Tuesday, September 8, 2009

حبة اخبار حلوة .. الكتاب الالكترونى وتضامن الكتاب للاحتجاج على دور النشر

الاول كده .. كل سنة و انتوا طيبين بمناسبة رمضان الكريم .. ربنا يعوده علينا دايما بالخير و البركة.

ثانيا .. اليوميات هتاخد شكل جديد ... هاتبقى كتاب .. اه والله .. و مش اى كتاب , كتاب الكترونى. ايون!

كتاب " يوميات عانس حقود " النسخة الاكترونية ... ببلاش!!!

ثالثا .. انا باتضامن مع مروة رخا وباقى الكتاب عن تجربة شخصية:

الفترة اللى فاتت كان فى تحضير كتير للكتاب و بعد محاولات مع دور النشر اكتشفت ان فى دور نشر كتير بيبيعوا و يشتروا فى الكتاب .. اللى بيبقى عايز فلوس , و اللى بيمضى الكتاب على عقود سنين و سنين و احتكارات لكل اشكال الكتاب فى بنود زى مانكون بنمضى اتفاقية كامب ديفيد , و اللى بياخدوا حق طبع و توزيع الكتاب و مانلاقيش منه نسخة على رف و فى نفس الوقت بيمنعوا الكاتب من انه حتى يوصل بأى شكل .. طب و على ايه؟ الاصل فى الموضوع انى نفسى صوتى يوصل لكل انسان .. و انى حابة افكر مع الناس بصوت عالى.

مفيش توصيل اسرع من الاتنرنت
و مفيش صوت اعلى من الصوت الاكترونى ( بعد صوت الاهلى طبعا!)

الكتاب اهه .. هايبقى فى ملف الكترونى .. و على الانترنت .. لأى حد عايزه .. و من غير فلوس خالص!

و ده مش انا و بس .. و انا مش اول واحدة .
- مروة رخا فى البوست ده عملت نفس الكلام مع كتابها.
- محمد سامى البوهى فى الجروب ده على الفيس بوك حاكى كل حاجة حصلتله.

و ليسة!!!

انا بس ليسة باجهز فيه و ان شاء الله قريبا هايكون موجود على الانترنت

ه

تحديث الاحد 06/09/2009
فى كذا فكرة مطروحين دلوقتى للنشر الالكترونى
اللى عنده اى افكار يقولها .. مواقع , اعلانات , تصميمات
انا بشكل شخصى مرحبة بكل و اى فكرة مع الحفاظ على حقوق اصحابها الادبية و المادية

تحديث الاتنين 07/09/2009
محمد سامى البوهى يكمل حدوته هنا

25 comments:

Knee said...

Rabena ywaffa2ek insha'allah ya Emz :)
this sounds great wallahi, I really hope it will work out for you b2ezn allah.
Wishing you all the best.

Eman Hashim said...

متشكرة اوى
ربنا يسهل للجميع يا رب
و يا ريت الفكرة تنتشر بقى و الكل يعرف

nachoua said...

الف مبروك يا ايمز
براوه وعفارم عليك يا بنت
والله حاجة ظريفة جدا وحتديله انتشار اكبر

بالتوفيق يا رب

Eman Hashim said...

متشكرة جدا يا نشوى على نساندتك
على رأى مروة رخا "بلا تحمات فارغة" .. هو الواحد يكون بيدعو فى كل كتاباته للحرية و حرية التعبير عشان ييجى يشوف الويل و سواد الليل عشان ينشر كلامه ده؟ ليه يعنى

TAFATEFO said...

في طريقة تانية مجانية أشيك من المطبوع وليها عائد ممكن يكون أكثر من المطبوع .. كنت اقترحتها على أشرف بك حمدي

قراءة الكتاب على صفحات مصممة بشكل يضيف للمحتوى وتكون الصفحات دي فيها إعلانات

أعتقد ان ده يدي انتشار للكتاب أكتر من الطباعة .. ويكون الشكل أفضل من الطباعة . والعائد أكبر من الطباعة

أعتقد ان الفكرة بمجهود بسيط ممكن تتبلور .. وبمجهود مش كبير ممكن تتنفذ

كان لحضرتك لقاء مع رولا خرسا ممتع جداً .. وكان عندي وحاولت أبعتهولك بس مش فاكر ايه اللي حصل .. هشوفه تاني وأبعته لسيادتك

رمضان كريم

Eman Hashim said...

اولا يا ريت تبعتهولى فعلا يا تافاتيفو
انا فعلا محتاجاه اوى

ثانيا يا ريت فعلا لو عندك افكار لتنفيذ حاجة زى كده تقوللى عليها

لو انت يتشتغل فى مجال تصميم المواقع او اى مجال مشابه ممكن نتعاون سوا

انا احب اسمع مل الاراء

و ماعنديش اى مشكلة لو حد عنده فكرة و حابب ينفذها مع الحفاظ على حقوقه الادبية و المادية

Asser Mattar said...

مبروك يا لوزة

Eman Hashim said...

ميرسى يا لوزة
:)

Ahmed Ali Eid said...

مبروك , إن شاء الله أتضامن معاكو بس أخلص الكتاب

Eman Hashim said...

طب يالله شد حيلك يا احمد

أومي مة said...

فعلا هو الاصل اننا نشارك الناس آراءنا وافكارنا
والخطوة دي هاتفلت نظر الاعلام ليكوا

وافكاركوا ممكن قوي تنتشر اكتر من الكتب المطبوعة
مبروك مقدما على الكتاب

انسانة طموحة said...

بجد خطوة جميلة جدا وربنا يوفقك

وبانتظار الكتاب


دمتى بحفظ الرحمن

mostaa said...

كده احسن بكتييييير
خطوة جميلة وجريئة
تحياتى

TAFATEFO said...

أولاً أنا بتاع سنان .. ومفهمش أوي في الحاجات دي .. لكن ممكن أجرب معاكي

الفكره محتاجه مصمم جرافيكس ومواقع

الفكرة ان الطباعة نص على خلفية بيضاء .. شكل الصفحة مبيعبرش ومبيضيفش لمضمون النص

الويب يسمح بتصميم صفحات تضيف لمضمون النص وإضافة أشكال صور رسوم وسط النص تضيف له وإضافة موسيقى مثلاً صوت أو غيره

كمان .. الصفحة دي ممكن تحتوي على إعلانات تفيد صاحب المحتوى مادياً (أعتقد أكتر بكتير من الطباعة في مصر) وهيبقى الكتاب مجاني مش هيكلف القارئ حاجه .. والكاتب مش يهخاف على سرقة حقوقه عن طريق توزيع نسخة الكترونية مسروقة من الكتاب

كتاب مروة رخا النسخة الإنجليزية مثالي جداً جداً لتنفيذ الفكرة .. وهي مش مكلفة فتجربتها مش هتخسر على ما أعتقد

لو تحبي نجرب مع بعض حاجه زي كده ولو على مقال واحد من مقالات كتابك .. أنا مستعد

الفيديو بدور عليه هبعتهولك ان شاء الله إذا لقيته

TAFATEFO said...

ايميلي tafatefo007@hotmail.com
تليفوني 0122922212

magi said...

اول حاجه
كل سنه وانتى طيبه مش فاكره قلتهالك ولا لا قبل كده
بالنسبه للعسوله مروه رخا انا قريت النوت بتاعها على الفيس بوك وهى جدعه اوى انها عملت الحركه دى ومسابتش دور النشر تستغلها وتبيع وتشترى فيها
اساسا كده كده الكتب مبتجبش دخل كبير للكاتب لان والحمد لله القراءه فى مصر زى م انتى عارفه مزدهره مزدهره
والمهم لاى حد بيكتب انه يوصل صوته وافكراه للناس
ربنا يوفقك يا ايمان ومبروك على الكتاب وفى انتظار صدوره وانا عايزه نسخه الكترونيه موقعه مليش دعوه
هههههههههههههههههههه

Eman Hashim said...

شكرا يا اميمة
الاعلام ممكن جدا فعلا يبص للموضوع
و الاهم دور النشر اللى فاكرين ان الكتاب و خصوصا الشباب و بالتحديد المدونين دى ناس هايموتوا و ينشروا و عندهم استعداد يقبلوا اى ظروف بس ينشروا
لا شكرا
الحكاية مش كده خالص

Eman Hashim said...

طموحة ... ازيك
ليكى وحشة والله
متشكرة جدا على كلامك

شكرا يا
mostaa
التشجيع ده ماعندكوش فكرة عامللى ايه

حكاية التوقيع دى اكيد ان شاء الله هايكونلها حل يا ماجى
ههههههههههههههههه
كذا حد كلمنى فى الموضوع ده
هانشوفلها حل
ممكن ابقى اسكانهولك
هههههههههههههههههههه

Eman Hashim said...

و انا الايميل بتاعى
emanhashim@hotmail.com
و هابعتلك التليفون

مش مهم اسنان .. مانا دكتورة عيون
فرقت يعنى؟ هههههههههه
المهم لو فى افكار كويسة تستغل و تتنفذ
انا عارفة ان احنا نقدر نتكاتف و نعمل حاجة تفيدنا ان شاء الله

77Math. said...

مبروك مقدّمًا وبانتظار الكتاب
:)

Eman Hashim said...

متشكرة يا رفيقة الدرب
:)

هوندا said...

فكرة جامدة ياإيمان

انا فى لينكات بعتها من شوية لنفس الفكرة دى

عن كتاب انشر كتابك بنفسك
ممكن تشوفيه

Anonymous said...

هاي يا ايمان ازيك الف مبروك علي الكتاب وبجد بجد
ربنا يوفقك يا دكتورتنا وانا عايزه نسخه والنبي اما ربنا ييسر الامور فيه ان شاء الله
Maha Elkhatib

Miso soup said...

مبروك ..... يا ريت ان الكتاب يبقي حجمه صغير (او علي الاقل نسخة منه) و يكون تصميمه بسيط بحيث انه ممكن يتحمل بسهولة و يتقري علي الموبايل .. افتكر ده ممكن يديله انتشار اكبر لان فيه اوقات انتظار كتيرة ضايعة زي في المواصلات مثلا ... تحياتي

Eman Hashim said...

Miso soup

عندك حق جدا
نقطة مهمة فعلا
متشكرة اوى