Saturday, January 3, 2009

42 - قولى لأة

ABUSE

الكلمة دى ترجمتها للعربى كلمة "التحرش"*. بس الكلمة العربية اسيرة للايحاءات الجنسية فقط سواء كان بشكل مباشر زى الحوادث المشهورة و حالات الاغتصاب اوغير مباشر لما بيكون استغلال لسلطة فى فرض علاقة على حد تانى .
لكن المعنى الاكبر للكلمة بيشمل فرض اى شخص على القيام بأى تصرف مش من طبعه و على غير ارادته . سواء كان بقى بالعافية او باستغلال السلطة او حتى بالابتزاز العاطفى او لأى سبب آخر.
و التحرش مش بس اجبار الشخص على فعل جسدى ... اجبار شخص على قول رأى مش رأيه تحرش ... اجبار شخص على مشاهدة حاجة مش عايزها تحرش ... فرض انسان انه يعمل اى حاجة ضد المبادىء اللى هو او هى مقتنعين بيها برضه تحرش.

تطبيقا للمعنى ده .. كلنا اتعرضنا للتحرش!!
مفيش حد مننا ماتعرضش فى يوم فى علاقة ما للتحرش. من حبيب, قريب, صديق او اى حد تانى .
انا ليه كتبت المرادف الانجليزى الاول؟ لانه بيبين ان الفعل جاى من فعل آخر و هو "استخدام" او
use
لان فى استخدام و فى اساءة استخدام

لما تكونى فى علاقة و تلاقى نفسك مجبرة على فعل اشياء مش من تصرفاتك او قبول كلام عمرك ما تتخيلى انك كان ممكن تسمعيه يبقى انتى فى علاقة فيها تحرش!
لما تبقى فى علاقة فيها تفاصيل كتير فى مجملها بتحسسك انك "قليلة" يبقى انتى متعرضة للتحرش.
 

اللى بيحب حد بيديله عينيه ... بس بمزاجه, مش تحت التهديد او الزن او البعد او بالغصب ولا بالمحايلة.
كلمة "لأة" بتتقال مرة و اللى بيحب مش بيخللى حبيبه يكررها.
اما تقولى لأة على حاجة و تلاقى كلام تانى فيها .. يبقى انتى بتتعرضى لتحرش.
تانى ... لو بيحبك مش هايتحايل عليكى, ولا يغصب عليكى, ولا يفرض عليكى, و لا يتقمص منك, ولا يفتح بقه تانى اصلا!

الكلام ده مش بس فى مسك الايدين و الكلام ده ... لأ ... الكلام ده يشمل انك ما تجبريش نفسك على اى فعل مش من طبعك
اللى يجبرك تتحجبى بيتحرش بيكى ... ايوة
اللى يتحايل عليكى تسيبى شغلك بيتحرش بيكى
اللى يسبل لك و هو عايزك تديله فلوس بيتحرش بيكى


طيب و الحل؟ ماهو لو من الاول كلمة لأة بتنفع كنا قولناها و خلاص.
الحل .. انك تتعرضيله مرة ... و تفضلى تقبلى بمص دمك, لحد ما ييجى يطلب منك اللى مش هاتقدرى تديه او لحد مايزهق منك, و ساعتها هايسيبك ... ... ساعتها نتكلم:
- ممكن تعيشى فى دور المحبة الضحية اللى وقعت فى واحد واطى و هى ماعملتش اى حاجة وحشة و نقطة على سطر.
و تحبى تانى و تتكرر المأساة و بعدين تحبى تالت و رابع و تعيشى كده!!
- و ممكن تفتكريها العمر كله ... عشان يوم ما تحبى تانى تعرفى ان اللى بيحبك, بيحبك كلك ... زى مانتى
اللى عايز يفصل فيكى مش بيحبك
اللى عايز يقيفك على مقاسه مش بيحبك
العشم و الخواطر موجودين ... بس بحساب و مش بالعافية!!

لما تروحى و انتى طول السكة متدايقة انك قلتى او عملتى او قبلتى او وعدتى بحاجة مش مريحاكى ... انتى بتتعرضى للتحرش
حتى اللمس ... طالما وصلك احساس انك "قليلة" يبقى انتى بتتعرضى للتحرش. و طبعا اللمس كلمة لأة فيه بتتقال مرة!! و ده على فكرة حتى لو متجوزين... آه... حتى لو متجوزاه مايلمسكيش بالعافية!
و لو متجوزك و اجبرك ... يبقى برضه انتى بتتعرضى للتحرش
ده حتى التليفون ... لو بقى الرد على التليفون بالعافية .... ده تحرش ( بس دى صراحة الستات بيعملوها فى الرجالة اكتر)

قولى لأة
المرة اللى جاية افتكرى و قولى لأة


فى اضافة اكثر تخصصا فى اللغة ان كلمة تحرش بالانجليزية معناها الحرفى هو *
Harassment not Abuse
لان الاخيرة ترجمتها العربية هى اساءة
و الفضل فى الاضافة يرجع الى:

شكراsiegex

25 comments:

Anonymous said...

لا اعتقد ان كلمة ابيوز هي مرادف لكلمة تحرش بل هي تعريف لكلمة اساءة لانه في فرق بين تعريف الاساءة وتعريف التحرش


وكما قلتِ كلمة ابيوز تعني اساءة استخدام، او ابالمصطلح المتعارف عليه عالميا وهو "اساءة" وبتقدري ترجعي ل ويكيبيديا بالنسبة لتعريف الاساءة (ابيوز)

اما المرادف لكلمة تحرش فهي كلمة هراسمنت ولها كل العلاقة بالتحرش الجنسي
مثلا اذا ضايقك احدهم بالنظر اليك والبحلقة واشكالها فهذا يعتبر تحديدا تحرش جنسي(هراسمنت) وهو من ضمن الاساءة (ابيوز) حيث ان الاساءة تشتمل على التحرش الجنسي في تعريفها
اقصد ان التحرش الجنسي هو نوع من انواع الاساءة

ختاما اوافق على كلامك على ان اي نوع من انواع منع المرأة عن التعبير عن ايها او التصريح به او ممارسته هو نوع من الاساءة لها كما ان اي نوع من انواع فرض الشيء على المرأة او الانسان بشكل عام هو ايضا نوع من انواع الاساءة

واؤيدك في الرأي بان على المرأة ان ترفض اي تحرش واي نوع من انواع الاساءة لانها اذا لم ترفض الاساءة فكانها تعطي المسيء لها الضوء الاخضر حتى يزيد من ممارسة الاساءاة (مهما اختلف نوعها) عليها

Unknown said...

طيب انا عشان اصلح الكلام عايزة اعطى الفضل فى المعلومة لصاحبها
ممكن اعرف مين اللى اضاف الكلام ده عشان احطه دلوقتى؟

siegex said...

عفوا كان في تصحيح للجملة الاولى بتعليقي والظاهر انا اضفت التعليق مرة تانية مع التصحيح بنفس الوقت اللي انتي مسحتىي فيه التعليق الاول

ما فهمت؟ بدك اسمي؟
هيني عملت ساين وحطيت التعليق من خلال اسمي في البلوغ تبعي

وسوري عالخربطة اللي حصلت

Unknown said...

لا مفيش خربطة ولا حاجة
و شكرا على الاضافة

Unknown said...

شكرا جزيلا
و تم اضافة المعلومة فى البوست

ايوة كده .. نتجمع و نفيد بعضينا
يا سلاااااااااام
انا سعيدة

siegex said...

Nice blog, btw

Keep it up!

Anonymous said...

تقنيين و تسمية الفعل بيساعد فى مكافحته

عشان كده تلاقى الabuse شغال عندنا على ودنه

Unknown said...

لأ معلهش
مش فهمت قصدك

Anonymous said...

الابيو عندنا مش محدد و عايم و مش معروف اصلا

we have to label people and stuff to be able to fix them, got it?

Unknown said...

اى حاجة غصب عنك

هاه؟ ينفع ده؟

Anonymous said...

اقصد لازم نحدد نوع التجاوز و اسبابه لفظيا كمان كأن نطلق ابيوز على النوع ده من التصرفات عشان نقدر نكافحها و نفهم مرتكبها انها تجاوز

مشكلتنا فى مصر اللغة ضعيفة جدا مش بتسمح بشرح النوع ده من التجاوزات بعكس الانجليزي
انتي لو لاحظتي تلاقي عندهم اللغة محددة جدا و نادر ماتلاقي لفظ له اكتر من معنى

77Math. said...

أحب ترجمتها إلى : الاعتداء

بدلا من التحرش

لأن سوء الاستخدام مش راكبة ع البني آدمين من وجهة نظري


لا تغيبي كثيرًا :)

Unknown said...

و آدى كلمة جديدة
طيب مع زيادة الكلمات المفهوم واحد و ده المهم
ولا اييش؟

77Math. said...

تمام يا فندم

المهم الاتفاق في المعنى

تحياتي

Anonymous said...

مش عارفة يا ايمان اقولك حلو و لا في بوست في مبالغة..
في حاجات بتتعمل بسيطة بتغيريها في نفسك عشان متزعلهوش و هي الحاجات دي نفسها بتزعلك و هو كمان بغيرها عشان ميزعلكيش
الموضوع مش كدة!!
الموضوع اكبر من كدة بكتير
سياسة التربية من اول وجديد انا حشكلك زي ما انا عايز و سمعا و طاع في كل حاجة هي دي الكارثة اللي البنات بتعملها و في اخير يلطمة
في حدود في كل حاجة
و مش بس في العلاقات العاطفية

Unknown said...

هاقولك ليه انتى محتارة
فى حاجات ممكن اقولك عليها كمثل للغصبانية عندى مثلا و تكون الاشياء دى ليكى مش موضوع اصلا و العكس
الفكرة مش فى ايه هو نفسه
الفكرة فى شعورك تجاهه

فى فرق بين انك تعملى حاجة عشان خاطر حد مرة و انتى يعنى هاه .. يالله. و بين ان حد سغصب عليكى و انتى فعلا مش عايزة و مش قادرة

الغصب ممكن يكون باى شكل زى ماحنا قلنا

فالمقياس الوحيد هو انتى .. انتى اللى تقدرى تحددى كويس الموقف

Anonymous said...

و نقول ايه بقى للبنت اللى بتفتكر الابيوس ده حب؟

بيشك فيكى و بيتهمك بالانحلال ... يبقى بيحبك

بيغير عليكى و مانعك من الخروج مع اصحابك .. يبقى بيحبك

عايزك تقعدى فى البيت و ترمى شهادتك من الشباك يبقى بيحبك

عايزك تسقطى سنة و لا اتنين فى الجامعة علشان تعرفوا تشوفوا بعض ..يبقى بيحبك

عايزك ترفضى المنحة علشان لو سافرتى علاقتكم هتنتهى .. يبقى بيحبك

Unknown said...

ايوة يا مروة
مش فاهمة ازاى ده يكون حب
ازاى يكون بيحبها و مش عايزها تكبر

و الاهم .. ازاى البنت مش بتاخد بالها

Anonymous said...

البنت واخدة بالها بس هى مازوشية

بتمبسط بالذل يعني

Anonymous said...

صديقتى السابقى
عندك حق 1000%
بس حنعمل اية نجيب رجالة من كوكب تانى ولا نصلح خرافات العقل العربى المصرى الشرقى المتخلف المتأسلم بتعرفى راجل واتنين وتلاتة وعشرة و فى الاخر كلهم شبة بعض مفيش راجل عدل الا فى حالة لو عايش دور الصديق السبور اللى مالوش انه يدخل فى تصرفاتك الشخصية طب نعمل اية ؟ نعيش احرار سنجيلز طب اللى مش دكتورة تعمل اية و شهادتها مش حتجبلها شغل كويس ؟ طب حنفضل طول عمرنا كدة فى شغل واشغال شاقة و قلق على بكرة حاشتغل اية و بكم و عند مين الحل الاسهل و الاوقع نرضى بالابيوز ونعصر على نفسنا لمونة و نعيش اللحظة و نغش المتخلفين اللى فاهمين نفسهم رجالة طالما هو راضى انه يعيش مخدوع وعايش الدور نسيبة يعيش الدور ويبقى طور فى ساقية و انا اعيش مطمنة و مرتاحة يومين
عارفة
فى مجتمع غير سوى ما فيهوش امان اجتماعى للست ما فيهوش حرية انى اعيش لوحدى واكسب واختار شكل علاقانى لما اعيش فى مجتمع بيحترم الاخر و يتقبلة زى ما هو مش عاوزة تفصيل فى عاوز البنت تبقى فى صورة معينة عشان يتحط جنبها كلمة دى بنت محترمة اخلاق صراحة
لازم و بكل اسف بقولهالك تتعلمى تقدمى تنازلات و تبتسمى وانت بتقدميها تحبسى نفسك فى عالم الديجيتال وحرية الراى و التفكير على النت عشان الوقت ممكن يسرقك وتلاقى نفسك مش قادرة تتعاملى مع مجتمع كل الرجال فية نسخة واحدة مكررة مع بعض التعديلات

Anonymous said...

انا متفقه معاكي يا ايمان


لكن في موضوع الحجاب مختلفه..لان ده امر من ربنا ولما ربنا يامرنا اننا نعمل حاجه لازم ننفذها من غير جدال
طالما شيء ربنا ذكره في القران


انتي محجبه ولا

Anonymous said...

شكرا علي الموضوع ولأةةةةةةةة

Mariam Galal said...

abuse
عمرها ما كانت تحرش
هيا معناها اساءه معامله او اساءه استخدام حاجه يعنى وليها معانى كتير اووى وبالاصح بتيجى اكتر فى التعذيب فى السجون وكده
انما التحرش الجنسى زى ما ذكرتى
sexual harassment

Unknown said...

انونيماس 1 ( المصممة انى صديقتها السابقة و مش عايزة تقول هى مين ) اللى بتقوليه ده يوجع القلب
بجد!!
على الرغم من انه طالع بيأس شديد لكن لخص كلام كتير اوى

انونيماس 2

انا مش باتكلم فى فرضية الحجاب و مش هاتكلم فيها .. انا باتكلم فى اللى يتجوز واحدة مش محجبة و يجبرها على الحجاب بالعافية
ماهو مفيش اكتر من المحجبات فى البلد .. يروح يتجوز واحدة منهم .. انما ياخد واحدة من بيت اهلها على حال و بعد كده اما تبقى فى بيته و فى عصمته يجبرها على تغيير الحال يبقى لأ .. ولا ايه؟

Unknown said...

انونيماس التالتة
ايوا كدااااااااااا
ههههههه

crazyrama:
thanks :)