Thursday, February 26, 2009

46 - الجراحة .مش للبنات (مقال مجلة احنا شهر يوليو2008)ه

كان يوم من الايام الحلوة .. يوم نتيجة الثانوية العامة.. و اللى عرفت فيها انى حققت حلمى و حلم العيلة و دخلت كلية الطب.

و بعد 6 سنين عذاب مع المذاكرة و ذل فى امتحانات الشفوى و قهر ايام النتيجة..و بعد سنة امتياز و بالضبط فى مارس 2006 اتخرجت من كلية الطب و مسكت كارنيه النقابة و ترخيص مزاولة المهنة.

عشان تبقوا فى الصورة..طب بالنسبة لى عمرها ما كانت كلية القمة بتاعت الصفوة و الكلام ده اللى بينفخوا بيه طلبة سنة اولى..ولا كانت مصدر بريستيج و خصوصا للبنات عشان ابقى فى سوق العرايس دكتورة و لا لزوم الفشخرة الكدابة زى ما اهالى كتير بيبصولها.

طب دى من الاخر...حلمى...فعلا..يادوب اخرج برا اطار الحفظ و التسميع بتاع مناهج الجامعة و يتحول الطب الى امتع العلوم فى للاطلاع.

ماستنيتش كتير بعد التخرج و كنت عملت عقد عشان اتعلم فى حتى لو على حسابى.. و ايه يعنى مش مهم الفلوس دلوقتى..هما الدكاترة كده .. لازم يشحتوا اول 20 سنة فى حياتهم .. طالما بتتعلمى يبقى بتستفيدى.

اول يوم رحت لابسة البالطو و دخلت العيادة , لقيت دكتورة بتكتب على مكتب و سألتنى: خير؟ قلتلها : انا جديدة هنا ..طب اهلا يا دكتورة اتفضلى

قعدت على سرير كد جوا العيادة و محدش عبرنى غير دكتور اخد باله منى اول ما دخلت و بصلى و قاللى: انتى مين؟ - ايه الداخلة دى..ما علينا- رديت عليه : انا ايمان ..ديسمبر 2004 .. طب عين شمس .. اصل الاسم الثلاثى فى طب كده! بصلى و قاللى : انا د\ ... و احنا هنا 6 نواب انتى اجددهم يبقى انتى ال

Junior

و احنا هنا كلنا

Senior

عليكى .. وده معناه انك تسمعى الكلام من غير نقاش..احنا النهاردة ينحضر حالات العمليات بتاعت بكرة و ده معناه ان النهاردة طوارىء و الدكتورة ... هى المسئولة عنها..بصيتلها و سألتها:

هو حضرتك هاتباتى النهاردة – انا قلت اشوف يمكن ابات معاها-

قالتلى : ابات مين؟؟ انا عندى عيال اربيهم!!!

المهم عرفت منهم حبة بحبة نظام الشغل. و كان اول شىء مطلوب منى هو

Paper work

Junior الاول كنت فاكرة انى عشان

لكن فهمت بعد كده ان دى الوظيفة اللى المفروض البنات تأديها هى و شوية حالات فى العيادة و كتر خير الدنيا.

تيجى فى الحالات الصعبة ولا المتطورة ولا الجراحة و يتقال: لأ .. البنات مش بتوع كده و الرائع و المستفز انى كنت باسمع الكلام ده من البنات قبل الولاد!!

يعنى لما الستات تقول الكلام ده يبقى الرجالة مش ملامة.. كان كلامهم من عينة:

,,, اللى تقوللى اصل الجراحة دى عايزة جمودية..دى شغلانة رجالى مش بتاعت بنات

,,, واللى تقوللى اديكى رايحة جاية على وظيفة كويسة و محافظة على اللقب و هاتخدى الماجستير بتاعك ..انما الجراحة دى كبرى دماغك منها

,,, و اللى تقوللى اصل جراحة ازاى؟ انتى فى الاول و فى الآخر ليكى هايبقالك بيت مسئولة عنه و عيال تروحيلهم و راجل مش هايستحمل ترجعيله متأخرة عشان قال ايه كان عندك عمليات النهاردة

كان نفسى اسألهم طب دخلتوا طب ليه .. او طب جايين هنا ليه؟ ماقعدتوش فى البيت ليه؟ بس اكيد الاجابات كانت هاتنقكنى اكتر و انا مش ناقصة

عشان كده عذرت الرجالة شوية فى كلامهم اللى كان مليان غيظ و شحن و قرف و يأس من اى ست فى المجال

لدرجة ان مرة استاذ من اساتذتى – اللى كان فعلا بيحاول يساعدنى و يعلمنى – قاللى : انا هاعد اعلم فيكى و اول ما هاتتخطبى مش هلاقيكى .. هاتتلهى فى الجهاز و الشقة و بخ!

و مرة زميلى قاللى:

مانتى تعدى تزاحمينى فى التعليم .. و الفرص تتقسم علينا بالتساوى و بعد ماتتجوزى بكم شهر تاخدى عمل مخفف عشان الحمل و اجازة رعاية طفل عشان العيال .. يعنى لا سيبتيلى التعليم و لا انتى عملتى بيه حاجة .. للى هو فيها لاخفيها و خلاص

و واحد بقى من النواب الكبار جابهالى على بلاطة و قاللى:

الدكاترة الستات .. استثمار فاشل!!!

طب حد يفهمنى .. بكلام الستات قبل الرجالة,انا ارد اقول ايه؟؟ و منين اقنع اى حد انى مش كده ؟ و ازاى؟؟ دول فاكرينى جاية املى الفراغ العاطفى اللى فى حياتى و ادور على عريس

محدش كان واخدنى بجد و اللى كان مزود ده انى بحكم انى ليسة متخرجة كانت معلوماتى قليلة و خبرتى معدومة .. فطبعا كنت بسأل فى امور بسيطة و اصبحت بديهية عندهم و كانوا بيستخدموا ده ذريعة لتأكيد عدم استحقاقى للتواجد فى المكان ده اصلا و كأن كل واحد فيهم كان مولود ب سيديهات طب فى دماغه

و طبعا كانوا بيضحكوا ..

اما حبى الاول بقى ..الجراحة فمهما وصفتلكوا اول مرة يتسمحلى رسمى تبقالى عملية جراحية اعملها لوحدى كانت عاملة ازاى مش هاعرف ! كان استاذى الطيب ده هو السبب .. ماعتقدش لولاه كان حد هايدينى الفرصة دى . و طبعا لازم الاول فى مرحلة طويلة باشتغل تحت اشراف كامل من احد الدكاترة الاكبر منى و ده امر مفهوم طبعا .. و ده طبعا جه بعد مرحلة من التمرين على حاجات من كذا مادة و سفينج و بعدين خطوات بسيطة – كانوا بيذلونى عليها-

المهم .. ان ليا حالة النهاردة .. اما الممرضة نادتنى و قالتلى :" يالله يا دكتورة اتعقمى عشان هانبدأ حالتك " كنت سعيدة سعادة .. بس السعادة ما كملتش .. لان ببساطة شديدة الدكتور المشرف اشتغل الحالة كلها!! بلغة الدكاترة "هبشها " .. آه .. هو كده .. بمنتهى البساطة !!

وقتها مسكت نفسى بالعافية من العياط .. و باصيلى هو و قاللى:

"ايه مالك فى ايه؟ انتى مصدقة نفسك اوى كده ليه؟ انتى فاكرة انك هاتبقى جراحة بجد؟ .. امتبى علاج العيان فى الملف بتاعه عشان التمريض يطلعه اودته !!"

15 comments:

محمد حمدي said...

ايه ده انتى بتكتبى فى مجلة احنا

ايه رايك فى موضوع بعنوان "انا اللى قتلت اخويا" انا اللى كاتب الموضوع ده على فكره

تحياتى

Unknown said...

سيبك منهم
اتمسكي بحلمك ومسيرك هتحققيه

Guminamaso said...

بصراحةخبرتي عن مصر قليلة ولكني اعرف دكاترة كانوا مبتدئين وصغار والحمد لله حالياً عظماء في تخصصاتهم,
اللي أعرفه هنا في ألمانيا وإيطاليا حيث أقيم أن المبتدئين في مهنة الطب بيأخذوا فرصتهم الكاملة بممارسة المهنة تحت إشراف أطباء كبار في الخبرة والممارسة بكل إحترام وحب عطاء لخلق أجيال جديدة من الأطباء ....اللي عايز أقوله ليكي أنك لا تنظري لكلامهم وإستمري بصبر حتي تنالي ما تبغين ولا يهمك كلامهم حتي تحققي ما تصبو إليه
مع تمنياتي لك بمستقبل ناجح
تحياتي لك
أبو يوسف
ألمانيا

Unknown said...

كنت يا محممد السنة اللى فاتت
دلوقتى لأة

الاوضاع اتغيرت خالص يا اسراء .. انا دلوقتى علاقتى بالطب عجيبة جدا

هى الدنيا فى مصر مختلفة كتير عن البلاد اللى اتكلمت عنها يا ابو جوزيف .. و برضه انا مش ناسية بس خلينا نأمل فى الخير و اللى فيه النصيب

nohamy said...

للاسف الوضع كدة ف كل الشغل
مش عارف اقولك اية
بجد مش عارف

منــار فايد said...

على فكره هو ده اللي بيحصل فعلا من كل الدكاتره الكبار
بس ولا يهمك مادام انتي حابه الحاجه اللي انتي عاملاها ولا يهمك
وان شاء الله هتوصلي

بس عارفه لازم تتعبي شويه وتستحملي كتير اوي عشان ده معناه انك ماشيه صح وانك في طريق تحقيق حلمك

بس كلامك بامانه اداني دفعه ياس كبيره
ان بعد العذاب ده كله وخصوصا امتحانات الشفوي هنتعامل كدا او هنقعد في البيت؟؟؟؟؟؟؟

ده رايي بس كلامك جميل جدا واديني بقرا في مدونتك واللي يعجبني برد عليه

تقبلي مروري منار

Anonymous said...

am da msh m3aky bas 7ta law ragl kanw hy3zboky we asbory ama teb2y senior we htl2y myt sabab ank t3zby ally as3'r mnk zy ally akbr 3amloh feky .. msh mawd3 ragl we st hwa elmasryn lazm yl2w sabab bas
3ala fekra ana a3rf senior gra7a ansa we mbhdla kol ally ta7tyha arfahom bas baman hya ashtrhom 3oablk kda

silverstone said...

never say die ya iman da 7elmk w lazem tsbory l7ad matkhalihom homa aly y3trfo ank gara7a shatra w mat2lesh 3anhom , and by the way da 7al albanat fe ay sho3'l not only altb , ya3ny yob2a tal3 3enek w shayla sho3'l aktar mn agda3 ragel w tla2y alpromption aw altakber kolo ray7 llwalad aw 2al ah 3ashan fate7 bet w 3ando mas2olya w m7tag llsho3'l aktar mnk tab bas bardo da mosh m3nah an ay bent tt7'ala 3n 7elmaha w kyanha

Unknown said...

ماتقولش يا تهامى ... هانقول ايه بس


شباك موارب
الكلام ده فعلا ممكن يكون دفعة لقدام او تلكيكة عشان الواحد يبطل يتعب
ماهو خلاص .. طالما هى صعبة كده يبقى ايه بقى لازمته التعب؟
و فعلا اى حد فينا فى المجال ده ممكن بسهولة يلاقى نفسه بيستسلم .. عشان كده انا اصلا حطيت المقال دى رغم ان بقالها كذا شهر .. عشان افكر نفسى

Unknown said...

انونيماس:
اللى دايقنى مش ان فى سناير بيعملوا كده فى الجناير .. زى مانت قلت ده حال الكل.
انا اللى كنت باتكلم فيه هو موقف البنات قبل الولاد
ماهو لما الستات يبقوا اصلا بالتكاسل ده .. منين هيبقى فى اى تغيير؟
حاجة كمان .. انت شكلك فهمت ان انا نايب ولا حاجة فى حتة و تصحيحا للمعلومة انا كنت و دلوقتى لأة

يا سيلفر المأساة فىالستات مش الرجالة
المشكلة فى الستات اللى المناظر من كل حاجة
مظهر الدكتورة
و مظهر الزوجة
و كل حاجة بيعملوها بالتمثيل لحد ما فقدنا مصداقيتنا فى حاجات كتير اوى

silverstone said...

da mazboot ya iman w ana lma atkalmt 3ala altafro2a kont ba2sod alstat 2bl alrgala ya3ny law 3andk moder ragel bydeky tashge3 w support aktar mn alstat w da aly f3ln ghareeb awy bas khalena n2ol an mosh kol albanat kda bdalel ana w anty w gherna kter . bas sad2eny da sababo altarbya w almogtama3 aly byraby albnt w yzra3 feha anaha mataslo7sh l7aga gher algawaz w altabekh w alamal alwa7ed howa an a7na nbtdy bnafsna

Anonymous said...

Eman,
Sex and gendre ( role of sex) are 2 different concepts.
The society reduces the feminine role to certain functions, old heritage. You are doctor, you benefitted from a formation, you had your chance, and you will have the possibility of practicing your “art”.
I do not know for Egypt. In occident, the girls are majority at some Medical colleges, and in much of fields, the problem becomes different: how to improve the situation of the boys, to convince them to give up the foot and the games to make “good studies”.

mona shawky said...

السلام عليكم
كلامك معبر عن الواقع المر فعلا يا دكتورة وده فى مجالات كتيرة
غير الطب كمان
بس لازم نصر على إثبات كفائتنا
ولانى الرجالة طبيعى بياكلوا فى بعض وكذلك الستات
فربنا يعنيك ويوفقك
وفعلا لازم تتمسكى بحلمك
ربنا معاك

ولاء النعماني said...

عارفه فكرتيني بمين ؟؟
د. كريستينا يانغ - ساندرا أوه إللي ف جرايز أناتومي

هي كمان تنافسيه جداااااااااا
وبتعيط عشان العمليات

بس أنا بحترم الشخصيات دي جداااااااااً

ليكي عندي تعليق طويل
بس المرة الجايه أن شاء الله

Unknown said...

Pathol: can I just move and to your place? :D
I would so much love to live there for a while :D

منى:
الحل فعلا فى التمسك بالحلم
اللى للأسف كل شوية بيبقى صعب
بس مفيش غير كده فعلا .. عندك كل الحق

ولاء:

اولا انا مستنية بكل فارغ الصبر بقية كلامك فعلا
اما عن انى تنافسية فدى فعلا حقيقة فعلا فيا
انتى فهمتينى اوى