Tuesday, September 15, 2009

النشر الالكترونى هو ابغض الحلال

من ساعة ما قررت انى انشر الكتاب بتاعى بنسخة الكترونية و انا بتجيلى مكالمات زى اللى ناوية تتطلق و الناس بتعقلها.

---: انتى واعية للنتى هاتعمليه ده يا ايمان؟
انا: اه , فى ايه؟
---: يا بنتى لازم تطبعيه ورق
انا: مانا نفسى , بس الشروط غريبة اوى
---: معلهش بس اسمك نشرتيه!!!
انا: ايوة مانا هادفع فلوس و كتابى هايعد جنبى
---: بس هايبقى مطبوع
انا:
ده اخره هايبقى فى مكتبتين .. و انا اللى هادلل عليه فى المكتبات و الصحافة و التليفزيون . لان اغلبهم ليسة بيبتدوا و علاقاتهم ليسة مش قوية

---: يا ستى ما كلنا بنعمل كده
انا: ده انتى نفسك كتابك مش بيتوزع
---: بس اسمى طبعت!!!



--: ايمان انا عايزك تفكرى تانى
انا: مانا فكرت و بعدين انا فعلا مرتاحة كده
--: مش مهم الراحة
انا: نعم؟
--: يا ايمان افهمى .. ما كل الناس بتكتب على النت .. انت على النت ( مدونة) لكن لقب ( كاتبة) لازمله كتاب مطبوع
انا: مش بالمسميات دى .. و بعدين انا فعلا مدونة
--: بس لقب كاتبة حتى لو محدش شاف كتابك برضه احسن من الوضع ده!!!
انا: مانا والله نفسى -مش فى اللقب , فى الطبع- بس هاعمل ايه ؟ الاوضاع مش نافعة
--: طب ما فى دور بتوزع كويس و هاتعملك كل التسويق اللى تحلمى بيه و مش هاياكلوا عليكى جنيه كمان و الكل عارف كده
انا: بس بيتدخلوا فى كل كبيرة و صغيرة
--: حقهم .. ما هم برضه اللى بيصرفوا!!!
انا: و الاحتكار؟
--: امان يا ستى .. على الاقل ضامنة وضعك لفترة معقولة!!!
انا: بس انا لو اقدر امضى على عقد احتكار سبع سنين كنت اتجوزت من زمان اصلا!!!



**: بصى يا ايمان .. انا بكلمك رغم ان اتقاللى انك راكبة دماغك عشان انا بحبك
انا: برضه هاتطلق يا ** , ييييييى قصدى برضه هانزله على النت
**: ايمان لازم تفهمى حاجة . كلنا عارفين اللى بتقوليه كويس و كلنا برضع متبهدلين . مانتى عارفة (...) اللى كتابه عنده تحت السرير
انا: طب امال ايه بقى؟
**: اهه ... معرض الكتاب قرب . على كم حفلة توقيع . و انتى عارفالك كم معد ممكن تخليهم يطلعوكى فى التليفزيون و كده
انا: طب و اما الناس تشوفنى و تسأل عليه فى المكتبات و تروح معرض الكتاب و ماتلاقيهوش عشان الكتاب مش فى المكتبات الكبيرة اللى الناس بتروحها ؟
**: انتى و شطارتك بقى . زقيه كم زقه كده
انا: طب مادام انا هازق . مازق على النت .. ولا الحوجة لحد بقى
**: لا برضه .. لازم تطبعى الكتاب .. و لازم يبقى دار نشر ( ضل دار نشر ولا ضل حيطة)



+++: اصل انتى هانم و مش مستنية فلوس من الكتابة
انا: طبعا طبعا .. زيى زى كل خريجين طب , مستنية اول الشهر عشان اغير اليخت بتاعى لواحد جديد يليق على لون ملاية السرير
+++: اصل انا ككاتب ليسة جديد نفسى فى فرصة و صوت هابقى بانتحر لو عملت كده
انا: انت اخر مرة اشتريت سى دى فيلم ولا اغنية كان امتى؟
+++: انا عمرى ما اشتريت سى دى . عايزة توصلى لايه
انا: ان كل حاجة بتوصل عن طريق النت لكل الناس و انت عارف ده
+++: ايوة . بانزل لناس معروفين اصلا . انتى مدونتك اتعرفت شوية. لكن لو انا واحد مش معروف هاعمل ايه؟
انا: تقوللى و انا هابقى احطهولك على مدونتى (المعروفة ) دى
+++: طب و هاكسب ازاى؟ لو انتى مش مستنية فلوس انا ماقدرش على ده
انا: و انت اما تدفع الافات لكتاب اخره مكتبتين و تبقى نسبتك 10 فى المية . يعنى لازم تستنى اما الكتاب يعمل الف جنيه عشان انت تمسك مية جنيه فى ايديك . و حط فى حسابك ان سعر الكتاب العربى مش غالى ... بتسمى ده مكسب؟


انا عمرى ما كنت ضد انى انشر كتابى . بالعكس . كان نفسى فعلا.
بس الحكاية مش القاب و اشكال اجتماعية زى كل حاجة فى حياتنا كده.
اى كتاب بأى غلاف فى اى طروف بأى امكانيات. اهه يبقى اسمى طبعت .. زى كده اللى يقوللى اتجوزى و اتطلقى اهه يبقى اسمى اتجوزت.

النشر مفروض مرحلة متقدمة للكاتب عشان يحصل على فرصة اكبر لصوت اعلى و للوصول للجمهور.
مش غاية الامل يعنى عشان اقبل حد يساومنى و يبيع و يشترى فيا عشان يبقى (اسمى) نشرت و خلاص

ابقى بناقض نفسى و كلامى لقرب سنتين على المدونة دى لو كنت عملت كده. اكتب و اقول شغف و اخلاص و يا اما حاجة عدلة يا بلاش و اعنس احسن ماتجوز جوازة بايظة و لقب عانس احسن من التعاسة و خيبة الامل و فى الاخر انا اعمل كده و اقبل الظروف دى عشان يبقى (اسمى) طبعت كتاب!

و الكلام اللى باقوله لكل البنات على المدونة هاقوله لكل الكتاب:
التغيير مش بيحصل من حوالينا ... التغيير بيحصل لما يبقى فى ناس مؤمنين بيه و مستعدين عشان يعملوه يدفعوا اى تمن ... و اللى بيستنى التغيير يحصل من حواليه عمره ما بيحس بيه ... حتى اما بيحصل ... و اللى مش عاجبه حاجة و عايزها تتغير يبدأ بنفسه و بالفعل مش بالجعير الفاضى !!

و اى مدون او كاتب و صاحب كلمة بيكتب عن الاستقلال او الحرية او رفض القمع و التحكم . و بيقبل اوضاع غلط لمجرد انه يبقى اسمه طبع و خلاص انا باقوله انت بتناقض نفسك
اى مدون او كاتب او صاحب كلمة او رأى شايف نفسه انسان حر و محدش له عنده حاجة و صباعه مش تحت ضرس حد و مؤمن بالحرية و بييجى على نفسه و يقبل اوضاع مش مرتاح لها عشان بس يطبع كتاب انا باقوله اتكلم مع نفسك شوية . عشان شكلك مش عارف نفسك اوى

فكروا يا جماعة ... فكروا!
ه

6 comments:

77Math. said...

معك حق تمامًا.. وعلى فكرة ممكن تنشريه الكترونيًا، ولو حصل بعد كدا الظروف اتغيرت تتطبعيه برضه..

يعني في ناس بيعجبها الكتاب وتكون قرأته كله، بس تحب تحتفظ بنسخته الورقية..

بس بنظام الكفالة\العبيد اللي بتقولي عليه دا.. الله الغني.. انتِ لو دفعتِ لشركة تعمل لك موقع عليه الكتاب واخترتِ التصميم براحتك وعملت اللي قال عليه طفاطيفو قبل كدا حتكسبي برضه..

ربنا يوفقك ويكثر من اللي زيك :)

Muhamad Farouk said...

السلام عليكم
ازيك يا ايمان
اولا انتى و مروة رخا صح
خليكى على رأيك
هوه اكيد الدنيا معكوسة اليمين دول و عشان تتعدل زى ما بنحلم لازم كلنا نقول لأ وألف لأ
للإستغلال و الآحتكار و الكوسة بجميع أشكالهم و مع مختلف مواقع كل واحد منا فى عمله و مجاله
لازم كلنا نصحى و نفوق
و اللى يقؤلك عشان المكسب المادى و هيعيش منين
دى ممكن نعمل ليها حل و لو رمزى مش بالصورة المطلوبة للكتاب المطبوع
و كمان مش كل واحد عنده موهبة الكتابة هيبقى فاروق جويدة او عبد الوهاب مطاوع من اول كتاب .. بالعكس النت فرصة كويسة جدا ان الكاتب يعمل شعبية و ينتشر خاصة بين الشباب اللى المفروض هما الأمل و هيغيروا البلد للأحسن فى المستقبل
بشرط يعرفوا ازاى الطريق للتغير ده
صوح ولا لع يا ايمان

Alien Purlo said...

Perfectly said.

Kontiki said...

ايمان ازيك كل سنة وانت طيبة عشان حاجات كتير عيد ميلادك و رمضان و العيد وكدة
المدونات بقت موضوع كبير الاول تنفيس من صاحبها على الفضاء الالكترونى بعدين تلفزيونات وتوك شو وبعدين كتب ما هو مش معقولة دور النشر متستفدش من البيزنس و تاكل حتة من التورتة ، المدونات مساحة حرة للشخص مع نفسة عشان يقول كلمتة بيفرحة اوى لما يلاقى مشاركة من غيرة وتشجيع وبعدين دخل التليفزيون اللعبة كل واحد عاوز يملا مساحة فى برنامجة ويستغل نجاح المدون يقوم يجيبة فى حلقة مع انى شايفة ان نجاح المدون هو على الانترنت لاننا شعب غير قارىء بالدرجة الاولى وطبيعى وحوش الانترنت اللى زى حالتنا عاوزين الكتاب او الاغنية او الفيلم متاح مجانى ( مش ناقصين تكاليف يعنى ) كمان فى قضية ان ( ليس كل مدون كاتب ) يعنى مسئوليتك لما تنشرى كتاب علية اسمك و يتم نقدة ادبيا نظرا لان "حرفية الكتابة ممكن تخونك او تخون اى مدون يسعى انه ينشر رأية فى كتاب مطبوع بالتالى انتى كدة بتظلمى نفسك انت مدونة اخترتى الحرية بكل معناها حرية الكتابة على الفضاء الالكترونى بدون رقابة او حجر على رأيك او تدخل استمرى حرة الاهم ان رأيك يتقرأ الاهم ان كلمتك تتعرف ممكن تأثر فى انسان ولو بعد سنين بس مش مهم ابدا كلمتك تتطبع و تحتكر وتبقى سلعه للبيع .. الحرية ارقى من انها تتباع او تتمن .

فركشاوي ..ناوي said...

بسم الله الرحمن الرحيم
السلام عليكم ورحمه الله وبركاته
عيد سعيد*
وكل عام وانتم بخير .

Anonymous said...

انشر كتابك بنفسك حل مثالي لمثل حالتك جربي الاطلاع عليه من موقع شبايك

http://www.shabayek.com/blog/2008/10/18/%D9%83%D8%AA%D8%A7%D8%A8%D9%8A-%D8%A7%D9%84%D8%B1%D8%A7%D8%A8%D8%B9-%D8%A7%D9%86%D8%B4%D8%B1-%D9%83%D8%AA%D8%A7%D8%A8%D9%83-%D8%A8%D9%86%D9%81%D8%B3%D9%83/

انشري مجانا وتكاليف الشحن فقط عليك كتاب جميل ويستحق القراءة

دمت بود