شوفتوا الحكاية دى؟
البنات فى مصر فى منهم عندهم الاستعداد و الرغبة فى المشاركة فى الخدمة العسكرية. و طبعا الحكاية دى هاتلاقى صف طويل من المعارضين متسلحين بكل الافكار الخاصة بان المشقة للرجالة و ان الدين خص الست بادوار معينة و ان طبيعة البشر فيها اصلا اختلاف بين الراجل و الست و ان طول مالستات حاطين مناخيرهم فى كل حاجة (رجالى ) عمرهم ما هايفلحوا.
و الفريق التانى من المناصرين و المشجعين رافعين لافتات المساواة فى الواجبات و الحقوق, و بيقولوا ان الست فى مصر مش اقل لا من الرجال و لا من اى ست تانية و طبعا هنا هايبقى فى درس كبير يشمل كل انثى فى التاريخ الفرعونى و الاسلامى بل و العالمى بداية من سبأ انتهاء بوزيرة الدفاع الاسبانية اللى كانت حامل و هى فوق الاربعين و خدت اجازة ولادة من منصبها كوزيرة دفاع لتعود بعديها.
هى الفكرة مش فى مدى كفاءة الست فى انها تكون فى الجيش و لا فى انها زى الراجل او احسن و لا فى صراع الهرمونات اللى بتلاقيه ملى المكان اول ما بتيجى السيرة دى.
الفكرة فى "الحق فى الفرصة" .. بس كده .. اذا كان فى مواطن فى البلد دى عايز يخدم الخدمة العسكرية, اعطوه الفرصة. بس!
و الله نفعت بنت واحدة من المتقدمات حلو .. نفع اكتر كويس .. مانفعش خالص , بلاش. يعنى من غير اى اعتبارات شخصية او دلع. لو فى بنت تقدر على المشقة دى و عندها الاستعداد و الرغبة ماتشوفوا يا جماعة! هو احنا ليه بنحرم البلد دى من كوادرها الاكفاء لو موجودين.
و لو مثلا خايفين من عدم الجدية, خلوهم يمضوا على تعهد او غرامة فى حالة ترك الجيش ( اعتقد ان ده الحال مع الرجالة برضه , و لو غلط حد يقوللى الصح). انما مانحرمش البلد من مواطن نفسه يخدمها و لا نحرم مواطن من حقه فى الحصول على الفرصة.
يمكن انا شخصيا مش متحمسة اوى للفكرة لان حالتى الجسدية تمنعنى من انى اشطح باحلامى بعيد اوى كده .. ده انا باطلع السلم 5 ادوار بابقى هاموت! لكن لو فى بنات ينفعوا ليه لأ .. هو السؤال ليه لأ؟
25 comments:
azon en el moshkela el 7a2i2eya fel mawdoo3 da mesh en el setat wel regala wel set ezay te7areb wel kalam da laken en law fee setat dlwa2ty fel geish ezay 7ay7otohom ma3a el 3asaker we keda ya3ni lazem yeb2a lihom mo3askarat lewa7dohom we kol 7aga lewa7dohom we kaman 7arb lewa7dohom 3shan mayeb2oosh motareen enohom yedaf3o 3an nafsohom mn el a3da2 we mn el 3asaker elly taba3ohom kaman tab3an kol da 3ashan e7na fekreit el e7'telat 3andena fe Masr mesh mawgooda asslan ya3ni law bent da7'alet el geish 7atet2ata3 fa abl ma nefakar fe mawdoo3 el geish lazem ne3aleg fekreit el regala elly fe masr elly kol fekretohom 3an el setat enohom ashya2 le mote3et el regala law el mawdoo3 da et3aleg ana 7a2adeim fel geish :)
http://globalvoicesonline.org/2008/12/20/egyptian-spinsters/
Thanks ya Emma
شكرا يا مروة
فكرتينى بايام خوخة
مشكلة خوخة دى مش عارفة احلها ازاى
المدونة الانجليزية الاولى بتاعتى اسمها خوخة
ممكن احط اتنين مؤلفين
بس كده
هاعمل كده فعلا
الكلام ده يثبت نظريتي ان بنات مصر بقوا خلاص شوية و يحلقوا دقنهم زينا
والله العظيم كنت لسه بفكر في الاحتمال ده النهارده
وماله
اشمعني احنا يطلع تيتنا ونتبهدل ونتغرب علشان مصر لوحدنا؟
هم لا مؤاخذه الحريم مش برده حته من مصر ولا ايه؟
بس اهم حاجه هيبقوا محجبات ولا من غير حجاب علشان الاخوه اياهم
واللبس هيبقي عامل ازاي؟
ماهو لو هيبقي حشم ماشي بس مش معقول يبقي باديهات واسترتشات وميكرو جيب
كده هيبقي جيش نايت كلاب
وبعدين البنات جامدين برده مايغركمش انهم ضعاف دول وقت الشده بيبقوا وحوش واللي مش مصدقني
يشوف اي حرمتين او بنتين بيتخانقوا
يااه يبيبقي ناقصهم شويه فشار والفرجه تحلو
اللي انا اعرفه ان في بنات كتير فعلا متحمسين للفكره دي
وده لأن احنا عندنا بنات وطنين كتير ونفسهم يخدوموا البلد دي بأي طريقه
بس معتقدش ان الفكره هتنجح
اللى متحمسات للخدمة بالجيش متأثرين قوى بالأخت ديمى مور و هى زلبطة فى خدمة الوطن
و الله و ليه لأ . أنا كان عندى صديق مهندس محترم إتجند عسكرى . كل لما أسأله عامل إيه فى خدمة الوطن يقولى أنا مش فى خدمة الوطن أنا فى خدمة البيه الضابط .
إنت عارفة يا إيمان الرجالة بتهرب من الجيش ليه ؟ علشان محدش فيهم عارف إزاى خدمة البيه الضابط تساوى خدمة الوطن .
و الستات على فكرة مش بتحارب زى الأفلام .
و الله يا إيمان فكرتين بحاجة نفسى أكتبها من فترة بس ماليش نفس . يمكن دلوقتى بس أكتب
أه طبعًا أنا ضد التجنيد الحريمى علشان أنا مش حمل خدمة البيه الضابط ، أنا أخدم الوطن بعنية و الله بس هو الوطن يشاور كده ، أى خناقة أنا تحت أمره . ده أنا حتى كنت بفكر أخد فلوكة و أطلع أحارب القراصنة علشان الوطن شكله مش واخد باله بس واقفين على المقاديف .
قال يحاربوا قال ، إحنا بلد سلام . مصانع الإنتاج الحربى بتنتج ثلاجات و الجيش بيعمل مكرونة و صلصة و ماء طبيعى فى زجاجات .
المشكلة أعمق من مين يتجند
أنا بقى نفسي يبقى التجنيد إجباري على البنات عشان الحفاظ على اللياقة البدنية !!
اعتقد ان كل حاجة يا سو فى اولها بتبقى ملخبطة شوية و بتتعدل مع حاجة الناس و الوقت
و عمر مالدنيا بتتظبط و الواحد بعيد
لازم المحاولة
ده رأيى يعنى
مصرى : بدأ كلامك يبقى غريب
دكتور ليكتر : اكيد الحجاب مش هايخش كمان فى الكلام ده بقى! مش معقول يعنى!!
هو كل حاجة فى العيشة يتحشر فيها الحجاب؟
اقرا دى لو سمحت
http://3anes.blogspot.com/2008/11/37.html
انا شايفة كده برضه يا اسراء
بس ليه مش شايفاها هاتنجح؟
طيب يا شيماء انتى اللى ضده هو الفساد اللى فى النظام مش فى المبدأ .. صح كده؟
:D 77 math
هههههه
أنا مبدئى ضد التفرقة و لكن مع الإختلاف
يعنى ماينفعش أقول إن شغلانة معينة ممنوع منها النساء
يعنى من حقى أقرر و أختار مش لمجرد إنى ست يبقى أنا بالتبعية ناقصة عن الراجل و لكن أنا مختلفة عنه إختلاف لا يقلل من شأنى و لا يزيد من شأنه ، زى إختلاف الصوابع كلها مهمه و لكن مختلفة فى الشكل و بالتبعية الوظيفة
يعنى أنا أقرر أنا عايزة أشتغل مأذون و لا لأ و أنا اللى أقرر إذا كنت عايزة أشتغل ضابط و لا لأ . و على فكرة الستات ضباط فى مصر من زمان . فى الأسلحة المعاونة و زيهم زى الرجالة مافيش تفرقة . الحاجة الوحيدة اللى ممنوع منها الستات بموجب القانون هو التجنيد الإجبارى .
أما الفكرة اللى قد تخطر فى بال بعض الناس بالمطالبة إن الستات تحارب و تحمل السلاح ، فالموضوع ده لم يحسم حتى فى الجيوش اللى فيها مشاركة نسائية كبيرة .
الستات لا تشارك على الخطوط الأمامية . يعنى قبل ما نطالب بحاجة نعرف الناس اللى إحنا متخيليين إننا بنقلدهم بيعملوا إيه .
أما التجنيد الإجبارى للستات فهو مش موجود غير فى إسرائيل على ما أعتقد و طبعًا مش علشان هما متقدمين و لا متفتحين و لكن علشان مافيش أعداد كافية
One final side note, I am sorry I didn't know how to say it in Arabic but didn't anyone ever think that the whole women in uniform and on the war front in the movies are sort of fetish? Putting an icon like Demi More Bald on a hot zone turned many men on.
So, how come a man'r fetish be a woman's dream??!!!
يعنى انتى مع انك تدى الفرصة للى عايزاها؟
يبقى احنا متفقين
بصى .. هو انا شخصيا ضد التجنيد الاجبارى بشكل عام من الاساس , رجالة و ستات
و انا عارفة كويس ان فى ناس لعشرميت سبب هايتمسكوا و يبقوا غاية حلمهم هو العمل فى المجال ده
و بالتالى المساواة فى الفرصة مش امر غريب ولا عجيب
بالضبط اللى عايزة تدخل الجيش تفضل و الفرصة موجودة من دلوقتى
و لكن أنا بتكلم عن تعليقات البنات فى الموضوع بتاع مصراوى اللى متخيلين إن دخولهم الجيش معناه يشيلوا سلاح و يطلعوا يحاربوا
الكلام ده غلط و غير موجود حتى فى الجيوش اللى بيضربوا بيها المثل .
الرجالة بتدخل و تخرج من الجيش دلوقتى و معظمهم مش بيعرف إيه السلاح ده و لا بيستخدم فى إيه .
المهم قبل ما نطلب الحاجة نكون عارفين بنطلبها ليه و إيه الممكن تحقيقه منه فعلاً .
بعد السلام عليكم
عزيزتى
ارجو التواصل معى عن طريق الايميل للموافقة على نشر بعض اعمالك فى كتاب مدونات مصرية للجيب
tahees123@yahoo.com
راسلينى ع الايميل
او ع
e_m_s51@yahoo.com
تحياتى
يا دي النيله
دا فراغ دا ولايه؟؟؟
وكان حد قال ان الرجاله احسن نسبيا عشان بيخشوا الجيش والستات لا
انا بقيت احس بالكلام دا اهو اي حاجه نقول زيهم
لو الرجاله بتاكل خرا هنقول لازم مساواه
عادي مش مسأله رجال وست المسأله قدره بس
ف الغالب الاعم الصفات البدنيه فعلا للراجل انسب فيه ستات تنفع بس مش كتير ومش عشان الاحتمال دا اللي مش كبير هنقلب الدنيا ونطوع كل الستات عشان ننقي منهم طالما ان الرجاله مكفيه فالاحتمال تاني مستبعدينه
لكن طبعا الناس دي كلها قاعده علي ترابيزة الاجتماعات مستنيه حاجه الرجال بتعملها والستات لا
عشان تقول اشمعنه ...بتفكروني باخويا الصغير
انتوا لو مخكوا كبير فعلا؟؟ ومتخطيين بينكم وبين نفسكم فكرة الفرق بين الراجل والست
مكنتوش وجعتوا دماغكوا بالكلام دا ولا قولتوه
انما فعلا انتوا اللي بتقولوا الكلام دا اكتر ناس حاسه بالفرق ولمساه ومؤمنه بيه
والعمليه مش ناقصه عقد
والمشرحه مش ناقصه جثث
معدش اللي افلام الاربعينات اللي هنعيدها كمان
نورا
فعلا ليه لأ
بس يكون مش اجبارى
يبقى فل جدا
عشان البنات اللى فاكرين نفسهم 7 رجالة يورونا رجولتهم
المهم قبل ما نطلب الحاجة نكون عارفين بنطلبها ليه و إيه الممكن تحقيقه منه فعلاً
كلام موزون جدا جدا
يا نورا لو فى واحدة بتستطعمه و عايزة منه , انتى زعلانة ليه؟
بهزر طبعا
انا اللى اعرفه ان نسبة اللى بيتقبلوا من اللى بيتقدموا كل سنة فى الكليات اللى من النوع ده نسبة قليلة جدا
يعنى مش الاشكال فى الموضوع هو ان النسبة هاتكون موجودة
انا بس عايزاكى تفتحى دماغك للاحتمال .. مش يمكن؟ احنا خسرانين ايه طيب؟ مش يمكن واحدة تنفع؟
اما تحدى وفاء فعى بنرة التهكم اللى فيه بس انا موافقة على المبدأ
شكرا كلاكيت و هابعت الميل حالا
والله انا شايف ان مفيش حاجة اسمها مساواة بين الرجل والمرأة ! التعبير دة انا بعترض عليه !
لما نقول مساواة .. معناه ان فيه طرف أقل من التاني وبيطالب انه يتساوى بيه .. يعني الست لما بتطالب بالمساواه يبقى بتقول انها أقل من الراجل .. وانا بقول لاء مش كدة طبعا !
المرأة نصف المجتمع .. بحسبة بسيطة هنستنتج ان الراجل هوة النص التاني ! يبقى كل نص يخليه في اللي هوة فيه ! اللي بتعمله المرأة دلوقتي انها بتطالب انها تكون المجتمع كله مش نصف المجتمع بس !! المفروض الست ليها مجالها اللي ربنا خلقها علشانه .. وهوة دة النص اللي المفروض تشتغل عليه .. والراجل ليه مجاله اللي بيشتغل عليه .. وأي يخلط هيؤدي لنتائج عكسية .. واي مرأة برعت في مجال مش مجالها فدة شذوذ بيأكد القاعدة !!!
سلام ...
وليه لا
انا على اتم استعداد انى اشارك فى الخدمه العسكريه
بس يا حبيبتى لما تكون فى بلد تانى غير مصر او بمفهوم غير اللى فى مصر
يعنى هنا الواحد يدخل عنده بارقه امل انه يحب البلد ديه . يخرج من الجيش كاره يسمع اسم بلده او اسم الوطنيه
اذا كان هيثم شاكر غنالها ارمى حمولك عليا اتسجن سنه
وتامر بقه قالك متشكرين يا جيشنا قامو خدووووه بردو علشان يقولوله العفو ههههههههه
بصى ده مش مبرر لان الناس تتهرب من الجيش
بس دعوه لانه يبقى جيش بجد وينمى روح الوطنيه عند الشباب وقتها بقه
انا اول بنت اتمنى اشارك وانتمى لشئ يخدم بلدى
انونيماس :
انا مش معاك فى حاجة واحدة بس .. انك فرضت وجهة نظرك على جموع البشر
حددت ( من خلال اللى انت شايفه مضبوط ايا كان مصدره ) ادوار كل شخص و ده اعتقد امر بعيد تماما عن المنطق
crazyrama:
والله يا عيونى فى عايزين يعملوا كده فى مصر .. نديهم الفرصة بقى
انا مش مع الفكرة دى خالص مع احترامى للجميع لسبب بسيط لو لا قدر الله البلد دخلت حرب مع عدو اى كان وكان الجيش فيه بنات وستات محدش فكر ليه انهم ممكن يتعرضوا للاسر وممكن يحصل حاجات مش كويسة لهم خصوصا لو العدو ملهوش ملة ولا اخلاق واللى عايز يخدم البلد فى حاجات كتير ممكن نخدم بلدنا بيها غير الجيش مع ان فيه بنات بتدخل جيش بس تمريض عسكرى بعيد عن ارض المعركة واسفة للاطالة
و ايه المشكلة لو واحدة عندها استعداد لده؟
و مين اللى قال لك ان كل الستات قدرات واحدة؟
منين جيبت الثقة فى الحكم دى؟
بعدني هو احنا هانكون اول مين عملها؟؟ ده بلاد كتير جدا و فيها ستات برضه زينا و بيخشوا الجيش
بالمناسبة... شوفتي الموضوع ده قبل كده؟
:)))
http://www.youm7.com/News.asp?NewsID=21137&SecID=89&IssueID=32
http://www.daylife.com/photo/0c1zaOvbXu1zt
http://en.wikipedia.org/wiki/Carme_Chac%C3%B3n
http://www.spiegel.de/international/europe/0,1518,688785,00.html
على راي اللي قال... لن نخترع العجلة
:)
انا الحقيقه ضد الفكره جددددددددددددددا لان الستات فمصر بدأت بشكل غريب تفقد انوثتها جدا يعني مينفعش كل حاجه بتتفرض عالراجل يبقي لازم تتفرض عالست او الست تعملها امال ربنا خلقنا مختلفين ليه انا شايفه ان الستات اللي بتحب البلد بجد وعايزه يبقالها دور فعال ممكن نفعل الخدمه العامه اللي هيا المفروض مفروضه عالستات بس مبتتنفزش يعني يبقي في خدمه للمجتمع رعايه مرضي كبار السن تعليم توعيه ما دي خدمه للوطن مش لازم يعني بالشقلبظات والعيشه اللي فالصحرا دا غير ان عنصر الامان عمره ما حيتوفر لبنت فالجيش
Post a Comment