Friday, March 20, 2009

48 - انا بنت و عندى مخ ... بس ريحتى مش وحشة (احنا اكتوبر 2008)ه


فى الفترة الاخيرة...بدأت احس ان فى شوية حاجات كده بتطفش اى راجل يقرب منى , زى ما تكون ريحتى وشحة و اول ما الواحد فيهم بيقرب..يشمها و يقول (اففف) و يجرى..
ازاى تضمنى ان ريحتك تبقى وحشة؟
1- اعملى مدونة..اكتبى فى مجلات .. و على الفيس بوك .. و فى كل حتة
المهم ان يبان ان عندك مخ
و الاهم ان المخ ده يكون شغال و بيتفرج اللى حواليه
و اهم شىء انه يكون فى (رأى) .. و يا سلام بقى لو فى اتجاه فكرى معين!
2 - من وقت للتانى..اما يقولك على حاجة تعمليها, قولى له كلمة واحدة...(ليه؟)
3 - اما يسألك عن شغلك , وضحى ان ليكى طموح و حلم و خطة زمنية لتحقيق اهدافك دى!
4 - اما يسألك عن صحابك , وضحى له انهم مهمين فى حياتك
اقول لك على حاجة انأح.. قولى له " انا انسانة اجتماعية و بحب اروح و آجى و اتفرج على الدنيا "
5 - لما تتكلموا عن اهتماماتك قولى له ان هو كحبيبك او خطيبك حاجة مهمة فى حياتك, بس ده مايمنعش ان فى حاجات تانية مهمة فى الدنيا!
6 - لو حبتيه ..قوليها له
لو لبس مرة حاجة و شكله عجبك غيها .. بيني له
لو شك مرة فى مشاعرك ..اكيديها
لو لأى سبب حسيتى انك عايزة تجامليه ..اعمليها
لو ماتصلش هو..اتصلى انتى!

7 - لو كنتى فى لحظة ضعف او احتياج و انتى البنى آدم القوى المستقل , احتاجيه هو .. و اضعفى قدامه هو!
8 - خليكى على طبيعتك معاه
ماتمثليش .. ماتكدبيش .. ماتدعيش حاجة مش فيكى!
9 - و الاهم ..وضحى انك زى مانتى هاتاخديه زى ماهو .. انتى كمان من حقك فى الدنيا دى حد ياخدك زى مانتى!
10- اقولك على حاجة........ كلمة "من حقى " كفاية!!!

63 comments:

AyA said...

أول تعلييييييييييييييق :D


هقرا البوست وليا عودة تاني

77Math. said...

فينك يابنتي من زمان ؟

حقدك بيوحشني بصراحة :D

وبكلامك دا مش بتلمي حواليكِ غير الحاقدات اللي زيك عشان ريحتهم وحشة برضه

;)

ما عنديش تعليق ع اللي بتقوليه، مش ححرق دمي خاااااااااالص مفيش حد يستاهل


صحيح .. لما يبص لكـ بخبث ويقول لك على ممثلة أو مطربة كلام مدح عايز يثير غيرتك .. قولي له عندك ذوق بجد :D

حاجة شبه " حقي وحقك كدا"
ههههههههههه



تحياتي

AyA said...

جيت تاني :D

تعليقا على النقاط حسب الرقم :
1\
ده حلم واحدة اعرفها, هي بتكتب حلو اوي وذكية جدا جدا ونفسها يبقى عندها مدونة وتتشهر و.... زي ما قلتي حرفيا :)
2\
نفس البنت برضه بتتكلم كده علطول, معرفش اتكلم معاها من غير ماتقول ليه, بس فعلا ده عاملها مشاكل كتير, هي كلمة ليه - بحدود - بتكون كويسة وبتحسسك ان اللي ادامك بيسمعك وبيعمل اللي بيعمله عشان مقتنع ومهتم... بس لو دايما بتبقى صعبة, لأن لو الواحد هينحر في قلبه مجادلات على كل كلمة, مش هنخلص, يعني مش هتبقى الحياة سلسة بالشكل ده....
وده مش معناه ان انا بس اللي اتنازل احيانا, لا هو كمان لازم من حين لآخر يكبر دماغي شوية ويعديلي حاجات من غير ما يعملها تحقيق...

اربعة وتلاتة
مش عارفة ليه ناس كتير مش بيبقوا قادرين يفهموا ان البني ادم زي الكرة الارضية, ممكن يلف في أكتر من محور, يعني يلف حوالين هدف كبير زي الشمس, ولفات صغيرة على محاول اصغر زي محور الارض حول نفسها, وفي نفس الوقت الارض نفسها تشكل محور للقمر يلف حواليها.... ليه بقى نجيب البني آدم ونحصره في حاجة واحدة بس؟ ومش شرط الزواج ده فيه اصدقاء بيبقوا عايزين يحتلوا حياة اصدقائهم كلها ويغيروا ويتضايقوا لو صديقهم انشغل بدراسة او شغل او حتى علاقات انسانية تانية زي الاقارب مثلا!
يعني الواحد ممكن يوازن بين جوانب حياته كصديق وزوج وابن واب وبني آدم له هوايات واهتمامات...

6
.......
بجد دي حاجة تضايق اوي, ومش فاهمة ازاي المجتمع بيطالب البنت تبقى مفعمة بالمشاعر كأم وكزوجة وكـ بإختصار في كل مراحل حياتها, ومن ناحية تانية يكبتوا مشاعرها بالشكل ده!!!!

7,8,9
فكرتيني بجلسة بنات بس من اللي قلبك يحبها :) كان فيه واحدة بتتكلم على الخطيب وازاي نتعامل معاه وكده, بجد كان كلامها يستحق يتحط في كتالوج!! لو متضايق تبقى هادية لو متعصب تمتصي غضبه لو زهقان لو تعبان لو مخنوق لو مبسوط..... ولازم تحسسيه انك حاجة تحفة وترضي غروره بأنه استحق واحدة زيك, وفي نفس الوقت تحسسيه ان 80 في المية من ثقتك في نفسك عشان هو موجود في حياتك ولازم ولازم ولازم, يالهوي! ده انا لو هتعمال كده بجد هحتقر نفسي اوي, ده على اساس اني المطلوب مني اني ابقى حربا بألف لون؟
انا طبيعتي عفوية شوية او تلقائية شوية ومنكرش ان ده بيسببلي مشاكل احيانا بس لا أتخيل نفسي بالتعقيد ده.....



سوري على الرغي والانتشار الشنيع في المدونة :) شكلك هتعمليلي بلوك قريب

Eman Hashim said...

واله انتى اللى بتوحسينى يا بنوتة
ليسة امبارح فى الشغل كنت باقول هى فين
- شوفتى بفكر فيكى و انا فى الشغل ههههه- ماتقوليش .. اصل انا عارفة انك زى حالاتى خلاص

و اللى بتقوليه ده ممكن كمان يترد عليه فى موقف مشابه بعدين بتعليق صغير على اى ممثل - اهى دى الرجالة!!- ههههههههه

بس العاقبة ماضمنهاش بقى

وحشتيى بجد

Eman Hashim said...

ازيك تانى يا اية
1 مفيش اسهل من انها تبدأ
2
انا بدأت الجملة ب (من وقت للتانى ) اعتقد بكده احنا متفقين

3 عشان الراجل ببساطة عايز الست تلف حواليه و يكون هو محور اهتمامها - مش كلهم اكيد بس الاغلبية -
و بكده اى اهتمام تانى مش هايفهمه و لا هايقدره

6 البنت المصرية فى احيان كتير تسنحق الاوسكار فى التمثيل المستمر

7 و 8 و9
المهم ان الواحد يكون على طبيعته .. لو هى مش بتضغط على نفسها عشان تعمل كده هنيئا لها .. بس للأسف ده صعب شوية
مش باقولك اوسكار!! عرض مستمر يا أية .. عرض مستمر

يا ستى انتشرى اكتر و النبى
ده انتى فتحتى نفسى اكتب على فكرة
بجد انا متشكرة ليكى جدا جدا جدا
و اتمنى ماتنسيش تبقى هنا علاطول

و مستنية مدونتك بقى
;)

AyA said...

:D ربنا يخليكي يا ايمي

استعدي بقى :)


انا كمان والله نفسي اكتب مدونة من زمان, لأني بكتب كتير جدا على الورق وبقطعه,, لسه مجتليش الجرأة والإلتزام بالكتابة في مدونة بشكل منظم وموضوعي...

psycho said...

انتي جبتي المفيد
زي ما انتي حتاخدية زي ما هو هو كمان حياخدك زي ما انتي
بس دة ميمنعش ان التغير مطلوب و ساعات كتيـــر لازم يخصل التغير دة عشان لا هي عايشة لوحدة ولا هو لوحدة
و بعدين اية الاستراتيجية دي كلة:]:]

حكايات أم سهير said...

ايمان.. عرفتي الكلام ده منين؟ كنت فاكراه سر مفيش حد تاني يعرفه!!!
يعني فعلا الريحة الوحشة بتطلع من التصرفات دي!!! اتاااااااري... كل الناس بتجري وتروح وماترجعش لما تتعامل مع واحدة بتقول الكلام ده وبتتصرف التصرفات دي.
والبرفان والديودوران اللي ممكن يخفي الريحة بيكون في نصايح كتير بتسمعيها من اصحاب الخبرة:
-يابنت خليكي تقيلة، اوعي تريحيه وتقولي على مشاعرك
-الراجل بيحب البنت التقيلة، خليكي غامضه وتقيله ودوخيه علشان حتى تردي عليه في التليفون
-الراجل بيحب دايما يكون في حالة حيرة، اوعي تعرفيه اي حاجة عنك ولا عن مشاعرك..
-اعملي عبيطة، ولا كانك تعرفي حاجة في الدنيا،، عرفيه انك بتشوفي الدنيا من خلاله وانك قبل ماتعرفيه كنتي البطه البلدي اللي قاعدة في البيت وماتعرفش طريق باب الشارع من فين..
-شغل ايه وبتاع ايه، حياتك معاه وبيه وبس..

Anonymous said...

صديقتى السابقة اتمنى تكونى بخير رغم اختلافنا لسة محتفظة ببعض ذكريات كويسة بينا وبهتم اقرا البلوج بتاعك من وقت للتانى ولسة على ما اعتقد احنا الاقرب فى التفكير والظروف

رقم 1 : مؤكدة 1000 % بلوج لازم يتمسح فورم لأ لو اتنرفزتى شوية وكتبتى كلمتين تفكى بيهم عن نفسك فى اى مكان على الفضاء الالكترونى تبقى سافلة ومش متربية وازاى بنت يا عالم بنت يا هووو تكتب كدة ازاى ؟ ازاى ؟ ويستمر السؤال والزن والقرف على وشة والالحاح فى كلامة لحد متستسلمى لوجهه نظرة المتعفنة و تبقى علاقتك بالانترنت زى علافتى باللغة اليابانية التى لا افقه منها شيئا .
2. لية --- الرد عليها الــ default answer ( كدة ريحينى ) ولما تريحية وتمشى بمزاجة مرة واتنين وعشرة بلاقى اعذارة تافهه و عندة سوء تنظيم للامور وبيقولك ( كدة ريحينى ) لانه مش قادر ينظم اى شىء .
3. الرجالة والشبان المنقرضين الموجودين حوالينا وصول لدرجة من الذكاء الغبى يعنى يحترمك شغلك واحتياجك الادبى والمادى للشغل ؟ بس بقى فى خطة بديلة دلوقت الصراخ المستمر و وصلات التجعير والبكاء على رجولتة الممسوح بيها البلاط فى الحالات الاتية ( لو ابتسمتى فى وش عميل – لو اتكلمتى فى التليفون مع زميل قديم – لو اتاخرتى نصف ساعة عن معاد مرواحك – لو قبلتى هدية رمزية كشكر وتقدير لشغلك ) ويبقى الحل الوحيد والمنطقى للخلاص من وجهه نظرة ان الشغل مش عاجبة وانك مايصة ومش بتراعية فى شغلك فسيبى الشغل .
4. صحابك بقى دى عاوزة مجلد ( لو اصحابك بنات بس حيتحفظ عليهم اصل دى وحشة بتغير منك ودى عانس حتوقع بينا ودى بتضحك بصوت عالى فى الشارع ( مع ان عمرة ماشفها فى شارع ) والخلاصة انتى وصحابك البنات وخروج والحاجات دى لا لا لألأ انتوا بتمشوا تهزروا وتضحكوا وتتعاكسوا ومش حتحافظوا على نفسكو ) ولو سابك تنزلى مرة والتانية معاهم يبقى قاعد يهرى وينكت فى نفسة وبعدين الحل البديل انا انزل معاكى انا اتفسح معاكى حوديكى كل حتة ومش حتغرمى حاجة هومعاهم احسن ولا معايا .
اما فى حالة ان عندك اصدقاء شبان وممكن يكونوا مجرد شخص او اتنين وببتقابلوا فى مكان عام حفلة او مركز ثقافى ) تبقى القارعه والموتوالشرف غالى وازاى بنت ... بنت ... بنت يا ناس ... بنت يا هوة تصاحب ولاد ازاىىىى وتستمر وصلة البكاء على الرجولة وعلى الحب اللى متستهليهوش والنتيجة المعروفة ان مافيش صداقات من اى نوع اللهم الا هو ( طب الراجل لما يطلب كدة هل هو جدير وعندة الوقت الكافى والروح الكافية والثقافة الكافية والفلوس الكافية عشان يحل محل كل الناس فى حياة خطيبتة ؟؟ وهل دة اسلوب صحى للحياة ؟؟ ولا نوع من الانغلاق والتملك والانانية وتكون حياة الانسان مقصورة على فرد واحد ممكن دة يحصل بس فى حالات نادرة من الحب والوفاق )
5. يا ايمان يا حبيبتى مش قلتلك فى خطط بديلة دلوقت حيهتم باهتماماتك وحيروح معاكى كل مكان بتحبية مركز ثقافى سفارة اى حاجة حيروح معاكر مرة واتنين وثلاثة وبعدين تبدا وصلات النقد وعدم الرضا وضيق الوقت والغيرة حتى من ممثل او مطرب او تسفيه اى اهتمام ليكى لدرجة انك تكرهى تروحى اى مكان بتحلبة معاه تجنبا للمشاكل.
6. لو قلتى انك بتحبية او اتصرفتى تصرف شخصى يدل على الحب يبدأ الشك الرهيب عرفتى تقولى الكلام دة ازاى اتصرفتى كدة لية قلتيها لحد قبل كدة ؟ اكيد حصل اعترفى ( وفى حالة لو ليكى تجربة خطوبة سابقة يبقى الاتهام بقى مؤكد وجريمة تستحق العقاب والشك المستمر ) اما اللبس لو عجبك وبينتى دة ( يبقى كان مين من صحابك بيلبس كدة وعاجبك ) ( او عاوزة تلبسينى زى فلان اللى كان صديقك ) وغيرة ... !
7. لو ضعفتى اداة حيحترم دة بس العقلية الشكاكة الغير واثقة فى اى شىء على الاطلاق حتى فى اسمى المشاعر حتشك ختى فىلا ضعفك وتتهمك انه تمثيل .
8. حتبقى فى منتهى الطبيعية فى الاكل والكلا م والتفكير وحيبقى هو فى منتهى الشك ان كل دة تمثيل نظرا لفكر عام سائد بين الشباب الراغبين فى الزواج ان البنت بتلبس ماسك البنت بتمثل عشان تتجوز البنت بتكذب بطبعها ( ولو حصل وداريتى علية حاجة فى اول علاقتكوا للخوف او لاى اسباب شخصية واعترفتى بعدها بالحقيقة حتفضلى كدابة طول عمرك عندة لان الراجل المتفتح اللى يفهم ان البنت او الست انسان لية اخطاء وعيوب ومميزات مش شيطان بطبعه و ممكن لما يستقر ويحب يتحول لانسان متفانى فى العطاء ... ولو لية اى خطا مش شرط انه يكررة للاسف الراجل دة مش موجود على خريطة القطر المصرى .
9. فكرة الـ acceptance الخطة البديلة لقبولك زى ما انتى هى قبولك زى مانتى لفترة مؤقتة لغاية ما يحثل التعارف بينكوا والثقة وتبدا بعدها مرحلة التغيير فيكى واعادة تشكيلك وكل بنت بتقبل دة وفقا لمعاييرها وحبها لخطيبها ومدى تقاربهم الفكرى من بعض وممكن تتنازل شوية عشان خاطرة فى حين ان الشاب بيشتمر اسلوب حياتة وتفكيرة زى ما هو الا مجموعه شكليات انما الاساس بيفضل زى ما هو ولو جربتى واختلفتى معاه فى موضوع جد يخص الحياة الحقيقة زى السكن والعلاقة بين الاسرتين او الاسلوب العام فى التعامل مع الحياه والعمل والمخاطرة عشان ننجح وغيرة صدقينى مفيش ساعتها غير كلمة واحدة ( كل واحد فينا من سكة ) يا اما تفكيرة هو يا اما بلاش منك خالص .
شكرا يا ايمان انك لسة بتفكرى وبتكتبى ومتمسكة برايك وتفكيرك وعارفة انك صح ومبتتنازليش تحت اى ضغوط ... وعذرا لو التعليق طويل جدا بس انا معاكى فى كل كلمة وحبيت ازود حاجات بناء على تجربة شخصية ... للاسف ! .

Eman Hashim said...

يا انونيماس - ياللى مصممة ماتقوليش مين - كلامك منور! عارفة يعنى كلام ينور؟! والله انا اللى متشكرالك انك رديتى
عشان ساعات بيجيلى تعليقات ما معناها انى مجنونة و معقدة و ان انا اللى عندى المشكلة و ببالغ و الدنيا مش للدرجة دى

شكرا ليكى انتى و اتمنى اشوفك علاطول و يا ريت مرة ابقى اعرف بقى
:)

تحياتى بجد ليكى

Eman Hashim said...

استراتيجية ايه بس يا سايكو .. ده عزاب والله العظيم

اللى انتى بتتكلمى فيه ده ان الاتنين بيطبعوا على بعض .. و دى حاجة بتيجى اوتوماتيك من نفسها مش مستنية الاتنين يتعمدوها
اللى بيبقى متعمد هو فى اغلب الاحيان المشكلة

شوفتى يا ام سهير انا ناصحة ازاى؟
ههههههه
الحمد لله انا ماليش فى الحوارات دى
انا لو قلتلك انا كنت باعمل ايه مش هاتصدقى
اهم حاجة السلام النفسى .. بجد .. ملعون ابو اى عيشة تخلى الواحد دايما مشدود و اعصابه تعبانة
هو الواحد ناقص؟
و بعدين اللى تعرف تعمل كده تشرب .. الحكاية كلها ان فى فعلا اللى مش بيعرفوا يعملوا كده
و مش هاحاول اتعلمه انا

dina amin gad said...

begad enty bent gamda moot

bluestone said...

دي وصفة خراب ممتازة .. والبايخ بقى اني تقريبا بعمل اغلبها :)

Eman Hashim said...

الف شكر يا دينا .. و اهلا بيكى

انتى ماكنتيش تعرفى يا بلو؟؟ هههههههههه

silverstone said...

ya ya eman 3ala fekra aly 2olteh da mosh bykhaly al7ad aly mortabt beky bas aly yb3d 3ank da kol alnas 3arfa leh 3ashan a7na mogtam3at monafka w bnmot fe aly ynafk w 2la yob2a magnon aw mosh taby3y aw mosh mtraby ...

Eman Hashim said...

LOOOOOOOOOL @ Silver
3andek 7a2 wallahy
3ashan keda ana raya7t dema3'y men mawdoo3 elbanyadmeen da

magi said...

ايمان بجد مدونتك ممتعه
وريحتك مش وحشه ولا ريحتنا دى عقولهم الى عفنت وريحتها وحشه

Eman Hashim said...

شكرا يا ماجى و ادعيلنا بقى

قلب ينبض بالحب said...

والله يادكتور كنت فعلا مرتبطة بشخصية نفس النموذج الي بتحكي عليه وحاولت ميكنش ليا ريحة وحشة واستعمل البرفان بتاعه بس واضح اني مستهلش ابقى من غير ريحة وحشة حكم دمتي بكل الخير

Anonymous said...

ازيك يا منة الحاقا لكلامى المنور فى البلوج بتاعك :) احب اضيف اضافة خفيفة كدة :)
محسوبك الشاب اللى اللى شايفنا وحشين وريحتنا وحشة و شاكك فينا وبنفكر لية و معندناش لا عقل و لا دين و لا اخلاق
الشاب دة اللى بيرفض اصحابك وفسحك و شغلك الشاب اللى عامل راجل وبيحبك وبيخاف عليكى وانتى اللى متستهليش وانتى اللى مش كويسة هو برضة نفس الشاب اللى بيخرج معاكى و ينزل ويطلع معاكى و يشيل و يحط فيكى على كل تصرف و يعمل جنازة ومحزنة على كل تصرف ويصورلك ان معاكى ابو السباع هو نفسة الشاب الشكاك اللى مش عاوز يعمل اى خطوة ايجابية ويدوس ويبدا معاكى حياة بجد حياة فيها قبول و حب و تحمل للمشاكل مهما حصل حب بمعنى انه يخاف يسيبك فى الدنيا لوحدك هو برضة اللى بياخد من اى تصرف تعملية بحسن نية او اى حقيقة او حاجة عرفها عنك حجة وسبب للمشاكل او للتطويل والممماطلة وبعد ما ينزل ويطلع ويتفسح وياخد بوسة فى السريع ويمسك ايدك ويعشمك يختفى مجرد يختفى التليفون يتغير ويختفى تفتكرى دة شاب قويم الاخلاق ولا ضميرة كويس ولا نيته خير !! تعرفى ان فى فرنسا ممكن بنت او سيدة تدين راجل فى المحكمة عشان عشمها بالزواج وكذب عليها تعرفى ان دى تهمة !!! اد كدة احنا مشاعرنا ماتسواش ياترى مين اللى ريحتة وحشة اللى بيصبر و يتغير و يقبل ويستعد يكافح ولا اللى يختلق المشاكل ويهرب بمنتهى الندالة

بنوتة مصرية said...

هاى ياايمان
محتاجللك
ياريت تسيبلى اميللك عندى على المدونة او رقم تلفيونك ومش تقلقى لانى بشوف الكومنتات قبل اما تنتشر
معاكى نشوى العدوى مذيعة براديو حريتنا ببرنامج عريس تفصيل

Anonymous said...

كفاية على البنت تنازل انها تنخطب لواحد بكرش
كلنا بقينا بكروش
متهيألى أبو كرش يعرف يفسح ولا يركب مراجيح

تحياتى

Eman Hashim said...

قلب ينبض بالحب:
ريحتك مش وحشة .. ريحتك "طبيعية" و فى ناس لازم بنضحك عليهم
و دول مايجوش للى زينا
مش عشان الفضيلة ولا الشعارات الرنانة
بس عشان فى ناس فعلا مش بتعرف تكون الا نفسها
و اللى مش بيحبنى بطبيعتى ببساطة مش بيحبنى

Eman Hashim said...

انونيماس: انا شاطة والله تكونى عيشتى معايا فترة كده من حياتى
مش معقول كلهم للدرجة شبه بعض
انتى كأنك بتحكى قصة فترة من حياتى

ههههههههههههه

Eman Hashim said...

بنوتة مصرية:
ردى فى مدونتك .. و شكرا لاهتمامك

انونيماس:
مش فاهمة قصدك بصراحة

Anonymous said...

يا صديقتى السابقة العزيزة مش قولتلك فى اول بوست احنا الاقرب فى التفكير و الظروف
الحقيقة اة كلهم شبة بعض
ههههه ربنا يرحمنا من الكوميديا السوداء اللى احنا عايشين فيها :)
ومتتاخريش عن البلوج كتير من فضلك :)

تأثير الفراشة said...

:D :D :D
النهارده،أول مرة أشوف مدونتك، و بإذن الله مش هتكون الأخيرة، بس عايزة أقول لك إن أسلوبك جميل جدا و كلامك فعلا حقيقى لحد كبير، خصوصا رقم 1و3و8 و 9 و 10،و الخمس نقط دول بالذات المفروض أنهم مزايا مش عيوب، ربنا يوفقك و يوعدك باللى يقدرك بجد

Eman Hashim said...

قولتيلى آه - مش هاعرف بقى انتى مين؟- هم فعلا واحد كلهم
مهما اختلفوا

شكرا يا فراشة يا جميلة على الدعوة الحلوة دى
و اتمنى اعرف رأيك فى باقى الكلام لو ممكن

ايوشة said...

وليه ده كله الاسهل تفضل دايما على طبيعتها

Eman Hashim said...

هو انتى شايفة ان اللى انا باقوله معناه ماتبقاش على طبيعتها؟

فكرة من الزمن ده said...

تؤتؤتؤتؤ
(وش مكشر وزعلان خالص)ه
ده احنا كده بقى كلنا ريحتنا جايبة لاخر شارع التدوين

عندك حق
الراجل يحب المراة الذكية لكن لما يرتبط بيحب يرتبط باللي مخها على قدها
علشان تعيش
تحياتي

Eman Hashim said...

هههههههههههههه
ضحكتينى والله
الموضوع ان الريحة دى مالهاش اى حلول
بتطلع بتطلع

AyA said...

:) :)

لا ليها حل يا ايمان :)
انك تختلطي بأوساط تانية ليها ثقافة ودماغ مختلفة عن الدماغ دي, بالتالي الكل هتبقى ريحته كده :) مش هتبقى مختلفة عنهم فمحدش هياخد باله :) زي ما في الصين مثلا حاجة عادية جدا ان واحد عنده 10 سنين ويتكلم صيني :) لكن هنا لا :)

أيمن عبد العظيم said...

السلام عليكم ورحمة الله وبركاته
بارك الله لك في مدونتك الرائعة واتمني لك كل توفيق
وادعوك لزيارة مدونتي المتواضعة التاريخ قبل الطبيخ ربما تجد فيها ما يفيدك
http://aymanabdelazeem.blogspot.com/

Eman Hashim said...

متشكرة اوى يا فندم
و انا هناك فعلا دلوقتى

Mohamed said...

ههههههه
توبيك رائع وربنا يكفينا شر الحاقدين
Fkrny

Eman Hashim said...

شكرا يا محمد
ربنا يخليك

الكلمة نور said...

بس هوا ممكن يسال عن الطيبخ والقدرة على الكى واكيد هيسال عن الغسيل
واحتمال احتمال بعيد يسال يعنى لا سمح الله عن تنظيف الشقة
واكيد اكيد واسألينى انا ممكن يجى فى دماغة فكرة ان لوعندها دماغ يبقى اكيد هتكون كفاءة تسد فى البيت
اكيد برضه انت ممكن تقوليله لحظة من فضلك انا عندى خطه زمنية وهدف والكتابة والمطالعة الرشيدة
هايقولك عادى اهو كله عشان الاولاد فى الاخر
ولما يقولك بس كل حاجه ليها معاد وفى الاخر انا هتجوزك يعنى انا الراجل الوحيد فى الدنيا اللى هيشيل همك
هيقولك مش مشكلة تكونى اجتماعية اهو مفسد يرضه لما نزور الاهل والجيران
ولا انتى اجتماعية لاصدقائك بس؟
ياترى انتى مفكرة فى الردود ولا انتى بتفكرى من ناحيتك بس؟

Eman Hashim said...

لو مش بافكر او مش فى دماغى الردود عاملة مدونة ليه؟
المدونة اصلا عشان اللى عايز يقول رأيه فى الكلام يقوله
كمان المدونة هنا معمولة ان اى حد حتى اللى ماعندوش حساب ممكن يرد

دى اول حاجة

تانى حاجة الاجابة على اسئلتك موجودة فى المدونة هنا بس فى بوست تانى اسمه اعادة تعريف الزوجة لو جالك وقت تقراه
عشان بس ماكررش نفسى

بس هو سؤال .. ايه اللى جاب فى دماغك الاسئلة دى؟ ليه حسيت ان فى تناقض بين كلامى و بين ان اللى بتقول كده بتطبخ مثلا؟؟

الكلمة نور said...

انا فعلا مجاليش وقت اقرا كل تدويناتك
اسف لو كان دا تقصير

بالنسبة لعلامة الاستفهام الاولى
ممكن تكونى عاملاها عشان تلاقى ردود

بالنسبة للموضوع التانى
انا عادة كل الستات اللى بيعرفوا يطبخوا واعرفهم كانت دماغهم حلوة
ودا شى مالوش علاقة بيكى
انما كل للى كان قصدى اقوله
ان ممكن ودا احتمال وارد تكون مشاكل البنات مالهاش علاقة بالرجالة
فكل اللى انتى قولتيه ده يريح اى راجل عاقل

Gina said...

BRAVOOOOOO ya Emy! walahi gebty men el a7'er!! :D

MEN 7A2Y!!

Eman Hashim said...

الكلمة نور:
ماعتقدش ان ده الحال دلوقتى
لكنه الحلم اللى نفسنا فيه

شكرا يا جينا .. ربنا يخليكى ليااااااا

Shaimaa said...

عارفة يا ايمان ده فعلا اللى اللى بيطفش الرجالة من حوالينا "الريحة الوحشة" أو البنت اللى عندها شخصية- عارفة كل ما يجيلى عريس ماما تنبه عليا 60 تنبيه .. متعلقيش على حاجة ومتتكلميش فى حاجة.. تقعدى مبتسمة وبس..كل ما يقول حاجة تقولى فعلا مظبوط
أقوم أنا أقعد أحفظ فى الكلمتين دول طول الليل وأول ما أقعد قدام أى عريس أتصرف علطول بطبيعتى وأعلق وأناقش.. وأضحك.. وأتحرك.. وأسأل و و و..الخ فتكون النتيجة فشل التجربة. عياط ماما

Eman Hashim said...

والله يا شيماء انا اللى اعرفه ان مفيش حاجة ولا حد يستاهل ان الواحد يدعى ما ليس فيه
و ان اساس الحب التقبل من غير تنقية ولا تأييف

sea said...

تعرفى يا ايمى انى كنت لسه بقول لنفسى شوية من كلامك ده ...فعلا لاحظت الرجالة او بمعنى ادق العرسان بتهرب منى وفكرت ليه.. لاقيت انهم حسوا انى بنت عندى مخ وبفكر وطموحة وبشتغل وعايشة حياتى كويس ...هما حسوا انى ليا شخصيتى المستقلة وانى مش مستنية الفارس اللى على حصان ابيض اللى هيجى ينقذنى من العنوسة
كنت بقول لنفسى المفروض انى لما اقابل عريس بعد كده محكيش عن حياتى ولا
طموحى ولا اهتماتى ولا هواياتى ولا شغلى ولا سفرى
والمفروض انى افهمه انى قاعدة مستنية سيادته ينقذنى بقى من وضعى الاليم ويمنحنى لقب متزوجة؟؟؟
بجد بنقابل عقول تعبانة مسيطرة عليها افكار قديمة متخلفة

Eman Hashim said...

مع ان مفيش اى حاجة تخوف من البنى آدمو المستقلة القوية
هم بيخافوا لان هى السيطرة عليها امر مش سهل
و ده شىء حيوى بالنسية لهم
لازم يحس انه طابق على نفسها عشان يبقى راجل
ربنا يهدى

Anonymous said...

مساء الخير
انا اسمى عبدالرحمن و عايز ارد عليكو فحاجه... انكو زي مانتو شايفين الرجاله كائنات خرافيه بشنب (مقتبس( فان رجاله كتير شايفنكو كائنات خرافيه بشعر. و انا عن نفسى شايف ان مشكلتنا اكبر من كده و مش لازم نحصرها ف اختلافنا الجنسى , لازم الاول نبص لمجتمعنا المتخلف و الغير متدين و الى بيبان فظاهره غير كده نظره فاحصه ,, انا عارف ان ده مش هيخلينا نعزر بعض بس على الاقل نفهم احنا بنعمل كده ليه.
انا اعتقد انكو بتعانو فبعض المواقف من بنات زيكو لمجرد انكو مختلفين ف حاجه معينه , زى و خصوصا مظاهر التدين و اكيد حاجات كتير تانى.

اشكركم و لو عايزين مشاركه رجالي تاني اكون سعيد جدا

Eman Hashim said...

ازيك يا عبد الرحمن و اهلا بيك
معلهش انا مش واخدة بالى ازاى انا فى البوست ده باتكلم عن الاختلافات الجنسية بين الجنسين
و ايه دخل الشعر و الشنب بالكلام ده؟

" انا اعتقد انكو بتعانو فبعض المواقف من بنات زيكو لمجرد انكو مختلفين ف حاجه معينه "

معلهش انا مش فاهمة الجملة دى

Anonymous said...

اسف اصلى اسه جديد على الكتابه على blog
انا قصدى اختلافات مابنكو زى الحجاب و التدين و يمكن دول اكتر حاجتين بشوف البنات بيتكلمو فيها على بعض

عبدالرحمن

Eman Hashim said...

والله هو فى ناس الحجاب واكل مخها زى مايكون الدين كله فى الحجاب
ماعرفش مين الله يسامحه اللى عمل كده

AyA said...

يا استاذ عبد الرحمن
انا -بعد اذنك يا ايمي ^_^ -عندي بس تعليق صغيّر, مين جاب سيرة الحجاب دلوقتي؟ وبعدين ليه دايما البنت القوية يعني بنت مش محجبة او بمعنى أدق اللي غالبا بيكون "مش محجبة " ده تلميح ليه (مش محترمة)؟!!!! انا بقول قوية وبس مقلتش علمانية ولا ليبرالية انا بقول قوية, وده اللي بوست ايمان اصلا بيتكلم عنه, شخصية البنت المستقلة, اللي شايفه نفسها بني آدمة مش أسنان راكبة فوق بعض والراجل هو التقويم الدائم بتاعها اللي هينظملها حياتها كلها وتفكيرها كله مش يستشرها ومش مشكلة يكون القائد بس يبقى فيه رئيس ورئيس وزرا ^_^ زي ما مثلا نظم حكم الدول

monmon said...

بصى انا مقتنع بكلامكو جدا مع انى ساعات غصب عنى ابان دكتاتور بس مبيكنش اصدى التفاهات زى اعرفى ده و ماتعرفيش ده و الحاجات الصغيرة دى, بس كتير كل ما اتكلم مع بنت على المسؤليات المشتركه يحصل فيه اختلاف . انا من وجه نظرى ان اهتمام الست ببيتها و جوزها من خلال وجودها اكتر فالبيت و العكس للراجل ,, اقصد من ناحيه الشغل, انا عارف ان ده ضد فكره الاستقلاليه للست بس انا بحس ان البيت الى فيه ست عايزه تشوف مستقبلها دى ست انانيه شويه لانى اعرف ناس كتير كده و بشوف اد ايه علاقتهم وحشه ببيوتهم و يمكن لانى مقتنع انى لو بعمل حاجه كويسه ف شغلى و بتقدم فيه فده عشان بيتى و اسرتى لكن الست فمعظم الاحيان عشان نفسها .
هيا معادله صعبه و الله بس انتو برضه لازم تعرفو مخاوفنا و لازم تعرفو احنا بنبقى عايزين نتجوز و نحب ليه.
انا مش ضد الست المستقله بس ضد الست الانانيه و مش ضد الست الناجحه بس لازم تحسسنى ان لي اولويه ف حياتها مش مجرد تكمله لشكلها الجتماعى
و على فكرة الراجل لو حس ان مراتو او حبيبتو مش محتاجه لرجولته بتتكسر حاجه جواه زى بالضبط الست الى الرجل الى فحاياتها مابيلاهاش كلمه حلوه.

monmon said...

sorry monmon is Abdelrahman

randomika said...

I love this post ... eh el gomodya ely enty feeeha di ya Emaaan.

La2 bs begad I love it la2eno da fe3lan ely 3awza a3melo w da ely kol showya 7ad yeegy ye7asesny eno ehh ely ana ba3melo da w eny ezay ba3mel keda w eny ezay mabagdebsh w mabat7angelsh w mabatsahweksh w mesh batnasha2 3ala ay 3arees w 7'alas .. by7asesooony eny wa7da habla w mesh 3arfa masla7etha w mn wagebhom el watany enohom ywa3ooha 3shan.
Ana 7a7'od el post da marge3 3shan mansash wala wa7da menhom wla 7ad yehez wa7ed men mabad2y :D
Mercii merci :)

Eman Hashim said...

randomika:

ahlan beeky ya fandem fe ay wa2t
wetfaddaleeh taba3an el post we sa7beto ta7t amrek
3ala fekra .. ana 3arfa kowayes we 7asa kowayes awy elly enty bet3any menno

Eman Hashim said...

عبد الرحمن:

شكل المسئولية و تقسيم كل اتنين للواجبات بينهم امر نسبى جدا
ممكن اتنين يتفقوا على حاجة و تلاقى اتنين تانيين شايفنها شكل حياة مش منطقى و غير فابل للتطبيق
اللى انت نفسك ذكرته على انها امثلة للأمور الهايفة فى رجالة كتير ممكن يختلفوا معاك فيه
و ان كنت انا موافقة شخصيا
بس الفيصل هنا هو الاتفاق .. بمعنى ادق .. انا اللى بارفضه ان راجل يشوف ست و يعجب بيها و بعدين بعد مايخطبها يقوم مقيفها على مقاسه
زى ما هى هاتاخده زى ماهو و هاتحبه زى ماهو .. هى كمان من حقها بنى آدم يحبها زى ما هى

قصة الست اللى عايزة تشتغل انانية دى انا شايفاها انانية من ناحيتك انت ان سمحتلى
ليه؟
الواجبات المنزلية لما الست بتخرج للعمل بتتقسم على الراجل و الست
و لا الراجل لحد النهاردة بيشوف انه لو حمى ولاده و ساعدهم فى الواجب ولا غسل المواعين انتقاص لرجولته فعمره بالتالى ما بيرضى بده
رغم ان لا الدين قال كده ولا امر الست بكده
و لا فى منطق بيقول ان سلام الكيان الاسرى يعتمد كليا على اعتمادية الست المادية على جوزها اولا
و على رميها لمستقبلها المهنى ثانيا

على فكرة .. اهتمام ست بمستقبلها و رغبتها فى انها تنجح مش سبة ولا تهمة عشان ننفيها او نحاول نلف حواليها
و فعلا بقى الام تعليمها و خبرتها بتفرق
انا شفت ده بمنتهى الوضوح اما عملت مقارنة بسيطة بين زميلاتى وبناء على مستوى اماهاتهم التعليمى و الثقافى و طبعا النضج
الام بتفرق اوى
خصوصا فى البنت
و تأثير رهيب كمان
عشان كده فى اللغة العربية فاقد ابوه يتيم .. لكن فاقد امه لطيم

Eman Hashim said...

و عشان تبقى عارف
اللى بيكسر راجل مع مراته
انه مايكونش مكفيها فى حاجة من اتنين
السرير .. او الفلوس

لو مش مضبط حاجة من دول ييبان عليه
راسه بتبقى مطاطية
و عصبى
و واخد خط دفاعى علاطول
و مكرهها و مكره نفسه فى العيشة

شمس العصارى said...

انتى عارفة لو الموضوع زى ما بتقولى
حبقى اسهل جدا و الحياة حتمشى
على الاقل حيبقى فى حوار بالعقل
و المنطق الصحيح هو الى حيكسب
لكن المشكلة مفيش كده خالص خالص
كله تمثيل و كدب و تجمل
وده مش بيدوم
الصراحة الحل فى الصراحة
و نلتقى بعد الكذب

Eman Hashim said...

كله تمثيل و كدب و تجمل
وده مش بيدوم

بالضبط كده
دى المأساة. انهم على الاكثر بعد سنتين جواز بتلاقيهم اخدوا المقلب. الفرحة بالجواز و بان كل حاجة حلال راحت ... الفرحة بالفستان و الشقة و العفش راحت... و غالبا الخلفة تمت و فرحتها برضه راحت. فيكتشفوا المقلب اللى اخدوه
بكل اسف شفتها بعينى
بتلاقي خيبة الامل و النكد بقى. و قاعدين مكبوسين و شكلهم اكبر من سنهم
ربنا يهدى الجميع
و يثبتنا

المثالي جروب said...


شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر
شركة المثالية للتنظيف بالقطيف
شركة المثالية للتنظيف بالجبيل
شركة المثالية للتنظيف بالاحساء

المثالية للتنظيف سيهات
المثالية للتنظيف الاحساء
شركة مكافحة حشرات بالجبيل
شركة رش مبيدات بالجبيل

المثالي جروب said...


شركة تنظيف منازل بالخبر تعد افضل شركة تنظيف بالخبر والمنطقة الشرقية حيث تستطيع تقديم افضل خدمات التنظيف الشاملة ومكافحة الحشرات بالضمان بمحافظة الخبر باعلي جودة ممكنة وبارخص الاسعار المثالية التي لا تتوفر الا مع شركة تنظيف بالخبر فأذا اردتم الحصول علي خدما تنظيف المنازل والشقق والفلل والقصور والبيوت والمجالس والكنب والموكيت والمفروشات بجميع انواعها فتستطيعون الحصول علي جميع خدمات التنظيف بالجودة والدقة المثالية وبكفاءة عالية وبدقة ليس لها مثيل وهناك اهم خدمات التنظيف وهي خدمات تنظيف المجالس والكنب والمفروشات والتي تقدمها شركة تنظيف مجالس بالخبر بالاعتماد علي كافة الاساليب الحديثة وماكينات التنظيف بالبخار المتخصصة في التنظيف والتجفيف وازالة البقع كما ان شركة المثالي جروب لديها فروع بالمنطقة الشرقية فيتوفر لديها الخدمات الاتية

شركة تنظيف فلل بالخبر
شركة تنظيف شقق بالخبر
شركة تنظيف منازل بالدمام

شركة تنظيف منازل بالقطيف
شركة تنظيف بالقطيف
شركة تنظيف مجالس بالقطيف
شركة تنظيف فلل بالقطيف

شركة تنظيف خزانات بالجبيل
شركة تنظيف مسابح بالجبيل
شركة صيانة مسابح بالجبيل

المثالي جروب said...


شركة تنظيف منازل بالجبيل
شركة تنظيف بالجبيل
شركة تنظيف مجالس بالجبيل
شركة تنظيف شقق بالجبيل
شركة تنظيف فلل بالجبيل

شركة كشف تسربات المياه بالجبيل
شركة تسليك مجاري بالجبيل
شركة شفط بيارات بالجبيل

شركة نقل عفش بالجبيل
شركة نقل اثاث بالجبيل

المثالي جروب said...


شركة تنظيف منازل بالاحساء
شركة تنظيف بالاحساء
شركة تنظيف شقق بالاحساء
شركة تنظيف مجالس بالاحساء
شركة تنظيف خزانات بالاحساء
شركة تنظيف مسابح بالاحساء
شركة صيانة مسابح بالاحساء

شركة كشف تسربات المياه بالاحساء
شركة تسليك مجاري بالاحساء
شركة شفط بيارات بالاحساء

شركة نقل عفش بالاحساء
شركة نقل اثاث بالاحساء