النهاردة عدى على هذه المدونة سنتين بالتمام و الكمال. ليسة فاكرة اليوم اللى جاتنى فيه الفكرة, كان فى آخر ديسمبر 2007 و كنت مخنوقة و غضبانة و حاسة بالوحدة و الرغبة الشديدة فى الصريخ. كنت مش قادرة اسكت اكتر من كده.
كنت حاسة انى قربت اموت مخنوقة.
الفكرة ماكانتش حقوق مرأة و لا مساواة ولا كلام كبير من ده. الفكرة كانت قهرة على طاقة بشرية مكبوتة قدام عينى. احساس التسليم بالانهزام.
كم مرة سمعت " انا لو عييت عمرى ما اروح لدكتورة ست"
كم مرة سمعت " ماهو هانعمل ايه, لازم نسكت عشام مفيش عرسان"
كم مرة سمعت " اصلها يا عينى اتطلقت"
و كم مرة شوفت فى عينهم " يا عانس يا غيرانة"
لحد ما قررت ابدأ هذه اليوميات , و كلمت كل اللى قالوا عليا فى سرهم "عانس و غيرانة"
كان فى تدوينات كنت فعلا باكتبها و انا باصرخ بعلو صوتى. و كان فى ردود على تعليقات كنت باكتبها و انا حزينة.
عرفت ناس كتير حلوة اوى منها.منهم اللى اتفق و اللى اختلف. عرفت عنى حاجات كتير جدا من التعليقات و التفاعل مع المعلقين.
بقيت باضحك اما اتشتم و اتسلى اما ييجى حد يعرفنى ( و يعمل نفسه من غير اسم) عشان يقول كلمتين محشورين فى زوره مش قادر يقولهم فى وشى.
عرفت يعنى ايه حد يبقى مش موافق على كلامى و خايف يقوللى و اشوفها فى عينيه و هو ساكت.
عرفت و سمعت و قريت لكتر كلامهم فى سكة و شعورهم و تصرفاتهم فى سكة ... لما جيت فى فترة و فقدت ايمانى بانى اكتب اصلا من قرفى.
السنتين دول مهما شرحت عملوا لى ايه مش هاعرف.
غضبت .. و بكيت .. و رفضت .. و اكتئبت .. و قمت .. و ضحكت .. و كتبت .. و عرفت .. و قريت .. و سمعت
السنتين دول عمرهم ما هايروحوا لانى هافضل مدينة ليهم بكتير جدا. و مدينة لكل المتابعين و المعلقين و المشجعين بأكتر و اكتر.
و علانهم مهمين, و لانهم فادونى جدا , جمعتهم فى كتاب. و عشان هدفى منه مالوش علاقة بدنيا النشر اياها , جمعته فى نسخة الكترونية.
عشان تفضل المرحلة قدام عينى ...
لانها مرحلة مهمة جدا بالنسبة لى
انا يمكن مش عانس حقود خلاص ... لكنى لازلت غاضبة , و رافضة , و ثائرة ... ثورة البنفسج !
ه
28 comments:
كل سنة و إنت طيبة و مبروك البلوج الجديد
و انتى طيبة يا شيماء
و الله يبارك فيكى
ربنا يكرمك والله
انتى فعلا من الناس اللطيفة جدا اللى الواحد عرفهم هنا
كل سنة وانتي طيبة ياايمان وبجد مبروك البلوج الجديد ويارب كل يوم يكون عليكي زي ماتتمني
شكرا يا تامر جدا
و الله يبارك فيك
والله انتوا ناس لطيفة و مشجعة
:)
القلوب عند بعضها يا إيمان
ناوية بقى الثورة البنفسجية تكون ثورة سلمية و لا ثورة تأكل الأخضر و اليابس ؟
و انا اعرف ابقى هادية برضه يا شيماء؟ ههههههههه
انتى تعرفى عنى كده؟
على رأى واحد اما عرف اسم المدونة الجديدة , بيقوللى اما اللى فات ده كله ماكانش ثورة . امال كان ايه؟
ههههههههه
مصرية .. ازيك يا حبيبتى
وحشانى على فكرة
انا مش هاقفلها على فكرة
اما بتقى عندك وقت و حابة تقرى اى حاجة يا ريت
و ريت كمان تبقى تقوليلى رأيك
كل سنه وانتى طيبه ومبروك البلوج الجديد
و انتى طيبة يا ماجى
و الف شكر
ليه بس تشاركى المجتمع التخلف بتاعه و تسمى المدونة عانس مع انك بتكلمى فى حقوق المرأة و المساواه...لفظ عانس فى اللغه العربية يطلق على الرجل و ليس المرأه
لا ارى اى مشكلة فى عدم الزواج او الانفصال فان كانت المرأة لا ترتاح مع الرجل فلتنفصل او ان كانت لا تجد من يملأ عقلها قبل قلبها فلا داعى ان تورط نفسها فى عيشة مرار
دى سخرية من هذا المجتمع
عانس عانس
قولوا اللى يعجبكم و انا برضه هافضل زى مانا
مش هاتغير عشان حدحتى لو كان التمن ان يتقال عليا كده
بس ماتخافيش
انا مش عانس ابدا
الحمد لله
فين البلوج الجديد ده؟ انتي فتحتي بلغ تاني من وراية ؟
عزيزتي دكتورة ايمان
مبروك ثورة البنفسج ألف مبروك
mesh nawya tegy el bet 3andy 7aba :)
u always creative girl :)
regards
http://thawratalbanafseg.blogspot.com/
البلوغ الجديدة اهى يا فوبوس
هدفنا ارضاءكم يا فندم
صحيح ... فين حبوب الكافيين اللى قلتلى عليها دى؟
شكر د/ اياد
تشجيعك دايما بيفرحنى
شكرا جزيلا
انا جاية قريب ان شاء الله
بس الناس تخلص امتحانات يا بطة
:)
مدونتك رائعة وافكارك بتعجبنا ... استمري واحنا معاك يا قمر...
Success:
متشكرة جدا على التشجيع. عايزاكى تبصى على البلوج الجديدة بقى لو سمحتى و تقول لى رأيك
ماشى؟
كل سنتين وانت طيبة يا إيمان
:)
سنة سعيدة
أنا اليوم بدأت أول مدونة لي يا إيمان ويا ريت أوصل لليوم اللي تكون فيه مدونتي بعد سنتين في مستوى نجاح مدونة حضرتك
انا باجى هنا كتير بس مبعلقش
معرفش...بحترمك اوى اوى وبحبك وبحس انى لو علقت دة هيبقى شىء سخيف
معجبة بيكى بجد
ربنا يحميكى
77math:
وانتى طيبة يا رفيقة :)
احمد ... لو ماخانتوش الذاكرة:
احترافية مرة واحدة؟ متشكرة اوى
و شكرا لدعوتك الرقيقة للمدونة و هى حاجة بتيجى مع الوقت على فكرة. اصبر بس انت و هاتشوف ان شاء الله :)
Abdulmuttaleb
الف الف شكر على كلامك الحلو ده
و ان شاء الله بكل التوفيق يا رب
enjy
متشكرة اوى
و ان شاء الله المدونة الجديدة تعجبك
و يا ريت من وقت للتانى ابقى اعرف رأيك فى اللى باكتبه
انا اول مره ازور مدونتك وعجبتنى جدااااا
الف شكر يا هداية
يا ريت لو ليكى تعليق على اى حاجة تكتبيه لو سمحتى
يهمنى اعرف رأيك
وعليكم السلام والرحمة والإكرام يا بنت الكرام..
بالمختصر المفيد لأول مرة بسمع في المدونة في إحدى الصحف العربية ودخلتها لأول مرة قبل أيام معدودات وتقريبا قرأت كل ما كتبتي ..وذاك يشرفني ..ولي عودة قريبا ولكن أطلب منك طلب أو بالاحرى مجرد استفسار ألا ترين أنك تكتبين لنا على فترات متباعدة من 13/1 كتيييييييييييييير
Elia:
اهلا بيكى يا ست الكل
اما مش مبطلة كتابة
انا عندى مدونة تانية دلوقتى و باكتب فيها
و الرابط بتاعها اهه
http://thawratalbanafseg.blogspot.com/
و يا ريت اعرف رأيك فى اقرب وقت لو سمحتى
هى دى الحياة
التفاصيل الصغيرة بتصنع احداث كبيرة
و الاحداث بتصنع حياة
مضبوط كده يا شمس
شوفتى المدونة الجديدة؟ يهمنى رأيك
كل عام وانتي بخيرر انا اول ازور الثورة هذه والمدونة المتميزة انتي رائعه ياايمان
تمنياتي لك بالتوفيق والسعاده
Post a Comment