33 - الام مدرسة .. مش بيوتى سبا

من فترة كنت عند واحدة صاحبتى اكبر منى شوية و بنتها ليسة متحجبة جديد . الست قال ايه بتاخد رأيى فى شكل بنتها بالحجاب فقامت قايلالى – قدام البنت – و كل وشها تعابير عدم الرضا بل و القرف:

ايه رأيك يا ايمان؟ شكلها معقول بالحجاب..ولا ايه؟ يمشى يعنى؟

انا ما بقيتش عارفة ارد .. مش عشان البنت شكلها مش معقول

عشان الست دى فى لحظة 1- وصلت لبنتها انها شايفة شكلها وحش . 2- عبرت عن ده قدامى و 3- اديتنى فرصة انى انا كمان يبقالى رأى فى بنتها فى وجودها و بسماحها بل و بناء على طلبها!!

بعدها بحبة كنت عند صحبتى تانية ليسة عندها بيبى شهور. و مش فاهمة العيلة قررت ان البنت دى شكلها مش قد كده..كل شوية صاحبتى تبص لبنتها و تقوللى " هى مش امورة بس والله دمها خفيف! ". و طبعا الشعور ده هايوصل للبنت دى من و هى صغيرة!

انا مش هاتكلم عن تضخيم اهمية شكل البنت و استخدامه فى التأثير على ثقتها بنفسها! و مش هاتكلم عن كمية المواقف اللى فيها حوار السمار و البياض و العينين الملونة بيكون هو موضوع الساعة!

انا بس عايزة افهم .. ازاى ممكن ام تكون مصدر انهيار ثقة البنت بنفسها و هى مفروض تكون العكس؟ انا مش باقول تضحك على بنتها و تفهمها انها ملكة جمال .. بس برضه ماتكسرش مقاديفها - و قدام الناس – و تتخيل ان ده مش هايأثر. مهما انا قلت و شعرت فى البنت فى الموقف الاولانى عمره ما هايصلح اللى الست دى وصلته لبنتها . لان البنت هاتفضل مصدقة ماماتها مش اى حد تانى .. و اللى بيحصل بعد كده هو سلسلة من المشاكل بيكون احسن مصير فيها هو ان البنت تتمرد تماما على ماماتها و تجرد كل كلامها من قيمة و ده برضه فى الاخر هايفقدها مساندة و نصيحة حد مهم جدا فى حياتها.

يا ريت كل بنت تربى بناتها على الشموخ و الثقة . و يا ريت مايكونش شكل البنت هو كل رصيدها فى الدنيا اللى على اساسه يتحدد البنت دى بنى آدم له قيمة او لأة !!

32 - الحياة ... خللى العفريتة تتفرج

كنت قاعدة باتفرج على التليفزيون و لقيت اعلان لقناة تليفزيونية نصه الآتى:

يبدأ بالبطل بيعرفنا بنفسه ب "حسن رمز الرجولة" .. طول عمره فى الجامعة "راجل" ... و تليفون البيت ده محدش يجرأ يرد عليه غيره .. يرن التليفون ... ليسة هايمد ايده للتليفون ييجى كائن عجيب الشكل ... و تنزل بالساطور على التليفون تقسم الترابيزة نصين و هى بتزعق "حسن !!" و هو بقمة الاستكانة و الصوت الواطى " حاضر .. حاضر" ...

المشهد التانى .. الزوجة بتتفرج على المسلسل و بتمص قصب بطريقة مقرفة و بصوت يصحى الميتين و هى لابسة جلبية الخدامين و شكلها بجد منفر... الزوج بس حب يمسك الريموت هى قامت مجعرة فيه "حسن!!" و هو "حاضر .. حاضر" ز بعدين تقوم تجيب حاجة فهو يستغل الفرصة و يطلع ريموت من جيبه زيادة زى الحرامى فهى تجعر من مكانها "حسن!!" و هو يرمى الريموت و يكرر "حاضر ..حاضر"

و ينزل الكلام : الحياة ... سيب المدام تتفرج

الدروس المستفادة من الاعلان ده:

1 – الرجولة هى ان الراجل يكون الوحيد اللى ماسك الريموت و الوحيد اللى بيرد على التليفون

2 – الست اللى عايزة الحق "الرجالى" ده ست معفنة و مقرفة و غالبا ريحيتها وحشة

3 – الراجل اللى يسيب المدام تتفرج هو ابو صوت مش مسموع المستكين

4 – الراجل اللى مش راجل ده هو اللى بيقول لمراته "حاضر .. حاضر"

لأ و النعم!! هى دى المفاهيم اللى فعلا نحب برنى عليها مشاريع الستات و الرجالة

31 - الرجالة كمان ب......

فى اتهامات كده منتشرة عند الرأى العام على انها تصرفات بناتى خالصة... و الحقيقة ان الرجالة كمان بيتألقوا فى المناطق دى و بشدة زى:

1 - بيزنوا
الراجل اما بيبقى عايز حاجة بيزن زن الدنيا و الاخرة و "فيها ايه يعنى؟" .. "هايجرالك ايه " .. "عشان خاطرى انا بقولك" .. " مانتى لو بتحبينى فعلا ماكنتيش خالتينى اطلبها كل ده"

2 – بيتقمصوا
احدث خبر .. "الرجالة كمان عليهم بوز"!! و بوزهم ممكن يستمر ايام .. و على ايه بقى.. طب الست بتقلب بوها قدام الراجل لو هو مزعلها . لكن الراجل ماشاء الله بيقلب بوزه قدام الست ( و بس قدام الست) لو اى حاجة فى الحياة مش ماشية صح

العربية بايظة..الحياة لونها غامق

الشغل فيه مشاكل .. نكد العالم

الكمبيوتر متفيرس .. ياللا بينا نتكدر

واحد صاحبه متخانق معاه .. مفيش امان فى الدنيا و ماحدش يستاهل

3 – اللهفة العيالى
جربى ماترديش عليه مرتين ورا بعض .. و شوفى ممكن يكلمك كم مرة .. و لو ماتكلمش يبقى من بتوع سيناريو رقم 2

4- سياسة ال 30 رنة و ال20 رسالة
عادى جدا ... ممكن اوى تلاقيه عامل كده! خصوصا لو زعلانين مع بعض.. و خصوصا بقى لو هو اللى غلطان فيكى ... و يا سلام لو عرف انك عايزة تسيبيه

5 - الغيرة من اى مذكر على وجه الارض
عنده 50 سنة ... سن الخبرة و دول يتخاف منهم

عنده 20 سنة ... لو تعرفى دول بيفكروا فى ايه

مسيحى و انتى مسلمة ... طب عايز منك ايه ده

زميل فى الشغل ... هو مش عارف انك مرتبطة , بيكلمك من اساسه ليه ؟؟!!!!!

قرايبك ... ما خلاص بقى , هو انتى عيلة هاتلعبى معاهم فى الشارع؟

6 - المفاجأة بقى !
الرجالة كمان بتفرح بالهدايا! آه .. اعمليله سى دى اغانى, هاينشكح آخر الانشكاح..جربى مرة تبعتيله اغنية على الموبايل هايطير من السعادة , او اى لفتة لطيفة صغيرة كده

" هو بس الفرق ان فى احتمال كبير انه مايبينش"

7 - بيغيروا من صحابهم المتجوزين
آه...آآآآآآآه .. أه بقى.. و مش بيغيروا بس عشان نظرة المجتمع ( اللى بتفرق معاهم على فكرة) لآة. الراجل بيبقى عايز بيت و عيال بلعي معاهم . و مهما كدبوا فيها دى اتأكدوا منها

8 - بيخبوا الخير عن صحابهم عشان بيخافوا من الحسد و بيتعرف انهم فى علاقة متأخر

و بيداروا الاخبار الكويسة عن صحابهم

و مش بيقولوا ان مراتاتهم حوامل غير متأخر عشان الحمل (بيتنظر)

9 - عايزة تتستر
اصل اذا كان المجتمع بيقول على الست المش متجوزة "عانس" فتفسيرات المجتمع لعدم جواز الراجل كلها بتحصر يا فى اتهام مباشر لسلوكه..يا تشكيك واضح فى حالته الصحية..يا تساؤل مهم بشأن اتجاهاته الانتقائية

10 - بيكدبوا فيما يتعلق بمعرفتهم و ثقلفتهم الجنسية
الست بتكدب بادعاء الجهل

و الراجل بيبالغ فى المعرفة الى حد كوميدى فى بعض الاحيان .. كل واحد بيصور لخطبيبته انها "هايغمى عليها منه"

11 -بيسمعوا كلام صحابهم و بيتأثروا بيه اوى

12 - بيتلمعوا فى الافراح عشان يعجبوا البنات اللى فى احيان كتيرة بيرورحوها عشان يشوفوا عروسة

13 - بيسمعوا لامهاتهم فى شئون الجواز كويس اوى

14 - بيعيطوا!
ايون! كلهم.. خلاص بقى.. مابقيناش فى الزمن اللى ده معجزة فيه – و دى مش حاجة وحشة اصلا- يعنى اما تلاقيه بيعيط قدامك ده مش معناه انك عملتى كارثة مثلا.. ده اصلا هم عشان عارفين ان احنا فاهمينها حاجة كبيرة , ساعات بيستغلوها

15 - بيقولوا ان فى عروسة تانية كأسلوب ضغط
ماما عايزة تجوزنى عروسة جاباهالها طنط و معجبة بيها اوى

العيلة عندى متحمسين لواحدة زميلتى فى الشغل

فى ناس بيضغطوا عليا اشوف بنت مرشحينها ليا

16 - الرجالة كمان محتاجين الستات و بنفس القدر و لنفس الاسباب
يا ريت بقى نبطل نمثل على بعض. و نكون صرحا مع نفسنا و مع قدام بعضنا

الاعتراف بالحب مش عيب

الاعتراف بالاحتياج للحب مش خيبة

و الاعتراف بالاحتياج للحبيب شكل انسانى جدا من اشكال العلاقة ... مش ضعف ولا قلة حيلة..للدرجة انها تكون تنافى رجولة الراجل او قوة الست

30 - الجنس فعل حب!

الاول كده ازيكوا .. وحشتونى اوى .. معلهش الامتحانات منعتنى عنكم. انا ليسة مش خلصت الامتحانات بشكل رسمى بس خلاص هانت الحمد لله.

و طبعا البداية خل!! و بس عشان نتفق انا حاولت " انقى الكلام " على قد ماقدر بس الكلام ساعات هايكون صادم .

انا عايزة اعرف ..هو ايه الجنس؟ اللى اعرفه انه حاجة انسانية طبيعية جدا زى كل الحاجات البشرية بل و الحيوانية كمان. جميل؟

مفيش شك ان الجنس من الجوانب المهمة فى الجواز و الا نبقى بنضحك على نفسنا.

و للأسف الشديد مجتمعنا البارع فى انه يضحك على نفسه لافف الموضوع فى مجموعة من الاكاذيب اللى مش بيكدب بيها الا على نفسه.

انا متهيألى ان ده من اهم اسباب تعدد الزوجات و الخيانات الزوجية و الفتور فى العلاقات الزوجية و السطحية اللى فى ناس كتير بتتعامل بيها فى موضوع الجنس لما بتفكر فى الجواز و فى الجوازكله بشكل عام .

يعنى عايزة تقولى ايه؟

الجنس حاجة آه و حتما تتقضى.. بس فى اساسه فعل حب . درجة عالية من التعبير عن مجموعة من المشاعر ... كون ان انا مثلا لأسباب كتير, الحبيب بالنسبة لى هو الزوج او مشروع زوج . ده ما يمنعش ان العلاقة فى اساسها مشاعر الحب.

لو تخيلنا اى شكل آخر للعلاقات الانسانية اللى ممكن يكون الجنس جزء منها غير الشكل المتسمى "حب" هانلاقى ان الاساس فيه سواء انجذاب جسدى بحت او جوازة صالونات خالية من اى مشاعر الا المسمى "احترام متبادل و قبول" .. بيكون

Exclusiveness صعب جدا فيه مطالبة طرف بال

اللى هو انه مش مسموحله ابدا انه "يبص" لحد تاني او انه ينجذب له,,و طبعا صعب ان طرف يتصور استمرارية العلاقة دى الى ما شاء الله . الا لو فعلا اللى بيحسه للطرف الاخر دى مشاعر صعب تتكرر مع اى حد تانى .. و ده اللى بيخللى كل جوانب العلاقة – و الجنس منها – فى شكل مميز جدا مرتبط بتواجد الاتنين دول بالذات عشان شكلها يبقى كده.

الاغلب من الناس بتبص للموضوع ده زى حاجة كده باستغربها و باخد بالى منها كتير...و هى ان فى ناس تقول " احنا رايحين سينما " طب فيلم ايه؟ مش مهم.. هما مش اصلا مهتمين بحضور فيلم معين... مش فارقة معاهم .

المهم انهم لبسوا الحتة اللى على الحبل و ساقوا و حجزوا تذاكر و اشتروا فشار و قعدوا فى " المكان الضلمة" و اتفرجوا على اى بتنجان على الشاشة ! النوع ده هو اللى بتلاقيه بيتكلم و بيرد على الموبايل و بيروح و بييجى فى وسط الفيلم.. لانه اصلا مش مهتم اطلاقا بمتابعة الاحداث ولا فارقة معاه . هو بالكتير هاتلاقيه يتفرج على العربيات و البوس لو راجل و على التسريحات و الفساتين لو ست!!

Passion و ده لان – و للمرة الالف- الناس فاقدة ال

فى كل و اى حاجة بتعملها.

ده اللى بيخليهم يفكروا ان اى راجل و اى ست ممكن يتجوزوا !

و ده اللى بيخللى الجوازات تتم فى ازمنة قياسية !

و ده اللى بيخللى الناس مش مدركة اصلا ان الجانب ده فى العلاقة جانب مهم و ضرورى .... و على فكرة .. لا عيب ولا حرام!

يمكن الرجالة اكثر صراحة فى التعامل مع الموضوع ده و ان كانوا برضه مش اذكياء.. يعنى هو فاكر انه لما "يطلع المازورة و يرفع المقاسات" هو بكده اتأكد من ان الموضوع ده فى السليم .. و كأن المازورة هى المقياس الوحيد لمدى نجاح الجنس بين الاتنين.

لازم البنت ما تتكسفش انها تتسائل اذا كان الجنس مع الانسان ده هايكون امر محبب ليها او لأ .. و لازم الاهالى تتفهم يعنى ايه " شكله مش مريحنى" او "مش ....كده" و كل التعابير اللى البنت ممكن تحاول تعبر بيها انها مش متصورة نفسها فى الموقف ده .

لان ده مش عيب و لا حرام تانى!!

ماهو لو مفهوم الصفقة هايخش كمان فى ده يبقى دى دعارة مشورعة بقى! البنت الحلوة سوقها يمشى و جوازتها تتم حتى لو غصب عنها و طبعا مش بيبقى من حقا انها حتى تكون رأى عنها . هو كده و ان كان عاجبك!

اللى استفزنى للكتابة عن الموضوع ده هو نموذج محطوط قدامى الايامى دى للتعاسة الحقيقية فى أم و زوجة.. كل مهمتها فى الحياة هى التمثيل و جاتنى بتطالبنى بمهدىء "يسطلها" فى الوقت ده بس ماينيمهاش عشان هى خلاص مش طايقة!

و لما حاولت اسألها طب ليه مايعملش مش عارف ايه تقوللى مفيش وقت .. ده بيبقى عايز يدوب يخلص عشان يلحق ينام عشان يصحى الصبح تانى يوم للسحل فى الشغل !

و اما سألتها انتى اصلا بتحبيه .. قالتلى حب ايه , انا لو امى كانت شمت بس انى بافكر حتى فى العريس ده كانت رامتنى من الشباك .. اصله كان فعلا جاهز يا ايمان و انا برضه كنت شايفاه "مناسب" جدا و جايللى فى الوقت المناسب!!!!!

29 - اعلان التحرش الجنسى

اتنين شباب لابسين بدل سودا شيك فى حفلة يلمحوا - لا مؤاخذة - مزة واقفة بظهرها لابسة فستان اسود سواريه فوق الركبة

قوم ايه الواد الاول يزغد الواد التانى و يقله ظهرها حكاية فالتانى يرد عليه و يقله لا ده وشها جامد ... و كلام كده

ياخدوا بعض و يمشوا فى اتجاه البنت اللى واقفة و بصالهم و فرحانة بنفسها

يقوموا يخيبوا املها و يسيبوها واقفة و يتجهوا لعربيه هيونداى سودا واقفة وراها فى القاعة

كل مجهودنا ضاعت للارتقاء بالشعب ... انا مش مزة و حتى لو البنت قلعت ملط و لا للتحرش و لسة فيكى رجالة يا مصر و احمى نفسك و مش عايزة اتعرف.... و لا عزاء

منقول عن مروة رخا .. على الله الحملة دى تعمل اى حاجة

اعتذار

انا عارفة انى مقصرة بقالى فترة بس انشغال فى مشروع تابع للشغل شهر يوليو و اغسطس مع امتحانات الماجستير بتاعتى شهر اكتوبر ان شاء الله .. الموضوع مش سهل شوية
بس استنونى .. ده انا ليه حبة كلاااااااام
ليسة الحقد هايسمتر

28 - تعديلات مقترحة على قانون الاحوال الشخصية

الخير هنا

باختصار عشان اللى مش عارف او مش عايز يقرا .. مجلس الشعب و لله الحمد اخد باله ان فى احكام كتير فى قانون الاحوال الشخصية ما بين منسية و ما بين محتاجة تغيير بما يناسب شكل حياتنا .
و بالفعل هايناقشوا اقتراحات مقدمة فى اكتر من مادة فيما يتعلق بالزواج و التعدد و الزواج العرفى و الطلاق و الخلع.

مصدر بعض المطالب دى هو الدكتورة هدى رشاد رئيس لجنة المرأة بامانة السياسات بالحزب الوطنى .. و الخبر بينقل على لسانها اكتر من مادة مقترحة منهم

1 - رفع سن الزواج الى 18 سنة بدل 16 سنة

و ماعتقدش ان ده هايبقى فى خلاف كتير و اصلا ده مفروض واحد من التعديلات على قانون الطفل

2 - وضع شروط مسبوقة مطبوعة فى عقد الزواج:

و ده برضه مش هايكون متهيألى سبب خلاف لان اولا العقد ده مش سر ..يعنى اللى هايمضى عليه عارف من الاول انه ماضى و محدش هايمضى غصب عنه - المفروض- يعنى.
الفكرة ان للأسف فى بعض الحالات .. الست بتبرى نفسها من كل مليم من حقها عشان تتطلق و ده بيحطها فى موقف لا تحسد عليه ففى ناس شايفة ان ثبات بعض الحقوق - مادية او غير مادية - حاجة تحافظلها على حقها من غير ما حد يقدر ياخده منها.
و ان كان ارجع و اقول ان اللى هايوافق على كده مش هو الراجل اللى اصلا يتخاف منه لان ده فى الاساس فى مخ .. ممكن يوافق على دى او يرفض دى .. المأساة فى اللى هايعتبر ده "ركوب" يهز عرش رجولته..و فى البنات الهبلة اللى هاتشوف ده تطفيش للعرسان اللى ما صدقنا جم

3- تقييد تعدد الزوجات مع منح القاضى حق السماح به حالة تأكده من قدرة الزوج على الانفاق على الاسرتين

هنا انا عارفة هانزعل مع بعض.. بس خدونى على قد عقلى للآخر..هو مش شرط من شروط التعدد معرفة جميع الاطراف و موافقتهم؟
يعنى الراجل المتجوز عشان يتجوز تانى مفروض بيقول لمراته و هى بتقول آه او لأ ... و اما بيروح للتانية برضه هى عارفة انه متجوز و موافقة ... يعنى السرية تبطل التعدد .. هو انا على قدى كده عارفة ان السرية اصلا تبطل الزواج بشكل عام بس خلونا فى دى.
الايام دى بقى عادى اوى ان الست تبقى بعيالها و تكتشف ان جوزها بقاله سنين متجوز عليها
او انه يتجوز ست تانية و يهمل الاسرة و مصاريفهم قال ايه بيعاقبها
او انه هددها انها لو فتحت بقها مش هايديها مليم

سؤال تانى .. هو مش من احد شروط التعدد المهمة هو العدل؟ العدل اللى وصل مش بس فى الفلوس .. ده مفروض لو جاب هدايا لولاد زوجة يجيب لولاد التانية.. لو لبس بيجاما جديدة هنا يلبسها هناك .. لو اشترى حاجة جديدة ازوجة لازم يجيب للتانية..العدل اللى كان استثناءه الوحيد هو المشاعر
طيب ... فيها ايه لما يبقى فى جهة مسئولة عن انها تتأكد ان اهم شرطين للتعدد فعلا بيتم تطبيقهم؟ و هما سابق المعرفة و الموافقة و القدرة على العدل فى الانفاق؟؟ بس عشان نحافظ على حق الستات اللى مرة واحدة بيلاقوا نفسهم فى الشارع بيعالهم.

اصل التعدد مش اللى بييجى فى المسلسلات اللى هو رجل الاعمال الثرى اللى بيتجوز السكرتيرة فى السر.. التعدد ده فى عمال و ناس مش لاقية تأكل و تعلم عيالها اصلا...بيستخدموه على سبيل المتعة الحلال و اسلوب لكسر نفس الست و تهديدها.

4 - حق المتزوجة عرفيا فى الحصول على نفس الحقوق التى تتمتع بها الزوجة العادية مثل النفقة و نسب الاولاد تلقائيا

انا صراحة كنت فاكرة ان حكاية نسب الاطفال دى كنا خلاص بنطبقها .. اول مرة اعرف انه ليسة فيها كلام.
اصل ده حق للطفل مش للست ولا الراجل..حقه فى انه ينسب لابوه و لامه
اما النفقة و باقى تفاصيل الزواج المادية .. فلو اعتبرنا الزواج العرفى زواج .. يبقى يتطبق عليه كل بنود الزواج بقى من مسئوليات على الاتنين.
و اعتقد ان مساواة الزواج العرفى بالعادى قانونا هو الحل الوحيد للحد من الزواج العرفى .. اما كل راجل يلاقى ان عقد الزواج العرفى ده زيه زى القسيمة هايفكر الف مرة قبل مايعملها. ده غير الحالات اللى بتلف حوالين قوانين كتير بانهم يتجوزوا عرفى ..برضه دول هايبطلوه .. حاجة مهمة كمان و هى الورث

5 - الغاء الطلاق الغيبى