Friday, January 18, 2008

3 - السفينة

اما بتغرق سفينة, الناس اللى فيها بينقسموا 3 انواع:

-النوع الاول بيغرق سواء كان حاول و فشل او ماحاولش اصلا.
-النوع التانى بيعوم لحد الشط و يعيش.

في لحظة الاكتئاب, بنفقد كل قدرة عندنا و بنصدق إننا هنغرق. و في لحظات ثانية الخوف من الفشل بيكون حافز قوى في الوصول سريعا إلى الشط.
و كلنا بنمر باللحظتين و بنبقي مرة من دول و مرة من دول.


-النوع الثالث بقى – الى هما العظماء في رأيي و اللى بيغيروا التاريخ – ده النوع اللى بيعرف يعوم بس بيشد واحد معاه من الغرقى!
كل واحد فينا بتمر عليه اوقات شدة الحياة بتعميه عن قدراته الحقيقية. و بنصدق اننا هنغرق و بالتالى عمرنا ما ممكن نفكر اننا فعلا نقدر نشد حد معانا.
بس الحقيقة إننا نقدر! دايما لازم نفتكر اننا نقدر و إننا ساعات لازم نقدر, و الأهم لازم نفضل على طول فاكرين ان اللى عندنا ده مش عندنا لتميزنا
يا ريت ما نضحكش على نفسنا, ده كله من عنده!! أنا مش بستشيخ ولا عايشه دور الداعية بس متأكدة انكوا زيى بتنسوها الحكاية دى.
أما تذاكر و تنجح .. بلاش رسم الدور أوى عشان سهل انك تسقط
أما تعوم و تطوف .. ماتصدقش نفسك أوى لأنك ممكن في لحظة تغرق

ماتستقواش على اللى اضعف لان كلنا لنا لحظات ضعف

كل واحد فينا كل فترة (يوم .. أسبوع .. سنة .. مش مهم ) لازم ...... لاااازم تشد واحد معاك.
الشدة ممكن تكون ابتسامة,مكالمة تليفون,طبطبة. الشدة ممكن تكون جنيه, ممكن تكون اى حاجة عندك, أو اى حاجة ناسى إنها عندك.
المهم .. انك ماتوصلش الشط لوحدك

لان هو ده الإنسان
و هي دى الحياة
و هي دى عظمة الإنسانية

11 comments:

Yasmine Adel Fouad said...

انا شايفه ان
1- انك تحدد اتجاه الشط اللى يناسبك
2- تؤمن بقدراتك
3- تفكر مين اللى هتشده معاك


و اعتقد ان الواحد ممكن يقعد يفكر فى كل دول و هو بيعمل عجلة مش و هو بيغرق طبعا

____________________


سؤال هامشى
انتى ما برتديش على تعليقاتنا ليه ؟ و للا احنا هنا بنكلم نفسنا و لامؤاخذة !!!!

Unknown said...

بحس ان مساحتى من الكلام انتهت و انى مش من المفروض افرض اتجاه للتعليقات
بس عندك حق ... ده ممكن يثرى الموضوع اكتر

اما عن كلامك فالفكرة انا بعتقد فى المبدأ .. طبعا هتساعدى مين ده سؤال مهم و ازاى ده سؤال اهم
بس انا اللى شايفاه ان لالاأسف فى ناس كتير حتى مش بتسأل السؤال ده

Samar Ali said...

f el la7za de byt2dry te3rfy meen ely dafa ely benek w benhom kafy enk teshdehoom m3aki

mostafa rayan said...

صح انا معاكي في الكلام دة لو كلنا عملنا كدةكانت الحياة بقت احسن بكتير قوي

AyA said...

فكرة جميلة بأسلوب ممتع....


انا بقى بفكر في سؤال تاني خالص بيحرق في سيور مخي من التفكير :D

لو فيه حد وجودك في حياته (سواء بنت او ولد) المهم ان تواجدك في حياته مفيد جدا ليه... يعني بياخد رايك بيشتكيلك او بيطلب مساعدتك المعنوية في الغالب واللي بترتبط بيها اكيد في بعض الاحيان انك تتدخلي بمساعدات ملموسة أكتر من الدعم المعنوي بالكلام.... اوكي,لو الحد اللي معتمد عليكي في حياته ده بقى, ابتدى يرهقك, وابتدى الموضوع يخوفك أنه هيبقى ادمان وهيزيد... بس كل ما تيجي تبعدي تلاقيه الانسان ده حالته تدهورت وابتدت حياته تتداعى وكأنك سحبتي منه رغبته في الحياة.... هنا بقى .... تعملي ايه في الوضع ده دلوقتي؟ تنسحبي ومالكيش دعوة, ولا مادام ابتديتي ووصلتي بيه او بيها لدرجة الاعتماد المعنوي ده يبقى مسؤوليتك انك تستمري في المساعدة؟ ولحد امتى؟ ولو فكرتي تخرجي من الموضوع ده تخرجي ازاي؟ وانا بتكلم انك تقدري تساعدي لكن ابتديتي ترهقي شوية لكن مازلتي تقدري تساعدي..... تعملي ايه؟

Unknown said...

Aya
mail me here: emanhashim@hotmail.com

desertrose said...

انا عايزة اقول حاجة لاية , في فرق بين المساعدة لشخص و انك تشيلي عنه مسؤلياته

واضح من اللي بتقولية ان الشخص دا اما بيستغلك او هو سلبي لدرجة انه بيعتمد على الاخرين في تحمل مسؤليته و حل مشكلاته
لو كان الاخير يبقى اكيد مساعدتك ليه بالطريقة غلط لانه بكدة مش هيروح حتة
الاحسن انك تسيبية يعتمد على نفسه , صحيح انه ممكن يتخبط شوية لكن هيوقف على رجليه بعد كدة و ياجه مسؤلياته بنفسه وتبقي عملتيله خدمة جايز ميحسش بيها في الاول لكن هيقدرها بعدين.

Unknown said...

متهسألى كده فى سوء تفاهم
لان انا مش باقصد ابدا ان الواحد يسيب نفسه للكل يستغله
انا قصدى ان يكون فى رحمة و رغبة حقيقة لتجمل مسؤلية المجتمع من حوالينا
ساعات انت ممكن تتخيلى ان الامر ده سهل و مش لازم تساعدى صاحبه فيه
فى حين ان ممكن السهل عندك يكون صعب عند غيرك
و من هنا فكرة ان احنا نساعد بعض
فى ناس فعلا مش بتعرف تعوم
و مش كل الاوقات انك تسيبيه يلطش فى المية لوحده لحد اما يعوم بيكون الحل الصح
الموجة ممكن تكون عالية و هو فعلا مش بيعرف يعوم
و ربنا مديكى المقدرة و القوة .. يبقى تساعديه
بس كده

desertrose said...

انا مش مش معترضة على اللي بتقوليه

لكن انا باقول رأيي في شخص معين اللي بتتكلم علية اية


ساعات ممكن تكون مساعدتك المستمرةبالشكل ده والتي بلا حدود لشخص معين بتؤذية اكتر من ما بتنجيه لانه لانه مش هيعتمد على نفسه ابدا طالما في ناس بيتكل عليهم.

Unknown said...

كده يبقى احنا فعلا متفقين
:)

احمد على المصرى said...

حقوق اية وكلام فارغ اية وعوانس اية يعنى لو ربنا كرمك بعريس حتكتبى الكلام الفارغ دة ولا نفسيتك حتفرح وتنسى البنات الاخريات وهموم العنوسة اوعى تقولى انت مش فاهم حاجة انا كنت مستريح منكم ومن كلامكم الهايف كل مرة يجيلى اعلان على الايميل افتكر كلامك بالاهانة لشخصى ويدعونى شيطانى ان ارد عليكم بكلام يزعل لانك انتى لم تستطيعى ان تكسبى اخ وصديق لا يهم امثاك بالكوم على النت مع احترامى احمد المصرى