Wednesday, January 13, 2010

سنتين ... و ليسة - 55


النهاردة عدى على هذه المدونة سنتين بالتمام و الكمال. ليسة فاكرة اليوم اللى جاتنى فيه الفكرة, كان فى آخر ديسمبر 2007 و كنت مخنوقة و غضبانة و حاسة بالوحدة و الرغبة الشديدة فى الصريخ. كنت مش قادرة اسكت اكتر من كده.
كنت حاسة انى قربت اموت مخنوقة.
الفكرة ماكانتش حقوق مرأة و لا مساواة ولا كلام كبير من ده. الفكرة كانت قهرة على طاقة بشرية مكبوتة قدام عينى. احساس التسليم بالانهزام.
كم مرة سمعت " انا لو عييت عمرى ما اروح لدكتورة ست"
كم مرة سمعت " ماهو هانعمل ايه, لازم نسكت عشام مفيش عرسان"
كم مرة سمعت " اصلها يا عينى اتطلقت"
و كم مرة شوفت فى عينهم " يا عانس يا غيرانة"

لحد ما قررت ابدأ هذه اليوميات , و كلمت كل اللى قالوا عليا فى سرهم "عانس و غيرانة"

كان فى تدوينات كنت فعلا باكتبها و انا باصرخ بعلو صوتى. و كان فى ردود على تعليقات كنت باكتبها و انا حزينة.

عرفت ناس كتير حلوة اوى منها.منهم اللى اتفق و اللى اختلف. عرفت عنى حاجات كتير جدا من التعليقات و التفاعل مع المعلقين.
بقيت باضحك اما اتشتم و اتسلى اما ييجى حد يعرفنى ( و يعمل نفسه من غير اسم) عشان يقول كلمتين محشورين فى زوره مش قادر يقولهم لى فى وشى.
عرفت يعنى ايه حد يبقى مش موافق على كلامى و خايف يقول لى و اشوفها فى عينيه و هو ساكت.
عرفت و سمعت و قريت لكتير كلامهم فى سكة و شعورهم و تصرفاتهم فى سكة ... لما جيت فى فترة و فقدت ايمانى بانى اكتب اصلا من قرفى.

السنتين دول مهما شرحت عملوا لى ايه مش هاعرف.

غضبت .. و بكيت .. و رفضت .. و اكتئبت .. و قمت .. و ضحكت .. و كتبت .. و عرفت .. و قريت .. و سمعت
السنتين دول عمرهم ما هايروحوا لانى هافضل مدينة ليهم بكتير جدا. و مدينة لكل المتابعين و المعلقين و المشجعين بأكتر و اكتر.

و لأنهم مهمين, و لانهم فادونى جدا , جمعتهم فى كتاب. يمكن ليسة مفيش فرصة انه يطلع, بس متأكدة ان ده هيحصل فى الوقت المناسب.

عشان تفضل المرحلة قدام عينى ...

لانها مرحلة مهمة جدا بالنسبة لى

انا يمكن مش عانس حقود خلاص ... لكنى لازلت غاضبة , و رافضة , و ثائرة ... ثورة البنفسج !
ه

61 comments:

Shimaa Gamal said...

كل سنة و إنت طيبة و مبروك البلوج الجديد

Unknown said...

و انتى طيبة يا شيماء
و الله يبارك فيكى
ربنا يكرمك والله
انتى فعلا من الناس اللطيفة جدا اللى الواحد عرفهم هنا

Tamer Abdel Aziz said...

كل سنة وانتي طيبة ياايمان وبجد مبروك البلوج الجديد ويارب كل يوم يكون عليكي زي ماتتمني

Unknown said...

شكرا يا تامر جدا
و الله يبارك فيك
والله انتوا ناس لطيفة و مشجعة
:)

مصرية said...

الف مبروك يا ايمي ويارب يا حبيبتي من حلو إلى أحلى .. المدونة دي ماكنتش ليكي وبس كانت لناس كتير .. بس حظي وحش اني عرفتها متأخر .. عموما اديني بحاول أعوض اللي فاتني ومن كل قلبي ربنا يوفقك

Shimaa Gamal said...

القلوب عند بعضها يا إيمان


ناوية بقى الثورة البنفسجية تكون ثورة سلمية و لا ثورة تأكل الأخضر و اليابس ؟

Unknown said...

و انا اعرف ابقى هادية برضه يا شيماء؟ ههههههههه
انتى تعرفى عنى كده؟
على رأى واحد اما عرف اسم المدونة الجديدة , بيقوللى اما اللى فات ده كله ماكانش ثورة . امال كان ايه؟
ههههههههه

مصرية .. ازيك يا حبيبتى
وحشانى على فكرة
انا مش هاقفلها على فكرة
اما بتقى عندك وقت و حابة تقرى اى حاجة يا ريت
و ريت كمان تبقى تقوليلى رأيك

Magi Mostafa said...

كل سنه وانتى طيبه ومبروك البلوج الجديد

Unknown said...

و انتى طيبة يا ماجى
و الف شكر

Tears said...

ليه بس تشاركى المجتمع التخلف بتاعه و تسمى المدونة عانس مع انك بتكلمى فى حقوق المرأة و المساواه...لفظ عانس فى اللغه العربية يطلق على الرجل و ليس المرأه

لا ارى اى مشكلة فى عدم الزواج او الانفصال فان كانت المرأة لا ترتاح مع الرجل فلتنفصل او ان كانت لا تجد من يملأ عقلها قبل قلبها فلا داعى ان تورط نفسها فى عيشة مرار

Unknown said...

دى سخرية من هذا المجتمع
عانس عانس
قولوا اللى يعجبكم و انا برضه هافضل زى مانا
مش هاتغير عشان حدحتى لو كان التمن ان يتقال عليا كده

بس ماتخافيش
انا مش عانس ابدا
الحمد لله

Phobos said...

فين البلوج الجديد ده؟ انتي فتحتي بلغ تاني من وراية ؟

Dr. Eyad Harfoush said...

عزيزتي دكتورة ايمان
مبروك ثورة البنفسج ألف مبروك

Kontiki said...

mesh nawya tegy el bet 3andy 7aba :)
u always creative girl :)
regards

Unknown said...

http://thawratalbanafseg.blogspot.com/
البلوغ الجديدة اهى يا فوبوس
هدفنا ارضاءكم يا فندم
صحيح ... فين حبوب الكافيين اللى قلتلى عليها دى؟

شكر د/ اياد
تشجيعك دايما بيفرحنى
شكرا جزيلا

انا جاية قريب ان شاء الله
بس الناس تخلص امتحانات يا بطة
:)

Walaa.S said...

مدونتك رائعة وافكارك بتعجبنا ... استمري واحنا معاك يا قمر...

Unknown said...

Success:
متشكرة جدا على التشجيع. عايزاكى تبصى على البلوج الجديدة بقى لو سمحتى و تقول لى رأيك
ماشى؟

77Math. said...

كل سنتين وانت طيبة يا إيمان
:)

Anonymous said...

ما شاء الله ... ايه الإبداع ده ؟ .. اسلوب راقي و متميز ما شاء الله

اول مره ازور المدونه بس ان شاء الله نتابع دايما مع حضرتك

كل المدونين بقو بيكتبو باحترافيه و انا اللي وقعت من قعر الأفه يعني ؟

ههههههههه

يا ريت اتشرف بحضرتك في مدونتي المتواضعه

http://ra7alaat.blogspot.com/

شكرا لوقتك

Unknown said...

سنة سعيدة
أنا اليوم بدأت أول مدونة لي يا إيمان ويا ريت أوصل لليوم اللي تكون فيه مدونتي بعد سنتين في مستوى نجاح مدونة حضرتك

Unknown said...

انا باجى هنا كتير بس مبعلقش

معرفش...بحترمك اوى اوى وبحبك وبحس انى لو علقت دة هيبقى شىء سخيف

معجبة بيكى بجد

ربنا يحميكى

Unknown said...

77math:
وانتى طيبة يا رفيقة :)

احمد ... لو ماخانتوش الذاكرة:

احترافية مرة واحدة؟ متشكرة اوى
و شكرا لدعوتك الرقيقة للمدونة و هى حاجة بتيجى مع الوقت على فكرة. اصبر بس انت و هاتشوف ان شاء الله :)

Unknown said...

Abdulmuttaleb

الف الف شكر على كلامك الحلو ده
و ان شاء الله بكل التوفيق يا رب

enjy

متشكرة اوى
و ان شاء الله المدونة الجديدة تعجبك
و يا ريت من وقت للتانى ابقى اعرف رأيك فى اللى باكتبه

hidaya said...

انا اول مره ازور مدونتك وعجبتنى جدااااا

Unknown said...

الف شكر يا هداية
يا ريت لو ليكى تعليق على اى حاجة تكتبيه لو سمحتى

يهمنى اعرف رأيك

elia said...

وعليكم السلام والرحمة والإكرام يا بنت الكرام..
بالمختصر المفيد لأول مرة بسمع في المدونة في إحدى الصحف العربية ودخلتها لأول مرة قبل أيام معدودات وتقريبا قرأت كل ما كتبتي ..وذاك يشرفني ..ولي عودة قريبا ولكن أطلب منك طلب أو بالاحرى مجرد استفسار ألا ترين أنك تكتبين لنا على فترات متباعدة من 13/1 كتيييييييييييييير

Unknown said...

Elia:
اهلا بيكى يا ست الكل

اما مش مبطلة كتابة
انا عندى مدونة تانية دلوقتى و باكتب فيها
و الرابط بتاعها اهه

http://thawratalbanafseg.blogspot.com/

و يا ريت اعرف رأيك فى اقرب وقت لو سمحتى

شمس العصارى said...

هى دى الحياة
التفاصيل الصغيرة بتصنع احداث كبيرة
و الاحداث بتصنع حياة

Unknown said...

مضبوط كده يا شمس
شوفتى المدونة الجديدة؟ يهمنى رأيك

Anonymous said...

كل عام وانتي بخيرر انا اول ازور الثورة هذه والمدونة المتميزة انتي رائعه ياايمان

تمنياتي لك بالتوفيق والسعاده

حلم بيعافر said...

ربنا يكرمك انت والبنفسج الثاير

Unknown said...

رندا الجنوبية:

الف شكر على تشجيعك.و اتمنى اقرا رأيك بقى

حلم بيعافر:
ربنا يكرمنا جميعا فى البلد دى

Walaa Elshamloul said...

بحييك على مدونتك يا إيمان
أسلوبك بسيط ومعبر جداً
فعلا أسلوب عانس من الدرجة الأولى
هههههههههههههههه
وبشكرك على قبول الاضافة فى الفيس
أنا على فكرة عضو مؤسس فى حركة عوانس من اجل التغيير
واضح ان فى توافق أفكار بينا
" من مذكرات عانس"
كان موضوع مقال لى فى نوفمبر 2007
ونشر تحت عنوان
حاجة وتلاتين
http://www.20at.com/masr/105-msa7t-r2y/7588.html

آخر أيام الخريف said...

يا ستى عقبال ميت سنة ...مدونتك حلوة قوى معرفش ازاى مخدتش بالى منها قبل كده ... لكن ع العموم ملحوقة ادينى من هنا و رايح ان شاء الله لاجئة هنا..!!

انا حاسة جداً بكل كلمة قلتيها ..نظرة المجتمع للبنت أو للأنثى عموماً بقت حاجة لا تطاق .

مستنياكى تشرفينى فى مدونتى

http://reeeshkalam.blogspot.com/

Unknown said...

Walaa Elshamloul:
اهلا بيكى. اكيد التوافق واضح
ربنا يتولانا جميعا برحمته
هههههههههههههههه
و شكرا على الاضافة, الشرف اكيد ليا

آخر ايام الخريف:
اهلا بيكى يا ست الكل و شكرا لكلامك
مستنية رأيك بقى فى البوستات اللى تلفت نظرك و تقريها
يهمنى جدا اقراه يا ريت

آخر أيام الخريف said...

هاى ايمو

انا مش عارفة افتح اللينك بتاع

ساى نو تو فيولنس اجنست ويمن

Unknown said...

ضبطته يا خريف
شوفى كده و قولى لى

آخر أيام الخريف said...

تمام كده يا قمر ..تسلم ايدك

Nicholas Urfe said...

كل سنة وانت طيبة ؟

مكتوب عمرك 28 ومن سنتين كان عندك 26 سنة !

هل 26 سنة عانس؟؟؟؟؟؟ امال أنا شاب وعندي 34 والبنت اللي بحبها 30 وما تجوزناش بسبب ظروف الصراحة مش كلها مادية ، نقول على نفسنا ايه ؟

Unknown said...

اهلا يا على
اجيب مصحف و اتصور بيه و انا باقول ان انا عمرى ما كنت - ولا ان شاء الله هابقى - عانس؟
وحياة الاخوة انا باتريق

لو كنت قريت الكلام كنت عرفت والله

و اتجوز بقى, خليك يالله تزهق من الجواز و تشتكى و كده
هههههههههههههه

Anonymous said...

mabrook eman wish you many many more being a woman beautifull and its some thing that i'm proud to be thank you for every single post كل سنة و انتي طيبة
lubna from baghdad

Unknown said...

كل سنة وانتى بخير مرتين مرة لعيد ميلاد المدونة ومرة عشان رمضان

Unknown said...

المجتمع كله يتغير و تتغير الثقافة في أمور كثيرة و بشكل سلبي في أغلبها و لكن مسألة النظرة للغير متزوجة لا زالت كما هي متخلفة. هذه النظرة التي تدفع بالبعض للجنون أو الانتحار او الاكتئاب او الانطواء و غير ذلك من أمور ..
المجتمع ذكوري و لا يزال الزواج صفقة بيع و شراء و كلما كان الشاري قويا كلما
ارتفع سقفه عالياعاليا ليطول السحاب ..لدي صديق اعرفه-جاهز من مجامعيه- كما يقال هنا و لكنه غير متزوج .. لماذا لان سقفه عالي جدا: يريد ملكة جمال الكون لانه يشعر انه اللقطة اللي مفيش غيره .. و عرفت قصة فتاة رمت نفسها على طبيب لتتزوج رغم انها تعرف انه متزوج و رغم انه عارضها كثيرا لكنها تريد ان تلبس فستان الفرح و تريد ان تأخذ الصور و تريد ان تدخل و تصبح امرأة متزوجة و في سبيل ذلك تكفلت بكل شيء تقريبا ثم نالت ما تريد و لكن لمدة ليلة واحدة فقط حيث تركها الاسد المغوار في الصباحية و سافر لدولة عربية للعمل و انقطعت اتصالاته بها اللهم الا من ثواني معدودة على التليفون .. هذه مهازل و لابد ان يفيق الجميع من الجنسين. لابد من معرفة ان البنت اكرم لها ان تعيش دون زواج من ان تمتهن كرامتها و كبريائها بهذه الطريقة المشينة ..و لن يتغير المجتمع الا اذا بدأت الفتيات انفسهن في التغيير و ان يكون للفتاة اهداف كثيرة في الحياة بجانب الزواج .. لماذا لا تكوني طبيبة ناجحة او محامية متفوقة او محاسبة متمرسة ..و لندع موضوع الزواج ده انه ييجي لوحده لانه الكثير من انصاف الرجال بياكلوا عيش دلوقتي على الازمة دي ..

تحياتي

احمد بهجت

عبدالصمد محمدی said...

السلام علیکم مبروک السنتین
زورونی انا عربی من جنوب ایران
و المدونه حلوه

فافى said...

مدونتك لطيقه وكلامك صحيح فعلا وبيحصل انا من الناس اللى بقيت ساعات احتفظ براى لنفسى عشان مش ايمع كلام له لازمه وابقى تابعينى
http://wafaa-shalaby.blogspot.com/

الزمن كبرنا said...

اليوم كنت جالسة زهقانة مش شي غريب
بس اصله بنت خالتي انخطبت ويعني ايه
مبروووك والله يهنيها
بس الماما بقى شافت ان هالشيء جدد احزانها ؟
طيب وانا مالي عشان يومي يتنكد
ماهي خلصت اثانوية بس
وانا خلصت جامعة وبشتغل ؟
بس هي اصغر مني ب 5 سنوات
يبقى العيب في ؟
انا شفت مدونتك عن طريق الصدفة وعجبتني فعلا
وانتي معاك حق انا اخر وحدة صاحباتي بيقولوا لي لما يكون في عريس
وانا الراتب كله بيروح على هداي خطوبة وزواج ومولود جديد
بس عمره ماحدش فتكر يجيب لي هدية لو مجاملة
يقول عيدي ميلادي حتى لو مش ميعاده
:(

Unknown said...

و انتى طيبة يا اية
متأسفة على تأخيرى فى الرد

اسماعيل "احمد بهجت" اولا متأسفة على تأخيرى فى الرد
ثانيا كلامك فى الصميم حقا
ربنا يستر علينا لان المؤشرات مش فى صالح السلام ابدا

Unknown said...

عبد الصمد
الله ايران مرة واحدة
ده انا هاتجنن و اروح ايران, بجد ماعندكش فمرة
اتمنى اكون فيها السنة اللى جاية ان شاء الله

وفاء: شكرا كرورك الكريم و اكيد هامر على مدونتك اللى باين جدا انها لطيفة اوى

Unknown said...

يا جميلة ياللى عمرها ما هاتكبر
انتى عندك صاحبة جديدة دلوقتى
سيبك من صحابك الأى كلام دول

انا عارفة و حاسة بيكى لان اكتشفت انى كنت بس للتسلية عندهم و نسيونى بعد ماتجوزوا

ايميلى عندك و اتمنى انك تبعتى لى عشان نقدر نتواصل اكتر

حقيقى اتمنى ان ده يحصل

Shaid said...

مبروك البلوج الجديد
و الله يبارك


free scholarships

Unknown said...

Thanks a lot Shaid :)

انسانة واقعيه said...

وحشتينى والله يا ايمان يارب تكونى فاكرانى

انا فجاه من فترة لاقيت الاكونت بتاعك عندى ع الفيس اختفى مش عارفه هل الاكونت بتاعك وقع ولا انتى حذفتى الناس ال مش اكتيف عندك
بس بجد الحياه بتاخد الانسان بشكل صعب
بس فالاخر بيرجع للاماكن اللى لقى فيها صدق
وكلام من القلب
وعمرة مينسى الناس المحترمه اللى قابلهم فحياته
حتى لو كانت مقابله افكار
اتمنى تكونى مش نسيتينى
ولو لسه صفحتك ع الفيس شغاله ضيفينى
وبلاش تحرمينا من جديد مدوناتك وافكارك والحجات اللى بتنبهينا ليها اللى المفروض نكون على وعى بيها
هستنى ردك

Emtiaz Zourob said...

عقبال التدوينة المائة وعشرين بعد المليون ان شاء الله وإلى المزيد والمزيد
يسعدني مروري بمدونتك ..

Unknown said...

ازيك يا طموحة يا واقعية؟ ههههههههههه

ربنا يخليكى والله
انا بافرح اما بلاقى ناس مهتمة بيوميات عانس حقود
باحس ان فعلا السنتين دول مهمين اوى فى حياتى

عاملة ايه؟ طمنينى عليكى

Unknown said...

ازيك يا وجع البنفسج

متشكرة اوى لتشجيعك اللطيف ده

بجد متشكرة جدا

انسانة واقعيه said...

ههههههه شفتى من طموحة لواقعيه النقيض..
الحمد لله اهو ماشى الحال بس المضحك فى الموضوع ان كل فترة البنى ادم يبص لحاله يقول لا مفيش اسوء من كدة استحاااااله فيه اسوء
وفجاه يلاقى فيه اسوء هههههه
بس يعنى واهى ماشيه
تسلمى لسؤالك يا قمر

Umzug Wien said...

Vielen Dank .. Und ich hoffe, Sie Mved Entwicklung und Schreiben von verschiedenen Themen :)

entrümpelung wien said...



Vielen Dank ... Wo neue Themen?

Räumung Wien said...


مدونة مميزة
كل تقدير واحترامى لكم ... :)

Entsorgung Wien said...

شكرا لكم ..))

ربح من النت said...

شكراّ ع الموضوع :)