Sunday, January 27, 2008

5 - و السلام


من اكتر الصور المشوهة و المسببة للمشكلة اللى كانت اثاث المدونة .. ثقافة " و السلام" .. كلنا بنعمل كل حاجة و السلام...
بنتعلم و السلام .. مش مهم اتعلمنا ايه
و بندخل جامعة و السلام .. مش مهم كلية ايه ولا هاتعلمنى ايه ولا هاتساعدنى ابقى اللى انا عايزاه ولا لأة
و بنشتغل السلام .. مش مهم الشغلانة دى هتضيف ايه
و ينتجوز و السلام .. مش مهم امتى ولا مين ولا ازاى

يعنى الجوازات السلق بيض دى جزء كبير من المشكلة الأكبر
المشكلة اننا فى الجيل ده -تحت تأثير كامل من غلطات فى التربية- فقدنا عنصر اساسى و مهم و ضرورى فى رأيى للانسان عشان يعيش و هو

PASSION

معلهش اعظروا الانجليزية بس مرادف الكلمة فى العربية على جماله لكن بعيد عن ودننا شوية و هو الشغف .. كسروا نفسنا الله يسامحهم و افقدونا ايماننا بنفسنا و قدراتنا
صحيح احنا فى الاول و آالاخر سمحنا بده بس برضه
خلاص .. بقى كل واحد غاية امله يعيش واحد من الوحايد زيه زى الستة و تمانين اللى قبليه و بعديه
كلنا بقينا كربونة من بعض .. مفيش طموح فى اى اتجاه

الغريب و العجيب و المرفوض فعلا الطموح العلمى المفقود ده ... يا نهار اسود!!! بقى اللى يفكر فى اى ارتقاء علمى سواء بدراسة اكتر او بعمل او بمجرد الحلم ببعثة برا مثلا, بقى بيتعامل معاملة الكائن الفضائى ...

" و ان شاء الله هتتجوز امتى؟؟ " و كل ده للولد, ما بالك بقى البنت


ليه كده؟؟

ليه ما نفسناش نبقى متميزين؟ فى اى حاجة؟

انا معاكم ان الانسان لو حط مقياس عالى اوى لكل جانب فى حياته مش هيعيش بش برضه ده مش معناه انه يعيش و يموت زيه زى كل اللى عاشوا و ماتوا!

ليه مفيش طموح؟؟ انا هتجنن من الحكاية دى!

اما الطموح يكون مفقود فى الشغل و الدراسة, و للولد قبل البنت يبقى طبيعى و منطقى جدا ان البنت تلاقيها شايفة نفسها كبيرها تتجوز و صعب انها تبص للموضوع بنظرة انتقائية.

هتتجوز فى السن اللى كل اللى حواليها بيتجوزوا فيه دون النظر لظروف شغلها و حياتها هى, و هتخلف اول عيل بعد 9 شهور من ليلة العلقة زى كل الستات ما بتعمل, و تربيهم حسب توجيهات ماماتها و مامته اللى رابطينهم بسلاسل و ده طبعا لأنهم فى أغلب الاحيان المنظومة دى بتخرج ناس فاقدة الشعور بذاتها و بالامكانيات اللى عندها.


لأ ... لازم نحس بنفسنا و نحلم لنفسنا .. و احلم حلم كبير ... احلمى تكونى كل اللى نفسك مانتيش قليلة ابدا 

8 comments:

Sue said...

la2a ya bnty fee hadaf beeyb2a odam el banat lama beyro7o yet3alemo we yod7'olo el koleyat beyb2a hadafhom enohom yekouno mota3alemin 3ashan ye3rafo yetgawezo gawaza kowayessa hadaf 3azim aho...
el fekra en el tomoo7 elly gowana beymoot mn we7na so3'ayareen awy fa e7na benbatal asslan ne7awel en e7na yekoon 3andeina tomoo7 3ashan manetsadamsh tany ya3ni massalan el 3eyal lama beykouno fel 7adana we keda tela2y lama yekoun fee walad wala bent "ash2eya" 3ala 7asab ra2yohom ya3ni, yekouno beys2alo as2ela ketir we keda ye2olo 3aleihom a3'beya we mesh beyfhamo mesh bas keda dol kaman yeroo7o yekalemo mametehom we ye2ololha weladeik mesh beybatalo as2eila we keda fa el om te7'alihom yeskoto 7'ales we tab3an el beit mosta7il tegeilhom forsa yetkalemo ma3a ay 7ad el ab me2anta7' we maloosh asslan fel ta3amol wel om waraha meet 7aga we tab3an law 7ato3od ma3a 3eyalha 7ato3od tesamamhom el kotab heya mesh fadya terod 3ala as2elethom we el kalam el fady da...
tab3an kol da bey2tel 7ob el ma3refa we yewa2af nemow el zaka2 3and talaterba3 el atfal fa mosta7il yetla3leik mobde3 wala mofaker mn el fe2a dee abadan....

Samar Ali said...

Passion...
Dear Emma..
We lack passion in every aspect in our lives.
we do everything soul-less.
we work without passion...
we hug our friends without passion..
its a viscious circle of feeling lonely.
we lack heat in every inch in our lives.

mostafa rayan said...

اه طبعا احنااتربينا غلط واللي حوالينا افقدوناالشعور بالشغف اللي انت بتتكلمي عنه ده بس احنا المفروض نكسر الغلط دة مانخليش غيرنا يفرض علينا وصايته نتمرد عليه نقوله لاء انت غلط ومش بتفهم حاجة المفروض نكون اقوي من اللي حوالينا ونمشي رأينا في حياتنا لآنها حياتنا احنا لأننا لو سمعنا كلام الأخرين نبقي بنديلهم فرصة يعيشوا حياتنا احنا يبقي بنضيف لأعمارهم عمر من اعمارنا احنا
الغلط اللي وقعنا فيه اننا استسلمنا ولازم نصلح الغلط دة بكل سرعة لازم نقول لاء ونصر عليها مهما لاء دي جابتلنا مصاعب لكن لازم نقولها ونصر ونموت عليها

Unknown said...

مصطفى
عاجبنى اوى صيغة القتال فى كلام مصطفى. فعلا هى دى الروح المطلوبة.

سو
ايوة بس رغم كل الكلام ده احنا اهه بنقول ان ده مش عاجبنا.. بس المشكلة فى ترجمة ده لشكل حياة و اسلوب تفكير و تصرفات عامة

سمر
عارفة .. لو بطلتى كل حاجة بتعمليها من غير شغف؟؟ هتلاقى نفسك فعلا اريح حتى لو ظاهريا افضى .. يا بنتى الصراحة مع النفس دى جميلة اوى

انسانة واقعيه said...

والله كعادتك دايما يا ايمان بتيجى ع الوتر الحساس..فعلا نبقى بننكر حقيقة اذا مقولناش ان كلامك كلة مظبوط

تحسى بقى فية جوانا كسرة نفس يمكن دة اجابة سؤالك ؟؟؟؟؟؟

لية بنختارر الاسهل والاضمن حتى لو احنا نستحق الاكتر ؟؟؟؟؟

صح ممكن دة تكون الاجابة ..ان نفسنا مكسورة من جوة معندناش ثقة فنفسنا ولا فى ظروفنا ولا فمجتمعنا ولا فعلمنا

بنخاف نجرب لنخسر..فبنتراجع

بنخاف نحلم لنصحى على كابوس مرعب

بقولك الكلام دة واسمى طموحة ..وفعلا انا طموحة

ودة مش لانى مش بعانى من الكسرة دة لا..دة لانى شيفة اننا هنعيش مرة واحدة

وكمان هنموت موتة واحدة

يبقى مدام مش فارقة كدة

لية منجربش ولية منحلمش ؟؟

لية منحاولش نسيب بصمة اللى بعدنا يشوفوها

يعرفوا ان كان فية انسانة عملت حاجة ..مش نعيش ونموت زى الحيوانات
عفوا) عاشوا وماتوا ومحدش سمع عنهم

كلة ماشى فخط واحد..ويرجعوا يقولوا ملل وخنقة ومعرفش اية وتسلط وتحكم

طيب متغير دة بايدك..احلم بلافضل واسعر لية بدل م انت شغال نقد ع الفاضى

احلم ..جايز الحلم يتحقق

زمان كان كل اللى احنا فية دة حلم

الطيران كان حلم وبقت عندنا الطيارة

التلفزيون كانت فكرتة بالنسبالهم جنان واهو مجننا دلوقتى

وغيرة وغيرة

يبقى منطقيا البشرية فى تطور..لية نوقف عقولنا باردتنا..؟؟؟

سؤال يطرح نفسة

تسلمى ايمان لطرحك الرائع

P=s=y=c=h=O said...

اية دة تصدقي بقالي كتير مش بدخل هنا:)
المهم بقي..

مين اللي قال ان المشكلة في الطموح!!
المشكلة با خوختي في انعدام الهدف.. حياة بلا هوية .. ودية الكارثة الكبري
ازاي اطلب من اي حد انه يكون طموح وهواصلا عايش كدة من غير هدف
!!!

Unknown said...

طموحة ... عاملة ايه؟ عايزة اتطمن عليكى

ممكن تبعتى لى ايميل كده فيه احوالك لو سمحتى؟

Unknown said...

ازيك يا مرووشة يا سايكو
عندك حق
هو لا فى هوية ولا حلم و لا طموح ولا اى نيلة الحمد لله
ربنا يتولانا برحمته