Wednesday, April 16, 2008

20 - التحمرش

التحرش يعنى
اللى يعرفونى بشكل شخصى عارفين ان الموضوع ده واكل دماغى بقالى فترة
الاخوة شباب التحمرش مش هم اللى هاتكلم عنهم لانهم مايسهلوش
المهم عندى هم البنات اللى بيتعرضوا للتحرش و المجتمع اللى بيشهد الحادثة دى
أولا كده انا باقصد التحرش بكل انواعه و درجاته .. من اول التفكير فيها بشل مهين الى النظرات اياها مرورا بمحاولات اللمس و الهمس( اللى اى واحدة بتركب مواصلات فى مصر عارفاهم كويس)الى الضرب انتهاء بالاغتصاب .. و ده حتى لو من الازواج!! آه .. ما هو الزوج برضه ممكن يتحرش بزوجته .. و ممكن كمان يغتصبها .. غريبة صح؟؟
للأسف الشديد , البنت فى الاحوال دى نتيجة تربية مهينة لانسانيتها و مقللة لقيمتها رسخت فيها قبل فى غيرها مجموعة من المفاهيم الخربانة اللى بتؤدى بالبنت ضحية التحرش الى الوقوع فى دواير ذنب و حلقات مفرغة من المشاعر السلبية اللى كلها طبعا تجاه نفسها
الدايرة الاولى
" اشمعنا انا مش اى بنت من اللى حواليا؟ ماهو اكيد شاف منى اللى شجعه و اكدله انى هاقول آه"
ما هى اللى بتنزل من بيتها لابسة كده لازم تتعاكس
" ما هى مش لازم يعنى تتكلم بحريتها و على سجيتها كده .. البنت لازم تنقى كلامها ( و تمثل ساذجة و عبيطة ) و والا ماكانش هيتاخد عنها الانطباع السافل ده و لا عمره كان اتجرأ يفكر انها هاتوافق
يعنى بالذمة راجل فى مركزه و باسمه .. الللى يعنى لو عايز واحدة فى الحرام حتى مش هايجيب؟ اكيد مش هايغامر بكل سمعته و هايلمانه ده الا لو كان عارف و متأكد منها
الرجالة برضه ليهم نظرة .. بيعرفوا علاطول دى ايه و دى ايه
اصل فى ستات كده ... مزاجهم يلاغوا الراجل حتى و لو بالعينين بس و بعد كده اما يقرب منها تقوم عاملة محترمة و رافضة و آل يعنى مالهاش فى كده.... فالرجالة يا حرام اتلخبطوا من تخبط الرسايل
هل مفيش فى هذى الحياة ستات (تستمتع ) بالمعاكسة و تستهدفها؟ اكيد فى طبعا
هل مفيش ستات فعلا مزاجهم يجيبوا الراجل و بعدين يرموه؟ للأسف فى
بس فين الراجل فى ده كله؟؟ يعنى الستات وحشة خالص و مش مؤدبين نهائى ... مااااااااااااشى .. فين الراجل يعنى؟؟
سؤال: مين قال ان الراجل كتلة هرمونية واخدة شكل بشرى تحركها الهرمونات ( و اشياء اخرى )؟
و كأن الراجل كائن يا حرام لا حول له ولا قوة .. اما بيشوف ست مثيرة بيبقى يا عينى لا مقاومة له فمبالك بقى لو المثيرة دى هى اللى جت لحد عنده!! و بالتالى لو جات معاه مرة غلط فى واحدة مش كده يبقى الرجالة يا كبدى اتلخبطوا .. مش كفاية انهم مش قادرين على نفسهم كمان هايفكروا و يشوفوا و ينقوا من يتحرشوا بيها و مين لأة؟؟
الدايرة التانية
"الراجل لو اتصد مرة عمره ما هيكرر المحاولة تانى"
" البنت المحترمة الجدعة لو حد قرب منها بتقلع جزمتها و بيها على دماغه و لو عملت كده اكيد عمره ما هايحاول تانى"
" هى اللى خايفة على المصلحة اللى جايلها منه عشان كده متجاوبة معاه
" انا اول مرة من الخضة و المفاجأة لسانى اتشل ,فافتكر ده موافقة صامتة"
"اللى بتعمل الغلطة مرة تعملها تانى و اللى تغلط الغلطة الغصيرة هاتغلط الغلطة الكبيرة"
و دى خصوصا لو البنت فعلا ابدت اى نوع من اللا مقاومة سواء كان لرغبتها فى الاستمرار او خوف او غباء او اى سبب آخر.
طيب ... هانفترض جدلا انها وافقت او ماقاومتش بالشكل الجذرى المناسب اول مرة ,خلاص؟ يتكتب عليها كده العمر كله؟؟
انا كنت باقول لو على قد انه بيقول كلام و خلاص ماشى .. الكلام مابيلزقش لكن هو فهم من ده انى مرحبة بالاكتر
اللى ترضى تمسك ايدين و تبوس اكيد ترضى تعمل اكتر من كده
فى كل ده المجتمع الظالم اولا بيحكم على الانسان اللى غلط مرة سواء بالمشاركة او بعدم الرفض القاطع البين انه انسان مخطىء للأبد .. و فعلا هنا بيختفى تماما من القاموس مصطلح " الفرصة التانية"
بصى من الاخر كده .. هى لازم تبهدله .. تلطشه بالقلم .. ترقع بالصوت .. تلم عليه الرجالة يضربوه
لانها لو سكتت يبقى تستحمل بقى النتيجة .. هى طالما ماشية صح مايهمهاش حد
فى نفس الوقت تلاقى لو البنت بلغت او يعنى يبقى بتفضح نفسها و عيليتها على اساس ان الست مش لنفسها بس , الست بتمس جوزها و ابوها و اخوها و ابنها
ثالث دايرة
خطوة تبليغ السلطات
العقبات فى الخطوة دى كتير و طبعا اولها و اصعبها بيقى الاثبات لان فى احيان كتيرة اللى بيعملوا كده بيكونوا عارفين كويس ازاى مايسيبوش اى اثرو طبعا الاصعب لو البلاغ ضد الزوج و شبه المستحيل لو البلاغ بلاغ اغتصاب
العقبة التانية .. ردود الفعل
بيتبص للبنت دى بالتشكيك فى اخلاقها و نواياها ياما الاستخفاف بيها و غالبا الرجالة اللى حواليها هايكدبوها و يشتروه.
طبعا الحكاية مش مفترض تكون لعبة و اى واحدة تقدم شكوى كيدية كده فى اى واحد مش عاجبها
رابع دايرة
انا حاسة انى فى انتخابات
اخر مرحلة بقى ... المجتمع بينظر لضحية التحرش بمزيج من اللوم و الشك و الشفقة و الرخص .. كده كوكتيل على بعضه .. و لما بتطالب بحقها بمعاقبة المتحرش ماعرفش ليه و منين ده علاطول بيترجم الى انها اكيد اكيد اكيد فيها حاجة غلط
دى عينيها قوية
بالذمة دى واحدة ليسة منعرضة لموقف زى ده؟ دى ناقص تقوم ترقص
و كأن اللى بيحصلها كده لازم تكون موطية راسها و مش طالعلها حس
ماهو الموضوع بالصعوبة ان اللى تطالب بحقها فيه لازم تنشف و تجمد و لا يهمها كلام ولا يفرق معاها ناس
هو مفيش رد فعل واحد مناسب لكل المواقف و كل البنات و كل المتحرشين فى كل الاماكن
بس اهم حاجة انك تتصرفى التصرف اللى لما ترجعى تفتكرى الموقف ما تفتكريهوش لا بحزن ولا خجل و لا ندم ولا احساس بالهوان او الذنب... لان المزيج ده لو استولى على الانسان بيبقى اخطر عدو داخلى ممكن ياكل كل اللى جواكى من انسانية و يحولك لكائن قبيح مليان مشاعر مش ايجابية خالص تجاه نفسك و تجاه الحياة كلها
و بعدين لحسن تبقى حقودة زيى.....هههههههههه

12 comments:

Crystal Lobna said...

ياه موضوع كبير و مهم حاولتى تلخصى فى كلمتين أنا شايفة أنك نجحتى أصل كل ما عليكى أنك تقولى رأيك . ماكلنا تعرضنا للواقف ديه بدرجات متفاوته . بس بتنهيئلى أن النتيجه واحده أحساس عام بالظلم و الغضب و الأرف و الأحراج يعنى كوكتيل من المشاعر اللى بتأزى الست و يعنى مينفعش نلوم البنت يعنى الواد المؤدب المحترم اللى بيعمل كده حيتصرف ازاى لو سافر مره و لاقى كل الستات قلعين حيتحمرش بالبلد كلها ولا أية؟
حرام عليكوا يا ولاد راعوا ربنا. و على رأيك لازم البنات تعترض و تشتم و تزعق حتى لو بصولها أنها مجنونة أو هى اللى غلطانة ميهمهاش لأن لو كل البنات مسكتتش يمكن فى يوم يدركوا أن الغلط على الولد أكثر من الغلط على البنت

Samar Ali said...

hmmmmm...Emy!
wenaby aboos edeky can u shorten the posts 7aba? ana e7waleet!

tb3n..lazm ye7otto kol 7aga fo2 dema3' el female..3eeb 3leeky da 7ta kano yetn2to...asl el regala lsa 3ayshen dor Adaam el Mysken ely 3'aweto 7awa el 7aya..

Unknown said...

حاضر يا سمر
هاحاول اختصر فيه دلوقتى

بالضبط يا لبنى كلامك مفيش بعديه

P=S=Y=C=H=O said...

el mawdo3 dah begadd moshkelaa...
w moshkela kebira..
w moktma3 sl shrky bebos lil mawdo3 men zawaya wa7da bas w heya el''banat''
men awel el mo3ksata el 3abeta la7d el a3'tsab

w men awelo li a7'ro el bent heya eli mashya 3ala 7al sh3raha w say3a w ahlha marbhash
7aga ta2ref
7ar2et damy ya shi7'a

Anonymous said...

ايمان انا من شهر واحد بس اتعرفت على البلوج
واعجبت بيه كتير وانا واحد من البنات اللى اتعرضت للتحمرش للانى بشتغل .. يعنى تحرش ساعات فى المواصلات والشغل كمان واللى انت قلتيه على وجهة نظر الناس لما بقولهم بتكون نفس الكلام اللى انت قلتيه.. شكرا ليكى لنك حسستينى انى طبيعية لما بتضايق من الكلام ده
انا ليا طلب عندك ممكن تكلمى عن الصراحة فى حياتنا وازاى الكدب فى كل حاجة بقى هو العادى والصراحة هى الاستثناء
حتى كمان فى المشاعر
dody

Anonymous said...

انا بصراحة اول مرة اشترك فى التعليقات بس انا مبسوطة جدا من كم الصراحة والشجاعة اللى اخيرا عرفت الاقية لما نتكلم فى الموضوع دة بالذات بس علشان اقوللك ان موضوعك كامل انا ليا اعتراض كبيييير على كلمة شباب التحمرش لان ن هى دة الكلمة اللى معقدانى فى عيشتى ...
مين اللى قال ان المتحرشين كلهم او معظمهم شباب طبعا الحكومة ووسائل الاعلام الحكومية الغرض الوحيدمن الكدب دة هوة فقط المحاولة لالتماس اعذار للحيوانات قصدى للمتحرشين بانهم ضحية الظروف والكلام البطيخ دة ..
انا شخصيا معظم حالات التحرش اللى شفتها او تعرضت لها طوال عمرى حتى وانا قانونا يطلق على طفلة كانت من الانطاع ممن تجاوزوا سن الاربعين والخمسين والستين ايضا و يمكن ابر من كدة انا مبسننش يعنى .. وسدقينى ياايمان ان هؤلاء هم الاكثر فجرا فى تحرشاتهم ولا ينفع معاة النظرة الزاجرة ولا الافافة ولاحتى انك تشتمية وتفضحية دة تلاقية علاطول قال الاسطوانة الوسخة اللى كلهم بيقولوها اية يابنتى - خليتى بالك من بنتى دة كل المتحرشين بيقولوا يابنتى للى بيحترش بيها فعلا او بيمهد- انا عملت حاجة دة انتى من دور ولادى او على فكرة بقى اناى عندى اللى قدك ....
وطبعا كل الناس بتسكت ما هما اصلا بيسكتوا فى كل الاحوال او تلاقى حد اتطوع ياعينى وقاللك ما يقصدش ...
المصيبة فعلا ان انا اتعرضت قبل كدة لييجى خمس حالات تحرش من النوع دة كان المتحرش فيها معاة مراتة وعيالة كمان تخيلى وواحد منهم كان بيستغل ابنة الصغير على حجرة علشان لما قلت لة ما تلم نفسك بقى يقول لى دة ايد الطفل اللى على حجرة مش ايدة هوة يا سلام ايد الطفل فيها دبلة فضة ... بينما الكم المهمل اللى جنبة اللى اسمها مراتة تعمل مش واخدة بالها ولما الحكاية تبقى فيها فضايح تعمل مصدقاة رغم ان صفرة وجهها تؤكد العكس واكيد دة مش اول مرة يعنى ....
اللة يخرب بيت المحاكم اللى ذلت الستات وخلتهم يفرطوا فى كرامتهم حتى اخر ذرة

Unknown said...

dody:

اكيد انا الى فرحانة جدا بكلامك
اما عن التجارب فصدقينى مفيش بنت مالهاش قصص و حكايات فى الموضوع ده
و الموضوع اللى بتتكلمى فيه ده اساس عذابى فى الحياة و انا بحضره فعلا
تحياتى

انونيماس:

كلامك معندكيش فكرة اثر فيا ازاى
زبالة بشرية و الواحد المفروض يتعامل معاها
انيل حاجة فى الدنيا اما البنت تحس بالذنب اما واحد يلمسها
و ده اللى بيخرسها
و ده على فكرة بييجى من ام جبانة عاشت خايفة و عايزة تربى عيال خافين زيها
و من اب مختفى
الاب اللى المفروض الحيطة و السند و كل حاجة البنت ممكن تحتاجها عشان تحس بالامان
بس اما يبقى بنى آدم و راجل اصلا
للأسف .. الحكاية كلها خربانة

Unknown said...

سايكو:

قال يعنى البت مش محروق دمها اصلا .. ههههه
كالعادة فى ردودك .. بتجيبى من الاخر

Unknown said...

احسن كده يا سمر؟

Samar Ali said...

foll ya amy!

AyA said...

هو فعلا تحمرش :)

انت تقريبا غطيتي الموضوع من كل جوانبه....
وعلى فكرة, كتير جدا بيحصل ان البنت تمسك في الحيوان وتقول أبلغ وهاخده القسم, الناس تسيبه خاااالص ولا حتى يمسكوه يضربوه, ويقعدوا يقولوها معلش سيبيه عنده عيال عنده ذفت, طب هي مالها؟ ماللي عنده عيال يخاف على عياله ويتلم, واللي خايف على عمره من تلات سنين سجن يبقى يحترم نفسه, واللي خايف لا البنت تقوم زقاه موقعاه تحت اتوبيس ولا موتوسكل يبقى مايحطش البنت في موقف يخيرها بين يا تتسبب في مقتله يا تتحمل كلماته المريضة....
بجد بجد موضوع مزعج اوي, واذكر مرة انا كنت متنرفزة جدا, رجعت كتبت موضوع في منتدى عن الموضوع من وجهة نظر تانية, اللي هي انا أقل منه في ايه عشان ياخد الحق في انه يؤذيني لأني خرجت الشارع؟!!, وفكرة ان البنات لابسين ولا مش لابسين دي فكرة غلط خالص, انا مش هفتي وأقول الرجالة بتفكر ازاي ومابتفكرش ازاي, بس من واقع كوني بنت واعرف بنات كتير أقدر اقول بثقة ان اللي بيعاكس مابيشوفش بنت لابسة محترم ولا لا, هو أصلا بيشوف البنت على انها انثى والمعنى الحيواني لكلمة انثى وبس!, يعني لو جبت قرد ولبستيه لبس بنات هيتعاكس.... بس يبقى قرد بيمشي في الشارع عشان لو اتنطط على الشجر مش هيعرفوا يعاكسوه...:(

Unknown said...

عندك كل الحق يا اية
و للأسف الشديد ان اللى بيروج للأفكار بشكل كبير هو البنات نفسهم نش اى حد تانى
اما الواحد بقى مش طايق يتكلم مع بنات والله
اكيد هى اللى شجعته
حرام عليكوا الشباب .. هايعملوا ايه يعنى
ماتحاكموش جعان على سرقة اللقمة

و كلام اهطل بقى بيقلب معدتى والله