Wednesday, July 1, 2009

50 - احنا السبب

فى مناقشة عن عار المطلقة فى مجتمعنا, قلت ان احنا السبب . و لقيت نوع من الملامة بسبب الكلمة دى. فى حين انى فعلا مقتنعة ان احنا "الستات"السبب فى كتير من مشاكلنا . خصوصا الجزء المتعلق بنظرة المجتمع للمرأة اللى من غير راجل.

اللى بتخاف من الارملة لتخطف جوزها الست
و اللى بتخبى حملها على صحبتها العانس الست
و اللى بتفكر فى الحسد و الأر و النبر و تعمله الف حساب عادة الست

اللى ربى الراجل على ان المطلقة دى واحدة هاتموت و تبقى مع اى راجل و لو نص ساعة الست
و اللى قبلت انها عشان كبرت فى السن فمش من حقها تطلب اى طلبات و عادى انها تتجوز متجوز عشان تشتغ له شغالة ست
اللى ربت بنتها انها تقبل اى اهانة فى الخطوبة عشان تتجوز لحسن ده خلاص مفيش عرسان ست

و اللى انضربت قدام ابنها و بنتها و ما قالتش حاجة لحست تتطلق و المطلقة دى سبة ... برضه ست

كم ست مسكت بنتها بايديها و وديتها يتعملها عملية الختان؟
كم ست اعترضت ان ابنها يتجوز البنت اللى بيحبها لانها فوق التلاتين؟
كم ست اما بتشوف واحدة مش متجوزة لأى سبب بتقول - سرا او علانية - " ياعينى .. ليه؟"


الست هى اللى قبلت و عملت و سببت ده كله .. ليه؟ لانها ضعيفة . موقفها اضعف من انها تقول لأة. مش ضعيفة لانها مخلوقة ضعيفة. و لا لانها محتاجة راجل فى حياتها. لان لو الاحتياج لرفيق و شريك كان هو الاحتياج الرئيسى كانت الكفة بقيت متعادلة .. لان زى مالست عايزة تتجوز , الراجل كمان اكيد.
الست ضعيفة لانها محتاجة لكفيل.. كفيل يكفل بيها كلية.
مش بس ماديا .. معنويا كمان. الست فى وقت معين كده قررت انها تكبر دماغها من اى تعب فى الدنيا. و اشتريت ده بانها تحمل و ترضع و تنضف و تطبخ. انا مش باقلل من اهمية الدور ده اطلاقا . لان كلنا محتاجينه . انا اعتراضى على اللى جردت نفسها من كل قدراتها فى العيشة
للهدف ده بس.

اغلب المعرضات للايذاء الجسدى بيختاروا عدم الطلاق فى الاساس لانهم ما يقدروش يتكفلوا بمصاريفهم الشخصية فمبالك بولادها.
لما نسبة مش قليلة من بنات مصر يتخرجوا من اجسن الجامعات و يرضوا بالتهميش الكامل ده .. يبقى احنا السبب.
انا مش مصدقة ان لحد النهاردة فى 2009 ليسة فى بنات بتعتمد اعتماد كلى على وجود راجل فى حياتها.
هو اللى يتعامل مع العمال .. و يتخانق مع الجيران .. و يهزأ البواب و يجيب الفلوس و يخلص الورق مع الموظفين. لحد النهاردة فى بنات بتستنى اما يتواجد راحل مثلا عشان ييجى معاها تعمل اى ورق.
الى هذه الدرجة الست خايفة تواجه المجتمع لوحدها .. خايفة حد يشوفها من غير راجل.

لانها مش هاتعرف تجيب حقها لنفسها .. لانها مش هاتعرف تتخانق لو لزم الامر لحقها .مش بس عشان الراجل متربى على كده. لان هى بيبقى صوتها مهزوز .. جواها كسرة

الست اللى من غير راجل مكسورة من جواها و دى حاجة هاتجننى.
الست القوية الشجاعة يوم ما بتتطلق عمر ما بيخطر على بالها مين هايقول عليها ايه و لا مين هايفكر فيها ازاى.. و اللى بيتعدى حدوده معاها بتيله على دماغه.
قبل ما حد يستنتج حاجة غلط .. انا مش باقول ان مقياس قوة الست فى انها تتطلق و تدى الناس على دماغهم .. انا بس بدى مثل .. ههههههه

يا بنات اجمدوا شوية و النبى .. عارفين اما البنت بتقوى بيحصل ايه؟ ضهرها بيتفرد .. و عينيها بتلمع و روحها بترفرف زى العلم المرفوع فى الهوا. ضحكتها بتحلى اى مكان .. و طلتها بتحلى اى حاجة حواليها.
كده هاتتحب ليها و عشانها. هاتحبى راجل بيحبك .. مؤمن بيكى و بطموحك .. نفسه تكبرى .. و اما يحصل هايفرح بيكى
و بلاش الخوف انه مايجيش .. الجبن عمره مابيجيب نجاح .. مفيش نجاح من غير مخاطرة


و لو ماجاش ده و الله العظيم مش اخرة الدنيا .. و لو ماصبرتيش .. ماترجعيش تقولى المجتمع ظالم .. افتكرى وقتها ان انتى اللى عملتى كده ... و ان عشان كده ..... احنا السبب

21 comments:

Roubz said...

I totally agree on what you say..but as for the part you talked about work..well sometimes its really hard to do all of this at once! like work from 6 to 8 hours (min.) then go back home cook, clean & take care of everything else at home! sometimes you just feel like SCREAMING!! but at the same time u're right, women need to have their own money!!
ITS A DILEMMA!! WHAT TO DO?? WHATS THE SOLUTION HERE?

Eman Hashim said...

عشان معنى زوجة غلط يا روبى
الرجل عليه دور داخل البيت
و ده اللى احنا مسؤلين عنه
مش ممكن نفضل مدلعين الرجالة كده و بعدين نعيط على حالنا و صحتنا

بتاع ايه يجيله الشاى لحد عنده؟ هايجرى ايه اما يعمل لنفسه عشاه بليل؟
هايحصل ايه اما يلم الغسيل و يحطه فى الغسالة؟
هاتخرب الدنيا لو ذاكر للعيال؟
هايبوز الكون لو شال البيبى اللى بيعيط؟
مش ممكن يعنى

Moka said...

احييكي علي طرحك موضوعات كما تسمي في مجتمعنا شائكة
اما بخصوص ان المراة يجب ان يكون لها مالها الخاص وان الرجل يشاركها اعمال المنزل ولا يكون العبئ عليها


الاسلام وضع لنا تشريع راااااائع يجب ان يعرفه الرجل والمراة ايضا
يعني ميسالش عن مرتبها لان الاسلام وضعلها زمة مالية مستقلة عن الزوج

لكن المشاركة في ظل الظروف مش عيب اننا نعيش حياة كويسة واساعد في مصروف البيت

المشاركة مش عيب يلم الغسيل ويعمل الشاي وكل حاجة
وفيها ايه ان يروح معايا يعملي الورق او يتخانق مع البواب انا صوتي ميطلعش لاني انثي رقيقة لكن وقت الللزوم يمكنني ان الزم البواب والمدير ان يحترم وجودي ويعملي الف حساب مش لان صوتي عالي ولكن احتراما لي

احلي حاجة عندنا ان المراة مسؤلة من الرجل
في البيت ابوها وبعدين جوزها لانها مصونة

الرسول قال رفقا بالقوارير

يعني خلو بالكم من الانثي الرقية

بلاش نخليها جافة وناشفة ويجوز واحد صاحبه

ولا ايه

:D

Eman Hashim said...

فرق شاسع بين الانوثة و الرقة و بين الاستكانة و الهشاشة
فرق كبير بين ان جوزى يقدرنى و يشيل عنى - و هو و انا عارفين كويس انى اعرف امشى دنيتى - و بين انه يشيلنى كلى و مقابل ده يمحينى

ولا ايه؟

Shaimaa said...

آآآآآآآآآآآآههههه . والنبى لما بقرأ البلوج بتاعك بحس ان أنا لسة فى الدنيا ممتش ومش لوحدى ربنا يجبر بخاطرك يا شيخة
عارفة ليه يا ايمان؟ لأن احنا الستات كدة.. علشان ده تاريخ طويل جدا جدا اتربي عليه والدتى ووالدتك وجدتى وجدتك.. واحنا دايما نتمسك بالماضى ونفتخر بيه ونعيط عليه حتى لو كان غلط- بتقولى للبنات افردوا ضهركوا ..فوقوا.. عيشوا ...الخ أنا أعرف بنات (وعدد مش قليل أبدا) بيتباهوا بالعبط يتباهوا انهم مبيعرفوش يعملوا حاجة فى حياتهم(مع ان حقيقتهم مش كدة) .. لازم بابا يوديها ..وأخوها يجبها لحسن تبقى بنت قليلة الأدب وطول النهار بتلف فى الشوارع
اللى بابا بيجيبها وأخوها بيوديها هيه دى اللى بينصفها المجتمع وبنت متربية لا دارت ولا لفت وكمان بنت كلها أنوثة مش بتشتغل وعندها شخصية ومسترجلة زيينا
من الآخر... الراجل المصرى بيحب البنت المنكسرة اللى مبتعرفش تعمل حاجة زى ما ماماربته

Lamiaa said...

بعد كل التحية لايمان والتدوينه الرائعه, والمدونه المتميزه بوجه عام ... وكل تأيدي لما طرحتيه في التدوينه دي
.. أنا بس معترضه علي حكايه " تاريخ طويل , واتربينا علي كده " والكلام الكتير اللي من النوع ده
ماحدش يقنعني ان احنا متمسكين 100% بكل اللي اتعلمناه من اهالينا في كل نواحي الحياة الأخري... اشمعني دي بقي
احنا اللي بندي الفرصه للرجل انه يسيطر لما بنسلم قيادنا لمشاعرنا, وبنستكين لضعف غير راغبين في التخلص منه

تحياتي يا ايمان

الكحيان said...

احسدك على كم الحقد والغل الذي تكنينه في نفسك . ما تتحدثين عنه هو الوهم بعينه المرأة في حاجة إلى قوة الرجل مهما بلغ تحررها واعتمادها على ذاتها والرجل ايضا في حاجة إلى ضعف المرأة مهما بلغ من عتوه وجبروته الحياة ليست صراعا كما تتصورين بين قوي وضعيف لأن الرجال منهم الأقوياء ومنهم الضعفاء والنساء كذلك إن الحياة تكامل بين جانب معين من الضعف وجانب معين من القوة يعطيها صيغتها المستساغة ولو أن أحقادك وأفكارك النظرية هذه وجدت متنفسا وتحقيقا فعليا فثلاثة أرباع البنات سيجدن طريقهن إلى مستشفى المجاذيب بما جنت أيديهن وسينقرض النوع البشري وسيندثر ما يطلقون عليه دفء العلاقات الإنسانية أليس كذلك؟

lubna m. said...

i totally agree with you المرأة زي ميقولو نص المجتمع و هي الي تجيب النص التاني يعني ايه مثلا لو اتطلقت يعني ايه لو مش عاوزة تتجوز صحيح الحب و الجواز و الأمومة حاجة حلوة بس برأيي انو الست علشان تربي عيالها و تربي شخصيتهم لازم يكون ليها شخصيتها و كيانها مش لازم تعيش تحت ظل الراجل
و لو كل ست قبل متتجوز عرفت نفسها و قيمتها و شخصيتها حتى لو اتطلقت ده مش حاجة بالنسبالها علشان هية قوية صبورة

Eman Hashim said...

شيماء .. انتى مش لوحدك خالص
و انا فاهمة كويس اوى اللى انتى بتقوليه و عشان اثبتلك ده
اقوى الحاجات دى:
هههههههه
هتتأكدى انك مش لوحدك
http://3anes.blogspot.com/2008/01/2.html

http://3anes.blogspot.com/2008/02/11.html

Eman Hashim said...

Lamiaa:
اوزلا شكرا لتحيتك الكريمة
ثانيا اعتراضك واضح على انه كلام شيماء مش كلامى
فانا هاسيب الرد ليها هى توضح رأيها بقى

احنا اللي بندي الفرصه للرجل انه يسيطر لما بنسلم قيادنا لمشاعرنا, وبنستكين لضعف غير راغبين في التخلص منه

مضبوط اوى الكلام ده يا لمياء
ربنا يكملك بعقلك يا رب

Eman Hashim said...

الكحيان:
واضح انك مش فهمت المقصود من اسم المدونة
و واضح انك خالط بين " الانوثة و الرقة " و بين "الضعف"
و خالط كمان بين ( الرجولة ) و ( القوة)
لان عمر ما شرط الانوثة كان فى الضعف ابدا
ده اللى فى ستات للأسف بيستغلوكم فيه فيما يسمى "بالمحن و السهوكة" الللى انا صراحة مش شايفة انى مصطرالهم عشان اعجب واحد

فى اغنية بتقول كلمة حلوة اوى

take me as I am
this may mean
you'll have to be a stronger man

بس القوة هنا مش اللى انت تقصدها اصلا

عمر ما الراجل كان بيبقى راجل بفرض قوته و اثبات ضعف الست اللى قدامه
ده الراجل الضعيف هو اللى محتاج ده
الراجل بجد عايز ست بجد
يقفوا مع بعض قدام الدنيا

Eman Hashim said...

كلامك حقيقى يا لبنى
مش كلام شعارات و خلاص
كلام واحدة حاسة بالمجتمع و اللى بيحصل فيه
و مدركة ان الاستمرار فى جوازة و السم ده انتحار جماعى للأسرة كلها

تحياتى ليكى و لبصيرتك

Shaimaa said...

ردا على الأخت lamiaa
أنا مقولتش 100% متمسكين بعادات اتربينا عليهاأنا بقول "عدد مش قليل" دى حاجة
أدعوكى يا لمياء وياريت انتى كمان يا ايمان لدخول بلوج "يوميات عانس" ومنه الى بلوج "العرايس والعرسان" تجدى فقرة تحت عنوان http://home-of-the-bridez.blogspot.com/2008/10/blog-post_23.html
"شخصيتها قوية" علشان خاطرى اقرئيها هتعرفى أنا عايزة أقول ايه عن ما نعانيه نحن هذه الأيام
احنا بنقاوم أوى اللى زييي وزيك وزى ايمان .. بس فى بنات تانية بتعمل عبيطة وهبلة علشان الراجل يحبها وبعد ما تتجوز مبتتسحملش تفضل تمثل الدور ده فتتطلق فى أول سنتين .

Eng/Fatma said...

الموضوع مش ان الست محتاجه راجل عشان يتعامل مع البواب او بتوعوا الصيانه للشقه او العمال الموضوع ان الست المفروض انه مخلوق رقيق هي نبع الحنان والرقه لما بتتعامل مع العمال والحياه الصعبه بتفقد جزء كبير من ده زبعدين ربنا هو اللي قال وقرهن في بيوتهن ربنا خلق لكل واحد فينا دور الرجل له دور والست لها دور بس للاسف المشاكل اللي احنا فيها ده بسبب بعدنا عن تعاليم ربنا واحترامنا لدينا ولذتنا هي ده المشكله المشكله مش راجل وست المشكله احنا ايه ودورنا في الحياه ايه وازاي نتعامل معها المشكله اننا نفهم صح هو ربنا خلقنا ليه وليه نزلنا تعليماته عشان نتبعها في الحياه وللاسف الشديده احنا بعدنا عنها تمام البعد

Eman Hashim said...

بكل احترام اختلف مع كلامك تماما
و اهلا بيكى و شكرا لمرورك و تعليقك

Eng/Fatma said...

ازيك يا ايمان انت هنا مش واضحتي انت مختلفه معي في ايه ........هل مختلفه معي ان الست هي رمز الحنان والرقه ولا اني قلت زي ماربنا قال وقرهن في بيوتهن ولا اننا بعدنا عن تعاليم دينا واصبحنا نقلد الغرب بكل عيوبه وللاسف مش بناخد منهم غير عيوبهم..........وانا نسيت اعرفك بنفسي انا مهندسه وكمان ميكانيكا والحمدلله بشتغل ومش مخطوبه وعندي28 سنه ........ومعني كلامي لما قلت ان ربنا قال وقرهن في بيوتهن مش قصدي اني لازم الست تقعد في البيت وتلغي عقلهاوكيانها اللي ربنا اعطه للانسان وبقول هنا انسان عشان ربنا مش اد عقل كبير لراجل وعقل صغير للست هو خلق لنا احنا الاثنين عقل وكيان ذاتي لازم نستخدمه ونفكر به .......ممكن تقولي لي ازاي اعرف اتواصل باستمرار معكي هنا علي مدونتك

Eman Hashim said...

الست المفروض انه مخلوق رقيق هي نبع الحنان والرقه لما بتتعامل مع العمال والحياه الصعبه بتفقد جزء كبير من ده

مش معاكى فى ده. عمر مصعوبة الحياة ما بتقلل من انوثة الست. بالعكس
انا مش لازم اطلع شنب عشان اتعامل مع الدنيا. ده ده اللى الرجالة عايزين يفهموه للستات
زى كده ان الست مش بتعرف تسوق و مش بتفهم فى العربيات و مش بتفهم فى الكمبيوتر ولا فى اى حاجة فيها مخ

Eman Hashim said...

بنا خلق لكل واحد فينا دور الرجل له دور والست لها دور......... الى آخر الكلام

لما انتى بتقولى انك مهندسة و بتشتغلى , تقصدى ايه بموضوع الدور ده اللى يخليك شايفاع يتناقض مع اللى انا كاتباه فى البوست

Anonymous said...

شوفي يا ايمان الكلام دة حلو اوي بس لعلمك بقه ان الستات لما بتظهر الضعف دة للرجالة بتبقي هيه عايزة كدة يعني زي مبقولوا لذة احساس الحماية و لعلمك بقه الإحساس دة اذيذ فعلا و بعدين اصلا الراجل الشرقي لو محسش انه هو حامي الحمي و السوبر مان بتاع الهانم بيقولك ان البنت دي مسترجلة ووو الي اخر الكلام دة
و علي فكرة انا عايزة اقولك انانا نفسي كنت بعمل حاجات عادية جدا و ممكن الاقي جدتي تقولي عيب الراجل راجل و الست ست
يعني تقدري تقولي ان الموضوع دة وراثة انك لازم ميكونش ليكي رأي و إلا الباشا هيسيبك و يحرمك من الشرف الرفيع انك تكوني معاه
دة غير مجتمعنا المتخلف زي منتي قولتي اللي يحسسك انك فيكي حاجة غلط لمجرد انه لسه متجوزتيش يعني لازم تنكسري و تتبعي القاعدة لحد متوقعيليك واحد علشان بس تترحمي من ألسنة الناس
و حتي زمايلك و قرايبك اللي مخطوبين او متجوزين ديمنا يحسسوك ان كل كلمة تبقي اقصدك تحسديهم أو انك بترمي عليهم متعرفيش الناس دي مالها
بصراحة انا زهقت من حياتي كلها يمكن اكون خرجت عن الموضوع بس انا حاسة اني فعلا زهقت و لعلمك مش معني دة كله
اني مش قوية بالعكس انا زي مقولتي بخلص كل ورقي و بعرف اتعامل مع الدنيا و امشيها كمان بس بيني و بينك احيانا انا نفسي بزهق من القوة دي صدقيني كل حد فينا بيستحمل لحد درجة معينة عارفة بعدها لما بتحسي انه بدء احساس يقل بكل حاجة تفتكري انا هاجي فلحظة وتنعدم نقطة ضعفي دي هفقد الإحساس او الخوف من اي حاجة أو كل حاجة انا دلوقتي بيجي عليا وقت وكل شئ عندي بيتساوي تفتكري ليه اللمبالاة دي عارفةانا متأكدة انه احنا السبب امي وامك وامهاتنا كلنا هما اللي ربونا علي كدةبس تعرفي من كتر مالواحد بيحاول يكسر القاعدة هوه نفسه من جوة بيبقي فاضي
تحسي ان جواة هوا فاضي من جوة بس تعرفي انا مش عارفة اقول ايه بس انا اضحك عليا بالتربية اللي اتربيتها
سلام

Eman Hashim said...

اهلا يا انونيماس بيكى و بكلامك
و عندك حق فى كتير من اللى قلتيه

اما بالنسبة لتخوفك .. فميش له حل غير التجربة و انك لما تيجى قدامك فرصة كويسة تفكرى فيها
حاجة من اتنين هايحصلوا

يا فعلا ربنا يوفقك فى راجل كويس و تكملى معاه
يا يوريكى اللى يقرفك منهم حبة وقت محترمين تقدرى تواصلى بيهم فترة
و هكذا
ههههههههههههه

شوفتى الحل بسيط ازاى؟

r3delmasry said...
This comment has been removed by the author.