعيد في شغل ...

جمعته الصدفة مع واحدة من نوعية الحاجوة فاطمة تعلبة "هدى سلطان في مسلسل الوتد عن قصة خيري شلبي"

المهم أبويا بيحب يتكلم في موضوع الرجالة والستات ويحب ينكش الناس ... فسأل الست دي عن رأيها في الموضوع ده

قالتله : بص .. الراجل عندنا في الصعيد هو راس البيت وهو اللي بيفكر وهو اللي بياخد القرارات وهو الكل في الكل ... قام أبويا سألها طب وانتي يا حاجة؟؟ قالتله أنا بقى الرقبة اللي بتحرك الراس.

:)

معنى الجملة دي عميق جداً .... لأن الست غير المتعلمة دي لخصت حكمة علوم كاملة ... الراجل بيحب يكون في وضع معين .. وماله يبقى ويستريح عشان يريحنا احنا كمان ... بس لو للست رأي تاني وشايفاه أصح فشطارتها انها تطلع رأيها ده على لسانه هو عشان يبقى الكل كسبان والكل مبسوط

وطبعاً ده مش معناه ان الراجل أهبل .. بس المدامات العاقلات أكيد عارفين أنا باتكلم على ايه.

Unknown said...

طب واللى محترمة نفسها و جوزها على اعتبار ما يكون و مش عايزة تمثل تعمل ايه؟
بص يا اخ عمر.. لو دخلنا فى جزئية التمثيل مع الرجالة و المياصة انا عارفة و متأكدة انى فى اغلب الاحيان هعمل اللى انا عايزاه
بس اعمل ايع بقى فى بنى ادمة شايفة الزيف مهانة
و على رأى عبد الرحمن الابنودى - الصعيدى برضه-


"فى كدب بص اتأمل كيف بيتصدق .. يا ليل مهما تطول بكره تلقى الفجر بيشقشق"

بس كده ... و شكرا على التعليق

AyA said...

انا عايزة أعلق على جزئية مستفزة اتكررت في التعليقات ...
"انت تقدري تخليه يعمل اللي انت عايزاه من غير مايحس"!!!

هشربه حاجة مثلا!!!!!؟
وبعدين ليه مايعملش حاجة عشاني بكامل ارادته؟, ليه ما نتناقشش ونتفاهم على حل وسط بين اللي انا عايزاه واللي هو عايزه؟, يعني قريب كانت واحدة اعرفها خطيبها عصبي بشكل سئ جدا, ولما كانت بتشتكيلي وأقولها انه لازم تعيد التفكير في علاقتهم عشان اللي يخرج عن شعوره ويشتم -شتيمة شتيمة- وهما في الخطوبة, ممكن يمد ايده لما يستفرد بيها (وانا بقول يمد ايده دي عشان مخوفهاش انما انا شايفة انه ممكن يقتلها!), قامت ردت عليا رد ذكي جدا, قالتلي احنا بنتخانق كتير دلوقتي عشان هو بعيد وانا مش قادرة اتفاهم معاه, لكن لما يجمعنا بيت واحد ويتعصب كده هعرف اصالحه -فيما معنى اللي قالته-!!!!! انا بجد شايفة طريقة التفكير دي زي اللي ابنه الصغير بيتعصب ويكسر الحاجات, فيقوم يهديه بتشوكلات من غير ما يحل اصل المشكلة!!!

Unknown said...

عشان الخوف عامينا يا اية

و فى احيان كتيرة احنا اللى بنختار العمى ده .. بنمثل يعنى! كل بنت خايفة ماتتجوزش
و شايفة انه عادى انه ينقى و يعدل و يفصل فيها

و التربية المنيلة اللى هى عاملة ده .. البنت لا عندها احساس بذاتها - لان هى مالهاش ذات اصلا - و لا اى ثقة فى انها تستحق تتحب لنفسها

و الرجالة مش عارفة منين فاهمين انهم ممكن يربوا اللى معاهم - بجد .. انا دى اكتر حاجة تنقطنى فى الدنيا- بس انا عارفة منين .. من كل ام ربيت ابنها على انه طفرة بشرية صعب تكرارها

حاجة صعبة والله

Anonymous said...

i think the problim in today's girls that they do any think to get married its like the answer to all their problims and thats probably not their mistake alone familly can play a huge rule in this i mean come onnnn we are women call me proud may be very very proud but guys are lucky to have us and they should be the ones to (yeboso edehom wesh we daher) if you know what i mean, girls stop selling your self cheep have some self respect stop being stupid because your not trust me your not, again thank you so much for your posts eman women like you make history
lubna from baghdad