Sunday, July 26, 2009

51 - المحترم

الكلمة الصغنونة دى اللى ليها كذا معنى هى اللى عمالة بافكر فيها بقالى كم يوم. أكيد اى واحدة فينا نفسها لنفسها فى راجل محترم. و أكيد برضه اى واحد يحب يتبصله على انه راجل محترم
يعنى ايه محترم؟

عنده عضلات و عريض المنكبين؟ لأة

معاه فلوس و كريم مش بخيل؟ لأة

دمه خفيف من غير قلة ادب؟ برضه لأة


المحترم هو "الراجل" ... و زى ماقلتها زمان " الراجل هو اللى ماخافش ابقى ست و انا معاه". يعنى المحترم هو اللى الواحدة تبقى مطمنة و هى جنبه. مش مطمنة من الدنيا ولا المشاكل ولا الغيب..لأ .. مطمنة منه!
المحترم عمره ما يستقوى على ست لا بقوة عضلاته .. و لا بماله .. و لا جاهه .. و نفوذه .. ولا حتى بحبه.
الراجل المحترم عمره ما يجبر ست على حاجة هى مش عايزاها .. اى حاجة .. و فى اى وقت .. حتى و هى مراته .. حلاله .. فى بيته. المحترم عمره ما يجبرها , و لا يلومها , و لا يضغط عليها , و لا يزن عليها!! ايوة يزن عليها .. مش قلنا قبل كده ان الرجالة طلعوا زنانين .. و ان زن الرجالة امر الف مرة من زن الستات. زن الرجال بيبقى استنزاف مشاعر و ابتزاز عاطفى و استغلال لمشاعر انسان تانى.
الراجل المحنرم ما ينبسطش بحاجة متاخدة بالعافية .. ولا متاخدة بالزن .. او الاجبار.


الراجل المحترم ما يستغلش موقف ضعف اللى قدامه للحصول على انتصار وهمى لحظى .. فين الرجولة فى كده؟ ده كده ولا محترفات البغاء .. على الاقل المحنرفة مفهومة و واضحة .. هى بتستغل اللى عندها و رغبة الرجالة فيها و بتاخد فلوس على كده .. انما اللى يستغل مشاعر بنى آدم للحصول على اى نوع من انواع المتعة ده اكيد مش محترم.
عارفين نسبة حالات الاغتصاب بين الازواج واصلة لأيه؟ زى مايكون شرط ثبوت رجولته فى انه ياخد منها اللى هو عايزه بالعافية و الاجبار .. و ان الراجل مايستناش موافقة او ترحيب اللى معاه او لأ .. خيبة تقيلة و مصيبة
المصيبة ان حتى احنا يا ستات مش عارفين حقنا فى اننا نكون موافقين على كل حاجة بنعملها. و فى اننا من حقنا نقول لأة فى اى وقت .. و من حقنا راجل يتفهم ده .. و يتعامل معاه.

الراجل المحترم عمره مايكون مدعى لمبادىء بينساها اول ما يحس انه متنيل على عينه .. ساعتها و فى الوقت ده بينكشف اصل الراجل .. و بيتعرف بقى اذا كائن سعران ولا راجل محترم.

كل ما بافكر كده باحتار .. هم راحوا فين؟ و ايه اللى وصل كتير من رجالتنا لكده؟ و ما تقولوليش الحرمان. عشان لو هو ده بس السبب كان كل واحد عرف يتصرف بطريقته .. الفكرة فى رغبة غريبة فى الحصول على المرفوض.
بعدين جيت افكر فى المقلب اللى احنا كستات بناخده فى الرجالة .. اصل الحكاية دى مش هاتعرفى تختبريها الا لو كان حظك عثر جدا فى موقف استدعى الاختبار. و ساعة خيبة الامل فى البنى آدم اللى قدامك بتبقى مالهاش وصف.
مهما الواحد حاول يكون حريص .. هايعرف منين؟ دول بيبقوا قال الله و قال الرسول و فى لحظة معينة بينسوا الله و بينسوا الرسول ( استغفر الله العظيم ) .. انا مش معقدة بس انا النهاردة مش عارفة .. ازاى اما واحدة تيجى تحكيلى عن خطيبها اقدر اشوف دى فيه ولا لأ؟
ازاى ممكت اتأكد انه محترم .. و فى كتير اوى مدعين و ممثلين؟.

51 comments:

حسام عامر said...

حلوة التدوينة ودي وحلوة مدونتك
أولا خليكي واقعية وإعترفي بأن الخلل النفسي أصاب كل المجتمع برجالة بستاته وبناته وسلطاته وبابا غنوجه
وأنا من حقي برضه أقول فين الست اللي بحق وحقيقي وفين البنت الرقيقة العفيفة المتفهمة وفين البنت الطيبة المتزنة اللي مش فاتحاها سبيل لكل من يقول لها بحبك وفين المزة المثقفة اللي تريح عقل وبال وعينين اللي يتكلم معاها وفين البنت اللي مش بتموت في تامر حسني وتبلغ بيها التفاهة انها تدافع عن إنسان بيغني كلمات يخجل أي إنسان محترم إنه يقولها في سره
شفتي بقا إننا كلنا بندور على الإحترام بس العيب في الزمن اللي بقا عامل زي المفرمة اللي بتهرس كل القيم الجميلة
تقبلي تحيتي ومودتي

Eman Hashim said...

اهلا بيك و بآرائك و مودتك و تحيتك
اللى انا باتكلم فيه للأسف هو حالة و موقف معين
مش تعميم لوصف الرجال يترد عليه بان " ما الستات كمان كده"
انا باتكلم عن اختفاء لقيمة كبيرة فى الرجولة .. و للأسف بيشوهوها بعكسها كمان

Che said...

انا مقتنع جدا بكل اللى انتى قولتيه ... بس انا عايز اسألك سؤال ..... تلاقى راجل محترم بمعنى الكلمه و حسب تعريفك ليها ، و حظه وقعه فى انسانه بتستغل ده .... المفروض يتصرف ازاى .... مع العلم انه حاول مره و اتنين و عشره ... و صبر لغايه ما قرب يبقى ايوب ... و كل ده عشان السبب اللى انتى قلتيه ، مقتنع ان الحاجه لو مش جايه بطيب خاطر و نيه صافيه يبقى قلتها احسن ... المفروض يعمل ايه

Eman Hashim said...

همممممم
يتفاهم معاها و يفهم
و لو استحالت العشرة ....

ه

mosa3dholako said...

انا قعدت افكر ليه بقوا كدة؟ ماهو اصل كمان مش حكاية ولاد ... لا ده بقى فيه بنات للاسف مايعرفوش يعنى ايه احترام ... كمان مجتمع بيجبر الناس انهم يمشوا فى سكة واحدة .. سكة الندامة والتوهان

حبيبه said...

مش عارفه انت اكيد عندك حق لان كتير بنسمع عن مواقف من دى وابشع
لان الاحترام والاخلاق والادب مبقاش موجود
فحاجه من الاتنين يا نربيهم من اول وجديد وده صعب لان من شب على شئ شاب عليه
يأما take it or leave it
اكيد برده فى لسه ناس محترمه نسبه قليله هم بس موجودين

Eman Hashim said...

شكرا على مرورك الكريم يا
mosa3dholako

عندك حق يا حبيبة .. حاجة والله صعبة
و انا مخليانى مع
leave it
اما اشوف اخرتها ايه

77Math. said...

أؤيد تماما حسام عامر، البنات اللي هو بيقول عليها دي هي اللي ربّت الرجالة اللي انتِ بتقولي عليهم دول

end of story

والقادم أسوأ !

Eman Hashim said...

ازيك يا بنتى
وحشانى والله
و انا رديت بتحفظى على رأى حسام و ان كنت فاهمة انتى تقصدى ايه
و خلينا نأمل فى مستقبل افضل ماعرفش منين

Anonymous said...

عندك حق و الله شكلهم كدة خلصوا في الحرب بس يمكن يكون لسه في فئة صغيرة تحافظ علي السلالة و علي فكرة اقصد الجنسين
تقبلي مروري موضوع رائع

Eman Hashim said...

شكرا لمرورك و تعليقك
و اهلا بيك و برأيك فى اى وقت
و قلبى معاك فى دعودتك الرائعة
ماعنديش غير ( يا رب ) اقولها من كل قلبى

محمد سيد حسن said...

مفيش راجل ومفيش الست لأنه مفيش فروق جينيه متعلقة بالأخلاق والقيم ، الأخلاق لو متوارثة جينيا ربنا مكانش حاسبنا على شيء ، كمان الرجاله مش بيتربوا في بيئة منعزلة تفترض إنهم يكتسبوا أو ينقص منهم سلوك معين لأن المجموعة البشرية كلها بتتعرض لنفس الظروف

الأزمة مش راجل وست الأزمة أزمة إنسان محطوط في غابة ومطلوب منه إنه يمارس كل الطرق المشروعة والغير مشروعة عشان يوصل لمجموعة غايات استهلاكية غامضة في النهاية لكن حياته تمحورت حواليها بفعل عوامل كتير
صعب نلاقي القيم المفقودة في جنينة الحيوانات الإنسانية المفتوحة دي ، على الأقل مش تقسيمة الراجل والست اللي زيها زي الأهلي والزمالك والسنه والشيعه وغيرها من الثنائيات مش التقسيمات دي هي اللي هتوصلنا أبدا والله أعلم

محمد سيد حسن said...

أنا مكنتش قريت البوست للآخر واندفعت بالخطبة السابقة ، تحديدا مكنتش قريت السؤال الكوني النهائي اللي محدش يقدر يجاوب عليه بشكل مرضي بعيدا عن نظرية البطيخة\النصيب
أعتذر لقلة التركيز

nana said...

ع فكرة ياايمى انا معجبة بشخصيتك جدااااااا

الله المستعان

Eman Hashim said...

لا يا محمد ماحصلش حاجة
و فعلا هو سؤال كونى اجابته صعبة جدا
الواحد لازم يعقلها و يتوكل .. مافيهاش الا كده
و شكرا على التوضيح التانى ده

اهلا بيكى يا نانا يا جميلة
عايزة اقرا رأيك بقى ان شاء الله لو سمحتى

محمد الدخاخنى said...

أعتقد بأن فترة الخطوبة هي فترة يستطيع أن يدرك كل طرف من الطرفين أخلاق ومشاعر الآخر،إلا إذا تصعنعوا وتجملوا ..وهذا التجمل له عواقب وخيمة بعد الزواج...

تحياتى
محمد الدخاخني
لنتــــواصــل

Anonymous said...

بسم الله
ست البنات
دي اول مره بشارك فيه فمدونه فحياتي
ومش عادتي ولا من هواياتي
بس لما شفتك فالتليفزيون
حسيت ان في حاجه غلط
انتي انسانه جميله
مثقفه
ورقيقه
ومعاكي درجه علميه مرموقه
فيكي كل المميزات
ارجوكي
خرجي نفسك من اليي انتي فيه ده
RELEIF اعملي
ربنا خلقنا ذكر وانثي
جعل لكل نصف ما يحتاج اليه ليكمله من النصف الاخر
دي سنته ودي حكمته في خلقه
اي حد يحاول يخالفها راجل او ست يبفي بيكدب علي نفسه
والله بيكدب علي نفسه
انتي مكانك اللي مفروض تبقي فيه
وحياتك اللي مفروض تعيشيها
مع راجل محترم وجدع وكل حاجه
اكيد حتصادفيه في الناس الل بتتقدملك
وحيفضلو يتفدمولك
تختاريه زي الرسول ما قال اللي ترتضي دينه
وتقدري تتعاملي مع عيوبه زي ما فيكي وفيا وفكل الناس عيوب
كلنا عيووووووووب يجدعان
كلنا علل يجدععاااااااااااااااان
كلنا بلاوي
بس الشاطر
الناجح
اللي يقدر يتعامل مع علله ويتقبل علل غيره طالمامش وقاحه ولا خسه
ولاحاجه تغضب ربنا
السيستم اللي مافسهوش خطا هو خلق الله للكون
وحكمته اقتضت ان نكون خطائين وخيرنا
التوابين
اسمحي
اسمحي لحد يحبك وحبيه
وعيشي معاه المتع الل مابيشوفهاش
ولا هيشوفها غير المتجوزين
واقفلي المدونه دي
اوغير اسمها
خليها
مدونات انسانه رقيقه
لسه ربنا مارادش لها الزواج
شايلها بازنه تعالي
راجل صالح حيسعدها
انا اسف
لو عايزاني اسحب كل كلمه كتبتها اسحبها
بس انا شايفكفي مكان تاني

Eman Hashim said...

محمد الدخاخنى
متهيألى المشكلة اللى انا باتكلم فيها دى ماتبانش بسهولة

Eman Hashim said...

لا طبعا ماتمسحوش .. تمسحه ليه؟ ده رأيك

شكرا على وصفك الكريم ليا. و شكرا برضه انك قلت ان فى حاجة غلط.
انا بس مش فاهمة .. انا اللى باقوله ان الجواز فى حد ذاته مش غاية. و ان ماكانش انسان مناسب ليا و اهلى مرتاحينله يبقى عدم الجواز احسن
و ان لقب عانس ارحم الف مرة من انى اتجوز جوازة تعيسة اجيب بيها عيال تعساء

لو انت شايف دى مبالغات يبقى اسمحلى انت مش شايف المجتمع كويس.
مش شايف حالاات الفتور فى الجوازات .. ولا الطلاق المبكر .. و لا الخلافات اللى علاطول و اللى مش بتجيب غير ناس مكسورة و تعيسة و مهزومة.

احنا بنربى البنات بذعر من لقب عانس بيخلوهم يقبلوا اى حاجة فى الدنيا بس يتجوزوا .
الامر اللى وصل انها تنضرب و هى مخطوبة فى الشارع - ده المثال اللى قلته فى الحلقة و اللى مش مألفاه على فكرة- تفتكر البنت دى متربية ازاى؟
تفتكر ايه اللى وصلها لكده.

الدين لوحده مش كفاية. ماتدخلش الامرو فى بعضيها. ممكن يكون بنى آدم كويس بس مش مناسب ليا.
و انت عارف كويس ان مش تفسير الحديث هو اى حد و خلاص طالما مرضى دينه

و يا ريت تبقى تبان باسمك .. كلامك مافيهوش حاجة تخليك تداريه.

و طبعا مش هافقلها
و اهلا بيك فى اى وقت

Anonymous said...

it's my first visit but it seems that i will spend all the night to read all ur pervious writing coz i adore it
maha

Eman Hashim said...

Welcome Maha .. waiting for what you think :)

Bella said...

بوست جميل كالعادة

انا مش عارفة الخلل فين بالضبط
بس للاسف الشديد مش عارفة ليه دايما الانسانة الطيبة تقع في راجل مش قد كده يعني

وفي المقابل تلاقي راجل طيب ومحترم فعلا وواقع في واحدة الابالسة يقولوا لها ياطنط

مش عارفة بتحصل ازاي بس بتحصل وكتير جدا

وكمان فيه نقطة تانية ومش عارفة افهمها

مش عارفة ليه الناس بعد ماتحس وتتأكد بحب الطرف التاني لهم بتبدي رحلة الابتزاز العاطفي وتستمر حتى يحدث حاجة من اتنين

اما احد الطرف اللى بيحب يزهق ويبطل يحب
او الطرف اللى بيحب يستمر في رحلة العطاء القائمة على ابتزاز الي ماشاء الله

وهذا الامر لايختص به الرجال وحدهم لكن هناك نساء يمارسنه باقتدار

المجتمع مريض كما سبق وقلنا مرارا ومحتاج تدخل سريع

تحياتي

magi said...

بوست جميل كلعاده
وانا معاكى جدا ان الجواز فى الزمن ده ورطه الواحد بيورط نفسه فيها
البنات بتفرح بالفستان والفرح والكام دبدوب بتوع الخطوبه وبعد كده تتفرجى بقى
طبعا مش كل الناس فى قله سعداء بس كل اصحابى المتجوزين بيقولو قبل حاجه وبعد حاجه تانيه خالص
عشان كده انا اعتزلت الجواز

آه وكفى said...

بقولك ايه ماتوا كلهم في 73 صدقيني والبواقي نفايا حرب

Eman Hashim said...

بيلا
ازيك .. وحشانى اوى و وحشنى كلامك
انتى فى الجملة دى:
" مش عارفة ليه الناس بعد ماتحس وتتأكد بحب الطرف التاني لهم بتبدي رحلة الابتزاز العاطفي وتستمر حتى يحدث حاجة من اتنين
"
حطيتى ايدك على المشكلة الحقيقية .. انا فعلا مش عارفة ليه ده بيحصل و ازاى تتضبط

ماتعتزليش ولا حاجة يا ماجى .. بس ادعى ربنا ماتقعيش فى جوازة مالهاش لازمة و حاولى تشغلى مخك
و هو غالبا هايكون مصيرك يعنى معروف .. زى مصير واحدة اعرفها كده
هههههههههههههههههههه

لوووووووووووووووووووووول على آه و كفى
ضحكتينى والله

Albert said...

"مش قلنا قبل كده ان الرجالة طلعوا زنانين .. و ان زن الرجالة امر الف مرة من زن الستات. زن الرجال بيبقى استنزاف مشاعر و ابتزاز عاطفى و استغلال لمشاعر انسان تانى."


Your ideas are of an afflicting simplicity. Stereotypes !!!.

You cannot define the "good" and the" bad "according to your criteria, it is appropriate to say: he is good according to my opinion.


You say that you are doctor, useful to keep "scientific spirit" when you write on the Net

your blog is a whole of chattering, but the subject is so important.

Why not make a diary rather?

Eman Hashim said...

It is needless to say that what I write is how I personally perceive things.
Otherwise, why do people comment and leave their owns ideas and impressions if not because they know I only write what I think and they respond the same way?
Being a doctor of scientific as you mentioned is of somehow vague importance here. What do you mean by scientific? you want me to get an essay with numbers of how many men nag in Egypt of what age?
I am with you that the generalization is not always a favorable method and I tend to you "major", "mostly" or "more likely" when I talk. And it would have been better here to add it though I will be repeating myself, but still here it would have been much better.

Thanks a lot Albert for passing by, and I would really love it if you have the time to comment on the rest of the "chattering". You are so much welcomed :)

البنفسج الحزين said...

؟؟؟؟؟

eman said...

أولا السلام عليكم
و شكرا ليكي يا دكتورة ايمان على البوست الجميل ده وبجد جاي في وقته
بجد انتي عندك حق الراجل المحترم في الزمن ده بأه عمله نادرة .. وللاسف احيانا لو خادتني ايديا لكتب السيرة النبوية او سير الصحابه بأسأل نفسي أمال فين أحفاد الجيل ده ماحدش قدر يورث منهم حاجه خالص
وكمان من أهم النقط اللي ذكرتيها وانا متوافقه معاها تماما بكل ذرة في كياني هي زن الرجالة الراجل بداية من الطفل حتى الكهل يمتلك جين مش الزن لا التلاعب واستغلال المقدره دي في الضغط على الطرف الأخر واللي هو طبعا المرأة ومش عارفه ليه مافيش حد بيقدر احترام المرأة وعدم استغلالها لفهمها للطريقة دي والمواجههة والتزامها بالصمت
انا اطلقت على صمتها احترام لنفسها أولا وللشخص اللي معاها لاني مش قادره اتخيله انكسار وانهزامية منها
وتقبلي مروري

Eman Hashim said...

ازيك يا ايمان
اهلا بيكى علاطول
و يا رب تمرى على كل المدونة بوست بوست

بصى يا ستى .. من اابسط اساليب الست فى ابداء عدم ترحيبها هو الصمت
و للأسف الشديد .. فى رجالة كتير بيستغلوا ده ,.و كمان ممكن يستغلوه ضدها
و يقولك البوز و العكننة

اللى هو عايز ياخد منها اللى هو عايزه غصب عنها و كمان تكون هى مبسوطة و مبتسمة عشان سعادته ينبسط

Albert said...

من انواع المتعة ده اكيد مش محترم.
عارفين نسبة حالات الاغتصاب بين الازواج واصلة لأيه؟ زى مايكون شرط ثبوت رجولته فى انه ياخد منها اللى هو عايزه بالعافية و الاجبار .. و ان الراجل مايستناش موافقة او ترحيب اللى معاه او لأ .. خيبة تقيلة و مصيبة
المصيبة ان حتى احنا يا ستات مش عارفين حقنا فى اننا نكون موافقين على كل حاجة بنعملها. و فى اننا من حقنا نقول لأة فى اى وقت .. و من حقنا راجل يتفهم ده .. و يتعامل معاه.


Thank you for your answer, courteous and delicate.

If the man neglects his wife, h' is criticizable, and if she neglects the desire of her husband she is "creditable"?

Before entering in couple, before accepting the couple, each one needs a certain maturity; sexual matuirity is also to admit the needs for the other, his (her) body, nudity, and to understand thait the couple is also an association of two sexual desires.

The “marital rape” as concept exists in many countries. Useful in certain cases to judge the man who rapes his wife, but how to prove, how to keep the couple then?

Eman Hashim said...

Hello Albert,

Yes, proving rape - marital or even not - has been always one of the major reason why a lot of cases haven't been filed, not to mention that it's why a lot of women choose not to think of it as an option to start with.

As for the "sexual Maturity" that you demand between couples, I am totally and completely with you. There's nothing that is humiliating to women than those women who use their being "wanted" as a weapon.
A wife who uses sex to win some points or establish a certain purpose and actually thinks she is being smart and practical is not uncommon.
You can it legal prostitution if you want!
I hate to seem like I'm defending women all the way long - cause I really don't - but they are being brought up that this is all what they have, being a female, wanted by men. So a smart woman is this who uses that!
Araf!!

Anonymous said...

هاى يا دكتور
أنا كمان إيمان بس مدرسة لغة إنجليزىة(وباتكلم عربى فصيح اهوة)..يمكن كمان أحمل شهادة ومختومة بختم النسر إنى ,وبلا فخر,,عانس..مممممم,,أنا كل الحكاية إنى عبيطة ودماغى لسعت من القراءة فتخيلت(ولا زلت) إنى مش هاتجوز الا واحد أرتاحله واحس انى على طبيعتى معاه بدون مجاملات وخلافه..المهم,أنا لقيت مدونتك دية بالصدفة النهاردة..صدفة سعيدة

Eman Hashim said...

انا الاسعد يا ايمان والله
هو فعلا احنا شكلنا اتهبلنا
احنا نعد جنب بعض عشان اللمة تحلو
هههههههههههههه
اهلا بيكى و بارائك

Anonymous said...

شكراً يا ستى على ردك بس بلاش حكاية اللمة دية أحسن احنا (حسب آخر إحصائية عن الأشكال دية)وصلنا تسعة مليون(فى وش العدو ) ,تخيلى لو اتجمعنا...واو...دة احنا جامدين أوى,,بس تخيلى كمية الإشعاعات الحقودة اللى ممكن تطلع من العدد دة...لا تقوليلى نووى ولا ذرى...إوعى وشك:)

أحمد عاطف said...

السلام عليكم ورحمة الله

ربما لن أضيف أكثر مما أضاف حسام عامر

ولكن ثقي ياختي الكريمة أنه مهما كان يقول قال الله وقال الرسول يصدر منه ما يكشف مكنون نفسه او يظهر ما يبين مدى الضارب في داخله

نحن أيضا الرجال تعرفنا على نساء يتحدثن كأنهن رابعة العدوية ولكن في لحظة ما نكتشف أنهن ينافسن مارلين مونرو في حياتهن


وهناك من هن فعلا مثلما يكنون بين انفسهن ولكن كيف نكتشفهن

تحياتي

Eman Hashim said...

احمد عاطف
مبدئيا احب احييك على تمكنك اللغوى

الامر يدعو للتفكير طبعا
اعتقد ان الاساس فى الامر هو تحكيم العقل و مشورة الاهل و فى الاساس التكال على الله

مفيش فى ايد الواحد حاجة تانية

سلوى said...

كل سنه وانت طيبه
وبخير وصحه وسلام
أنت وكل الأسرة
:)

Eman Hashim said...

و انتى طيبة يا سلوى
ربنا يخليكى

Anonymous said...

اولا:- ازيك يا دكتورتنا اخبارك ايه وكل سنه وانتي طيبه وعقبال مليون سنه ثانيا:- انا عجبني البوست جدا وتقريبا كل كلامك اللي بتقوليه بيحصل معانا حرفيا اما بالنسبه للراجل المحترم ده بئه عمله نادره وقيمه جدا وده ان وجد الحقيقه بس انا فعلا مش قادره اعرف العيب فييييييييييين فينا والا في زمنا والا في الناس عامه والا فلتربيه الصح لان انا الحقيقه بشوف ان فيه شريحه من مجتمعناان الاهل ما كانوش فاضيين يربوا خالص وبنشوف ده يوميا وفمواقف كتير واللي مش مقتنع او مش شايف ده مع احترامي للجميع لمش عايش معانا او بيدعي انه مش شايف يبقي ده موضوعه هو وبجد يا ايمي احنا مفتقدين الراجل بمعني كلمة راجل اللي اتربينا عليها من زمان

hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله

sadek said...

ايمان....كلامك حلو كالمعتاد ب بيعجبنى ان اسلوبك بيشدنى لحد اخر نقطة...استمرى ومستنى الأحلى و الاحلى...
(انا عملت مدونة كدة لسة بادئ فيها...بصى عليها وقولي لى رأيك...
محمد صادق

خالد الاسكندرانى said...

Ramadan Kareem Eman..

Eman Hashim said...

الله اكرم لخالد و لحسونة

ازيك يا صادق! مبروك على المدونة الجديدة و بالتوفيق يا رب
انا عارفة اننها هاتعمل شغل جامد اوى ان شاء الله
و متشكرة جدا على مساندتك المستمرة ليا

Eman Hashim said...

انونيماس
و انتى طيبة و بخير يا رب

المجتمع هو احنا .. الناس .. و اللى عايز تغيير لازم يبدأ بنفسه
ماينفعش نستنى التغيير يحصل من حوالينا

و كل واحد يقدر يعمل حاجة ضرورى يحاول و يعملها

maha omar said...

الراجل فكرة ... يعني حوار و طريقة تفكير و كلام له معاني ظلال و مقاصد
الفكرة مرايا النوايا

لو الفكرة مش مبينة صح
هيبقى كله شكله وحش حتى لو حاول يبقى العكس

لو الفكرة جميلة و ناقصة شوية انتي اللي تحددي تكملي و الا لأ

لو الفكرة مكتملة و ده عادة لا
بتبقى فرصة العمر يا قلبي

مها عمر
مدونة تفاصيلنا
www.tafaselena.blogspot.com

ايمان هاشم said...

عارفه ياايمى انت كلامك جميل جداااا فعلا وجود الراجل المحترم فى الوقت حالى صعب ممكن لان غاب الوازع الدينى فى التعامل وكل حد همهالمظاهر بس ...انا مثلا عندى 22سنه تخيلى بيتبصلى بشفقه لانى خلاص فى نظرهم عنست لان كل اصحابى اتخطبو واتجوزهوياسلام لورحت خطوبه حدقريبى ولامن اصدقائى تخيلى كم البوس الى بينهال عليا وكلمات عقباللك اموووووووه امووووه عقباللك ياحبيبتى وعقبالك بقى وكل ده لان اابى اى راجل الا المحترم بس هما عندهم تتجوزى وتكونى تعسيه احسن واهم حاجه الواحده تتنيل على عيبنها وتوافق باى حد والسلام.....انتى فعلا شخصيه رائعه انا اشركت هنا مخصوص علشان مدونتك واعرف اكتب تعليقات

ست البيت said...

اروح من نفسي فين يا إيمان ؟
كل ما اهرب ألاقيها عندك أو عند خيخة وفاتيما
صعب قوي كل ما احاول اقنع تفسي
وادخل شعور عدم الامان وانعدام الثقة في اللاشعور
ترجعوهولي تاني
بجد قولتي كلام جارحني ومش قادرة اقوله
من كتر الألم
سكت القلم
وبرضه ارجع واقول مش كلهم اكيد حنلاقي حد مختلف
عيشي ع الأمل يا أختشي
تدوينة حلوة لأن ما فيهاش ادانة
وما فيهاش تنفيس عن غل واحساس اني عشان واحدة ست يبقى لازم اكره الرجالة واقول الجواز سجن والكلام بالاهبل اللي بيصدهونا بيه
لينا حق والحق دا في تفاصيل حياتنا في فراشنا
لينا حق بس مش عارفين فين حقنا
من كتر ما بنصحى كل يوم على ق الزوج
حق الزوج
اللي حقيقى بيعجب رجالة ناقصيين كتيير
وكتيير من الرجالة العاقلة بيفهموه صح
بس الدنيا ع ادي ودي
لا زم نفهم حقنا فين وواجبنا فين قبل ما نتجوز
وتبقى الحياة جحيم ويعيشها غيرنا اللي هم ولادنا
الحياة مش يوم أو يومين
دي عمر تاني
كلامك بيوجع وبيصحصح
تحياتي

Eman Hashim said...

لا زم نفهم حقنا فين وواجبنا فين قبل ما نتجوز
وتبقى الحياة جحيم ويعيشها غيرنا اللي هم ولادنا
الحياة مش يوم أو يومين
دي عمر تاني

ازيك يا ست البيت؟
كلامك ده هو اللى جه على الوجيعة ... البنت للأسف مش بتتربى انها بنى آدم له كرامة و حقوق زى ما عليه واجبات و مسئوليات الا فيما ندر جدا.
و ده لان كتير بيخاوفا بريوبا بناتهم على كده لاحسن يعنسوا
فالحل بيكون فى انهم بيربوها انها ولا حاجة عشان سوقها فى الجواز يمشى

انا مرة اتقالتلى كده وش:
"مانا لو سيبتها تتعمل و تفكر يا ايمان ... مصيرها هايبقى مصيرك!!!"
و ده كلام كان من شخصية مفروض انها مستنيرة و بتاع
اه يانا

Nanapkis said...

شكرا لمرورك و تعليقك و اهلا بيك و برأيك فى اى وقت و قلبى معاك فى دعودتك الرائعة ماعنديش غير ( يا رب ) اقولها من كل قلبى

Anonymous said...

Brokersring.com - Learn how to turn $500 into $5,000 in a month!

[url=http://www.brokersring.com/]Make Money Online[/url] - The Secret Reveled with Binary Option

Binary Options is the way to [url=http://www.brokersring.com/]make money[/url] securely online