Saturday, January 3, 2009

43 - و من الزن ما قتل

نداء و بيان عاجل و هام!!!

الى اصحاب العقول الرزينة و القلوب و الرحيمة
الموبايل .. التليفون .. الايميل .. دى اساليب اتصال مش مطاردة


انتهى البيان

سؤال:

اما حد يتصل بحد 4 او 5 مرات ورا بعض و التانى مايرضش يبقى ايه؟

اجابة:
1- نايم -------بلاش نصحيه
2- مشغول ------بلاش نخوته
3- مش عايزبرد -----يبقى مش هايرد

و فضلت احايله مايردش
اقوله حبيبى مايردش
اقوله يا عمى مايردش
اعمله ايه؟؟ ---------------- سيبه يولع او يتفلق


الكلام ده والله بجد مش هزار!! الناس بقيت زنانة بشكل غريب رجالة و ستات... مش كده!! انا والله منعت نفسى مرة انى ارمى الموبايل من الشباك.
و المشكلة انها كتير بتيجى مع ناس بيكونوا قريبين جدا للواحد و لايمكن يحب يخسرهم بس للأسف الشديد عدم الرد بيتفهم انه تنفيض او تناكة او اى حاجة مش كويسة.

و قول حق بقى: الستات بيعملوا كده كتير اوى فى الرجالة.ده ما يمنعش ان فى رجالة خبراء فى هذا المجال. انا كتير بيشتكولى انهم فى علاقات مع ناس زى الفل و فعلا بيحبوهم بس اللى مبوظ الموضوع هو (الزن).
و تلاقى الواحد بيقول الكلمة دى و هو يا عينى حاسس بمزيج من القهر و النرفزة مع قلة الحيلة و فقدان القدرة على التصرف.

لما مايردش على التليفون بعد مرتين خلاص ... هو هايشوف الرنات و هايبقى يكلمك.
لو ماكلمكيش عاتبيه .. و لو برضه ماتكلمش مش الحل هو الزن.
خلاص طالما مش عايزة ترد عليك دلوقتى ...سيبها , ماتطبقش على نفسها

دى الحكاية وصلت للكماين !!! آه والله! تكلمه من موابايلها و لو ماردش تكلمه من الكشك او اى نمرة غريبة. لدرجة ان فى ناس بقيت بتخاف ترد على التليفون اصلا! و فى ناس بتسجل نمر العيلة كلها و الصحاب عشان لو جربت اى موبايل جنبها يعرف .و فى ستات متعودين جدا على موضوع الزيارات الى العمل المفاجأة دى! و بقى عادى ان فى ناس قلبها بينقبض و معدتها تقلب اما رنة الرسالة تشتغل. و مابقاش انك تقفل على حد بيتصل ليه اى مدلول.

ليه يا ناس؟؟ ليه كده بس؟؟ والله الزن ده حاجة وحشة اوى

هو ايه بقى الزن؟؟ بس المكالمات الكتير؟؟ لأة
دلوقتى فى عدد 2 ناس
واحد منهم عايز حاجة, و ممكن التانى مش عايزها . الحاجة دى بقى خروجة, مناقشة , اى حاجة بقى. تلاقى البنى آدم ماسك ودن التانى بياكلها كلام فى الموضوع ده.

طب ايه يعنى؟ طب ليه لأ ؟ طب بس عشان خاطرى؟ ايوة يعنى انتى ليه ما بترديش على التليفون اما كلمتك امبارح .. ده انا حتى كلمتك تسع مرات!!! ايوة بس ده موضوع تاعبنى اوى و عايزة اكلمك فيه لازم دلوقتى ,مايستناش لبكرة ( و طبعا الموضوع الخطشير ده غالبا بيكون "فاكر اما من كم يوم قابلنا صحابى ؟كان شكلك متدايق كده, هو انت مش بحب صحابى؟")

والله لو تعرفوا الاحساس بيبقى عامل ازاى عمر ماحد هايعمل كده.

انا مرة نازلة امتحان و كنت متأخرة و واقفة مش لاقية تاكسى و اما الاقى مايرضاش يوصلنى . فطبعا واقفة متوترة. وواحدة صاحبتى بتكلمنى ورا بعضه ورا بعضه , لانا لاحقة اغير البروفايل ولا لاحقة اكتبلها رسالة "اعتقى امى لوجه الله دلوقتى". اقفل عليها تتصل تانى! و لقيت تاكسى اخيرا.
على ما لقيت تاكسى كان فات بالضبط 10 دقايق. و كان فى موبايلى 11 رنة من الانسانة دى ....... بالذمة ده يعقل؟؟؟!!
و اما رديت عليها فى التاكسى قالتلى "كنت عايزة اقولك السكة زحمة انزلى بدرى"!!!!
اقول ايه؟؟ طبعا هى كتر خيرها. بس كان ممكن رسالة فيها المعلومة دى تحل الموقف كله بهدوء

و برضه للأسف فى ناس بتكون لا مبالية . او سخيفة . او قليلة الذوق, بس دول مش حلهم ابدا ان الواحد يقف على دماغهم.
والله الواحد بيبقى حاسس ان فى حد فوق دماغه بجد... زى مايكون حد طابق على مراوحه .. كابس على نفسه
لأ و ايه .. لو الاتصال و الرسايل ما نفعيتش , يبقى ايميلات و رسايل على الفيس بوك
اللى هو مطاردة بجد!!

لأ ... حرام ... بجد ... الرحمة

21 comments:

Anonymous said...

مرة واحد صاحبي استلمني الضهر و انا مرهق و تعبان و بتاع 13 مرة قعد يزن على التليفون

ماكانش في حل غير اني امسح بيه الارض و من ساعتها بقى تمام :)

Unknown said...

ههههههههههههههههههههههههههههههههههههههههههههههههههههههههههه
طب الحمد لله
ضحكتنى والله
مش عارفة بيبقى فى ايه
ازيك يا مصرى؟

Anonymous said...

هاها
للاسف احنا المصريين محتاجين للشدة فى التعامل معانا
انا تمام الحمدلله انتي عاملة ايه؟

بس خليني اعترف اني انا كمان زنان بس البلوج ده هايساعد كتير فى اني ابطل زن شكرا :)

Unknown said...

انا زى الفل الحمد لله
انت فعلا عندك حق
الشدة فى التعامل
تحس ان لو مفيش عقاب على قلة الادب مش هايكون فينا واحد مؤدب

حاجة مخجلة

فلة said...

والله يا اختشي كان نفسي اتكلم في الموضوع ده من زمان
بس المشكلة ان اللي بتزن علي عارفة عنوان مدونتي كمان ومتعرفيش هي متابعه كل كلمة فيها ازاي
المهم
لا...13 مرة مين
انا اللي عندي ضربت رقم قياسي
43 مسد كول في ساعتين
ولك ان تتخيلي كنت عايزة اعمل ايه
وفي نفس اليوم عملتلي 3 كماين
اتصلت من موبايل جوزها وتلفون الشغل
ومرة كانت بتتصل من تلفونين ف وقت واحد
طب عملت ايه بس انا يا ربي؟؟؟
وفي الاخر اتصلت من رقم غريب وانا متأكدة انها هي بردو
بس رديت ... ما قولتش الو
وهي بمنتهى الغباوة
الو..الو..فلة
فما كان مني الا اني قفلت السماعة
ومارديتش عالرقم الجديد ده تاني


الملخص بقى قال ايــــــــــه
عايزة تطمن علي


عجبي

Tamer Abdel Aziz said...

ايمان
في خاصية لطيفة اوي اسمها
clip+
تدي اللي ينصل بيكي غير متاح ويبعتلك sms
ان الرقم ده بيتصل بيكي
اللي عاوزه تكلميبخ كلميه واللي مش عاوزه خلاص
موبينيل فيها نفس الخاصية بس ممكن تعملي وايت ليست لخمس ارقام حتي لو عاملة دايفرت يرنو عندك زي ماما وبابا واي حد مقرب
ده غير البرامج اللي ممكن تنزل علي الموبايل تعمل بلوك لرقم معين زي موبايل جارد مثلا او كوول بلوكر
في حلول كتير للاخوة الزنانين:)

Unknown said...

ههههههههههههههههههههه
والله يا فلة انتى حمولة اوى
ان شالله ما اتطمنت يا شيخة

sniper
انا عارفة الكلام ده بس هى الفكرة فى الناس نفسها يعنى
فى ايه يا ناس؟

Anonymous said...

:)

sadek

Unknown said...

صاااااااااااااااااادق

ازيك

مطلق said...

عشان كده انا مش شايل تليفون اصلا

Unknown said...

والله يا كريم هو حل
بس يعنى عمر ما كان عندك اصلا ولا رميته بعد ما اتدايقت منه؟

Yasmine said...

احسن حاجة للشخصيات اللى من النوع ده يتعملهم call divert على رقم ارضى او Voice mail يشتغل بعد اول رنة بجد فى ناس عندها قدرات فائقة على الزن و اللى بيفرسوا بجد اللى لما تردى عليهم يقولولك احنا عارفين انك مش عايزة تكلمى حد..طيب لما انتوا عارفين بتتكلموا بالاصرار ده ليه؟!

انا عن نفسي بقيت بكتفى بالرسايل بقول كل اللى انا عايزاه عشان لا ازهق حد ولا حد يزن عليا
مدونتك دمها خفيف اوى على فكرة :)

Unknown said...

و اللى بيفرسوا بجد اللى لما تردى عليهم يقولولك احنا عارفين انك مش عايزة تكلمى حد..طيب لما انتوا عارفين بتتكلموا بالاصرار ده ليه؟!

ايوااااااااااا
ربنا يخليكى!!
انا دى فعلا مش بافهمها

شكرا .. و اتمنى اشوفك كتير

Anonymous said...

سوري بس الزن ده إختراع بناتي أصيل

انا ومراتي لما كنا مخطوبين وهي لسه مبتشتغلش كان ساعات يحصل منها كده
وتضايق اوي لو متصلتش بسرعه بعد لما
هي تتصل
الكوميدي ان هي دلوقتي بتتهمني ان أنا اللي زنان
باتصل بيها وهي في شغلها بتكنسل
استني 3-4 ساعات وبعدين باضطر اتصل تاني لأن ساعات ببقي عايزها في حاجه ضروريه
الاقيها متنرفزه وتقولي كنت مشغوله
:-/

Tamer

Meno said...

طبعا الزن حاجة تخنق لكن فيه ناس برضه بتغيظ لما متردش ع التليفون
فيه ناس تتصلي بيها مرة واتنين وعشرة (وعلى فكرة مش ورا بعض) تلاقيها ولا تعبرك ولا تشوفك عاوزة ايه وممكن يعدى يوم واتنين ومفيش فايدة ميسألوش طبعا ده مينفعش
للاسف احنا بنستخدم الموبايل غلط وفيه كتير عاملين نفسهم رجال اعمال وخلاص بقى لو ردوا ع التليفون وقتهم هيضيع
طبعا لما تلاقي حد بيتصل بيكي اكتر من مرة لازم تشوفيه عاوز ايه حتى اذا رن مرة واحدة ومردتيش ف وقتها لاى سبب لازم برضه تردى عليه بعدها حتى اذا عارفة انه بيتصل لمجرد السؤال لانه يشكر على اهتمامه وسؤاله هو حد لاقي ناس تسأل عليه دلوقت؟!!

Unknown said...

اهلا تامر .. صراحة آه .. قول حق البنات فيهم الطبع ده اكتر من الستات

يا مينو مش كل الناس ظروفها زى بعضها او وقتها زى بعضها
انا ممكن ييجى معايا كم يوم ورا بعض مش لطاف و الحياة بعد كده بترجع
اللى انتى بتتكلمى فيه ده ان حد مطنش حد و اى واحد فينا يتدايق من حاجة زى كده
لكن انا باتكلم عن الزن
بعدين يا ستى بسيطة .. اللى عامل نفسه مهم ارميه فى الزبالة .. مش عايز يرد غلاسة و تناكة ..فى داهية مش عايزينه اصلا

mohamed said...

معاكي حق :) أوي
أنا بعاني من الموضوع دا وخصوصاً لما بكون مركز في الشغل او في اجتماع

المشكلة ان ناس معينة كلمة كنت مشغول او مش فاضي دلوقتي مش بتقول معاهم

وتعرفي يا ايمان اللي يفرس برضه ويغيظ لما حد يتصل بيكي ويظهر عنده انك بتتكلمي في التليفون ويكتبله بالبنط العريض كلمة ويتينج

يقوم برضه مكمل الجرس لاخره وبمجرد ما يخلص يقوم متصل تاني ..

اخر موقف لسه كان من كام اسبوع واحدة المفروض انها حد كبير وطبيبة نفسيه وبتاع فضلت تتصل بيا وانا معايا مكالمة تانية وبعتتلي 3 مسجات تسالني انا برغي مع مين
:@

Anonymous said...

لما مايردش على التليفون بعد مرتين خلاص ... هو هايشوف الرنات و هايبقى يكلمك.

m3aky 7a2 ya emey,da Mbd2y Brdo 3la fekra ! Bel Monasba,ana etsalt beeky mara we nos yoom el gom3a el sa3a 8 P.M Mrdteeesh,Klmtk tany yom (el sabt) Mara el sa3a 8 P.M brdo mrdteesh, ISA hklmk el gom3a el gaya we 3la ALLAh ma trodeesh LOL... Miss u Dearest

Hany.......med

Unknown said...

Mohamed:

والله حاسة بيك. الواحد بعد شوية بيحس انه محاصر
خصوصا اللى بيمسكوا النمرة فى الويتينج دول
يالهوى!!
بابقى هاتشل
بس هاقول ايه؟ الاحساس نعمة
المهم انت كان ايه رد فعلك ساعتها؟

Unknown said...

HANOUUUUUUUUUSH

la2 taba3an harod, ana aslan kont ha5asmak we ba3den olt adeek forsa a5eera
keda ana 5alas mesh me5asmak :D
I'll call ana kaman agarab 7azzy ba2a in shaa' Allah :D

mohamed said...

ولا حاجة رديت عليها تاني يوم بس حست أني برد بأتامة اوي

بس في المقابل في ناس بتخنق منهم لما بيكنوا شايلن تليفون ومش بيردوا عليه او عاملين التليفون سيلنت
وفي حد عايزهم ضروري وطبيعة شغلهم تخليهم لازم يردوا على التليفون على طول