Saturday, May 16, 2009

49 - ازاى تبقى طموحة و انتى سمرة؟

المشهد الاول

تدخل الفتاة (السمرة) الى مكان شبه السبا لتتقدم الى وظيفة هناك. تنظر لها الفتاة خلف الشباك بكل قرف من مدى سمار بشرتها معلنة انه لا وظائف خالية .. لتخرج الفتاة تجر اذيال خيبيتها (السمرة) ... و لكن بعد استخدام الكريم المعجزة لكدة 14 يوم .. و بعدما اصبحت هذه الفتاة (بيضة) تدخل المكان تتمخطر فى ثقة بياضها المتناهية لتزبهل الفتاة اياها .. و تنظر الفتاة بانتصار لانها طبعا اتعينت!

المشهد التانى

 
تدخل الموديل (السمرة) الى الاستديو لينظر اليها المخرج معلنا انها اكيد  (بسمارها د ) غير موهوبة, لتخرج الفتاة . و لكن بعد 14 يوم من الجير المتواصل,  تعود (بثقة هذه المرة) و لكن قبل ان يذهب المخرج بعيدا,  تشد هى الفولار - فى ثقة - من على رقبتها و تنظف به الزجاج الواقفة من خلفه, عشان بيان (قد ايه هى بيضة) حتى "يتنح " المخرج فى جمال بياضها ... ويعطيها الدور!!!

المشهد الثالث

 
تدخل الفتاة الى مقر عملها الجديد و هى كلها امل ... و تحدى ...و اصرار ... و ارادة... 
و الكريم المعجزة اللى بيضها و ده كان من اهم اسباب تكريمها !!!


------------


دى كانت عينة من الحملة الاعلانية اللى قايم عليها كريم (فير اند لوفلى) من قرون من الزمان. اللى اعتدموا من زمن فيها على انهم كريم - بيبيض - و عليه يبقى هو ده الكريم اللى هو! لان ازاى بنت تبقى سمرة و تفضل كده يعنى؟؟ هو هبل؟؟

و طبعا ده ماكانش اختراع جديد .. فاحنا و الحمد لله لاننا باريعين فى اختراع اساليب جديدة لتكسير مقاديف البنات , اخترع مجموعة مننا ان السمار وحش! 

و من هنا تلاقى جمل زى "هى حلوة بس سمرة!!" ... "مش مهم اى حاجة بس المهم انها بيضة" ... و "كان نفسى بناتى مايطلعوش سود!!!" ... و "ماشاء الله عليه ... خطيبته بيضة!" ... و كلام من ده

طبعا اى حد دخل اى مجل مكياج ممكن يشوف بعينه قد ايه فى بنات بتتفنن فى انها "تبيض" نفسها, و  ده طبعا عشان تكمل المواصفات العظمى للعروسة اللقطة ... (هبلة و مدملكة و بيضة شق اللفت!!!)

و المشكلة مش فى اللون فى حد ذاته , الموضوع اعمق من كده. اما يبقى كل رصيد الانسان شكله, و اما تبقى ذاته مبنية على كم واحد بيقول له انت شكلك حلو , و كمان اما يبقى النبى آدم ده متربى على ان شكله وحش, يبقى اكيد الانسان ده اتدمر للأبد.

انا مش ببالغ ... انا اعرف امهات بيربوا بناتهم على انهم "وحشين" و البنت تعيش فعلا مقتنعة بكده!

و ماعتقدش ان دى ممكن نطالبها بأى حاجة بقى. لا طموح, و لا ثقة فى نفسها, و لا رغبة فى النجاح, و اكيد ممكن تتخيلوا دول لو اتجوزوا بيحصلهم ايه!

اما واحدة تقول لى " يا ايمان انا مش هلاقى عريس زيه تانى, كويس انى لقيت حد يبص لى اصلا بسوادى و تخنى ده"!!!, انا ماعرفتش ارد, لانى ببساطة عارفة ان اللى فضل يقول لها كده طول عمرها هو امها و طبعا ابوها اللى ليل و نهار يتغزل فى الموديلز اللى فى الكليبات (البيض المسلوعين)
مانا اما اربى بنتى على انها شكلها يقرف و انا امها, طيبعى انها تطلع الشباب بيلعبوا بيها الكورة لانها فى عرض حد يقولها كلمة عدلة!

انا موضوع السمار و البياض ده مابفهموش!!! آه والله. من الجاحات اللى حتى مش باعرف ارد فيها, اصل هاقول ايه؟

انتوا عارفين كم مرة اتسألت " انتى مش زعلانة انك سمرة؟""
و كم مرة شفت فى عينيهم انهم مش مصدقننى اما باقول لأة؟؟
بلاش... كم بنت سألتنى ليه باجيب مكياج غامق. و اما اقول ان ده لونى, بابقى متأكدة انهم فاكرننى باعيش عليهم؟؟
  لا و الانأح بقى اللى يتعامل مع الكلمة على انها شتيمة: "لالالا انتى مش سمرة اصلا , انتى قمحية!!" كأنها سبة
لدرجة انى مرة واحد - راجل كبير بود مش معاكسة - بيقول لى يا سمارة, و كان لطيف فعلا, لقيت واحدة بتقول لى "ايه السخف و الجليطة دى؟ ثم انك اصلا مش سمرة"!!!!
 



يعنى انا المفروض دلوقتى ابقى العانس الحقود السمرة اللى مش رومانسية !! ... و ليسة!

54 comments:

قلوب حائرة said...

هههههههههههه والله ياموني جبت من الاخر وكلمتين في الجون المصيبة اننا بقينا بنربي اولادنا على ان الجمال هو رسا مالهم في الحياة وان البيضة ليها تمن في سوق الرجالة والسمرراء ملهاس تمن وتحمد ربنا ان في حد بصلها وعجبي ربنا يهدي ويصلح العقول دمتي ياموني بكل خير

77Math. said...

ههههههههههههههههههههههههههه

آآآآآآآآآآآآآآآه يا قلبي

هي حلوة على فكرة بس سمراء :(

ناس متخلفة تقولي ايه يا بنتي، وتلاقي الستات اللي بتقعد تنقي دي معفنة أصلا ووزنها يجيب ثلاث بنات من اللي بتتريق على سمارهم

وعشان كدا البنات معظمهم وجههم لما يحطوا مكياج بيبقى كإنهم مغطسينه في صحن من الدقيق !!

:D

مصري بالغربة said...

السلام عليكم
يا عانس يا حقود
ههههههههههههه

بجد بجد مدونتك هايله جدا وانا متابعها من زمان على فكره بس مكنتش باعلق

بس المره ديه هاعلق لانك بجد اتكلمتي في موضوع مهم جدا جدا وهي الحاله النفسيه للبنات
وانا اللي اعرفه ان البنات حساسيين جدا جدا
فميصحش لام او اب او اي كان انه يقول على البنت انها وحشه حتى لو كانت هي كده بالفعل
لازم نراعي شعور بعض ونخاف على بعض

وشكرا ليكي ولمدونتك بجد

مياسي said...

والله معاكي حق
أنا بيضا بس دعايات فير أند لفلي بتقهرني!!!

وتلاقي المجتمع بيحكي للوحده سمرا زي كأنها مسبه
"صحيح فلانه سمرا بس كويسه"
!!!

هي السمرا مش خلقة ربنا!!!

أنا شخصيا بشوف البنات السمراوات لطيفات وأمامير جدا جدا :)

مش بجامل والله

mimi said...

برافوووووووووووووووو

موضوع هايل ... واقتباس من الإعلانات يعزز الموقف...

دي ثقافة جدتي وجدتك ...
البنت البيضا ... تبقي جميلة

علي فكرة بقي ... كليوباترا نوبية سمراء ...

psycho said...

يالهوييي عليكي ان حتي الاعلان حللتة يا بنتي ارحمني نفسك:)

و بعدين احنا دايما كدة محدش عاجبة حالة البيض عايزين يسمرة و السود عايزين يبيضة و التخينة عايزة تخس و الرفيعة عايزة تتخن

و اهــــــــــم حاجة في كل دة
الثقـــــــــة الداخليــــة

سمرة برضو .. وافتخر said...

وقال ايه يقولولك السمار نص الجمال
والبياض الجمال كله

انا اصحابي اقترحو عليا مرة اني استعمل الكريم المنيل ده وقالولي على انواع تانية شبهه (قال يعني بيساعدوني اعتني بشكلي وكده) واسغربوا جدا لما قولتلهم (ليه هو انا كده وحشة؟؟ انا عاجبني لوني ومش ممكن افكر اجيرو بالميكب الفاتح ولا الكريمات الهابلة دي) وافتكروني اتضايقت!!!!
مش متخيلين ان في حد اسمر مبسوط بلونه وواثق في نفسه كده (ربنا يخليكيو ليا يا باباتي وماماتي)

ده احنا والله عندنا جمال مفيش منه بس للي يفهمه ;D

معنديش ليهم رد غير ده:

دول عايروني وقالولي
ياسمر اللون يا لالالي
صحيح انا اسمر
وكل البيض يحبوني يالالالي
في عطرهم مابين الفل حطوني يلالالي
:))))))))))))))))))))))

Kontiki said...

دة على اساس انك سمرة :)
ازيك يا منة
السطحية متأصلة فى المخرج اللى عمل الاعلان درس المجتمع و عارف العقد اللى عندك حق فيها وذكرتيها ولعب على الحبل اللى حيخلى البنت تشترى وبينى وبينك فى ناس بتبقى محتاجة منتجات التجميل دى حقيقة بس من منطلق انهم هما مش عاجبهم او عندهم رغبه فى تفتيح لونهم بمزاجهة يعنى مش عشان البنت كدة وحشة ومتربية انها لونها كدة وحش ولازم تبقى بيضة زى شق اللفت عشان تتنيل :) لا مؤاخذة تتجوز
يا شيخة بلا هم تربية معفنة و مجتمع سطحى متأسلم و شبان تافه وبتوع مصالحهم و عبيد لاهاليهم ومفيش حد عندة شخصية عشان واحدة تفكر تبيض
و لا تزرق عشان خاطرة :)

enjy said...

انا شايفة ان اللى عامل الاعلان دة شخص عبقرى فعلا.....عارف مكان الهشاشة النفسية جوة البنات فى مجتمعنا وصوب حلو اوى ناحية الهشاشة دى وضرب جامد

hamada said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

Anonymous said...

والله يا ايمان انا مش عارفة هى مشكلة اهالينا ولا مشكلة مجتمع اتربى على كده يعنى انا مثلا مش سمرة يعنى فعلا لونى قمحى فاتح كمان بس عندى اختى الاصغر بيضاء بياض جامد علشان كده ماما كانت دايما محسسانى بكده ان اختى احلى وفضلت طول عمرى بالاحساس ده وما كنتش امى بس لا كمان وانا فى المدرسة كان عندى 2 هما صاحباتى الانتيم وكانوا برده بيض ومرة مدرسة الموسيقى اختارتهم علشان حفلة وانا لا مع اننا دايما فى كل حاجة سوا سمعتها بتقول علشان دى اسمر منهم .. يعنى مش امهاتنا بس . انا على فكرة فضلت بالفكرة دى انى شكلى وحش لحد لما كبرت واشتغلت وعرفت من الناس انى شكلى حلو ومش سمرا مع انه مش عيب انى اكون سمرا بس ياريت كل ام تعرف ازاى ترفع من الروح المعنوية لبناتها
ونبطل نقول ان البياض هو الجمال كله ..لا كل بنت ربنا خلقها جميلة بس هى تعرف جمالها فين
والسمار يجنن على ناس كتير

mino said...

3'AREEBA AWEEEE OMAL ANA BATFANENNN TOOL EL SEEF BEL TANNING LOTION 3ASHAN ASMAR LIH????

ABATTAL BA2A .. YA LAHWY .. DA TELE3 MAWDOO3 KEBEER

:)) KEEP GOING EMOS

ايوشة said...

ههههههه اتكلمتى فى مشكلة تؤرق ملايين من الفتيات المصرية فعلا ساعات كده الناس بتحسسدك ان السمار ده حاجة مقرفة اوى وانتى ااقل منهم علشان سمرة
ياسبحان الله زى ما يكون احنا اللى اختارنا اشكالنا يلا ربنا يصلح الاحوال

Eman Hashim said...

قلوب حائرة:

المهم بس ان انا و انتى و غيرنا من المقتنعين بالكلام ده نفتكره كويس لو حد فينا ربنا انعم عليه بأطفال
كل واحد فينا ممكن يكون التغيير اللى نفسه فيه
انا مؤمنة ان احنا ممكن نعمل حاجات كتير ان شاء الله
و شكرا لعبورك الكريم

77 math:
LOOOOOOOOOOOOOOOOOOOOOOOOOOL

انتى يا بنتى مسخرة ... بتضحكينى بشكل مش طبيعى
و عندك حق
دول صنف ستات النوادى و الجوامع

مصرى بالغربة:
انا كده بقى هازعل منك
لازم لو سمحت اعرف رأيك فى كل الكلام اول ما يجيلك وقت
و عندك الحق الفكرة فعلا ان البنت - او الولد على فكرة - لازم يحسوا بقمة التقدير من اهاليهم
ماينفعش الاهل يكونوا مصدر اى شىء غير الحب و الثقة

Eman Hashim said...

مياسى:

هو اصلا انا مش باحاول اخش فى جدال "والله فى سمر حلوين" ده
من اساسه كده الموضوع مرفوض حتى و لو للمناقشة
دعايات الكريم ده بنتقطنى مش بس بتشلنى


mimi:
بالضبط كده
عندك حق جدا فى كلامك
و الاعلانات دى اصلا مهزلة و مليانة امراض نفسية
http://justurhead.blogspot.com/2007/01/pampers.html
اقرى البوست ده
فيه كلام اكتر كمان

Eman Hashim said...

ماهو بسبب الموضوع ده يا سايكو مفيش لا ثقة داخلية ولا خارجية اصلا
و مش هايبقى فيه طول ما تربيتنا بتهتم باللى برا


سمرة و تفتخر:
اهو انتى كلامك ده يعتبر امتداد للبوست
تسلمى يا بنتى
و حلوة الغنوة اللى انتى كتبتيها

Eman Hashim said...

Kontiki:

ازيك ... ليكى وحشة
عاملة ايه؟
هى فعلا لازم تزرق ... هههههههه ... وحشتينى و وحشنى كلامك اللى فى الجول
بتجيبى من الاخر طول عمرك

انجى :
هو عبقرى تجاريا .. بس كفن - لو اعتبرنا ده نوع من الفن - هو مفسد مش مبدع

حمادة:
هاعدى على الجروب حاضر
شكرا لدعوتك الكريمة

Eman Hashim said...

Anonymous:
كلامك وجعنى .. مش عارفة اقول اكتر من كده!!

مينو:
الموضوع طبعا كبير .. امال انتى فاكرة ايه بقى
هههههههه
تان ايه
انا نفسى اعرف كم واحدة مصرية عادية بتعمله اصلا

أيوشة:
اخترنا ايه؟؟؟
يا بنتى ده عته
اه والله
اصل اصلا هو مش حاجة وحشة .. و لو حاجة وحشة فعلا يبقى ده سبب ادعى ان الواحد مايدايقش صاحبه بيها
بس تقولى ايه من مجتمع متعود يضحك عاللى بيتكعبل و يقع؟ غير انه مجتمع فعلا متخلف

نور القلب said...

السلام عليكم
انا اعتبر بقالى اكتر من 3 او 4 شهور متابعه فى صمت
بس الموضوع شدنى جدا طبعا زى باقى مواضيعك الجميل بس انا كنت كاتبه موضوع مشابه ليه فى مدونتى اسمه ((على اى اساس))
الرجل بيختار زوجته
المهم بالنسبه للبياض والسمار فده عقده عند معظم البنات فى الوطن العربى مش فى مصر بس
ومن خلال كده بقه عقده برده عند الرجال وامهاتهم
وللاسف بسبب المجتمع ونظرته للفتاه السمرا
خلقنا مجموعه كبيره من البنات اللى ثقتهم معدومه بنفسهم
وبدل اننا اكيد مش هنغير ثقافه مجتمع باكمله
بس ممكن نغير ثقافتنا احنا الاول لو مش مع نفسنا واصحابنا هيبقه فى يوم من الايام مع بناتنا وبكده يبقه غيرنا ثقافة مجتمع جديد وجيل جديد
بس المهم ان محدش يفتح ودانه لاصحاب النفوس الضعيف اللى مش عارفين الدين كويس ومش عارفين ان مفيش حد بيخلق نفسه ربنا اللى بيخلق
هما مش عارفين انهم كده بعيبوا على خلق الله
طولت جداااااااااااااا سورى
بس دايما كنت بسمع مثل يقول لولا سمار العين ما كان نورها
تقبلى مرورى
سلام

Anonymous said...

انا أول مرة أدخل مدونتك بس الموضوع عجبني جدا لأنه واقعي وحصل معايا. أنا كان جايلي عريس عن طريق الأصدقاء لكن المحروس كانت أمه هي إلي بتختارله و عندما شاهدت صورتي ووجدتني سمرا رفضت باألاطة لأنها عايزة شق اللفت لإبنهاز أنا لم أعلم بالموضوع إلا بعد أن أنتهى, لأني طبعا أرفض الإرتباط بهذة الطريقة العقيمةو خصوصا من واحد ننوس عين أمه, لكن ما أحزنني أن أمي لم يضايقها إلا كوني سمرا و كأنه فعلا عيبز

ألأدهى و الأمر أن امي و خالاتي عندما يرون واحة غير جميلةيصفوها ,بالنص, سمرا بس دمها زي العسل, و كأن عيب السمار يعوضه خفة الدم, و الغريب أن عائلتنا كلها سمرا و قليل جدا من فلت من و صمة المجتمع الغريب ده.

تعرفي أنا خطيبة أخويا بيضا, زي شق اللفت, مرة و إحنا بنتفرج على صور الخطوبة خالتي حبت ترفع من روحي ,المعنوية فقالت مجاملة إني أجمل من خطيبة أخويا, جبر خاطر يعني فما كان من أمي إلا إنها انتفضت و نهرت خلتي بشدة مشددة عليها بكلمات مثل "مااتقوليش كدة" و لا كأني موجودة و حاسة و موجوعة.

و بعد كدة تهب فيا أمي لأني يتكسف من أي شاب يحاول يكلمني وعندما يمدحني أي حد أشعر انه بيشفق عليا ليس إلا و أحمر خجلا كأي مراهقة إذا تحدثت مع أي شاب فأنا و الحمد لله النموذج المثالي لما تتحدثين عنه.

و أخيرا أنا أسفة لو طولت عليكي و على قرائك بس بجد كلماتك كانت في الصميم فتحت الجرح و كان من الأفضل تنظيفه و كيه حتى لا يظل يلوث نفسي.

و شكرا

Emad said...

salam alikom

Nice post about real problem but that good men say that to let girls know how stupid they are,its better to live single than to live that stupid partner.right?

Anonymous said...

:) nice

Anonymous said...

بمناسبه التربيه و العقد اللى بنرسخها فى دماغ البنات و هما صغيرين حد شاف اعلان بامبرز الجديد اللى بيقول اولادنا بيتولدو فى فروق بينهم. و جايبين الولد بيلعب بالمكعبات اللى بتدخل جوه الجردل و مركز قوى فى الاشكال و عمال بيدخلها صح و البنت عماله تخبط بالمكعبات عالجردل من بره كده و مش عارفه ياعينى تدخل الاشكال. و بعدين تقوم قايمه خابطه اللعب كده و موقعاها اكنها عندها اعاقه ذهنيه. و يقولك فى اخر الاعلان سيبى اولادك يكتشفوا نفسهم.نفسى اعرف هما بجد شايفين ان ده الفرق بين الولد و البنت ؟

77Math. said...

by the talking !

نسيوا ان كل المصريين كدا لو راحوا برا حيتقال عليهم

black !

هـئ

eman said...

أولا أحب أهنيكي على المدونة الجميلة دي , وبصراحة دي أول مدونة أعلق فيها على أي بوست من المدونات الكتيييييير اللي أضفتهم للمفضله عندي من شهور على أمل اني أخد الخطوة الجريئة وأدخل في عالم التدوين...

أما بخصوص موضوع السمار , فأنا بقى معاكي وهو السمار وحش على العكس تماما (ده حتى السمار نص الجمال) ودي هي الكلمة اللي بأرد بيها دايما من قديم الازل على كل واحده تحس بالخجل من سمارها او واحده ظريفة تحب انها تتعدى على سماري , أو لون بشرة أي واحدة تانية قدامي.

أنا فخورة بأني سمراء اللون ، وبالمناسبة أنا من بورسعيد "وده أول أمر بأفخر بيه فعلا" والسمار أو كما يقال اللون القمحي بس انما برده شايفاه سمار سمة مميزة لكل المحافظات الساحلية ... بس نقول ايه الناس دائما تدعي التحضر ولكن غالبيتهم عايشين وهم متمسكين بعقليات جدة جدة جدتي .. وده بقى اللي مخليني مش قادرة أفهم ليه!!؟؟؟ .. هو الاعلام عندنا عايزنا نتحضر والا نتقهقر.

ويعني ايه سمرا أنا مش فاهمه!! هو احنا خلاص هنرجع لزمن الجاهلية وبدل ما يكون الحكم على الانسان بعمله وايمانه وتقواه بقى بلون بشرته .. والا الدكتور مش هيديني تقدير في مادته لاني سمرا وفلانه يديها لانها بيضاء
بجد البنات محتاجه تعقل شويه وتشيل من دماغها لستة التفاهات اللي معتقدينها دي , ويبدأوا بتعزيز ثقتهم بنفسهم أكتر.

أنا أسفه ان تعليقي طويل شوية بس بجد موضوعك شدني لانه فعلا واقع آخذ في الانتشار

Emad said...

it's me again i forget to tell you as fact from some recent studies found out that ARAb ARE RACISM Agianst black people.so its not only against girls,Another fact noway ARAB man agree his doather get married to BLACK man here in usa.thanks with my best wishes for arabic culture.....

magi said...

فعلا الناس بتستهبل جامد والمشكله ان البنات بتصدق وتبدأ تحط اكوام الجير على وشهم كأن ده هيخليهم احلى
وبالنسبه للتان علفكره الشمس عندنا بتعمل تان طبيعى لاى حد حتى لو كانت بشرته فاتحه خصوصا حد زى بيحب البحر ورياضته الاساسيه السباحه
تخيلى ان ناس بتقولى متنزليش البحر عشان متسمريش وسيبك من السباحه دى هتسمرك وكده
انا شخصيا افضل انى اسمر على انى منزلش البحر
السمار حلو جدا جدا بدليل ممثلات وفنانات سمر كتير والناس بتحبهم وشايفه انهم ملكات جمال
مثلا هيفاء وهبى مش بيضا هى قمحيه وكل الناس بتقول عليها حلوه جدا وقمر

أحمد عاطف said...

مش عارف يبدو ان انا اللي مجنون

انا عن نفسي باعشق السمار

ولما سافرت السودان كنت حاسس اني في الجنة من كتر ما انا باشوف بنات سمرا

ولو السمار وحش مكانش غنى عبد الحليم حافظ سمراء يا حلم الطفولة

ولا كان قال اسمر يا اسمراني

ولا كانوا قالوا حبيبي الاسمر

اسمر ورمشه كحيل

ولا غنت شهرزاد انت حبيبي يا حلو يا اسمر

السمار نص الجمال

عرضك مميز

تحياتي لكِ

أحمد عاطف said...

اسف نسيت اطلب طلب مهم جدا

تسمحي دا بعد أذنك ان اضيف مدونتك في المدونات المفضلة لدي

دا بعد اذنك

ملكة بحجابى said...

ههههههههههه
والله انتى عثل
يابنتى بيقولو السمار نص الجمال
والرجالة لسه فيهم اللى بيتهبلو ويتحولو عالسمرا

سكرايه انتى

اول مرة اجى هنا
بس خلاص خت كرسى وحجزت مكان دائم
تقبلى مرورى

:)
ملكة بحجابى

Eman Hashim said...

اولا اسفة جدا على تأخرى فى الرد

نور القلب:
انتى ما طولتيش ولا حاجة و كلامك بجد هو اللى انا عايزة اقوله
فعلا
هو ده المهم .. اللى جاى .. و اللى نقدر احنا نغيره

انونيماس:
كلامك وجعنى
على الرغم من انى المفروض افرح انك بتثبتى انى مش بألف .. بس كلامك فعلا وجعنى
على العموم .. انتى الحمد لله واضح جدا من كلامك و اسلوبك انك مش مستنيانى اقولك حاجة
ما شاء الله
لباقة و عقل و كلام مرتب
ربنا يحميكى
و عشان خاطرى
ماتستسلميش

Eman Hashim said...

Thanks Emad for your support :)

Thanks Anonymous :)

Anonymous, I left a comment for a post that I previously wrote, please read it.

LOOOOOOOOL 77 math

eman:
تعليقك مش طويل بالعكس
كلامك جميل و يا ريت اقرا تعليقك على بقية كلامى

Eman Hashim said...

Eman:
That's new info for me
thanks for sharing.

ماجى:
انا اعرف بنات بيلبسول جوانتى و هم بيسوقوا عشان كفوفهم ما تسمرش
بجد
انا حاسة انى هايجرالى حاجة

احمد عاطف:
اهلا بيك و بمدونتك و زيارتك الجميلة اللطيفة
و كلامك الحلو اللى بيدى الامل ان ليسة فى ناس بتفهم

ملكة:
انا مستنياكى بقى و شبطت
يعنى لو ما جيتيش هازعل و اتقمص
اتفقنا؟؟

Shaimaa said...

ايمان .. على فكرة البلوج بتاعك تحفة جدا جدا أنا قريته كله من امبارح
تحياتى- شيماء

Eman Hashim said...

شكرا يا شيماء
مستنية رأيك فى كل بوست بقى ان شاء الله

Anonymous said...

والله كلامك فى الجون يا ايمان لا والانيل اننا فى بلد اصلا جزء من قاره افريقيا وتلاقى فيها عنصريه مش موجوده فى بلاد الغرب
واسوء كلمه ممكن الواحده السمراء تسمعها انتى حلوه بس لو كنتى بيضاء
او الله على الجمال ده بس لو على بيضاء
بجدبلد متخلفه عنصريه

Eman Hashim said...

عندك حق
طب يستحموا الاول
ده الواحد بيبقى عايز ادوية لمعدته اما بيركب الكترو ولا المواصلات من ريحة الناس

ايمان هاشم said...

والله يايمى ياحبيبتى انتى قولتى الى بيحصل بالظبط مخلتيش حاجه انا قمحيه والكلمه الى تتكرر دى اموره بس سمره ههههههههه

Eman Hashim said...

اهلا يا ايمان
عارفة والله
بس ليسة فى ناس معتبرننى مجنونة و باخترع كلام من عنجى
فى ناس فعلا ماهرين فى انهم يعيشوا عاملين نفسهم مش واخدين بالهم

Ahmed Ali Eid said...

و في مصر المضحكيات المبكيات

Eman Hashim said...

مضبوط يا احمد

انسانة واقعيه said...

سمرا ولا بيضا ...مجرد بقايا من نزاعات وطبقيه بقالها ملايين السنيين
ومن الجهل بعيد عنك لسه فيه ناس مؤمنه بالكلام الفارغ دة
مجرد عارفه زى ايه؟
زى تمسكنا بعادات مالهاش اساس من الصحة ولا العقل ولا المنطق
زى امل تهزى رجلك وانتى قاعدة والدتك تشخط فيكى هتجبيلنا الفقر ؟
لا اله الا الله
يستى الرزق من عند ربنا ايه علاقه رجلى بالموضوع؟؟؟ انتى كل حاجة لماضة اسكتى
حاجة تانيه لو عفوا شبشب مقلوب يووووة متعدلى ام ل االشبشب هتجبولنا الخراب وقلب الحال يستى ايه علاقه الشبشب
تحسى مش بيقبلوال نقاش خلاص بقى اعتقاد سائد متعرفيش اصله
اهو جد وست وجد جد قالوا بقى معتقد شبيه بالمعتقدات الدينه بل فالدين بيناقشوا فيه بعض افكار ومعتقدات قديمه غبيه ولحد دلوقتى كانه قران ولا فيه مناقشه
رايى يبنتى نواجة دة بالتجاهل ومنعلموش لولادنا ويمكن يجى يوم ونتخلص من المفاهيم الغبيه دة اللى لا ليها اساس علمى ولا دينى ولا اى حاجة
مجرد افكار اتنقشت ع الصخر
وياما هنشوف
تسلمى يا ايمان على موضوعك الهادف

انسانة واقعيه said...

على فكرة انا انسانه طموحة بس غيرت اسمى

الطموح راحت عليه تقريبا هههههه

Eman Hashim said...

واقعية طموحة و قمر كمان

يسلم قلمك و عقلك يا رب

اهه كلامك ده هو اللى انا بحاول اهاتى فيه بقالى سنين

اننا نواجه الكلام ده و نفتكر اما نخلف ما نعملوش

المقلب بقى ان اللى زينا غالبا مش بيخلفوا علشان مش بيقدروا يتجوزوا اصلا

ههههههههههههههههههههههههههههههههه

انسانة واقعيه said...

ههههههههههههههههههه عادى عادى المهم المبدء هههههههههه

ســـاره الجهيني said...

ههههههههههههههههههههه
حلوه قوي بصراحة .. انا من البنات السمرا ومكتشفتش بصراحة اني حلوه غير لما اسمريت قصدي اتحرقت اكتر في البحر ولقيت الناس لسه بتعاكسني برضوااااا

Medhat Orban said...

الحقيقه المشهد التانى عايز يتظبط يعنى لما الموديل تقف خلف الزجاج المغبر ومن كتر بياض البنت ضوئه يعكس على كرسى المخرج فيقوم المخرج مش مصدق نفسه ليمسح الزجاج من الغبار ليرى من اين هذا الضوء وعندما يرى الفتاه بكل افوره يقول هى ديه هتوها فتتمخطر الفتاه ببراعه وتدور من خلف الزجاج ليقبل يدها ويعبر عن اعجابه بنظرات ثاقبه

Eman Hashim said...

مش فاهماك. هو عامة انا باحكى الاعلان مش باقول رأيى ولا حاجة
لو شفت الاعلان هاتعرفه

Eman Hashim said...

سارة انا مش عارفة احنا اخرتنا ايه والله

Eman Hashim said...

انسانة واقعية: وايه هو المبدأ بقى؟

mid said...

عتقد ان الاصل هو الزواج اما العنوسه فهى الخروج على الحياه الطبيعيه اما اذا كانت العنوسه فهى افضل من زواج فاشل

Bob said...

مش عارف يبدو ان انا اللي مجنون انا عن نفسي باعشق السمار ولما سافرت السودان كنت حاسس اني في الجنة من كتر ما انا باشوف بنات سمرا ولو السمار وحش مكانش غنى عبد الحليم حافظ سمراء يا حلم الطفولة ولا كان قال اسمر يا اسمراني ولا كانوا قالوا حبيبي الاسمر اسمر ورمشه كحيل ولا غنت شهرزاد انت حبيبي يا حلو يا اسمر السمار نص الجمال عرضك مميز تحياتي لكِ

jessy8511 said...

المشكله ان البنت بتكون محترمه جدا وكل الناس بتشكر فيها وفى اخلاقها واد ايه راقيه فى تعاملها مع الاخرين وياسلام لما يحاولوا يقنعوا حد ليها يكون ابيض انه يتقدم لها للمميزات اللى عندها يقول انا مش بفكر فى واحده سمرااد ايه المهم دلوقتى لشكل مش الاخلاق

Mona Ismail said...

سلام انا منى من السودان ومدونتك حلوة وبالذات المقال ده لانه نحن برضو بنعاني من المشكلة دي وبقو الاولاد زي الكلاب السعرانة قدام البت اللي لونها فاتح سواء برونز ولا بيضا لكن اذا البت كان لونها غامق زي بيانسي ولا زي هالي بري دي بعيدة عن الترشيح وعن الزواج ... هنا الاولاد عندنا عندهم نظرية بتقول::اتزوج البيضا السمحة اللي اخلاقها ما كويسة وبعد الزواج اعقلها واادبها من اول وجديد .لكن اذا جبتها سودا ولا سمرة واخلاقها كويسة اعمل باخلاقها شنو؟؟؟؟؟