Friday, January 25, 2008

4- اعادة تعريف الزوجة

زى اى مشكلة بنواجهها .. لازم نفتفتها حتة حتة عشان نفهمها

ايه اكتر مشكلة ممكن تكون الست بتواجهها فى مجتمعنا فيما يتعلق بموضوع الجواز؟؟؟ البق بتاع انها توفق بين البيت و الشغل .. طيب ليه فى مشكلة اصلا؟؟ لان التعريفات اصلا خربانة

تعريف الزوجة فى مصر و متطلبات المهنة :

1 - تصحى الصبح قبل كل البيت
2 - تعمل الفطار
3 - تلبس العيال و تتأكد من انهم اخدوا كل كتبهم و اكلهم فى شنطهم
4 - تأكل الشملول اللى ليسة صاحى و قالب بوزه
5 - تستنى الباص بتاع العيال او توديهم المدرسة
6 - تودى البيبى عند مامتها او الحضانة
7 - تروح الشغل ( متأخرة طبعا ) و كله طبعا يقول ادى شغل الستات .. لا يعتمد عليهم
8 - تشتغل ساعتين و تيجى الساعة 12 او 1 الظهر بالكتير و يركبها العفريت و تبقى عايزة تروح عشان تلحق تعمل الاكل و عشان لازم تروح قبل جوزها ( مش عارفة هو ليه الستات مش بيعملوا نسخ لمفتاح البيت للرجالة ما هو اكيد ده السبب فى انها لازم تيجى قبل جوزها )
9 - تعمل الاكل رهوان غالبا بهدوها
10- تأكل عيالها و جوزها
11- تغسل المواعين
12- تغسل الهدوم
13-تذاكر للعيال ( اصل الام هى اللى بتعرف تتعامل مع العيال)
14-تحضر الاكل عشان بكره تلحق تعمله بسرعة
15-تعمل للفلتة البشرية شاى عشان يتفرج على التليفزيون بمزاج
16-تعمل العشا
17-تشوف مشاكل العيال فى المدرسة و تتفاهم مع المدرسين
18-تحاسب البواب
19-تجيب السباك عشان الحنفية البايظة ( ان ما كانتش تصلحها بنفسها )
20-تتخانق على فاتورة الكهرباء اللى جاية غير القراية
21-تقدم للعيال فى المدارس و تتفق مع الباص و مع المدرسين
22-تباشر الست اللى بتنضف اللى اكيد جليباها فى يوم مخصوص واخداله اجازة عشان طبعا مش هاينضفوا و هو موجود
الاتهمات المتوقعة:
1 - مش واخدة بالها من شكلها
2- تخينة
3 - جسمها بايظ
4 - شعرها منكوش
5 - مش شايفة بيتها
6 - مش عارفة توفق بين بيتها و جوزها

الاكلشيهات المسموعة:

" لو مش عارفة يا هانم توفقى بين بيتك و ولادك بيقى اعدى فى البيت احسن" ... علما بان البيت لا يحتمل عدم وجود مرتبها فى اغلب الاحيان

" شايفة الستات فى الدنيا عاملة ازاى .. الست ملونة كده و محلوة عشان مهتمة بنفسها مش زيك"

" انا اخرتها هاتجوز عليكى "

" انت فاكرة نفسك بنى ادمة عشان اترقيتى فى الشغل .. ده تلاقى مفيش غيرك!!!!!!!"

" انت بتتكلمى كده مع مديرك فى الشغل ؟؟ ازاى تكلمينى كده يا مدام - ده على اساس طبعا انه هو مديرها فى البيت بروح امه-


ايه ده بقى ؟؟؟؟

الفكرة مش فى ان الرجالة عايزة كده ..ما هو طبيعى انهم يبقوا عايزين كده و اكتر .. المأساة فاللى بترضى بده .. اما الراجل يتمنظر انه عمره فى يوم ما نضف اودته ... اما النكته بتاعته تبقى ان مامته بتاخد الجينز بتاعه بالعافية عشان تغسله ( انا برضه موضوع مزج الرجولة بالعرق و القذارة بالنسبة موضوع مش فاهماه)

ليه بنرضى بكده؟ كل ده عشان مانبقاش عوانس؟؟؟
عمر ما هينفع نستنى التغيير يحصل من حوالينا من غير ما ندفع جزء من الاتمان .. عمر مالدنيا بتمشى كده .. و على فكرة .. اللى بيستنى التغيير يحصل من حواليه عمره ما هيعرف يستفيد منه لو حصل
لازم يحصل تغيير
و لازم كلنا نكون جزء منه

مش ممكن كل حاجة فى الدنيا تهون بس مابقاش عانس!!

لأة بقى ... انا عانس .... و عانس حقود كمان


41 comments:

Lasto-adri *Blue* said...

نسيتى لما يكون فيه ضيوف
:D
عليها تخدهم عشان تشرف وش البيه

ونسيتى اساسا اهم شئ.. ازاى يتدلع ويتهنن ويتبغدد
:D


واه شئ تانى.. بتقولى انها تبدأ تفكر من الساعة 1 فى الغدا؟ دا بأمارة ان الحكومة لسا بتشغل ناس
انتى نسيتى القطاع الخاص؟ اللى تخلص الساعة 5 يبقى مكتوب لها الجنة

دا غير أوامر الست الحامة وسنينها

وانها تحمى العيال وتذاكر لهم
:D

والسوق وطلباته
واصلا بتقولى عن الشغالة؟ دا لو كانت بتجيب شغالة مثلا
:D

م الآخر يا ايمان
الزوجة المصرية يعنى شغالة بس مع مرتبة الشرف
:D
ومرتبة الشرف بما تحويه الجملة من معنى ظاهر ومستتر وضمنى

Unknown said...

والحاجات دى كمان!!!

يالهوى ... و على فكرة الميعاد بتاع واحدة ده .. سواء بتخلص 2 او 5 .. تلاقيها الظهر ادن من هنا و هى خلاص على كده

و طبعا لازم تدلع و تهنن .. اما انتى عجيبة يا ايمان صحيح!! مش انثى و الانثى حنينة بطبعها .. حتى لو واقفة طول اليوم و هو كرشه طالع من الفانلة و قاعد قدام التليفزيون بيجعر "عايز شاى" و هى بتذاكر للعيال ... برضه تهنن

مش كتر خيره انه سترها!!
مش يكفيها فخرا ان فى فى حياتها راجل ..راجل ... راااااااجل

Samar Ali said...

all true!

P=S=Y=C=H=O said...

LooooL
Bas 3arfa el moshkela fi eh..!!
en 7ata lw el set shefha betha w sho3'lha kowyes w mohtma bi nafsaha

el ragel 7ay7'la2 1000 sabab w sabab 3ashan yebrar li nafso how leeh etgwez 3aleha

7'eba

salma said...

أنا متفقة معاكي يا إيمان أننا لازم نحاول نغير من الأوضاع الغلط، وأول تغيير لازم تعمله الست المتجوزة أنها تبطل تربي ولادها الصبيان على أنهم فلتات ومعجزات إنسانية زي البيه الوالد، ودي هى الي تبقى خطوة على الطريق بجد، لأن زي ما الست الوالدة بتعامل الباشا على أنه باشا، بيتوقع ده برده من الجارية الي بيشتريها في مؤسسة الجواز الهزلية.
Sal:)

Sue said...

All true bass heya 3'altet el setat mn el awel 3ashan homa elly sama7o lel regala enohom yewsalo le keda be ma3na a7'ar en lama el 3obodeya entahet wel 3abid ba2o a7rar ba2a fee fara3' we tab3an mafish 3'er el setat elly yemlo el fara3' da 3ashan homa el genss el adna tab3an...
el mafrood el setat te3mel edrab we tewa2af el regala 3and 7adaha begad bass lel asaf en fee setat ketir 3agebha keda we law 2oltelha 7aga te2oleik ma fe3lan el set a2al mn el ragel we heya elly lazem tigy 3ala nafsaha dayman 3ashan el markeb temshy we kol el kalam el fare3' da ma enshallah 3an el markeb mameshyet ya3ni.... lazem el marakeb kolaha te3;ra2 3ashan nebda2 mn gedid 3ala nadafa :D

صحفية روشة said...

عندك حق الزوجة جسد يتنهش فيه وقت الحاجة
وخدامة بقية الوقت
بل ان الخدامة افضل
لانها بتاخد فلوس وبتستفاد من شغلها دة بجد
وزى ما قال نزار قبانى
الرجل الشرقى لا يفهم المرأة الا فى السرير
اتمنى انك تزورونى فى البلوج بتاعى
http://namema2.blogspot.com/

mostafa rayan said...

قشطة عليكي ياايمي
بس يعني انت ماقولتلناش نعمل ايه من وجهة نظرك او ايه البديل اللي انت شايفة انه المفروض يكون
وبعدين مع احترامي ماكل الحاجات اللي انت قولتيها دي من عمل الست
الست هي اللي لازم تنضف البيت وتغسل الهدوم وتعمل الأكل
صحيح الرجل ممكن يعني يساعده بس مايمنعش ان دة جزء من مهامهاالأساسية
هي البشرية كدة حتي في الدول الاجنبية كدة بردة الست بتقوم بكل مهام البيت
وبردة بتشتغل وبتخلي بالهامن نفسها
وماسمعناش يعين حد اشتكي ولا قال كذاوكذا
دةرأي مع احترامي يعني لكل الأراء الأخري

islam said...

يااااااااااه كل ده الست بتعمله

الحمد لله إني راجل

وبعدين لما أي واحده تعرف اللي مفروض تعمله يبقى أحسن تفضل من غير جواز
هو يعني الراجل هيزودها إيه غير هموم زياده

و ممكن تتبنى أي عيل صغير و تربيه لو نفسها قوي في العيال

سهله جدا

Unknown said...

هو اسلام بتريأته حل المشطلة فعلا!!!

سايكو:
الراجل ده اكيد مش كدة مفاجأة بس احنا اللى بنستهبا و نتعمى طول مالدبلة فى اليمين و كل تفكيرنا بيبقى سارعة كدابة على انها تنقل على الشمال

والله يا صحفية يا روشة الكارثة ان دلوقتى مفيش حتى فهم فى السرير!!!

Unknown said...

مصطفى
البديل انه طالما هما الاتنين شاقيانين طول اليوم يبقى مش لازم يناديها من المطبخ عشان تعمله شاى
و مش اخرة الحياة لو غسل المواعين
و مش ضد الرجولة انه ياخد البيبى الصبح يوديه الحضانة او العيال للمدرسة
و على فكرة.. البصل لو الراجل مسكه يايديه التستيرون مش هيقل يعنى ( ده لو فى اصلا)

و غير كده كتير
المنظومة اللى كان فيها ده من صميم مهمات الست كانت فى شكل حياة مختلف تماما
كان فيه الست مسئولة ملاكامل من اى راجل
ان ماكانش باباها يبقى اخوها .. جوز اختها .. عمها .. او حتى بيت المالّّ!!! ما كانش فى ست ممكن تعين هم انها لو جوزها مات مطالبة انها تكون مسئولة
و مع الوقت كمان ما بقاش ده بس هو سبب التغيير .. التغيير شمل كل حاجة

و بلاش نظام " بتحصل فى احسن العائلات" اما كل شوية يبقى الرد بلاد برا دى مع الاخذ فى الاعتبار ان مش دى الصورة ولا حاجة

Unknown said...

سلمى
انا متفقة معاكى جدا و فعلا دى حاجة لازم كل واحدة تربى راجل تفتكرها رفقا بينا

و سو على الرغم من تهكم اسلوبها بس كلامك عاجبنى اوى فعلا
ماهى دى احد المصايب اللى موجودة فى مقال الجيم .. البنات فعلا احساسهم بنفسهم ضايع

Anonymous said...

يا إخواتى الأعزاء
أولا الكلام ده زى ما بتقولوا من العوانس الحقودين
لكن لو كل واحده فى الدنيا شافت إيه دورها فى الحياه اللى ربنا خلقها علشانه هتلاقى ان وظيفتها فى الحياة انها تشتغل فى بيتها وتربى عيالها وتهتم بجوزها ودى أعظم رساله فى الدنيا لانها هى ( مصنع الرجال ) الست لما بتربي ولادها بتكون بكده بتربى الراجل اللى هيبقى فى المستقبل زوج والراجل ربنا قال انه متكفل بالمصاريف وإنه يجيب كل مسلتزمات البيت
أنا مش بقول إن الستات مالهاش الشغل موافق انها تشتغل بس فى الشغل اللى هى مطالبه بيه
يعنى فى بعض المجالات بحتاج يكون فيها ستات زى تعليم البنات فى المدارس أو دكتورة نساء وهكذا
لكن الستات بيتدخلوا فى اللى مالهومش فيه وعاوزين يساوو نفسهم بالرجاله وياخدوا مكانهم يبقى لازم فى النهاية ان الست تبقى حياتها مش طبيعية وكذلك الراجل لو خد مكان الست هتبقى حياته مش طبيعية فبنقول إن كل واحد يلتزم بدوره فى الحياه وبكده هيكون كل واحد مستريح ومطمن وعارف هو بيعمل إيه وليه وهيقدر يقوم بالمهام اللى هو مطالب إنه يعملها
وبعدين الستات نعمه من عند ربنا وزى ما قلنا هى اللى بتصنع الرجال وبتربيهم فإيه فى الدنيا أعظم من كده دور وإيه فى الحياة أفضل من كده
أرجو من كل عانس حقود إنها تراجع نفسها وتفكر فى كلامى ده بعقل وبحياديه بدون ما تقول إنى راجل وإنى منحاز للرجاله
لان لو عقلتوا كلامى ده هتلاقونى باحترم الستات جدا وبقدر الدور الكبير اللى بيقوموا بيه
وشكرا

Anonymous said...

ايه التطرف ده
اولا السباكة و الكهربا و النجارة و الحدايد من شغل الزوج بلاش مبالغة بقي
و بعدين اللي بيودي العيال المدرسة و يجيبهم الزوج
او يوديهم عند امه
يا ناس اتقوا ربنا
كل ده عشان مش عايزين تطبخوا الطبيخ عاملكوا ازمة اوي كده
يعني عشان انتو بتأنفوا انكو تطبخوا لاجوازكوا و عيالكو خلاص
و مواعين ايه اللي بتتغسل دي امال القطقوطة بتعمل ايه و ربنا يخليلكوا اوليمبك اليكتريك

Anonymous said...

asmaa: هاي يا جماعه اولا انا فخوره اوى بايمان وكتابتها لانها بتحكي الواقع وبتطالب بالتغير يعنى مش دافنه راسها فى الرمل زى بقيت البشر السلبين ،كمان انا عندى رد لا الاستاذ الفاضل احمد رجب اولا مفيش حاجه اسمها الشغل الى يناسب الست ويناسب الراجل ده غير ان مفيش فرق مبين الراجل والست لان دينا الحنيف مفرقش مبينهم ولا فرق مبين اى حد واى حد غير بعمله الصالح كل الى عمله ان جعله قوامه على الست بحكم تكوين الجسدي مش اكتر اما بالنسبه لشغل الى يميز الراجل عن الست فهوه راجع لتكوين الجسدى ده ان فى مهن متقدرش الست انها تحتملها بحكم تكوينها الجسدى ده زى مهوه برده الراجل ميقدرش على الحمل والرضاعه بس اكيد قادر على رعاية اولاده مش بتكلم على الرعايه الماديه بتكلم على الى ايمان كانت بتتكلم عنه وهوه المذاكره والاهتمام والمشاركه فى التربيه بشكل عام والستات فى عهد الدوله الاسلاميه العظمى ايام نبينا الكريم اشتغلت فى التجاره وشاركت فى الحروب وكفاية ان السيده عائشه رضى الله عنها كانت احد مستشارين الرسول صلى الله عليه وسلم على الصعيد السياسي والصعيد الاجتماعى كمان "وكل ده مقللش من دورها فى صنع الرجال ولا تربية النشاء الى انتوا نسيتوه عالم الرجال وصية الحبيب مصطفى الى كان عليه افضل الصلاه والسلام يخيط ثوبه ويرتب فراشه بيده رحما منه بالنساء انه اخر وصاياه اوصيكم بالنساء خيرا .وانا حبيت اصبغ على كلامى استشهاد بمواقف الرسول الكريم مش عشان التدين لاء عشان مفيش راجل اتخلق فى الدنيا بكرم اخلاقه ولا برجولته ولا بحترامه للنساء,واسفه انى رغيت اوى كدا

Anonymous said...

asmaa: رد صغير اخير لاستاذ سمير مفيش راجل بيودى الولاد المدارس ولو انت بتعمل كدا او فى حد انت تعرفه بيعمل كدا يبقى شاذة القاعده ده غير ان فعلا الراجل اما بيلقى حاجه بايظه فى البيت بتخانق عشان الست مهمله وبيسبها هى الى تتصرف باى شكل كان ده غيرانى المقصود من الكلام مش ان الست مش عايزه تطبخ لاء الفكره الطلب بالمشاركه واتعاون وعلى ما اعتقد ده احد طرق اتقاء ربنا :)

Anonymous said...

يا أخت أسماء
أولا انتى ما اتكلمتيش فى الكلام اللى انا قلته غير على حاجه واحده بس إن كل واحد له شغله ودوره فى الحياه وسبتى بقيت الكلام اللى قلته ما علقتيش عليه
يا أستاذه أسماء
منين إنك بتقولى إن مفيش فرق بين الراجل والست وإنتى نفسك فى نفس كلامك بتقولى إن الراجل مش هيقدر يقوم بدور الست فى الحمل والرضاعه وخلافه
مع إنى أعرف إن العلم دلوقتى ممكن يعمل تلقيح خارجى ويهيئ غشاء المعده بتاعت الراجل بحيث إنها تكون زى الرحم
ودى مش قضيتى وإنتى نفسك لو فكرتى فيها كويس وتخيلتى إن الراجل هو اللى بيحمل وبيرضع شوف نظرتك للراجل هتختلف ازاى وإنه هيبقى شيء مقزز لإن فى نظرك الراجل ما اتخلقش لكدهكذلك الرجاله لما بتلاقى الستات بتاخد دورها وبتشتغل شغلها بتحس فى الست بشيء من الرجوله وده طبعا بيقلل من أنوثتها وده غير مرغوب لإن الست المفروض إنها رمز للجمال والحيوية وأنا ما قللتش من دور الست فى البيت بالعكس دا أنا رفعت من شأنها واحترمت اللى هى بتعمله ووصفته بإنه أعظم شيء فى الدنيا ورساله عظيمه لإنها هى اللى بتربى الراجل ووصفت الست بإنها مصنع الرجال يبقى ربنا إدالها الرساله العظيمه دى وتسيبها وتروح تاخد مكان مش مكانها وهتقولى أو زى ما الأخوات قالوا لإنها هتقدر توفق بين البيت والشغل طيب اشروحوا لى ازاى ان البيت أو الشغل مش هيتأثر
أولا فى فترة الحمل والولادة وأول الرضاعه المدام لازم تاخد أجازة من الشغل ما ينفعش إنها تروح وبالتالى الشغل هيتعطل ولو زملائها خدوا شغلها يبقى هى بتحمل زملائها فوق طاقتهم دى أولا ثانيا من المواصلات والزحمه والأرف وخاصة إننا عارفين المواصلات عامله ازاى الست هترجع من الشغل تعبانه لانها مش جبل هتروح الشغل وترجع تشتغل فى البيت لازم هتريح وفى الفتره اللى هى فيها فى الشغل مين هياخد باله من العيال
هتقولى إن الراجل لازم يشارك فى شغل البيت ماشى ما قلناش حاجه بس ما يبقاش بيتنصف ما بينهم وبعدين انتى اشتسهدتى بالسيدة عائشة فى كلامك أولا هى السيدة خديجة مش عائشة وثانيا هى كانت بتتاجر بمالها وما طلعتش فى التجارة وكانت بتستأجر سيدنا محمد للتجاره لها بأموالها لكن ما كانتش بتطلع فى القوافل وتسافر يا ريت يا أستاذة أسماء تراجعى نفسك وما تسيبيش لحد إنه يلعب بدماغك لإن واضح إن كلامك عباره عن كلام كان بيتردد قدامك وإنتى اقتنعتى بيه بدون علم فياريت لو عاوزه نصيحتى اقرئى عن دور المرأة فى الإسلام وعن مكانتها وانتى تعرفى أد إيه هى لو التزمت باللى ربنا قال عليه واشتغلت فى المكان المناسب ليها هتتحل مشاكل كتير عندنا وهيرجع للإسلام عزته اللى كانت أيام الرسول الكريم وهتختفى مشاكل كتير من حياتنا
وده لنك لمكتبة المسجد النبوى الشريف هتلاقى فيه حاجات كتير تفيدكم كستات وكرجال وربنا يوفقنا جميعا
http://www.mktaba.org/
ومعلش إنى طولت عليكم
وأترككم فى رعاية الله

Sue said...

احم، اولا منين جات فكرة ان الست ده دورها فى الحياه اللى ربنا خلقها علشانهانا مش قادرة افهم.... ده ربنا دلع الست اخر دلع و في الاسلام بجد الست مش من واجباتها اى حاجة من شغل البيت و الكلام ده و اللي هى بتقوم بيه يعتبر تطوع من ناحيتها و لو مش عايزة تعمله جوزها العزيز اللي سبع جالة في بعض ملزم انه يجيب لها خدامين يعملوا الحاجات دي و حتى الرضاعة الست مش ملزمة بيها و لو مش عايزة ترضع برضة بعلها المفروض يجبلها مرضعة و لو ارضعت يبقى المفروض يؤتيها اجرها.....

اللي بسغربله بأه مش الرجالة اللي بيقولو ان الست اتخلقت لخدمة و تدليع و هشتكة الرتجل لكن الستات اللي نفسهم مقتنعين بان ده اخر قدراتهم و اقصى حلمهم انهم يتجوزوا و يقعدوا في البيت و في الاخر ارجع و اقول كل واحد حر و اللي بيشيل قربة مخرمة بتخر على دماغه بس مش من حق اى حد انه يصنف شخص اخر او يفرض عليه رأيه بأه ....

Anonymous said...

asmaa: استاذ احمد انا استشهدت بالسيده عائشة وانا فاهمه استشهدت بيها فى ايه ومجبتش سيرة انها اشتغلت فى التجاره انا كنت بتكلم على دورها كاستشاريه للرسول الكريم يعنى انا فاهمه بقول ايه ياريت تعيد قرائت كلامي بتركيز ثانيا الفرق العضوى مش هوه الفرق الى الرجاله بتهتم بيه الرجاله عندها نظرية سفسطائية كده ان الفرق فرق ذهنى وعلى ما اعتقد ده واضح اوى من الى بتقال ادامى اهوه عموما كل واحد حر في راية وفعلا انا مع سو ان اشغال البيت تطوع مش فرض وده من رحمة الست باسرتها ده غير ان فكرة حمل الراجل وتأية معدة لستقبال الجنين فانا بصراحه متوعدتش اتكلم فى خيال علمى مخالف للفطره حتى ولو كان على سبيل الافتراض يا استاذ احمد وشاكره جدا تعاونك واهتمامك

Anonymous said...

asmaa: استاذ احمد حاجه اخيره انا قارئه كويس اوى عن دور المرأة فى الاسلام الظاهر ان انت الى محتاج تعيد قرائتها وشكرا لهتمامك لانى بعمل ماجستير عن دور المرأة العربيه ووضعها فى الاسلام متشغلش بالك بيا اشغل بالك بنصح ابناء جنسك عن احترام دور المرأة واشكرك مره تانيه

Anonymous said...

السلام عليكم
طيب ممكن يا أستاذة أسماء توضحى لى دور المرأة فى الحياه إيه ولما كل الحاجات دى مجرد إنها تطوع منها وكذلك الأخت سوعاوز أعرف منكم إنتم شايفين دور المرأة إيه فى الحياه وإيه المطلوب منها
أنا عن نفسى هقولكم دور الرجل فى الحياة إنه يشتغل ويشقى ويتعب ويصرف على بيته ويخلى البيت مش ناقصه أى حاجه فى حدود المستطاع وعلى قد مقدرته لأن الله عز وجل لا يكلف نفساً إلا وسعها فأرجو توضيح نظريتكم كويس ويا ريت لو تكون متحدده فى نقاط بحيث انى أقدر ارد أو استفسر عن كل جزء فيها لانى وقتى ضيق شويه
وشيء للعلم أنا مش ضد المرأة أنا بالعكس باحترم المرأة جدا بس المرأة(الأنثى ) مش اللى بتتشبه بالرجال
وسؤال ياريت تردو عليه
هل المرأة عندها القوه إنها تروح الشغل وترجع تعمل شغل البيت وهتستمر على كده أد إيه بدون تعب ولا تزمر منها؟
وكمان الخدامين اللى هيجوا يخدموا فى البيت دول هى المفروض الشغاله دى ليها أهل وبيت هى كمان هتعمل شغل بيتها ازاى ؟
وعلى فكره أنا مصرى علشان لو كان حد منكم مش من مصر وعارف أوضاع الناس هنا فى مصر شكلها إيه هل كل واحد فى مصر يعرف يجيب خدامه للمدام علشان هى تروح الشغل وهتاخد مرتب منين ؟
دا غير أسئلة كتير عاوز أقولها بس يا ريت لو تردوا الأول على أسئلتى دى وبعدين نكمل
وأفضل إنى أعرف وجهة نظركم للمرأة ودورها فى الحياة قبل ما أبدأ النقاش معاكم لإن كده الموضوع محتاج وقت كبير للنقاش
وشكرا على الردود وياريت الأستاذه إيمان صاحبة المدونة تقول رأيها فى الموضوع ده وفى الكلام اللى بقوله

Anonymous said...

أنا راجعت الكلام اللى انتى قلتيه يا أستاذه أسماء وده نص أخدته نسخ من كلامك "فى عهد الدوله الاسلاميه العظمى ايام نبينا الكريم اشتغلت فى التجاره وشاركت فى الحروب "
هل كده أنا لسه ما قرأتش كلامك كويس
واتأكدى برده إنتى بنفسك وشوفى إذا كنتى قلتى الكلام ده ولا لا
ثانيا هى المرأة بالفعل شاركت فى الحروب بس ياريت تقولى إيه كان دورها فى الحرب
بما إن حضرتك رسالتك فى الموضوع ده
هل كان دورها تضميد الجروح ومساعدة المجاهدين فى سبيل الله
ولا كانت شيله سيف ورمح وبتحارب بجانب الرجال
وثالثا لما الرجاله زى الستات ليه الرسول الكريم قال استوصوا بالنساء خيرا وما قلش الكلام ده للستات
يعنى ما قالش للستاء استوصوا بالرجال خيرا
وفيه نقطه خفيه عليكم أو يمكن أكون أنا موضحتهاش
الراجل ممكن يشتغل فى بيته وده مش عيب
يعنى مثلا أنا لما بتبقى ولدتى تعبانه أن ممكن أنضف البيت وأغسل وأطبخ وكل حاجه
بس لما بيكون فيه حد موجود من الستات فى البيت يعنى أمى مثلا أو حد من إخواتى البنات هم اللى بيعملوا ومفيش مانع برده إنهم وهم موجودين إنى أعمل حاجه فى البيت زى إنى أرتب الأوضه بتاعتى مثلا أو كده
إنما مش هغسل وأطبخ وأعمل والستات موجوده فى البيت
ياريت كل سؤال سألته أو نقطه اتكلمت فيها تقولوا إذا كان عندى حق فيها ولا لا ولو حصل إن حد دخل الدين فى الكلام وكان مستشهد بحاجه يذكر الحديث أو الآية اللى هو استشهد بيها علشان لو فيه خطأ فى تفسير معناها او فهمها أوضحه
شكرا

Anonymous said...

بجد الستات المصريات صعبانين عليا جداً

Anonymous said...

بسم الله الرحمن الرحيم
دى مقاله لعلماء فى الدين تقريبا بيتكلموا فى نفس موضوعنا يا ريت تشوفوها وشوفوا رأيهم ايه وايه تفسيرهم لمعنى قوامة الرجل على المرأة وكذلك معنى حديث الرسول الكريم " .. والمرأة راعية فى بيت زوجها ومسئولة عن رعيتها "
ده عنوان المقاله
" القوامة " فى الإسلام.. سعادة للمرأة واستقرار للأسرة
وده اللنك بتاعها
http://www.moheet.com/show_news.aspx?nid=174946&pg=7

Anonymous said...

http://manwithwoman.blogspot.com/

Anonymous said...

كان فيه سؤال نفسى أقوله اول ما دخلت المدونة وهو :
الحقد اللى موجود جو كل عانس زى ما صاحبت المدونة قالت سببه إنها ما اتجوزتش يعنى لو اتجوزت الحقد ده هيروح ؟
الحقد اللى هو صفة مذمومة عند كل الناس وكانت دى أول نقطه بتدل على فساد الرأى وانحيازه
وإنه مش رأى عادل لإنه تحت ضغط الحقد والغيره
ياريت اى عانس شايفه انها تقدر ترد عليا تقول ايه السبب ونتناقش فيه لان كل حاجه وليها حل
وكمان لان الحقد ده هيولد حاجات كتير وصفات مذمومه كتير احنا فى غنى عنها فى مجتمعنا ومش ناقصينها

Sue said...

النساء فعلا اشتركوا في الحرب ولا حضرتك ما عندكش علم بنسيبة بنت كعب اللي مش بس كانت بتحارب دي كانت بتحارب بسيفين مع العلم ان السيوف وقتها كانت ضخمة و ثقيلة جدا... فمن الافضل ان احنا نترك الحديث عن الدين للمتخصصين علشان منقعش في ذنوب "من اظلم ممن افترى على الله كذبا"
نتكلم بأه من الناحية الدنوية اللي نقدر نتكلم فيها اولا بالنسبة لمسألة الحقد من ان الواضح ان حضرتك مسمعتش عن الكتابة بالسخرية و اللي اصلا المدونة كلها مكتوبة بطريقة ساخرة و تهكمية لمحاولة اصلاح نظرة المجتمع للمرأة و بالاخص للمرأة العازبة.
عندي سؤال لو الراجل و الست بيشتغلوا و مرتب الست اكبر و مستقبله احسن و محتاجين لاى سبب حد منهم يقعد في البيت مش المفروض الاقل دخلا هو اللي يقعد في البيت ؟؟!! و لا هل ده حينتقص من رجولته؟؟ و هل معنى كده ان الرجالة اللي مش بيشتغلوا و مراتتهم بيصرفوا عليهم مش رجالة؟؟ و لا بيبقوا رجالة لما الست تبقى لسة جاية من الشغل و يطالبوها بالطبخ و التنظيف في حين انهم من الصبح قاعدين في البيت بيتفرجوا على السقف.....

شوية تفكير بأه و نحاول نغير الصور النمطية اللي استمرينا فيها قرون و عمالين نتأخر مش نتقدم

Anonymous said...

احنا بنتأخر لإن فيه ثوره من الجهلة اسمها التغيير فى حاجات هى ما ينفعش إنها تكون غير كده لإن دينا قال عليها كده والفطرة بتقول كده بس هم عاوزين يقلبوا الكون بدون علم ومن وجهة نظرهم إن كلامهم صح
وده الشيطان مسوله ليهم
إحنا اتأخرنا لإن ربنا قال لنا على حاجات إحنا ما نفذنهاش واتمردنا عليها
احنا اتأخرنا لان اليومين دول الستات بقت بتمشى فى الشارع كاسيات عاريات مائلات مميلات والحياة بقت صعبه والجواز بيتكلف ولما الراجل أو الشاب يشوف الحاجات دى قدامه لازم ينحرف غضب عنه ولازم القيم والمجتمع ينهار
لما تيجي تكلمى اى واحده على طريقتها فى الكلام أو لبسها تقولك أنا حره لا الانسان مش حر الانسان مخلوق اجتماعى ما يقدرش يعيش لوحده
لازم يعيش بتعاون الاخرين
هتقولى لى انا ممكن اعيش لوحدى
هقولك شوفى مكان غير بيتك يكون مفيش حد بناه
اكلك انتى ازرعيه
لبسك انتى اصنعيه كل حاجه اعمليها بنفسك
هتلاقي نفسك بتعملى حاجات كتير وهتلاقى نفسك محتاجه لمساعدة الناس
اللى أنا شايفه من كلامكم إنكم عاوزين تمشوا بطريقة خالف تعرف
عارفين إيه الصح بس بتكابروا وعاوزين تغيروه
عارفين إن الست مالهاش غير بيتها وجوزها بس عاوزين تغيروا ده لانكم شايفين إن الست بكده ضعيفه
الضعف ده مش ضعف نقص فيها
لا ده ضعف فطره وده أحلى حاجه فى الست إن الراجل يحس إن الست محتاجه له وبالتالى هيحاول انه يملى عليها حياتها ويديها حبه وحنانه لكن لما يلاقى الست بتناقره وعاوزه تقعد مكانه بيقول فى نفسه ليها اعملى اللى انتى عاوزاه لكن هيستخسر فيها أى جرعة حب أو حنان ودى فطره ربنا فطرنا عليها
يا بنات اتقوا الله ممكن يكون حد فيكم حصلت له حاجه أو موقف مع حد خلى فكره بالطريقه دى مش معنى كده إن الرجاله كلها كده
إنتم بفكركم ده ممكن تدمروا الناس أكتر ما هى متدمره إحنا عاوزين نصلح الحال
شوفوا الستات فى أوروبا حالهم إيه نفسهم الرجاله تعاملهم بعاملة المرأة المسلمة عاوزين ياخدوا مزايا الاسلام اللى اداها للمرأة المسلمة وهم كانوا من فتره من الزمن بينادوا باللى انتم بتنادوا بيه دلوقتى
وده فكر صهيونى عاوز يدمر بلادنا
بيدخلوا فى عقول البنات بطريق غير مباشر بانهم مثلا يصوروا ليهم ان ضعف الست ده نقص وإنه عيب وبالتالى الستات هتمرد وتصبح فتنه يا جماعة اتقوا الله
وافهموا صح
اقرأوا فى أمهات الكتب فى الدين وانتم تعرفوا ايه الصح وما تمسكوش على الوحده وما تنقوش الكلام
والدليل انكم بتنقوا الكلام علشان عارف ان فيه حد هيعلق على الكلام ده انكم بتنقوا تردوا على ايه من كلامى
طيب ما انا سألت أسئله كتير وقلت كلام كتير ومفيش حد رد عليا ولا قال اى حاجه لكن الاخت سو أخدت نقطه صغيره واتكلمت فيها
وكمان عاوزه الراجل يقعد فى البيت والست هى اللى تشتغل
حتى لو كان مرتبها أضعاف أضعاف
الست ست والراجل راجل
دوروا فى بيوتكم وفى بيوت أمهاتكم وآبائكم هتلاقوا الصح ايه وهتعرفوا إيه الفكر الخاطئ من الصح
لو شفتوا بيت الست فيه بتشتغل والراجل قاعد فى البيت هتحسوا انه بيت منعدم
الست بتدى روح ومعنى للبيت
هتحسى ان الراجل ده مش راجل تحسى انه ست حتى فى كلامه وتعاملاته والست بقت راجل فى كلامها وتعاملاتها وده بالنسبه للشخص السوى شيء مقزز
وهتلاقى العيال مش متربيه كويس لإن كل واحد اتخلى عن دوره
للمره الأخيره يا جماعه اتقوا الله فيه بنات مش فاهمه حاجه لو سمعوا كلامكم ده هتبقى مصيبه وطامة كبرى

Unknown said...

اساسا يعني
بعيد عن عينك انتي و هيا انكن اصلا توصلو للمشاكل دي

Unknown said...

دى حاجة نحمد عليها المولى عز و جل
مش من قلة الهم اللى فى الدنيا

واحد ضارب said...

كلمة واحدة
الزوجة المصرية = الأم المصرية = ست أصيلة

Unknown said...

الزوجة و الست مش معناها انها فى الاساس خدامة كده
الست مش من واجباتها الخدمة اصلا

AyA said...

اقتباس:
صحيح الرجل ممكن يعني يساعده بس مايمنعش ان دة جزء من مهامهاالأساسية
هي البشرية كدة حتي في الدول الاجنبية كدة بردة الست بتقوم بكل مهام البيت
وبردة بتشتغل وبتخلي بالهامن نفسها
وماسمعناش يعين حد اشتكي ولا قال كذاوكذا
دةرأي مع احترامي يعني لكل الأراء الأخري


معرفش ليه مبتاخدوش من كل حاجة اللي على هواكم, من الدين من الغرب, من كل حاجة في الدنيا تشوهوها وتلووا الحقائق....
نساء الغرب اللي حضرتك بتتكلم عنهم, ببساطة شديدة هما زوجات رجال الغرب! فياريت منتكلمش في الموضوع ده كتير عشان مش مجال المقارنة بين الجنسيات

ثانيا بقى, الست مبتتولدش بمعلقة خشب في ايديها ولا طاسة في دماغها عشان نقول مخلوقة للخدمة, امال الطبيخ مهمة مين؟ مهمتها النهاردة ومهمتك بكره, ومافيهاش حاجة لو هي جهزت حاجات يوم الاجازة وزوجها يسخن الاكل لما يرجع من الشغل.... يعني الحياة مشاركة, وبعدين هي شاركت في المرتب ونزلت الشغل, يبقى بسلامته يشارك في البيت, مش حكاية مين مخلوق لإيه, الزوج والزوجة اسمهم شركاء حياة, يعني يساعدوا بعض على قد ما يقدروا وماهياش اهانة ابدا ان الراجل يطبخ مرتين في الاسبوع او يحط الهدوم في الغسالة الاتوماتك او يشيلها من الغسالة ينشرهالها مرة في الاسبوع... مهي الست دي مش روبوت!! دي بني ادمة زيها زيه, ويزيد عليها انه جسمانيا اقوى منها -مش دايما بس ده الرسمي في كتب الفسيولوجي- فيبقى مين اللي المفروض يساعد مين؟

AyA said...

اقتباس:
هتلاقى ان وظيفتها فى الحياة انها تشتغل فى بيتها وتربى عيالها وتهتم بجوزها ودى أعظم رساله فى الدنيا لانها هى ( مصنع الرجال )

اه فعلا, لو الرجالة كلهم بقوا زي ما حضرتك بتوصف, يبقى الأمهات لوحدهم فعلا هما اللي هيبقوا مصنع الرجال......

Unknown said...

عندك كامل الحق يا اسة
كل واحد فاكر ان هو اتخلق يتخدم و الست اتخلقت خدامة
منييييييييييييييين ؟؟ ماعرفش!!!
ده انا هاتجنن من الحكاية دى

لان ضد كل تعاليم الدين اللى هم بيقولوا انهم بيتبعوه

الدين اللى قال انه ملزم يا يجيبلها شغالة يا يشتغل معاها .. و اللى قال انها لو عملت حاجة ليها اجر مفروض و ان ماخدتوش يبقى اجرها عند الله لانها مش خدامة و مش من واجباتها انها تخدم عليه

بس الغلط على كل واحدة تقبل الشخط و الامارة و الاهانة و المريسة و كمان تقبل انها تعد تجرى فى الشوارع عشان تلحق تعمل الاكل و تقبل انها لو مالحقتش تعمله يتشخط فيها
تقبل كل ده عشان تتنيل تتجوز .. والله اللى تقبل كده يبقى تستاهل بقى
المصيبة انها بتربى رجالة و ستات على كده
هو ده اللى يحرق الدم

desertrose said...

انا شايفة من التعليقات الكتيرة دي ان في ناس لسة موصلتهاش الفكرة اللي احنا البنات والستات عايزين نقولها , وهي ان المساعدة والتعاون المتساوي) بين الطرفين)


الملاحظ ان الست غالبا بتقوم بكل حاجة تقريبا سواء جوا البيت او براه والرجل شايف انه بشغله و دفعه المصاريف وصل لاسمى معاني المساهمة معاها,
لاحظت ان الاستاذ احمد شايف ان دة صح وبيتكلم من وجهة نظر خيالية شوية لانه شايف ان الست مكانها البيت لكي تكون مصنعا للرجال وتهتم بالبيت والزوج وده اسمى الرسائل بالنسبة لها

بالرغم من ان لي تحفظات على الرأي ده الا اني همشيها ,
بس انا عايزة الفت نظره لحاجة مهمة

ان الست تقعد باختيارها في بيتها لانها شايفة انها بتقوم برسالة اسمى (تربية الاولاد) ده شئ وان الزوج يعتبر ده امر مسلم به وانه مش من حقها اصلاانها تطالب بانها تشتغل او تكمل دراستها الاكاديميةعشان (ده مكان الرجال ) ذي ما هو بيقول ,هي في الحقيقة سابت رسالة سامية عشان تتحقق رسالة اخرى سامية ,مع ان في سيدات كتير يقدروا يحققوا الاثنين معا

الشئ الاهم اللي عايزة اوضحهوله ان الحياة مش سهلة اوي كدة في ستات كتير تحب تقعد في البيت لكن ميقدروش
لانه في ظل الظروف الاقتصادية الحالية الست بتشارك بمرتبها على البيت ,يعني الرجل مش هو اللي بيصرف لوحده , يعني الست اصبحت عامود اكبر واركز للبيت عن قبل كدة
فزي ما هي بتشتغل زيها زيه والبيت محتاج مرتبها زيه بالظبط يبقى من حقها انها تحس بالمشاركة والمساعدة في البيت زيها زيه
واسمحلي انت لما قلت انك بتنضف اودتك امم والدتك بتتعب او مفيش حد من اخواتك البنات في البيت حسيت انك بتعملها منة عليهم مع انهم كانه مش فرض عشان ترفق بالنساء زي ما بتستشهد بالرسول

وبالمناسبة يا ريت ماحدش يستشهد بكلام في الدين في غير موضعة عشان يبرر موقف متخذه او غرض في نفسه

الدين اسمى من كدة وبلاش نقول قال الله و قال الرسول واحنا لا مفتيين ولا فقهاء


ودمتم:)

Anonymous said...

انا حرد علي الاخ احمد
انت بما انك بديت تتكلم عن الشرع ودين فاحب اقولك انه شرعا باجماع الائمة المذاهب الاربعه لا يحق لزوج اجبارة زوجته علي خدمته بل هي مخيرة في ذلك

مذهب الحنفية
قال الإمام الكاساني في (البدائع): ( ولو جاء الزوج بطعام يحتاج إلى الطبخ والخبز فأبت المرأة الطبخ والخبز لا تجبر على ذلك، ويؤمر الزوج أن يأتي لها بطعام مهيأ.
ومن ذلك ما ورد في (الفتاوى الهندية في فقه الحنفية): ( وإن قالت لا أطبخ ولا أخبز لا تجبر على الطبخ والخبز، وعلى الزوج أن يأتيها بطعام مهيأ أو يأتيها بمن يكفيها عمل الطبخ والخبز).



مذهب المالكية:
جاء في الشرح الكبير للدردير: ( ويجب عليه إخدام أهله بأن يكون الزوج ذا سعة وهي ذات قدر ليس شأنها الخدمة، أو هو ذا قدر تزري خدمة زوجته به، فإنها أهل للإخدام بهذا المعنى، فيجب عليه أن يأتي لها بخادم وإن لم تكن أهلاً للإخدام أو كانت أهلاً والزوج فقير، فعليها الخدمة الباطنة، ولو غنية ذات قدر من عجن وكنس وفرش وطبخ له لا لضيوفه فيما يظهر، واستقاء ما جرت به العادة وغسل ثيابه)



مذهب الشافعية:
جاء في (المهذب) في فقه الشافعية لأبي اسحق الشيرازي- رحمه الله- ( ولا يجب عليها خدمته في الخبز والطحن والطبخ والغسل وغيرها من الخدم لأن المعقود عليه من جهتها هو الاستمتاع، فلا يلزمها ما سواه).



مذهب الحنابلة:
قالوا: ( وليس على المرأة خدمة زوجها من العجن والخبز والطبخ وأشباهه ككنس الدار وملء الماء من البئر، نصّ عليه أحمد؛ لأن المعقود عليه من جهتها هو الاستمتاع بها، فلا يلزمها غيره كسقي دوابه وحصاد زرعه)، ولكنهم مع هذا قالوا: ( لكن الأولى لها فعل ما جرت العادة بقيامها به، لأنه العادة ولا تنتظم المعيشة من دونه ولا تصلح الحال إلا به).

Unknown said...

desertrose:

كلامك فعلا جاب المفيد
مش معقول ليسة لحد النهاردة الست مش حاسة بقيميتها اوى كده
دى بتبقى يا عينى ممشية البيت كله و بتجيب فلوس آخر الشهر .. و هو كل شوية يتمنظر عليها و يقولها " قعدى " و كأن البيت يستحمل نقص مرتبها و كأنها هى هاتقدر تحرم ولادها من فرصة احسن
حاجة تقلب المعدة فعلا

Unknown said...

Anonymous:
الف شكر على التوضيح الرائع ده
ياكشى حد يفهم

botbot80 said...

ولا لما بتبقى لسه جايبه بابى ديد وبيعيط والباشا مش عايز دوشه فالبيت اصله ابها لوحدها يا روح امك وبالليل يقولها روحى نامى فالاوضه التانيه علشان اعرف انام انا عندى شغل الصبح

Unknown said...

اه ياما يا امة

ايوة بالضبط كده
زى ما يكون ابنها لوحدها