Wednesday, September 17, 2008

29 - اعلان التحرش الجنسى

اتنين شباب لابسين بدل سودا شيك فى حفلة يلمحوا - لا مؤاخذة - مزة واقفة بظهرها لابسة فستان اسود سواريه فوق الركبة

قوم ايه الواد الاول يزغد الواد التانى و يقله ظهرها حكاية فالتانى يرد عليه و يقله لا ده وشها جامد ... و كلام كده

ياخدوا بعض و يمشوا فى اتجاه البنت اللى واقفة و بصالهم و فرحانة بنفسها

يقوموا يخيبوا املها و يسيبوها واقفة و يتجهوا لعربيه هيونداى سودا واقفة وراها فى القاعة

كل مجهودنا ضاعت للارتقاء بالشعب ... انا مش مزة و حتى لو البنت قلعت ملط و لا للتحرش و لسة فيكى رجالة يا مصر و احمى نفسك و مش عايزة اتعرف.... و لا عزاء


منقول عن مروة رخا .. على الله الحملة دى تعمل اى حاجة

10 comments:

الكلام نوعان كلام فارغ وكلام مليان كلام فارغ said...

هيييييييييييييييه انا اول واحده
انتى عندك حق مع ان البنت بتفرح اوى من اللى يقولها يا مزه
ويعدين يرجعوا المزز الحلوين اللى قالعين ملط على رايك لما يحصلهم تحرش يقولوا دي حريه وانا البس اللى انا عايزاه
انا برفه صوتى معاكى وبقولك انا كمان مش مزه ومش عايزة اتعرف
سعدت بيكي وياريت تشرفيني

Fantasia said...

كل سنة وانت طيبة يا إيمان

مش تقولوا انها حملة؟ أنا الموضوع نرفزني فعلا ولو اني ما شفتش الاعلان

تشييء المرأة بقى ظاهرة لا يمكن السكوت عنها. مش ممكن حجم الاسفاف اللي مفروض علينا من كل ناحية وبيحاصرنا في وسائل الاعلام طول الوقت

شكرا على نشر الموضوع واتمنى دي تكون بداية لحملة على كل الاعلانات اللي بتستغل المرأة بشكل مهين

Unknown said...

ahlan meshmesh
ana sa3eeda aktar

fantasia:
المشكلة كمان فى البهوات اللى فى الاعلان دول من نجوم الكرة
يعنى الاعلان دعوة للتحرش رسمية مدعمة من نجوم المجتمع شئنا ام ابينا
و ده اللى زود غيظى

إيثار said...

بصراحة
الاعلان ده
من اكثر الاعلانات
اللي استزتني
و بدات الاحظ ان الايام دي
بداو ينزلوا اعلانات
ملهاش لازمة

ربنا يهديهم

خواطر ليست عابرة said...

يبقي الأحسن الواحدة تريح نفسها وتبطل محاولات إلفات نظر الولاد لأن لما يجيلها نصيبها هتستغرب انها مبذلتش مجهود يذكر عشان تنال المكتوب. ليست دعوة للاستسلام.

Unknown said...

امال دعوة لأيه بالضبط؟

انسانة واقعيه said...

والله يا ايمان هية ازمة تربية فى الاساس..غياب دور العيلة

لو الام مربية كويس ابنها هيعرف انة عيب يعاكس بنت فالشارع وهيعرف انها اختة فى الاسلام والمفروض يحافظ عليها وليس العكس

والبنت هتعرف الزى الاسلامى اللى ميلفتش النظر ليها وبالتالى هتبقى رمز للعفة والطهارة..وحتى لو البنت حبت تعمل غير كدة يبقى فية رقابة فالبيت البنت متنزلش وهية حطة بلاوى فوشها ولابسة ومش لابسة.. الاولاد مراءة للبيت

وبالتالى الشباب مراءة الامة

واكيد مرايتنا واضحة اوى..هية ازمة اخلاق..وازمة دين فى المقام الاول

تسلم ايدك ايمان

Unknown said...

تسلمى انتى يا طموحة
موال التربية ده مصيبة
من كم يوم فى العيلة بيحكوا ان فلانة خطيبها ضربها .. قام عيل فى تانية ابتدائى بيرد قال: "ليه..هى عملت ايه؟"

كنت عايزة اشيل التليفزيون و اخبط دماغى بيه
لولا ماما اتدخلت الحمد لله

لـِمضه said...

بصراحه انا كبنت ماحبش حد يصيفنى بكلمه موزه دى لانى بشوفها كلمه غير اخلاقيه وكمان البنت ذى الولد كائن بشرى مالهاش تصنيف غير انها انسانه , اما موضوع اللبس فده شىء خاص ولكل انسان له حريه اختيار ملابسه , وانا بشوف ان لبس الانسان بيكون مبنى على الوسط اللى عايش فيه , وبعدين ده مش بيحدد اخلاق البنت اطلاقا ,وبعدين انا بشوف ان الولاد الحجه بتاعتهم ان البنت بتلبس لبس عريان فلازم اتحرش بيها على الرغم ان نسب التحرش الاكثر ارتفاعا فى المحجبات والمنتقبات , يعنى الموضوع اخلاق الولاد وانهم فاضيين وعاطلين ويعملوا ايه غير انهم يتحرشوا بينا ,لكن لو فى قانون واضح وصريح صدقينى مش هيحصل كده .. لان بكل صراحه احنا شعب " يخاف مش يختشى" على فكره انا جديده هنا

Unknown said...

ازيك يا لمضة
اهلا بيكى يا ست الكل
يسلم كلامك و عقلك
اللى انت بتقوليه ده هو اللى بنحاول كلنا نوصله لفئة من الشباب اللى مش شايفين الست غير وعاء تفريغ .
ربنا يهدى الجميع
و اهلا بيكى