Sunday, November 15, 2009

52- نرجع للتدوين ... و لقبة البرلمان

ازيكم .. وحشتونى و وحشتنى المدونة و وحشنى التدوين كله.
كنت باحضر بوست عن الغيبة و سببها بس حصلت احداث خليتنى استنى على البوست ده
اولا انا صوتى رايح و زورى مجروح و فرحانة اوى ... و ان شاء الله الفرحة تتم يوم الاربع

اسمحولى اخش فى الموضوع علاطول.
فى 26 ديسمبر 2007 , قدم النائب محمد خليل قويطة - النائب فى مجلس الشعب - مشروع
تعديل المادة‮ '‬290‮' ‬من قانون العقوبات بجواز اجهاض الانثي التي تم اغتصابها
لو تم حمل نتيجة هذا التجربة.
بعد جدل متوقع بين علماء الدين , وافق مجمع البحوث الاسلامية على التعديل . و وافق مفتى الجمهورية السابق ( نصر فريد واصل)- وقتها -.. و شيخ الازهر الحالى ( محمد سيد طنطاوى) على التعديل.
الخطوة اللى بعد كده كانت رد فعل مجلس الشعب. و فى ابريل2008
وافقت عليه لجنة الاقتراحات والشكاوى بمجلس الشعب وقامت بإحالته إلى لجنة الشئون الدستورية والتشريعية بالمجلس.

الجديد كان فى 9 نوفمبر 2009. كان فى مؤتمر مشترك من مؤسسة المرأة الجديدة و المبادرة المصرية للحقوق الشخصية و طالبوا فيه المجلس انهم يعاملوا الموضوع باهتمام اكتر و سألوا فيه السؤال المهم " هو ليه لحد النهاردة مفيش جديد فى الموضوع ده؟"

هارجعله تانى السؤال ده.

و انا بالف لفة فى النت حوالين الموضوع . كنت عايزة اعرف اللى ممكن يعارض الفكرة بانى معارضته دى على اى اساس
فلقيت الفيديو ده .. حلقة من برنامج 90 دقيقة عن الموضوع . و مستضيفين النائب قويطة صاحب التعديل المقترح و الشيخ جمال قطب اللى مع هذا التعديل و طرف تالت يحمل وجهة النظر المعارضة و اللى - لحسرتى الشخصية - طلع ست!!!
الدكتورة فايزة خاطر رئيس قسم الفلسفة و العقيدة فى الازهر .. اللى بنت معارضتها على 3 محاور - و اللى كانت فى الاغلب هى اسباب نعارضة المعارضين -:

1- اذا كان الاغتصاب غلط , فالاجهاض برضه غلط و لا يجوز تصحيح خطأ بخطأ
2- القصص المشابهة فى السيرة .. و ذكرت قصة عن ان الرسول عليه الصلاة و السلام امر زانية بالحفاظ على جنينها و ارضاعه .. و راحت و جت حوالين فكرة ان محصلش اغتصاب وقتها عشان نعرف حكمهم فيه كان ايه
3- ايه اللى خلى المغتصب يغتصب؟ فين وزير القوة العاملة؟ فين وزير الشباب؟ مش حرام واحد يكمل 40 سنة و يبقى ليسة مش متجوز؟

ده بالاضافة لنقطة كمان - ماتكلمتش فيها الدكتورة- بس فى معارضين تانيين اتكلموا فيها - و هى ان ده هايفتح الفرصة قدام اى واحدة حامل حمل غير مشروع انها بسهولة تنهيه و ده هايخللى الامور سهلة

ماشى
اولا: انا مع الدكتورة بان تصحيح الخطأ عمره ماكان مبرر لخطأ آخر. بس الحكم على الاشياء بكونها خطأ او لأ اصلا بيخضع للنظر فى الظروف المحيطة ... بمعنى ... احنا هنا بنفاضل بين وضعين
*الوضع الاول هو الاجهاض الرسمى . فى مستشفى معروفة و حكومية . بمحضر بوليس و حكم
*و بين انها تعمل كده تحت بير السلم عشان بعد معاناتها السابقة فى اغتصابها تتعرض للمعاناة التانية فى اجهاضها.
اصل كم واحدة فعلا هاتحمل من اغتصاب هاتكمل الحمل يعنى؟ اللى هايحصل ان احنا هانجبرها تروح للحلاق و الله اعلم بقى تاخدلها ايدز ولا التهاب كبدى و لا تنزف لحد اما تموت ولا انهى بلوة ممكن تحصلها.
المفاضلة بين الاتنين - فى تقديرى الشخصى - واضحة.

تانى حاجة: انا مش هافتى فى السيرة و اقول حصل ولا ماحصلش . بس على قد معرفتى فى فرق واضح بين المغتصبة و الزانية. و مش هاتكلم فى النقطة دى كتير عشان ليها ناسها و رد الشيخ على الدكتورة فى الفيديو افيد لينا من انى اجادل فيها.

تالت نقطة بقى مش هاعرف ابقى مؤدبة .. و هاقولها واضحة جدا ..... " و هى مالها امها البنت بليه المغتصب عمل فيها كده؟"
وزير الشباب ظلمه اما مادالوش حقه. و وزير القوة العاملة افترى عليه اما ما وفرلوش وظيفة و الحكومة الوحشة حرمته من حقه فى الحياة ... يقوم يغتصب البنية؟؟؟؟ و كمان نقولها لو حملتى كملى الحمل؟؟؟؟!!!
و بعدين هبب اللى هببه و اغتصبها .. مالنا احنا دلوقتى و مال الظروف و الجوابات و اللى خلاه يغتصبها؟
يعنى ابقى عندى بنى آدم بينزف .. اقول هاعمل تحاليل عشان اشوف المرض المسبب و انا سايبة الدم عمال ينزف؟؟
طبعا معرفة اساس المشكلة مهم و حيوى فى حلها. بس برضه ده مايمنعش ان فى مضاعفات لا تحتمل الانتظار لحد ما نحلل و نتفحص فى ايه سبب المشكلة
خصوصا فى مشكلة زى دى
البنت - و الجنين - هايدفعوا تمنها بالكامل.

و فى الاخر الاخوة الخايفين على نسيج الامة الشريفة من الستات الوحشين اللى بيحملوا - لوحدهم - من اى حاجة غير الاغتصاب لحسن ده يخليهم بسهولة يتخلصوا من الحمل . و بالتالى هذه الست مش هاتعانى - لوحدها - من العقاب اللى المفروض تشوفه بعد علمتها المنيلة اللى طبعا عملتها - لوحدها-


حد من رجال الدين او اى معارضين فكر لو البنت دى فعلا خلفت الطفل ده هايروح فين و يتنسب لمين؟
حد فكر البنت دى هاتكون حياتها عاملة ازاى ؟
طب الطفل ده هايعيش ازاى؟ مين هايربيه؟ و لو الضحية طفلة صغيرة . هانجبر اهلها يبروا ابنها ده يعنى؟
انا مش حاسة ان فى حد واخد الموضوع جد لان الكل متأكد ان مفيش تقريبا اى واحدة هاتسيب الحمل يكمل و انها اكيد هاتنهيه .... بس فى الخفا ... الخفا اللى بنموت فيه
خايفين اوى لحسن لو قبلنا القانون ده يتقال ان مصر بقى فيها الاجهاض سهل؟ طب و الحل؟ نخليه صعب و مش مهم ان ده باب لحاجة من 2
يا اما الاجهاض الغير قانونى بكل مخاطره الصحية و النفسية
يا اما اكمال الحمل و بعدين التخلص من الطفل عشان ينزل ضيف دائم فى دار من دور الايتام اللى بتتضاعف فى مصر.

حد فكر الدور دى عمالة تكتر ليه؟ اصل الاطفال دول نسبة كبيرة منهم مجهولى النسب و لقطاء .. اليتيم فى اغلب الاحين حد من عيلته ولا بلده بيربيه .. انما اللى بيلاقوهم على الترع و فى وسط الطوب و الزلط دول حاجة تانية.

يعنى عشان المجتمع عايز يعاقب البنت اللى عملت كده بمزاجها - رغم انه ما بيحاولش يفكر حتى فى عقاب الراجل - يقوم يضاعف عذاب البنت اللى بتتعرض للاغتصاب؟

السؤال التانى - و الاهم - بقى .. هو ليه من سنة و نص مفيش جديد فى الموضوع ده؟
انا مش هادعى المعرفة بالقوانين .. بس مش غريبة ان من ابريل 2008 و مفيش اى جديد؟ ايه السبب فى ان ما تمش البت فى الموضوع ده.
يا ريت لو حد يعرف حاجة يقوللى
و لو فى دور احنا كأفراد نقدر نقوم بيه برضه يقول
احنا نقدر نتواصل مع اعضاء مجلس الشعب . لو الامر فى ايديهم
انا فعلا ماعرفش .. بس اللى اعرفه اننا لازم نسأل ليه .. خصوصا ان على قد فهمى الموضوع مرحب بيه من اكتر من جهة رسمية .. يبقى ايه اللى موقفه بقى؟

16 comments:

shaimaa rady said...

اول كومنت

قبل ما اعلق اناشمياء راضي اللي قابلتك في قعدة عربي مروة رخا :)

انتي بنت حلال لسة كنت بقول هي بقالها كتير مش بتكبت لية نسيت اسألك هناك :)

shaimaa rady said...

تالت نقطة بقى مش هاعرف ابقى مؤدبة .. و هاقولها واضحة جدا ..... " و هى مالها امها البنت بليه المغتصب عمل فيها كده؟"
وزير الشباب ظلمه اما مادالوش حقه. و وزير القوة العاملة افترى عليه اما ما وفرلوش وظيفة و الحكومة الوحشة حرمته من حقه فى الحياة ... يقوم يغتصب البنية؟؟؟؟ و كمان نقولها لو حملتى كملى الحمل؟؟؟؟!!!
و بعدين هبب اللى هببه و اغتصبها .. مالنا احنا دلوقتى و مال الظروف و الجوابات و اللى خلاه يغتصبها؟
يعنى ابقى عندى بنى آدم بينزف .. اقول هاعمل تحاليل عشان اشوف المرض المسبب و انا سايبة الدم عمال ينزف؟



النقطة دي اكتر حاجةاستفزتني الصراحة في الموضوع

بس بوصل لسؤالك علي انة لية لحد دلوقتي متجاهلين الموضوع ولم يأخذ فية قرار حاسم، وبوصي بقا للي هي طالبة، تخيلي من يوم ما بداء الكلام علي الموضوع ده ولحد ما توقف كام واحد حصلها اغتصاب واجهضت..؟؟؟
تفتكر بقا الست الحجة لما تقعد تحل البلاوي دي وظروف الراجل الغلبان اللي اتبع مبداء الغاية تبرر الوسيلة، لحد ما يحلولو المشاكل دي كام واحدة هتغتصب وتجهض نفسها ( تحت بير السلم ).؟؟؟

حسبي الله ونعم الوكيل

كلاكيت تانى وتانى said...

والله تصدقى نفسى يا منمن ارجع للتدوين بس فين الوقت يابنيه
موضوعك مهم بس اللى بيغيظ انهم بيضيعوا وقت كبي فأقرار قوانين الناس نفسها عاملالها قوانين يعنى مفيش بنت هتسيب نفسها تحمل من مغتصب والاجهاض الان بقى كيميائى مش بعمليه يعنى حبيتين والقصة تخلص واعتقد الحبيتين دول مش محتاجين قانون ولا عيادات الاجهاض اللى ماليه البلد محتاجه قانون دة قار شخصى وفالحالتين سواء قررت الابقاء علية او اجهاضة محتاجين قوانين تمنع الاغتصاب مش نفكر فالاجهاض ونقعد شهور نسن قانون اهبل عبيط خاضع للحريه الشخصيه
وكم فيكى يا مصر من معجزات ومبكيات
تحياتى وشكرى
مبروك لمصر ولنا كلنا ياقمر ياللى مبترديش ع تلفوناتى خالص

Anonymous said...

اولا ازيك يا ايمان و كويس انك رجعتى تكتبى تانى
ثانبا .... الموضوع ده مهم جدا و كان منسى فعلا ... بفعل فاعل و عن قصد طبعا
و من غير ما اسطح الموضوع و سبب تجاهلة من الحكومة و مجلس الشعب هوه ان فى حاجات كتييييير اوى فى البلد و فى الحكومة غلط فى غلط بس مجبرين و مأمورين عليها .. فى اطار مخطط تبويظ و افساد و تدمير الشباب و انهم ينشغلوا بأى حاجة الا الحكومة و الرئاسه و الميزانية و اموال البنوك اللى ضاعت و الاراضى اللى بتتوزع هدايا لأثرياء العرب ب 50 جنيه الفدان و فلوس الخصخصة اللى اصلا مش مناسبة للحاجات اللى اتباعات و بردو اختفت و الدين العام اللى وصل 800 مليون دولار
هتقوليلى ده مالة و مال ده ..... هقولك ماحنا لو ركزنا فى ده و صلحناه هنصلح كل حاجة ... و الشباب هما المفروض ان شاء الله هما الامل ... لكن ازاى ... لازم المخطط الامريكى او الاسرائيلى او حتى العربى اى كان نوعة لازم ... يتنفذ و الناس تفضل مشغولة بحاجات تانية وبردوا متتحلش عشان يفضلوا مشغولين بيها

Kontiki said...

عجبتنى قوى كلمة "نسيج الامة الشريفة"
تحياتى لحين اقدر اكتب اى شىء

Unknown said...

فينك يا كوتيكى و فين بقية الكلام؟
انا مستنية بقى
:)

ازيك يا شيمو .. انا فعلا مش عايزة افتى فى القانون و كده .. بس انا مش فاهمة ايه اللى مخللى الخطوة الاخيرة دى متعطلة كل ده؟

Unknown said...

التدوين هو الاصل يا كلاكيت .. ده اللى انا اكتسفته
بصى
كون الناس تستفيد بيه او لا دى مش القضية اللى توقف القانون
لو كل قانون بيحمى حق حد ماتعملش عشان الحد ده مش هايطلب حقه , ماكانش بقى عندنا محاكم احوال شخصية و ستات بيرفعوا قضايا طلاق و خلع
انا عارفة ان اول واحدة هاتعملها مش هاتكون عادية ولا فى ظروف طبيعية
بس التغيير دايما كده
محتاج ناس مؤمنين بيه ايمان حقيقى مش شعارات يقولوها فى قعدات
و يوم التصرف يعملوا حاجة فعلا

Unknown said...

انونيماس
انا فاهمة قصدك طبعا
بس ده مش عذر ولا سبب اننا كأفراد مانحاولش
ده رأيى يعنى

Kontiki said...

ازيك يا منة
بحاول اكتب تانى ياريت تزورى هلوساتى قبل ما امسحها :)
اولا البوست بتاعك مهم من ناحية دراستة لقضية ممكن اى بنت تتعرضلها
اولا
دكتورة فلسفة وعقيدة ! اسمحيلى اذا كانت النقط دى هى اللى اتكلمت فيها فهى ابعد ما تكون عن دكتورة فلسفة وعقيدة
1. تصحيح الغلط بغلط لا يجوز لما تبقى الحالة خاصة بانسان فرد هو المسئول عن ذاته فقط مش فعلة ترتب علية خطأ فى حق انسان تانى و ترتب علية ان انسان تالت ممكن يتخلق ويبقى لقيط بقى او مشرد مش مشكلتنا اهم حاجة منصححش الغلط بغلط تانى !!!
طب من باب تخفيف الضرر بضرر اقل يا دكتورة العقيدة
الطفل لو اتولد مشرد وعاش فى الشارع وتحول لبلطجى دة كارثة ومش ممكن نلومة
ولا لمه نجهضة افضل
اى ضرر اخف ؟؟
دى اكيد واخدة دكتوراة مسلوقة الفلسفة بتنور العقل وتخلى الانسان عندة فكر متميز والعقيدة بتدعمة مش تخلط الامور وكمان تستشهد من السيرة بقضية زانية ! طيب المغتصبة مالها ومال الزانية !
ربنا مش حيرحمنا من جهلة المجلس ابدا
وبعدين اللى زينا هما اللى ممكن يكون عندهم وقت يقروا انما الاشكال بتاعه المناصب الرنانة عندها وقت للتليفزيون و الحوارات الفضائية واهى تعمل اى بلا بلا عشان تلفت النظر
نقطة بقى اية اللى خلى المغتصب يعمل كدة اة طبعا ما هى بلد الظلم لازم يتحول فيها الجانى لضحية ويتحمل الوزر المجنى علية !
جميل نسيج الامة الشرية
وجميل الخفا اللى بنموت يه
بصى
المنظومة لازم تكون كاملة
يعنى القانون يعاقب المغتصب ويتحط قانون عشان نراعى ابعادة النفسية واثبات مدى جرمه ومسئوليتة وحدة عن الفعل او ان كانت المغتصبة مسئولة عن الجرم زية لاتيانها بتصرفات ادت لارتكابة الجريمة دى
كلمة تصرفات دى بقى عاوزة تحليل وتعريف
يعنى فى اللى حيقولك تصرفات يعنى اللبس واوقات الخروج وغيرة
وطبعا احنا فى امة شريفة زى مانتى فاهمة ما فيهاش قذف محصنات ولا حاجة والناس مش بتفترى على بعض
ولو واحدة عندها صديق او زميل فى النور حيبقى عشيقها
وطبيعى نحب الخفا زى مانتى قلتى بالظبط
الحقيقة يا ايمان انا مش شايفة لازمة للقانون لان فى منظومة اخلاقيات كاملة منهارة
وفى ظلم
وفى افتراء
وفى مجتمع حقير
مش بينصف البنت فى اى حال ان لبست يعلقوا لو بشعرها حيتهموها بالفجور ولو اتكلفتت ومارست كل الرذائل فى الخفاء حتبقى خضرة الشريفة
حسبى الله ونعم الوكيل
عموما زى مانتى قلتى الخفا احنا بنموت فية
عشان كدة انتى كطبيبة اكيد عرفتى موضوع اغشية البكارة الصينى وازاى اتهربت
وغيرة ما يثبت ان مجتمعنا من احقر وازبل مجتمعات الكوكب وانعدمت فيه القيم وبقت الشرف و الفضيل الشكلية
هى سيد الموقف
فبقانون او بدون للاتزال الانثى سبب الفتنة و الرذيلة وليس لها حقوق

Unknown said...

فين هلوساتك يا بنتى
عايزة اقراها
ادينى لينك لو سمحتى

وحشونى
:)

Unknown said...

نرجع للكلام المهم اللى قلتيه:

طب من باب تخفيف الضرر بضرر اقل يا دكتورة العقيدة
الطفل لو اتولد مشرد وعاش فى الشارع وتحول لبلطجى دة كارثة ومش ممكن نلومة
ولا لمه نجهضة افضل
اى ضرر اخف ؟؟

ما ده اللى انا مش فاهمة ازاى فايتها .. فعلا مش عارفة ترتيب الافكار فى مخها ماشى ازاى

بصى يا ست الكل ... انا برضه مؤمنة ان احنا كستات لازم نكون جزء من التغير ده
و كل ما تحسى باليأس و الخنقة ... افتكرى اول قضية طلاق من كم سنة و اول قضية خلع
مين كان يصدق ان ده كان ممكن يحصل
فى تغيير بس بطىء
و على قد ما البطىء ده بيصيب الانسان بالاحباط ساعات على قد ما لازم نفضل مؤمنين بيه

و برضه مستنية الهلوسات

Kontiki said...

thanks
just click on my miserable icon name :) miss u around too
http://bleeed-kontiki.blogspot.com/
عندك حق التغيير لو بطىء قوى لازم نفضل مستنينة
انا بقى بطالب بتطبيق القانون الفرنسى اللى بيجرم الرجل اللى بيوعد البنت بالزواج و يتخلى عنها
والله لندخلهم كلهم السجن
:D

Rana.Asaad said...

momken te3mli twitter account

Unknown said...

انا موجودة يا رنا على تويتر باسمى و صورتى كمان
و مفروض انه متزود هنا فى المدونة بس التطبيق اللى انا مستخدماه بقاله فترة مش شغال
هاحاول ادور على تطبيق تانى

http://twitter.com/EmanHashim

Dr. Eyad Harfoush said...

وهذه هي من ينتظر أن تدرس الفلسفة في الجامعة؟؟

استفزني الكلام الخايب بتاع البطالة والرياضة والحواديت دي في الكلام حول جريمة اغتصاب، كم مرة سنقول لمثلها أن الانسان الطبيعي لا يغتصب فتاة بسبب كبت جنسي أو تأخر الزواج، المغتصب شخص مشوه نفسيا وعملية الاغتصاب وقسريتها هي ما يريد
تحياتي للتدوينة وكاتبتها

Unknown said...

للأسف دكتور اياد
فى ناس كتير بتربى اطفالها على انها فلتات بشرية فقط لكونه ولد ذكر
دون زرع حقيقى لقيمة الرجل الحقيقية
اى رجل هذا الذى ينتزع مثل هذه المتعة من امرأة دون رضاها الكامل بل و مشاركتها ايضا؟
اين الرجولة فى ذلك؟
و من قال ان الرجل كائن مسكين ضحية هرموناته و كأنه كائن لا حول له ولا قوة

كل ام و كل اب بيربى ابنه على ذلك هو شريك فى هذه الافكار و بالتالى فى كل جريمة اغتصاب و كل حالة تحرش تحدش هنا