Saturday, June 7, 2008

27 - حصة احياء

اللى بيتكسف يمشى
و اللى بيخاف يروح
و الى يعرف ماما يبقى يطمن عليها من بعدى


انا بقالى فترة عاملة مش واخدة بالى و الناس ياما علقت على  خبر من الدستور و انا برضه ولا كأنى هنا.

لكن لأة ... انتهى ... حان وقت درس الاحياء

احنا كبار و مش هانتكسف من بعضينا



1- Pineal Gland

هى واحدة من الغدد الصماء و موجودة فى منتصف المخ جوا و صغيرة جدا فى الحجم. تفرز مادة الميلاتونين اللى ليها وظيفتين:
-وظيفة لها علاقة بالنوم و الصحيان
-وظيفة انها تمنع الجسم من النمو الجنسى


و دى يا حلوين موجودة فى الذكر و الانثى


عند سن البلوغ, تنكمش هذه الغدة و يقل معدل الميلاتونين فى الدم عشان بيدأ الجسم فى مرحلة البلوغ


2 - Puberty البلوغ

هو مصطلح يصف مجموعة الخطوات اللى بياخدها الجسم عشان يتحول الانسان من طفل الى بالغ قادر على التناسل.
الحكاية بتمشى ازاى؟

1 - ادراة كده فى المخ تبعت مرسال الى الاعضاء التناسلية ( الخصية و المبيض .. ملناش دعوة بحاجة تحت) تقولهم يالله شوفوا شغلكوا عشان البنى آدم ده عايزينه يبلغ
2- الاعضاء التناسلية بتعمل مرسال زى ايميل كده و تبعته لكذا جهة فى الجسم:

المخ ( ادارة الهوية الجنسية) و العظام و العضلات و الثدى و جهات تانية كتير
3- يقوم الجسم واخد بقى الخطوات:
المخ يبدأ يعرف الانسان - يا ذكر انت ذكر و يا انثى انتى انثى- و تبدأ سلسلة التغيرات بناء على كده زى مثلا فى الشكل و الطول و توزيع العضلات و الدهن و الصوت و الدنيا دى

المراسيل دى عبارة عن اشرات كميائية اسمها هرمونات


كل ده برضه يا حلوين بيحصل للذكر و الانثى



قبل البلوغ.. الفرق الوحيد بين الانثى و الذكر هو وجود الاعضاء التناسلية الغير عاملة


البلوغ علميا كمصطلح يصف حالة الجسم مع بداية عمل الاعضاء التناسلية ( تانى الخصية و المبيض مش اى حاجة تحت) و
بداية تحديد الفروق الجسمانية بين الجنسين اللى بتتسمى السمات الجنسية الثانوية
Secondary sex characteristics

احد هذى المراسيل زى ما اتفقنا بيروح لادارة الهوية الجنسية فى المخ بيفهمه بقى... و الله الانسان ده بلغ جنسيا كذكر ( او
كانثى)
و بيطالبه بانه يعمل اللازم عشان يبتدى يحس بالانجذاب
libido


برضه يا عيونى احنا بنتكلم عن الذكر و الانثى و برضه ماجبناش سيرة اى حاجة تحت . كله لجان فى المخ عاملة اجتماعات سوا عشان بياخدوا قرارات مصيرية حتمية



احد اهم مهام الادارة بتاعت الهوية الجنسية دى هى مشورع مهم و حيوى اسمه المراهقة



3 - Adolescence المراهقة

هى المرحلة الانتقالية اللى بتطور الانسان من طفل الى انسان كبير
الانتقال ده يشمل تغيرات بيولوجية و سيكولوجية و اجتماعية

تختلف النظريات فى العلاقة العمرية بين البلوغ و المراهقة و ان كانت فى الاطار العام تتفق على انهم قريبين من بعض



بيقى هنا اللى بيتأثر بالمجتمع هو المراهقة و ليس البلوغ

و ده معناه ان تحديد الهوية الجنسية امر حتمى هيحصل هيحصل و ان الانجذاب برضه هيحصل هيحصل لكن اللى بيتأثر بعوامل المجتمع و التربية و التقاليد و التابوز هو التعامل مع الواقع ده و التعبير عنه

يعنى اما نربى بنت انها تتكسف تقول الولد ده امور مش معناه انها مش هاتشوفه امور ولا معناه انها مش هاتقولها لتفسها - انا قلت امور مش عاجبها لا سمح الله - كل اللى بيحصل انها لو حاسيتها مش هاتقولها لنفسها و لو قالتها لنفسها فى نفسها كده فى سرها هاتبدأ تتكسف من نفسها و تعيش و تموت مكسوفة من نفسها و من اللى بتحسه

و هنا بنيجى لمرحلة مهمة جدا و هى التوجه الجنسى


4 - Sexual Orientation التوجه الجنسى


هو مصطلح يصف الانجذاب الجنسى و العاطفى و الرومانسى تجاه جنس معين سواء الجنس الاخر او نفس الجنس
Bisexuals الشذوذ -- او اللى هما اى حاجة ماشى دول

دى بقى .. من الاكتر الاشياء الخاضعة للتأثر بالمجتمع و القابلة لكل الخراب و العك
لان اللى بيحصل هو تحديد الجنس بشكل عام بقى .. لاحظوا هنا اننا بنقول عاطفى و رومانسى يعنى مش بس حاجة جنسية .. يعنى جزء مهم من هوية الانسان و اتزانه بينه و بين نفسه و تشكيل علاقاته بالناس بشكل عام بتتكون فى المرحلة دى

هاديكوا مثل يعنى ( و ماتمسكوش فيه و النبى, انا بس هاجيب صورة صارخة لتوضيح الفكرة) فى حالات لما بتتربى البنت فى عالم بدون رجالة و تكبر هى و غيرها على ان الرجالة دى وحوش بشرية و ان اى نوع من انواع المشاعر تجاه اى مذكر هو عيب و قلة ادب و حرام و عار و نيلة و هباب على دماغها و دماغ العيلة كلها, و فى نفس الوقت بتتربى فى وسط كله بنات بمباركة من الدنيا كلها, بيبدأ يتولد عندها ذعر و رعب ثم نفور من الرجالة و ارتياح اكبر مع البنات ... ده مثلا مثلا مثلا يعنى



5 - Clitoris البظر - يا نهار ازرق على الكلام -


البظر ده هو عضو من اعضاء انثى الثدييات ( اللى هما الستات منهم ) موجود اعلى المهبل و مجرى البول و مقابله عند الذكر هو العضو الذكرى اللى وظيفته للذكر توصيل الاحساس بالمتعة الجنسية بالاضافة الى انه فيه مجرى البول. فى حين ان البظر عند الانثى يحمل الوظيفة الاولى فقط, و اللى بيساعد على ده انهم الاتنين (البظر و العضو الذكرى) مليانيين قدر مهول من الاعصاب

هو ده بقى اللى العالم المعاتيه بيشيلوه - كله او حتة منه - اثناء جريمة الختان

يعنى سايبين الشقة كلها و قاعدين فى اودة واحدة ... اقصد سايبين عملية التطور الجنسى كلها و جايين فى الفينيشينج و يتكلموا

يبقى نستفيد ايه بقى يا قطاقيط من درس النهاردة

1 - الهوية الجنسية يبدأ تحديدها فى المخ
2- البلوغ هو المخ بيقول للاعضاء التناسلية تقول للجسم انه ذكر او انثى
3 - الانجذاب الجنسى كمبدأ عملية تبدأ من المخ
4- هاينجذب لأيه بقى و هايعمل ايه وقتها ده اللى المجتمع بيخربه
5- الاحساس بالمتعة الجنسية بيتطلب مجموعة من العوامل السابق ذكرها و بيوصل بكذا طريق احدهم و اهمهم عند المرأة اللى بيتشال فى جريمة الختان ده
6- اغلب الرجالة دى هما اللى بيتهموا زوجاتهم بكل اتهامات البرود و النفور و حاجات من هذا القبيل
7- فى دى بالذات العالم المجانين دول ملهمش دعوة بالسعودية اللى فلقونا بيها و عايزننا تقلدها فى كل حاجة, بييجوا عند دى و لأة . لان الجزيرة العربية كلها مافيهاش موضوع الختان ده


اطن كده اتأكدتوا اننى عانس و حقود و وحشة خالص خالص




27 comments:

Anonymous said...

يا حلاوة يا ولاد
ده الجهل طلع وحييييييششش
خالص

انا كده بحمد ربنا لو بقيت عانس زيك يا ايمى
اهو بردو نبقى بعقلنا!!!!

P=S=Y=C=H=O said...

اصحاب العقول في راحة فعلا..

Anonymous said...

بوست عظييييييييم بجد

طيب سؤال بما انها حصة احياء . هل أي بنت اتشال ال
Clitoris
بتاعها فى عملية الختان بيبقي انتهي للأبد حتة انها توصل لشهوتها كاملة . وهتفضل طول عمرها باردة غصبن عنها والا يمكن تعويض دة بشكل أو بأخر .

سؤال تاني . هل ال
G-spot
ممكن يعوض تأثير الختان . ولا الكلام دة هجص ؟؟

salma said...

بجد يا إيمان أنا الحوار ده كان غيظني جدا، أنا قريت مقالة في الجمهورية عنه حسيت أني هتشل، يعني لو بنت مش معمولها الموضوع ده هتجري في الشارع ورا الرجالة مثلا يعني ولا أيه؟؟؟:) حاجة غريبة، بس انت الشرح بتاعك تمام يا باشا;) keep it up

Unknown said...

يا نيرو الوحش ان العلم يخبط على الباب و يرن الجرس و برضه تقوليله لأة

اللى عندهم عقول بقى يا سايكو

و انا والله يا سلمى .. حاتنقط قريب من العالم دى
بس مش هانسكت برضه..مش هانسيبهالهم

Unknown said...

سالى:

انتظرى الاجابات

Anonymous said...

Wow, that great. Good topic Eman. One funny thing to add. There was a post-FGM conference, and Aziz Khattab was there (he is the greatest). He talked about female circumcision (genital mutilation) and his comment was like this:
"If the claim that the clitoris of the girl would further turn her on by friction or rubbing against he clothes, etc. is true, I wouldn't mind - however, the composition of the clit is more or less the same of the male penis. So, now, how unfair is it to leave a minimum of 10-cm long thing, and just to try to cut a less than 1-cm long another thing. Come on, cut the man's penises - they are much longer, with more potential of friction and getting excitement due to rubbing".

Men circumcise women then blame them for being sexually cold, that's true. It's part of the submissiveness men confine women into, but shitly enough, considerable segment of women are in favour of such submissiveness. Education and awareness are highly needed.
Ahmed Fathi

شفـقــة و إحســــان said...

ايه الكلام اللى يكسف ده...كده بردوا تخلى الواحد يدخل ويقرا وهو على عماه مش كنتى تنبهينا وتكتبى للكبار فقط....بس بجد شاطرة افادتينى الواحد ما كانش يعرف حاجات كتير

Shimaa Gamal said...

مش قادرة أفهم مين زرع الفكرة المسيطرة على إن الست كائن شهوانى لازم يسيطر عليه عن طريق البتر .
اللى بيعملوا الجريمة دى بيعملوها علشان عارفين إن الحاجة اللى بيشيلوها ليها علاقة بالمتعة . يعنى مع سبق الإصرار و الترصد . و العجيب إن من شيوخنا الأفاضل من يحاول يلاقى سند شرعى .
و العجيب إن الكائنات الشهوانية اللى ماشية تتحرش بمخاليق ربنا بيعتبروها كائنات مظلومة

As for the question about the G-spot. Women have two types of oragsms. One is the result of stimulating the clitoris and the other is related to stimulating the G-spot. They are different. They don't fill for one another. It is like apples and oranges. They are both fruit but who said that any fruit could fill for the other.

Marwa Rakha said...

من حوالى 7 سنين كده قابلت راجل محترم ملو هدومه بيشتغل دكتور نساء و من عيلة و مخلف بنتين و مطلق

طبعا كان بيرسم على العبد لله ... فسالته انت و مراتط اتطلقتوا ليه .. قام قال لانها مش حاسة بيه ... طبعا انا سخيفة و زنانة فقلت له مش حاسة بيك عاطفيا و لا عقلانيا و لا جنسيا ... وشه قلب و رد و قال ايه لزمة الكلام ده ... انا فهمت و سالته هى كانت مشوهة ... زعق و قال لى ايه الكلام ده ... قلت له ما هو الختان ده تشوية ... قام قال ديه نظافة امال نسيب البنات على حل شعرها ... قلت له انت عملت كدة فى بناتك ... قال اه

شوفتوا الخيبة و الجهل و النيلة

مصطفى عثمان said...

ايمان
بوست هايل طبعا
المشكله في مجتماعتنا العربيه اللي لسه بنقول عليها مغلقه رغم اننا طلنا بقى عندنا انترنت اللي خلى العالم قريه صغيره زي ما بيقولوا
و لازلنا باصرار غريب بنقول احنا مجتماعات محافظه عشان كده لازم نخلي مستوى الثقافه الجنسيه عند شبابنا صفر
عشان احنا محافظين و الحاجات دي عيب و حرام
و المجتمعات دي مش واخده بالها ان في نت دلوقتي
يعني ممكن الشباب الجاهل جنسيا ياخد معلوماته منه
و اللي في معظم الاحيان بتبقى ثقافه مشوهه
مش عارفه شكل العلاقه بين الراجل و المرأه فبكل سهوله نتيجه لجهلنا بنتسبب في رجاله مش عارفين قيمه الست و ستات مش عارفين شكل العلاقه و جواهم رعب رهيب من الجواز
في الاخر بنطلع اسر مشوهه
غير قادرة انها تربي اولادها صح
و المشكله بتتكرر
ده سبب من اسباب المشكله

Anonymous said...

أسلوبك سهل بسيط وممتع
شكرا علي الموضوع المفيد

Unknown said...

الف شكر :)

Anonymous said...

اولا احيكي علي طرحك الرائع
و كنت اتمني ان اعلق علية من يوم نشرة ولكن ظروف لم تسمح بهذا
---------------------
اوافقك الراي لان عملية الختان هي اكبر تشوية تتعرض له الانثي
و اكبر ملقب بياخدة الرجل الذي سيتزوجها و كلاهما غير ملام علي هذا و لكن نلوم علي الثقافة المتدنية التي تملاء قنوات اعلامنا الفاشل
و بالنسبة لمن قال ان المراه كائن شهواني و من قال ان شهوة المراة سبعة اضعاف شهوة الرجل فهذا من قبيل التخريف و لا اري انه يستند الي حقائق
و كم سمعنا مع تخاريف
لقد صح رهاني
النظام المصري الجديدة سيكون العنصر الفاعل فية بنات مصر
و لا تلومي نفسك علي العنوسة و لكن لما لا نغير من وضع مجتمعنا و مفاهيمة بما يتوافق مع اخلاقنا الشرقية و صحيح الدين الذين لا اري فيهم اي تعارض

Unknown said...

اهلا بيك مواطن
و شكرا لمرورك الكريم و تعليقك اللطيف

كلامك مضبوط. سطوة الدين المظهرى الزائف على اعلامنا اصبحت خطيرة, و بالفعل سببت مشاكل كتير فى هيكل مجتمعنا بكل اسف
بس برضه انا الوم كل انسان ينصاع, الناس بتستهل تسمع الكلام على انها تفكر فيه و تعقله و تتصرف من نفسها و تتحمل مسئولية اختيارها

و انا لا الوم نفسى على عدم جوازى بالعكس, احمد الله انى مش زى كتير من المتجوزين اللى باشوفهم

Ahmed She3sha3y said...

في جريمة تانية أنا شايفها بتحصل وقابلتها عن تجربة
الختان الفكري اللي بيتعمل في الإناث
والعملية وصلت للذكور برضه!!

وبجد
شكرا على توصيل المعلومة بطريقة سهلة وبسيطة وغير مخلة
خاصة مع العقليات المختونة

وإعتذر على اللفظ اللي حأقوله
الختان ماباقاش في الفينيشينج بس
الختان بقى من الأول وفي الأساس
والطفل بيكبر وهو مختون
وبيجي في وقت مبيعرفش يعمل أيه
ولا يتصرف إزاي
في مواقف أتحطيت فيها مع ناس
بجد لقيتهم مختونين فكريا
مش جسديا !!


إسمحيلي أني أعمل وصلة للكلام ده
لأن في ناس أعرفهم ومتخرجين من كليات علمية وما يعرفوش في أي حاجة غير من الأفلام أو كلام القهاوي
ولا مؤخذه!!!

جمال يوسف said...

العزيزة إيمان
أهنيكى على إسلوبك البسيط والمحترم، وياريت تفكرى تبتدى حملة لتدريس مادة الثقافة الجنسية فى المدارس اللى هى غير مفهومة المعنى للكبار ويتصور البعض أنها تعليم الصغار كيفية ممارسة الجنس وبالتالى فهو أمر مرفوض
وأنا شخصياً لى تجربة مع بناتى وكنت أعيش فى الخارج وكدت أرفض حضورهم هذه المادة الإختيارية، إلا أننى عندما عرفت المنهج وافقت على أستحياء، وبعد إنتهاء المنهج أدركت كم كنت سأكون مخطئاً لو كنت رفضت هذه المادة
أهنيكى على أسلوبك الجميل وعلى كراهيتك للشرطة وقد أختلف معكم فى تصحيح مسار عمل الشرطة لتصبح عن حق فى حدمة الشعب

Anonymous said...

حضرتك قولتى انه اوضه فى شقه ودا بيوضح انها عمليه متكامله فى حد ذاتهاالهلع من وجوده شىء غير منطقى لأنى بكل بساطه مش هعرف ادخل اوضه فى الشقه من غير مافتح باب الشقه .

Unknown said...

Eman,

i wish u can explain more about the details of circumcision procedure more than only clitoris trimming.

wish also u can shed a light over the historical and demographic practice in both islamic and non islamic countries.

thanks

‏@corexz said...

الاول احب اوضح رأى فى الختان و رأى دا مش من عندى لا انا سائل فى دكاترة قرايبنا و دا ملخص كلامهم
الختان بيستخدم فحالات معينة اغلبها عند الزنوج عشان ال بظر بيكون طويل شويتين تلاتة
غير كدا لازم فحص طبيب و غالبا مبيكنش ليه ضرورة طبية
و انا مش بتكلم على عملية تجميل على فكرة ‏

البظر بيقوم بعملية الاثارة عند المرأة بالضغط و الاحتكاك ‏
و بينتصب بردة و عشان كدا فى الحالات اللى بنقول عليها بيتشال منه جزء ‏

اتفق معاكى على انهجريمة بس للبيعمله بجهل لكن اللى بيعمله على نور و علم حاجة تانية

مقالك مفصل و مليء بالمعلومات بس انتى قصرتى فى شرح الاثارة عند المرأة البالغة اللى الناس بتعمل عملية الختان للحد من شدتها
و الموضوع دا يتكنتب فيه أكتر من كدا

‏@corexz said...

و دا مينفيش انه الختان لما امر بيه الرسول صلى الله عليه و سلم فحق النساء قال انه مكرمة للنساء ‏
مش فرض و مش واجب
الناس بس اللى مزوداهاحبيتين ‏
و العلم نظم الموضوع و يجب نشر الرأى العلمى فى الموضوع مش بالخبرة و حكايات الجدات

Unknown said...

حضرتك شايف الكلام ده مش علمى؟ ده كلام جدات؟؟

Unknown said...

Dr. Seyam
I see your point and I'll try to research these areas and write about them. Thanks

Unknown said...

smallcrimer
انا للأسف مافهمتش اى حاجة من تعليقك

Anonymous said...

Your current article featurеѕ establіshed useful to me peгѕοnally.
It’ѕ reаlly educаtіonal and yоu are clearly very educatеd
of this type. You posseѕs ρopped my οwn face to vaгiоus
views on this ѕubјect matter аlong ωith intriguing and strong artіcles.


Here is my web site: ar.de2mano.com
Also visit my web-site : Xenical

Anonymous said...

Nice blog here! Also your web site loads up fast!
What host are you using? Can I get your affiliate
link to your host? I wish my web site loaded up as fast as yours lol

my blog cellulite treatment

Anonymous said...

rosacea specialist Woden

My page Forest rosacea specialist