7 - البيوت اسرار

لولولولولولولولولولييييييييييييييييييييييييييييييييييييى

شفتوا يا عيال !! مش امونتكوا سجلت حلقة فى التليفزيون!!!!!!!!!!!!

اه و النعمة

من كام يوم سحر معدة برنامج البيوت اسرار فى قناة ال ايه آر تى عين سألت مروة رخا ( حبيبتشى) انها عايزة ضيوف لحلقة عن العنوسة و طبعا صاحبتكوا اكبر مفضوحة فى الموضوع ده ... هيهيهيهيهيهيهى

رحت النهارده و سجلت الحلقة و قابلت د\غادة عبد العال البلوجاوية الشهيرة صاحبة مدونة عايزة اتجوز
و قابلت دينا بنت السيناريست بشير الديك مدرس فى الجامعة الامريكية

والله كان يوم ظريف اوى .. جو الاستديو اصلا كان ظريف .. و المعدة اصلا دمها زى السكر و المناقشة كانت حلوة

كنا 3 بنات و ولد من الشباب و على الناحية التانية 3 استذة جامعة للطب النفسى و علم الاجتماع و الصحة الجنسية

مش عايزة احرقلكوا الحلقة ( على اساس انكوا هاتشوفوها طبعا!! ) بس يعنى حبيت اسجل اليوم هنا لأن انا سبب مرواحى اصلا هو المدونة دى

و بجد مش اكلاشيهات تليفزيون شكرا ليكوا لنكوا بتفاعلكوا معايا اديتونى ثقة استمر و الا كنت هتكبس كبسة المحشى و اسكت للمرة التلاتين الف فى عيشتى ( لاوننى مافتكرش انى كنت هاسكت بس كنت هاكلم نفسى) و شكرا لمروة انها اديتنى الفرصة دى.


و تفضلوا بقبول فائق الاحترام

مقدمه لسيادتكم \ عانس حقود

5 - و السلام

من اكتر الصور المشوهة و المسببة للمشكلة اللى كانت اثاث المدونة .. ثقافة " و السلام" .. كلنا بنعمل كل حاجة و السلام...
بنتعلم و السلام .. مش مهم اتعلمنا ايه
و بندخل جامعة و السلام .. مش مهم كلية ايه ولا هاتعلمنى ايه ولا هاتساعدنى ابقى اللى انا عايزاه ولا لأة
و بنشتغل السلام .. مش مهم الشغلانة دى هتضيف ايه
و ينتجوز و السلام .. مش مهم امتى ولا مين ولا ازاى

يعنى الجوازات السلق بيض دى جزء كبير من المشكلة الأكبر
المشكلة اننا فى الجيل ده -تحت تأثير كامل من غلطات فى التربية- فقدنا عنصر اساسى و مهم و ضرورى فى رأيى للانسان عشان يعيش و هو

PASSION

معلهش اعظروا الانجليزية بس مرادف الكلمة فى العربية على جماله لكن بعيد عن ودننا شوية و هو الشغف .. كسروا نفسنا الله يسامحهم و افقدونا ايماننا بنفسنا و قدراتنا
صحيح احنا فى الاول و آالاخر سمحنا بده بس برضه
خلاص .. بقى كل واحد غاية امله يعيش واحد من الوحايد زيه زى الستة و تمانين اللى قبليه و بعديه
كلنا بقينا كربونة من بعض .. مفيش طموح فى اى اتجاه

الغريب و العجيب و المرفوض فعلا الطموح العلمى المفقود ده ... يا نهار اسود!!! بقى اللى يفكر فى اى ارتقاء علمى سواء بدراسة اكتر او بعمل او بمجرد الحلم ببعثة برا مثلا, بقى بيتعامل معاملة الكائن الفضائى ...

" و ان شاء الله هتتجوز امتى؟؟ " و كل ده للولد, ما بالك بقى البنت

ليه كده؟؟

ليه ما نفسناش نبقى متميزين؟ فى اى حاجة؟

انا معاكم ان الانسان لو حط مقياس عالى اوى لكل جانب فى حياته مش هيعيش بش برضه ده مش معناه انه يعيش و يموت زيه زى كل اللى عاشوا و ماتوا!

ليه مفيش طموح؟؟ انا هتجنن من الحكاية دى!

اما الطموح يكون مفقود فى الشغل و الدراسة, و للولد قبل البنت يبقى طبيعى و منطقى جدا ان البنت تلاقيها شايفة نفسها كبيرها تتجوز و صعب انها تبص للموضوع بنظرة انتقائية.

هتتجوز فى السن اللى كل اللى حواليها بيتجوزوا فيه دون النظر لظروف شغلها و حياتها هى, و هتخلف اول عيل بعد 9 شهور من ليلة العلقة زى كل الستات ما بتعمل, و تربيهم حسب توجيهات ماماتها و مامته اللى رابطينهم بسلاسل و ده طبعا لأنهم فى أغلب الاحيان المنظومة دى بتخرج ناس فاقدة الشعور بذاتها و بالامكانيات اللى عندها.


لأ ... لازم نحس بنفسنا و نحلم لنفسنا .. و احلم حلم كبير ... احلمى تكونى كل اللى نفسك مانتيش قليلة ابدا 

4- اعادة تعريف الزوجة

زى اى مشكلة بنواجهها .. لازم نفتفتها حتة حتة عشان نفهمها

ايه اكتر مشكلة ممكن تكون الست بتواجهها فى مجتمعنا فيما يتعلق بموضوع الجواز؟؟؟ البق بتاع انها توفق بين البيت و الشغل .. طيب ليه فى مشكلة اصلا؟؟ لان التعريفات اصلا خربانة

تعريف الزوجة فى مصر و متطلبات المهنة :

1 - تصحى الصبح قبل كل البيت
2 - تعمل الفطار
3 - تلبس العيال و تتأكد من انهم اخدوا كل كتبهم و اكلهم فى شنطهم
4 - تأكل الشملول اللى ليسة صاحى و قالب بوزه
5 - تستنى الباص بتاع العيال او توديهم المدرسة
6 - تودى البيبى عند مامتها او الحضانة
7 - تروح الشغل ( متأخرة طبعا ) و كله طبعا يقول ادى شغل الستات .. لا يعتمد عليهم
8 - تشتغل ساعتين و تيجى الساعة 12 او 1 الظهر بالكتير و يركبها العفريت و تبقى عايزة تروح عشان تلحق تعمل الاكل و عشان لازم تروح قبل جوزها ( مش عارفة هو ليه الستات مش بيعملوا نسخ لمفتاح البيت للرجالة ما هو اكيد ده السبب فى انها لازم تيجى قبل جوزها )
9 - تعمل الاكل رهوان غالبا بهدوها
10- تأكل عيالها و جوزها
11- تغسل المواعين
12- تغسل الهدوم
13-تذاكر للعيال ( اصل الام هى اللى بتعرف تتعامل مع العيال)
14-تحضر الاكل عشان بكره تلحق تعمله بسرعة
15-تعمل للفلتة البشرية شاى عشان يتفرج على التليفزيون بمزاج
16-تعمل العشا
17-تشوف مشاكل العيال فى المدرسة و تتفاهم مع المدرسين
18-تحاسب البواب
19-تجيب السباك عشان الحنفية البايظة ( ان ما كانتش تصلحها بنفسها )
20-تتخانق على فاتورة الكهرباء اللى جاية غير القراية
21-تقدم للعيال فى المدارس و تتفق مع الباص و مع المدرسين
22-تباشر الست اللى بتنضف اللى اكيد جليباها فى يوم مخصوص واخداله اجازة عشان طبعا مش هاينضفوا و هو موجود
الاتهمات المتوقعة:
1 - مش واخدة بالها من شكلها
2- تخينة
3 - جسمها بايظ
4 - شعرها منكوش
5 - مش شايفة بيتها
6 - مش عارفة توفق بين بيتها و جوزها

الاكلشيهات المسموعة:

" لو مش عارفة يا هانم توفقى بين بيتك و ولادك بيقى اعدى فى البيت احسن" ... علما بان البيت لا يحتمل عدم وجود مرتبها فى اغلب الاحيان

" شايفة الستات فى الدنيا عاملة ازاى .. الست ملونة كده و محلوة عشان مهتمة بنفسها مش زيك"

" انا اخرتها هاتجوز عليكى "

" انت فاكرة نفسك بنى ادمة عشان اترقيتى فى الشغل .. ده تلاقى مفيش غيرك!!!!!!!"

" انت بتتكلمى كده مع مديرك فى الشغل ؟؟ ازاى تكلمينى كده يا مدام - ده على اساس طبعا انه هو مديرها فى البيت بروح امه-


ايه ده بقى ؟؟؟؟

الفكرة مش فى ان الرجالة عايزة كده ..ما هو طبيعى انهم يبقوا عايزين كده و اكتر .. المأساة فاللى بترضى بده .. اما الراجل يتمنظر انه عمره فى يوم ما نضف اودته ... اما النكته بتاعته تبقى ان مامته بتاخد الجينز بتاعه بالعافية عشان تغسله ( انا برضه موضوع مزج الرجولة بالعرق و القذارة بالنسبة موضوع مش فاهماه)

ليه بنرضى بكده؟ كل ده عشان مانبقاش عوانس؟؟؟
عمر ما هينفع نستنى التغيير يحصل من حوالينا من غير ما ندفع جزء من الاتمان .. عمر مالدنيا بتمشى كده .. و على فكرة .. اللى بيستنى التغيير يحصل من حواليه عمره ما هيعرف يستفيد منه لو حصل
لازم يحصل تغيير
و لازم كلنا نكون جزء منه

مش ممكن كل حاجة فى الدنيا تهون بس مابقاش عانس!!

لأة بقى ... انا عانس .... و عانس حقود كمان

3 - السفينة

اما بتغرق سفينة, الناس اللى فيها بينقسموا 3 انواع:

-النوع الاول بيغرق سواء كان حاول و فشل او ماحاولش اصلا.
-النوع التانى بيعوم لحد الشط و يعيش.

في لحظة الاكتئاب, بنفقد كل قدرة عندنا و بنصدق إننا هنغرق. و في لحظات ثانية الخوف من الفشل بيكون حافز قوى في الوصول سريعا إلى الشط.

و كلنا بنمر باللحظتين و بنبقي مرة من دول و مرة من دول.


-النوع الثالث بقى – الى هما العظماء في رأيي و اللى بيغيروا التاريخ – ده النوع اللى بيعرف يعوم بس بيشد واحد معاه من الغرقى!
كل واحد فينا بتمر عليه اوقات شدة الحياة بتعميه عن قدراته الحقيقية. و بنصدق اننا هنغرق و بالتالى عمرنا ما ممكن نفكر اننا فعلا نقدر نشد حد معانا.

بس الحقيقة إننا نقدر! دايما لازم نفتكر اننا نقدر و إننا ساعات لازم نقدر, و الأهم لازم نفضل على طول فاكرين ان اللى عندنا ده مش عندنا لتميزنا

يا ريت ما نضحكش على نفسنا, ده كله من عنده!! أنا مش بستشيخ ولا عايشه دور الداعية بس متأكدة انكوا زيى بتنسوها الحكاية دى.
أما تذاكر و تنجح .. بلاش رسم الدور أوى عشان سهل انك تسقط
أما تعوم و تطوف .. ماتصدقش نفسك أوى لأنك ممكن في لحظة تغرق

ماتستقواش على اللى اضعف لان كلنا لنا لحظات ضعف

كل واحد فينا كل فترة (يوم .. أسبوع .. سنة .. مش مهم ) لازم ...... لاااازم تشد واحد معاك.
الشدة ممكن تكون ابتسامة,مكالمة تليفون,طبطبة. الشدة ممكن تكون جنيه, ممكن تكون اى حاجة عندك, أو اى حاجة ناسى إنها عندك.
المهم .. انك ماتوصلش الشط لوحدك

لان هو ده الإنسان
و هي دى الحياة
و هي دى عظمة الإنسانية

2- الجيم

موانع شخصية و سلوكية و نفسية و دينية موجودة بيى و بين انى الروح الجيم ( من غير تعطيش الجيم) فى ايام الرجالة و الستات و بالتالى بروح الايام اللى فيها ستات بس. و ده طبعا لواحدة زى حالاتى نوع من انواع العقاب. حاجة تفوق الخيال ... اى مكان بتتجمع فيه الستات لوحدهم ده جنة لا نى باسمع فيه كلام من عينة:

"البطن الحلوة هى اللى تحت الوسط دى , الرجالة بيحبوها"
 "اصل المعدة لما تكبر عند الستات بيبقى الشكل عامل كرش كده وحش اوى"
"عارفة الجناب بتاعت يسرا كده؟ اهى بنتى عندها الجناب دى, بس يسرا طويلة. بنتى قصيرة. بس احسن,  الراجل مايحبش مراته تبقى اطول منه"
"انا هربط بطنى بس, مش بحب انا الرجلين تبقى رفيعة اوى. الست لازم يبقى بنطلونها مليان سنة كده. دى الرجالة بتتريأ على الرجلين الرفيعة موت!"
"والله حسب... اصلها امزجة, لعلمك فى رجالة بتحب الست الرفيعة جدا. طب ده انا واحدة صاحبتى مافيهاش حاجة خالص و جوزها مش متدايق بالعكس"
 "ايوة بس المنظر فى السواريه بيبقى وحش اوى البنت لازم يبقى فيها كده"
 "عارفة كله بيتحل بالكب"
"خطيبى مش بياكل السمك خالص." "لأ ة ما انتى لو عملتيه له بطريقة حلوة حياكله ( مانشالله ما عنه اكل , فى ايه؟؟ و لازم سمك يعنى؟ بتعلفيه فسفور من الخطوبة؟ جو التمثيل و التحوير ده اففففف) امال انا اعمل ايه .. ده انا خطيبى اكله قليل اوى

تيـــــــــــــــــــــــــــــــــــــت!

ايه ده؟! حرام عليكم. يا ناس اتقوا الله فىّ.

طيب فى نقطة مهمة: هل انا باسفه الاهتمام بالشكل؟ اكيد لأ. انا نفسى هناك عشان مش حابة شكلى يبقى مش عاجبنى. هل انا ضد ان الانسان يحب ان الناس تشوفه حلو؟ طبعا لأ, لانها غريزة جوانا كلنا. اى انسان بينبسط اما بيسمع تعبير استحسان من انسان آخر سواء فى الشكل او العقل او الشغل او اى حاجة بقى. انا نفسى انبسطت اوى بالتعليقات هنا ان المدونة عجبتكوا.

 طب ما الحياة بيس اهى ... ايه بقى؟

اقول لكم ... انا اللى بيطلّع كل زرابينى, ان الست عايشة عشان تاخد شهادة الايزو من الرجالة.  الحلاوة هى اللى الراجل يقول عليها حلو و الوحاشة هى اللى يقول عليها وحش. و المأساة بتبقى اما الكلام يبعد عن الشكل. البنت بتبقى ذكية اما الراجل يقول عليها ذكية, و مثقفة اما يقول كده.

لحد هنا مش غريب. الغريب ان حتى النجاح فى العمل مرهون بتصديق الراجل عليه. و لاننا عارفين ان رجالة كتير للأسف مش هيقبل ان الست تكون احسن منه. و ده يؤدى الى ان الست – ايا كانت قناعاتها – بتحط لنفسها سقف ماتعديهوش بينها و بين نفسها, و الا لو عديته حتجازف بالخطر الاكبر و هو بعد الرجالة عنها. و ده اصلا من الافيهات اللى اتهريت فى الدراما العالمية و المصرية بتاعت الست اللى لما بتنجح بتدفع تمن ده من انصراف الرجالة عنها. و بالتالى تعيش بقى الست فاهمة "آخرها" كوي ساوى. فهى لو ذكية, اكيد مش اذكى منه. و لو شاطرة مستحيل اشطر منه. و ده بقى يقوم مودينا للكارثة الكونية اللى انا مقهورة بسببها و باكتب البوست ده اصلا و هو مرض مزمن يعانى منه بناتنا:

UNDER-ESTIMATION

اللى بيعانى منه بنات كتير. و اللى واحد من اكبر الامثلة عليه زميلاتى فى كلية الطب اللى كانوا دايما بيقولوا "انا لو عييت مستحيل اروح لدكتورة ست!!" اصل برضه الراجل اذكى كده. لأ لأ احنا ماننفعش نبقى دكاترة*

هى هنا طبعا بتقول كده حتى تعلن لعالم الرجال غبائها و تعاهدهم على الغباء و الطاعة عشان تكون "ست" فى نظرهم, لانها طبعا مش حتكون ست الا لما تسمعها منهم!

الى هذه الدرجة و اكتر البنت بتتربى على انعدام الثقة و الامان و الاحساس بذاتها فى حالة عدم وجود الراجل فى حياتها. لدرجة انه مهما كان ثمن ده من احساس بالدونية و اذلال او حتى اخفاء لمزاياها و نجاحاتها حتى على نفسها. عندها كل ده يهون بس ما تبقاش عايشة من غير راجل!!!

*

هى داخلة طب مش عشان تكون دكتورة .. عشان تكون فى سوق العرايس دكتورة و معظم دول طبعا بياخدوا تخصصات التحاليل و الاشعة عشان مش بيشتغلوا دكاترة فعلا "حسب فهمهم هم للتخصص"

1 - تعريف

تعريف

لازم الأول نعرف إحنا بنتكلم عن إيه ... يعنى إيه عانس و إيه هو الحقد

" العنوسة"

هو تعبير عام يشمل الذكور والإناث على حد سواء للتعبير عن حالة بلوغ شخص ما سن فوق معدل سن الزواج دون زواجه/ها.فهذا الشخص أكبر من إن يتزوج ولكنه يستعمل أكثر مع النساء

العنوسة في مصر

تنتشر العنوسة في مصر بدرجة كبيرة , فبحسب الإحصاءات الرسمية يوجد في مصر  9 ملايين شاب وفتاة فوق الـ35 عاماً لم يتزوجوا، منهم 5.5 مليون شاب و3.5 مليون فتاة فوق سن الـ 30.

 ومعدل العنوسة في مصر يمثل 17% من الفتيات اللاتي في عمر الزواج، ولكن هذه النسبة في تزايد مستمر وتختلف من محافظة لأخرى، فالمحافظات الحدودية النسبة فيها 30% لأن هذه المحافظات تحكمها عادات وتقاليد, أما مجتمع الحضر فالنسبة فيه 38% والوجه البحري 27.8%، كما أن نسبة العنوسة في الوجه القبلي هي الأقل حيث تصل إلى 25% ولكن المعدل يتزايد ويرتفع في الحضر. وأسباب انتشار العنوسة في مصر هو ارتفاع معدلات البطالة في وغلاء المهور والإسكان وارتفاع معدل التعليم بالنسبة للإناث! (1)

سيبكوا كم كل اللي فات و خلينا في نقطتين ..." مرور سن الزواج و ارتفاع معدل التعليم للإناث "

 -  السن ممكن تكون مفهومة أو على الأقل متوقعة .. الصعايدة و الفلاحين و الأرياف يعتبروا اللي عندها 17 سنة عروسة و اللي عندها 23 عانس ... في القاهرة الأمور بتمشى عند 23 و تقلق عند 25 و تسرع عند 27 و تيأس عند ال 30

 - الأسباب؟ الأسباب الظاهرة هي إن عمر الست كأنثى و كأم قصير ... بالبلدي يعنى سن اليأس .

 لأنها بعد هذا السن لا تصلح لأن تكون زوجة و بالتالي لو كانت غير متزوجة يبقى مش هتتجوز و لو اتجوزت يبقى كتر ألف خير جوزها انه مش متجوز عليها,  وطبعا لا تصلح كأم و أكيد لا تصلح للقب امرأة.

لكن السبب الحقيقى هو إن المجتمع لازال ينظر للست كمكافأة في حياة الرجل .. الولد بيتربى على انه يذاكر عشان يخش كلية محترمة" عشان يوم مانروح نخطب لك مانبقاش مكسوفين" , و بيشتغل عشان يحوش حق الشبكة و المهر و فستان الفرح عشان اما يجمعهم ربنا يكافئه بحصوله على المرأة.... و يا ربت ده من باب مثلا تقدير بقيمتيها أو جادة .. إطلاقا

العانس في مجتمعنا هي  اللي في بالانجليزية
single
من الأخر كده! كل و أي واحدة مش متجوزة ممكن تكون عانس داخل مجتمعها ... مش مهم بقى عندها كم سنة لأنها حاجة بتخضع لظروف المجتمع نفسه.

العانس و أصدقائها
.العانس هي أخر من يعلم بأخبار الجواز و الخطوبة و الصحوبية و الفركشة
.العانس هي سبب كل الحوادث الغير متوقعة لان عينيها وحشة
.العانس هي مصدر الأر و الفقر و النبر و الحسد و كل المشاعر السلبية
العانس هي الفاضية اللي تضبط مواعيدها على مواعيد المدامات لأنها بحكم إن حياتها بدون رجل فهي حياة فاضية و بالتالي هي مفروض تكون متواجدة و متوفرة في اى وقت و إلا تتهم بالنذالة .
العانس هي سبب الفسخ و الطلاق و سقط الأجنة و النزيف و الخناقات الزوجية .
 العانس بتتحول في حياة صاحباتها إلى كارت معايدة ... تحضر حفلات الأفراح و الخطوبة و السبوع و العقيقية وزيارات المستشفيات و المآتم ... تبارك و تهني و تزغرد و تبكى و تمشى ... مجرد ديكور لزوم سد خانة الأصدقاء عشان الوجاهة الاجتماعية تكمل

 العانس في العمل
 - العانس في العمل هي محط الأنظار فهي لو أتكلمت مع المتجوز يبقى خرابة بيوت و لو كلمت العازب يبقى بترسم عليه.  و الخاطب يبقى بتحط نفسها في الشبهة .  و الأصغر منها يبقى خلاص يأست .
 - العانس لو عملت حاجة كويسة المقابل بيكون الدعاء بالعدل , و كأنها في الأصل مايلة و هو بقى اللي هايعدلها !
 - العانس لو جت يوم متشيكة يبقى مأفورة و أعراض المينوبوز (2) ظهرت عليها بدري و لو راحت الشغل عادى يبقى" شوفوا والنبي المنظر .. طب ازاى حد ممكن ينطس في نظره و يبص لها" .
العانس و الأفراح
 - العانس في الفرح متهمة في كل الأحوال ... الملابس الملونة بهرجة واحدة ميتة على الجواز و الألوان الهادية معناها أنها متنكدة
 - العانس اللي بترقص رخيصة و صايعة و مش ليدى و لو قعدت في الكرسي يبقى قعدت زى الكبة مش طايقة نفسها.
 - العانس لو قبلت عزومة فرح يبقى عشان تشوف عرسان و لو رفضت يبقى أكيد يا عيني بتتعب اما بتروح فرح .
 - و في كل الأحوال العانس طبعا غيرانة

1)موقع الويكيبيديا ارقام وقت ظهور البوست 14 يناير عام 2008

  (2) المينوبوز هى المرحلة الخاصة بانقطاع الطمث عند الستات و اللى مرتبطة بتغيرات هرمونية و سلوكية و نفسية - عند بعض  الستات – عجيبة. بتلاقى منظر البونيه بالوردة من الجنب مع ثلاث طبقات بودرة و سبع الوان فو عينيها و ملابس ولا الدنيا ربيع